San Mateo 15

Ñaꞌa ña kuyakua yuvi xiꞌin

1Ra saa ndixaa sava ndia maestro sañaꞌa ndiayu Ndioxi, xiꞌin ndia fariseo, ndia kee ñuu Jerusalén nuu íin Jesús, ra nindakatuꞌun ndia ra kachi ndia saa:

2―¿Nichuun xä toꞌo ndia itaꞌan xiꞌin kun costumbre ña ndakoo na xikuaꞌa, ña kaꞌan, ña xiꞌna ka xiniñuꞌu ndaꞌa yo, ra saa kuxi yo? ―kachi ndia xiꞌin Jesús.

3Ra saa ndakuiin ra kachi ra saa xiꞌin ndia:

―¿Nichuun xä toꞌo tu ndoꞌo ndiayu Ndioxi ña iyoo ndaꞌa ndo, ra iin ndakundiee va ndo ña ndikun ndo costumbre ña ndakoo na xii xikua ndo? 4Ra na kundaa ini ndo, chi suꞌva va ke kachi Ndioxi xaꞌndia ra chiñu te yachi: “Na sa toꞌo kun iva kun, xiꞌin siꞌi kun”, ra “Na kaꞌan ñàꞌa xiꞌin iva, a xiꞌin siꞌi, ra ^ndikun na kuvi va na kan”, ^kachi ña. 5Ndi su ndoꞌo ra siin va tu kachi ndo. Saa chi kaꞌan ndo ña kuvi va kaꞌan iin tiaa xiꞌin iva ra, a xiꞌin siꞌi ra, ña kachi ra saa: “Küvi chindiee taꞌan yu xiꞌin ndo, chi takundiꞌi ña xani ini yu chindiee taꞌan yu xiꞌin ndo, ra xa ta iyoo ña ndisoko yu nuu Ndioxi va iyoo ña”, kachi ra, saa ra xavaꞌa va, kachi ndo; 6ra ndia ndia ka na kaꞌan taꞌan tuꞌun yoꞌo, saa ra xiniñüꞌu ka vi ña chindiee taꞌan na kan xiꞌin iva na, a xiꞌin siꞌi na, kachi ndo. Ra suꞌva va ke xa ndo, ña sandiꞌi ndo xaꞌa ndiayu ña xaꞌndia Ndioxi ña ndakoo ra ndaꞌa ndo, ra ^ndakundikun ndo costumbre ña ^sandaku mii va ndo. 7Saa chi ¡na chiꞌña tuꞌun va kuvi ndoꞌo! Ra ña ndixa ni va ke ndikaꞌan Ndioxi xiꞌin ra Isaías ra ndikaꞌan tuꞌun yuꞌu ra xinaꞌa xaꞌa ndo, te ndikaꞌan ra, kachi ra suꞌva:

8Yuvi yoꞌo, ra takua iin tuꞌun ninu va ke kaꞌan na, ña kañuꞌu na yuꞌu,

saa chi nima na, ra xika ni va iyoo ña nuu yu.

9Ra ña uun va ke kaꞌan na ña kañuꞌu na yuꞌu,

saa chi süvi ichi yuꞌu ke sañaꞌa na yuvi,

chi ichi ña ndaku ini mii va na ke sañaꞌa taꞌan na, kachi Ndioxi xaꞌa ndo, ^kachi ña tiaa ra Isaías te yachi ―kachi Jesús xiꞌin ndia.

10Ra saa ndakana Jesús takundiꞌi yuvi kan, ra ndikaꞌan ra xiꞌin na kachi ra saa:

―Tiaa ni soꞌo ndo ña kaꞌan yu xiꞌin ndo yoꞌo, ra ndakiꞌin xini ndo xiꞌin ña: 11Takundiꞌi ñaꞌa ña xaxi na, a ña xixi na, ra xa yäkua ña kan na, chi tuꞌun ña kee yuꞌu va na ke kuyakua na xiꞌin ―kachi Jesús xiꞌin na.

12Saa ra kuyachin va ndia itaꞌan xiꞌin Jesús, ra ndikaꞌan ndia xiꞌin ra kachi ndia saa:

―Tata, ¿a kundaa ini kun ña väꞌa vi ndikuni ndia fariseo, te xini soꞌo ndia tuꞌun ña ndikaꞌan kun? ―kachi ndia xiꞌin ra. 13Ra saa ndakuiin Jesús kachi ra saa xiꞌin ndia:

―Takundiꞌi itun tu nindatäan Tata yu ra iyoo ndivi, ra kana ndiꞌi va nu kan, ra ndia tioꞌo va nu kee kana ―kachi ra. 14Ra saa ndikaꞌan ka Jesús xiꞌin ndia kachi ra saa:

―Ndäa ndo ña kuu vi ndia; saa chi na kuaa na niꞌi ichi nuu inka na kuaa va kuvi na, ra tu iin ra kuaa na kunuu ichi nuu inka ra kuaa, saa ra koyo uvi saa va ndia iin yavi ―kachi Jesús xiꞌin ndia itaꞌan xiꞌin ra.

