Лука 12
12
Глава 12
Олэкэндук тогэмкэчин
1Тарма, ок-ка тыкичэл бэил чакабтитан, эсөми мэр доливур кадатматтыл, Иисус дюлэгэч мэн хупкуттыӈэлтэкий төрэдилрин:
– Фарисеил дюирэӈкэдитэн ӈэлгэрэлрэ, тарак ноӈартан олэкэнтэн. 2Як-та дяючин ачча, эты аӈабта, як-та хумэчин ачча, харитан эты од. 3Теми, яв-ка ху химӈэнду гөндис, тарак ӈэринду долдабдин; тарбач яв-ка дю додун коритла гөндис, тарав дю ойлэн төрэдир. 4Хунтэки гөнэм, Мэн дялтакий, эдилрэ ӈэлкилрэ бэю марилбу, тадук часки яв-да некэннэвур туркутылбу. 5Тарбач хунтэки гөндим ӈив-дэ ӈэлгэрэдэсэн: таралбу ӈэлгэрэлрэ, ӈи мариди, тадук-нян төр долан бисилэ дурила улэннэ бигрэдин. Айдит хунтэки гөнэм, таралбу ӈэлгэрэлрэ. 6Эв тунӈан чукачар эсни дӫр мэӈэн эритэн бис? Тарбач Хэвки ноӈарбутан ирэв-дэ эч омӈар. 7Хун дылласан чэлэн нюритэсэн таӈуттан. Эдилрэ ӈэлкилрэ! Хун эрисэн чукачар эридукутэн эгдедьмэр.
Иисус Христос бэилтэки төрэнни
8Би хунтэки гөнэм, ӈи Мину бэилбу дэпки хаградин, Бэй Хутэн Оча Хэвки ангелалбан дэпки тарав хаградин, 9ӈи-ккэ бэилбу дэпки Мину этэн хамалра, Бэй Хутэн Оча Хэвки ангелалбан дэпки этэн хамалра. 10Ӈи Бэй Хутэн Очав дэпки төрэм гөндин, тарак хэлэврэгдин; ӈи-ккэ нян Хиргэбэм Хирам чукалдаградин, тарак этэн хэлэврэ. 11Ок-ка нэӈэдекэлдулэ дюлдула хуну ӈэнукэндир, эмэкэн хеврэ, яв-да гөннэвур, он-да мэнур дысуччиннэвур. 12Хиргэбэн Хиран хуну хупкудин, яв-да тарла часла гөннэвусэн.
Ач мэргэнэ эӈэев бэю тэлэӈ
13Бэил додукутан өмэн бэй Иисустэки гөнин:
– Хупкучимӈэ, гөли мин акантакиву, миннюн ханим абдув боритматтан.
14Тарбач Ноӈан тартаки бэйтэки барагрин:
– Ӈи-нян хун итучимӈасан бидэку мину овканин, хуну бөритмачукандаку?
15Тарбач нян Ноӈан чэлэн эйдуткин гөнин:
– Коеткэрэлрэ, чэлкин бидэвур ӈэлгэрэлрэ, бэй инин эсни эӈэедин-тэкэн айлатта, тарак хоя-да бисикэн.
16Иисус ноӈартакитан өмэм тэлэӈу тэлэӈрин:
– Өмэн эӈэе бэй хевкэчидеклэн эгден хоя-да бурдук нӫчэӈэн исурин. 17«Яв-нян некрэку ай бидин? – ноӈан мэни улгимирин. – Яла-нян исувкэнчэй, чакриди, нэдим?» 18Нян эчин гөнин: «Гэ, эчин нектэку: нэкурби кавакчим, эдук эгдербу-нян одим, нян тала эйдувэн бурдук нӫчэвэн дювутчим, эйду абдуй нэдим. 19Нян мэнтэкий гөндим: „Тек-кэл хин эӈэес хоя нэкуттэн, адыла-да анӈанна дес бидин: дэрэмкэтли, дебли, колли, өрэлдэли“». 20Тарбач Хэвки ноӈантакин гөнин: «Ач мэргэнэ! Эрэв-уттэ долбану хин инивус гадир. Чакаччавус-нян ӈи гаградин?» 21Тачин тарнюн бивэттэн, ӈи мэндыткэн эӈэебэддёттэн, эникэн Хэвкитки эӈэебэддэ.