15Ra saa ndikaꞌan ra Pedro xiꞌin Jesús kachi ra saa:

―Tata, ndatuꞌun xiꞌin ndi ra na kundaa ini ndi ni ke kuni kachi tuꞌun ndichi ña ndikaꞌan kun xiꞌin ndia fariseo ―kachi ra xiꞌin ra.

16Saa ndakuiin Jesús kachi ra saa xiꞌin ndia:

―¿Ra ndikundäa ini tu ndoꞌo va xiꞌin tuꞌun ña ndikaꞌan yu tu saa? 17¿A kundäa ini ndo, su takundiꞌi ñaꞌa ña xixi yo, a ña xaxi yo, ra chi ini siti va yo ke kuaꞌan ña, ra te ndiꞌi, saa ra kee ña kuaꞌan ña xitia va ña? 18Ndi su tuꞌun ña kee yuꞌu na, ña vaxi nima va na ke, kuyakua na xiꞌin. 19Saa chi nima va na ke kaku takundiꞌi ña väꞌa, ña vaxi xini na kuni na sa na, ña kuni na kaꞌni na ndìì, xiꞌin ña kutoo na koo kuaꞌa ni tani na, saa chi nii na siꞌi kuvi na xä toꞌo na yii na, ra nii tiaa kuvi ndia, ra xä toꞌo ndia yasiꞌi ndia, xiꞌin ña kutoo ni na sa na takundiꞌi nuu chiñu yakua xiꞌin taꞌan na, xiꞌin ña kuni na sakuiꞌna na, xiꞌin ña ndatuꞌun na tuꞌun chiꞌña xaꞌa taꞌan na, xiꞌin ña kañaꞌa kini na xiꞌin taꞌan na, 20ra takundiꞌi ña yoꞌo kuvi ña kuyakua yuvi xiꞌin, ndi su ña ndäꞌa na kuxi na, ra kuyäkua vi na xiꞌin ña kan ―kachi Jesús xiꞌin ndia.

Ndinuni ni ini iin ñaꞌá ña küu judío ^kandixa ña Jesús

21Ra saa kee Jesús ñuu kan, ra ndakiꞌin ra kuaꞌan ra chi ñuu Tiro xiꞌin ñuu Sidón va. 22Ra te ndixaa Jesús ñuu kan, ra ikan kanduꞌu iin ñaꞌá ña kuu ndiseꞌe na xindee iin ñuu ña xinani Canaán, ra saa ndixaa ña nuu Jesús, ra iin kokoꞌo ndaꞌyu ña kachi ña saa:

―¡Tata, Seꞌe xikua ra David, kundaꞌvi ini kuni yuꞌu ra chindiee taꞌan kun xiꞌin yu! Saa chi ña loꞌo seꞌe yu, ra tachi ndivaꞌa ke ndikaa ñaꞌa, ra ndiee ni xa ña xiꞌin ña ―kachi ña xiꞌin Jesús.

23Ndi su nindäa Jesús ña kuu yuꞌu vi ña. Ra saa kuyachin ndia itaꞌan xiꞌin ra, ra xakundaꞌvi ndia nuu ra kachi ndia saa:

―Tata, chindiee taꞌan xiꞌin ñaꞌa kaa, saa chi kaꞌan ni ña vaxi ña sata yo ―kachi ndia xiꞌin ra.

24Ra saa ndakuiin Jesús kachi ra saa:

―Takua na ñuu Israel va kuvi na tiꞌvi Ndioxi yuꞌu vaxi yu xaꞌa, saa chi ta iyoo ndikachi vali ri nindoñuꞌu va ke iyoo na ―*kachi ra.

25Ra saa kuyachin ñaꞌa kan, ra ndakusiti ña nuu Jesús, ra ndikaꞌan ña xiꞌin ra kachi ña saa:

―¡Tata, chindiee taꞌan xiꞌin yu! ―kachi ña. 26Saa ndakuiin Jesús kachi ra saa xiꞌin ña:

―Väꞌa kita ña, ña kindiaa yu ixta yuꞌu na kuachi, ra taxi yu ña ndaꞌa tina kuxi ri ―kachi ra xiꞌin ña.

27Saa ndakuiin ñaꞌa kan, kachi ña saa xiꞌin ra:

―Ña ndixa kuvi va ña kaꞌan kun, Tata, ndi su tina, ra ndia ikin vali ña koyo yuꞌu ixtoꞌo ri chi tixi mesa va ndakaya ri xixi ri ―kachi ña xiꞌin Jesús.