Няниндула бисич Амандит эечин, тэрукэчинмэй-дэ
22Нян хупкуттыӈэлтэкий гөнин:
– Теми хунтэки гөнэм, эдилрэ тарит-такан хеврэ, яв-да дебэннэвур индэвур, яв-да ойлаттавур, 23бини деплэдук эгдедьмэр, булгис-та ойдук эгдедьмэр. 24Туралкилбу коетлилрэ: яв-да эстэн исувкэттэ, тадук яв-да эстэн хуссотта, нэкуртэн-дэ ачча, амбаралтан-да ачча, тарбач Хэвки ноӈарбутан улиттэн. Яч-нян ху дэгилдук аидьмарал бисэс? 25Ӈи хундук манрутми-да иний өмэнь-дэ ечэнь исувкэндин? 26Тарбач, тарав-да кучукэм некӈэ туркутми, яӈгавур хөнтэв манручис? 27Коетлилрэ, он-да нёчэл, лилияч гэрбуттыл, исувэттэ: эстэн-дэ гургэвчир, эстэн-дэ томкар. Тарбач хунтэки гөнэм, Соломон-да-титта мэн хэррилэй, экич-тэ нодач оич тэтутми, ноӈан-да эчикэн нодач оич эрэлгэчин эч тэтуттэ. 28Тарбач авландула орату, эрэв инэӈу исурив, тимин-нян тогла дуруннэв, Хэвки эчин ханилачивканни, хуну-вул эдук нодадьмарач ханилачивкандин, хуну, абалач тэдеттылбу! 29Эдилрэ мэнур улгимигрэр, яв-да дебэннэвур, яв-да коланнавур, эдилрэ тарав-такан хеврэ. 30Эрэв чэлэн төр бэилни гэлэттэ, Хун-нян Амансан мэнкэн хан, эрэв надаривусан. 31Өмэм-тэкэн хевгэрэлрэ – Хэвки Тэгэмээрэдеккон, таракам эйду хунду бөгрэбдин. 32Эди ӈэлкил, кучукэн хада! Хун Амансан хунду Тэгэмэрэдеккэсэн бөдэй некрэн. 33Ханимур абдувур унивкэлрэ, дӫгрилбу бэлгэрэлрэ, хэрукэлгэвур этылбу манур дякутлилра, нэкчилрэ, эӈэелгэгэвур чакатлилра няниндула этыв манур, магдили-далу этэн дептэ, дёрмин-да этэн дагамра. 34Илэ-ккэ эӈэесэн бигрэдин, тала-тта мявунсан-да бигрэдин.
Эты хуклэр бэлтэлкэн
35Эрэглэ дякутич бигрэлрэ: тэтысэн-да эрэгэр калбалкан бигрэдэн, нейкэлсэн-дэ дургэрэдэтэн. 36Ӈи куптудяктук хунӈий алачиддӫтан уркэв аӈаградай, мучуми тарак коӈкэлрэкэн, тарак урэчин бидэвур манруткаралра. 37Ӈив, хунӈитан мучуми, этылбу хуклэр баккотан, тарал бэлтэлкэр нисэлкэсэр бис. Айдиту хунтэки гөнэм, ноӈан мэнкэн калбаладин, тоинэку тэвдин, дебдэтэн-дэ тэгукэндин. 38Окта-вул мучуми, долба-гу, ӈэрилэстилрэкэн-гу, ноӈан ноӈарбутан этылбу хуклэр бакчин, тарал бэлтэлкэр нисэлкэсэр бис. 39Ху хас, дю хунӈин, хами адыла-да часла дёрмин эмэннэвэн, таракам эмчи хуклэр, эмчи-дэ мэн дюги хэрдэлин улуврэ. 40Ху-дэ кимутчал бигрэлрэ, Бэй Хутэн Оча этилэсэн алатта часла эмгэрэдин.