28Ra saa ndikaꞌan ra xiꞌin ña kachi ra saa:

―¡Tiaa ni ndinuni kandixa kun yuꞌu, Nana! Ra vaꞌa na koo ta kuꞌva kuni va kun ―kachi Jesús xiꞌin ña.

Saa ra ndikun mii hora kan ke nduvaꞌa ndixa va ña loꞌo seꞌe ña.

Sandaꞌa Jesús kuaꞌa ni na xíꞌi̱

29Ra saa ndakiꞌin Jesús kuaꞌan ra, ra ndixaa ra chi yuꞌu tiañuꞌu ra ndikaa chi Galilea, ra saa ndaa ra xini iin iku ndakunduꞌu ra. 30Ra kuaꞌa ka vi yuvi ndakaya tuku ndixaa nuu nduꞌu ra, ra ndiaka na, na nduchiꞌña küvi kaka, na kuaa, na miꞌmi, na lundu, na köo ndaꞌa, na köo xaꞌa, ra kuaꞌa ni ka va na xíꞌi̱ ndiaka na ndixaa na, chindee na nuu íin Jesús, ra sandaꞌa ra takundiꞌi va na. 31Ra te xini takundiꞌi yuvi kan ña kuu, saa ra ndakanda ka vi ini na, saa chi xini na, ndakaꞌan na miꞌmi, ra nduvaꞌa tu na lundu: na köo ndaꞌa, na köo xaꞌa va, ra vaꞌa ndakaka na küvi kaka, ra nduvaꞌa tu nuu na kuaa va. Ra saa xaꞌa yuvi kan ^ndasakaꞌnu ka vi na Ndioxi, ra nduꞌu ndivi, ra kuu Ndioxi na ñuu Israel.

Sakuxi Jesús kumi mil yuvi

32Saa ndakana Jesús ndia itaꞌan xiꞌin ra, ra ndikaꞌan ra xiꞌin ndia kachi ra saa:

―Kundaꞌvi ni ini yu xini yu yuvi yoꞌo, saa chi xa kii uni va ke ndee na xiꞌin yu yoꞌo vichin, ra köo mii ñaꞌa niꞌi na kuxi vi na. Ra küni yu ña saa koo na xiꞌin soko ndatiꞌvi yu na kunuꞌu na veꞌe na, chi koto kuaꞌan na ichi saa kundiëe na, ra kuñaa nuu na ―kachi Jesús xiꞌin ndia itaꞌan xiꞌin ra.

33Ra saa ndakuiin ndia itaꞌan xiꞌin ra kachi ndia saa:

―Tata, ¿ndia mii kuꞌun kiꞌin ni yo ñaꞌa sakuxi yo yuvi yoꞌo, ra tiaa ni kuaꞌa kuvi na? Ra iku yuu nuu köo yuvi va kuvi ña yoꞌo ―kachi ndia xiꞌin ra.

34Ra saa nindakatuꞌun Jesús ndia kachi ra saa:

―¿Nisaa ku ixta niꞌi ndo? ―kachi ra xiꞌin ndia.

Ra saa ndakuiin ndia kachi ndia saa xiꞌin ra:

―Takua uxa va ku ixta niꞌi ndi, xiꞌin iin tiꞌvi loꞌo tiaka vali va, Tata ―kachi ndia xiꞌin Jesús.

35Ra saa xaꞌndia ra chiñu, ña na ndakundee takundiꞌi yuvi kan, nuu ñuꞌú, 36Saa kiꞌin ra uxa saa ixta kan, xiꞌin iin tiꞌvi loꞌo tiaka kan, ra ndataxi ra tixaꞌvi ndaꞌa Ndioxi xaꞌa ña, ra te ndiꞌi saa taꞌvi ra ña, ra taxi ra ña ndaꞌa ndia itaꞌan xiꞌin ra, ra ndia itaꞌan xiꞌin ra ndataꞌvi ña xiꞌin yuvi kan va. 37Ra xixi takundiꞌi va na ndiakua nditiandiaa ini na. Ra nindoo ndoso kuaꞌa ka va ña, chi uxa ka vi tuká naꞌnu sakutu ndia xiꞌin ñaꞌñu ña nindoo ndoso kan. 38Ra takundiꞌi yuvi na xixi xa Jesús, ra kuꞌva kumi mil kuvi niña tiaa va, ra ndiäꞌvi vi na siꞌi, xiꞌin na kuachi vali. 39Ra te ndiꞌi, saa nindiayu taꞌan Jesús xiꞌin yuvi kan, ra saa nandaa ra ini iin itun loꞌo tu xika nuu tiañuꞌu, ra ndakiꞌin ra kuaꞌan ra chi ñuu ña nani Magdala va.

Pilihan Saat Ini:

San Mateo 15: mxvNT

Sorotan

Berbagi

Salin