Ирэк нян кэлмэ эевӈи?
41Таракам Ноӈантакин Пётр гөнин:
– Хунӈиӈат, Хи эрэв тэлэӈу мунтэки тэлэӈэнри, эв эйдуткин-гу?
42Тарбач Хунӈит гөнин:
– Ӈи-ккэ тарак эевӈи, хавай-да дюгуртэмӈэ, ирэв тарак хунӈин кэлмэлби ойдэлин бэгэнтэн бидэн овканин, некэбэннэл-дэ часла деплэв бөткэрэдэн тэврин, тарак эевӈи, хавай-да дюгуртэмӈэ урэчин бидэвур манруткаралра. 43Ирэв бэлтэлкэв хунӈин мучуми гургэвчиддыв бакчин, тарак нисэлкэн бигрэдин. 44Айдиту хунтэки гөнэм, эйдувэн эӈэей дюгуртэмӈэн бидэн тарав овкандин. 45Тарбач тарак-нян бэлтэлкэн мэндэччи гөнэкэн: «Амрак хунӈиву этэн эмрэ», нян эйдувэн кэлмэлбу кусидилдин, дебэдилдин, коладилдин, бянадилдин-да, 46нян тарак бэлтэлкэн хунӈин этилэн алаттылан инэӈнэ мучудин, эмэннэвэн этилэн хар часла, тарбач тарав бэлтэлкэм кусидин, хөнтэлтэки ач долданалтаки хөрдэн эрэсчин. 47Тарак-нян бэлтэлкэн, мэн хунӈий касагчиман хари, тарбач тарав касагчим ханикан хунӈин гончэгчинни эты некөттэ, энтэкэе тарак кусивгэрэдин. 48Хөнтэ-нян бэлтэлкэн таррөчим касагчим эти хар, нян этилий-дэ тарав некрэ, абалач-та кусивдин. Ӈи-ккэ хояв некэннэн, тарав хоятта некчэвэн улгэмдир, нян ӈич-кэ энтэкэеч эеттэ, тарав унэт эгдедьмэрэч улгэмдир.
Тог, дэлкэн-дэ
49Би тогу төрлэ дурулукэндэй эмрив, тарбач тарак укал дурулэннэвэн алаттам! 50Би хөнтэч Мэни хэвкигэннэв, тарбач экичич маӈчир тарав нектэй алаттам. 51Эв ху гэрбэчис, аймулдам төрлэ бөдэй Мин эмчэдив? Эсни! Би гөнэм, дэлкэчэку эмурив. 52Тек-кэл эдук өмэндулэ дюла тунӈан бисил бэкэлтэбдир: илан дӫрбу дэпки одир, нян дӫр илам дэпки бидир. 53Аман няруди дэпки бигрэдин, нян нярудь амми дэпки оградин, энин хунади дэпки, хунадь эньми дэпки, атки кокми дэпки, көкэн аткий дэпки.
54Иисус бэилтэки нян гөнин:
– Ок-ка ху нӫлтэн тыкэнмэйлэн тогэчим итчёчис, ху гөвэчис: «Удан удалдин», тачин нян бивэттэн. 55Нян нямгида хунӈэ хунӈэрэкэн, ху гөвэчис: «Хокчилдин», тачин нян бивэттэн. 56Олэкэл! Төртэки, нянинтаки коетми, иррөчин-да инэӈ биннэвэн хамалкарисан, нян иррөчил инэӈэл тек очавутан эсэс унур? 57Ями-си ху мэркэсэл мэрур эсэс хар, он-да биннэвэн? 58Ок-ка хи баргакнюми бэгэсэлтэки ӈэнэнри, тарбач укал хотарандули ӈэнэдьми, тарнюн аймулдадай манрутӈанри, эдэн ноӈан хину итучимӈатки ӈэнукэн, нян итучимӈа хину эдэн хилгачимӈаду бөр, нян тарак хилгачимӈа хину хинючакла эдэн тэгукэн. 59Айдиту хинтэки гөнэм, тадук этэнри нёр, тамам манукан эми бөр.
Pilihan Saat Ini:
Лука 12: eve
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X
