مَتَّى 21
21
عِيسَى دخل مدينة القدس
1وَ عِيسَى وَ تَلَامِيذَهْ قَرَّبَوْا لِمَدِينَةْ الْقُدُسْ وَ لِحْقَوْا حِلَّةْ بَيْت فَاجِي فِي جَبَلْ الزَّيْتُونْ. وَ عِيسَى رَسَّلْ قِدَّامَهْ إِتْنَيْن مِنْ تَلَامِيذَهْ 2وَ قَالْ لَيْهُمْ: «أَمْشُوا فِي الْحِلَّةْ الْقِدَّامْكُو دِي وَ وَكِتْ وِصِلْتُوا، تَلْقَوْا حُمَارَةْ مَرْبُوطَةْ بِدَحَشْهَا. حِلُّوهُمْ وَ جِيبُوهُمْ لَيِّ هِنِي. 3وَ كَنْ نَادُمْ يُقُولْ لَيْكُو كَلَامْ، قُولُوا لَيَّهْ: ‹الرَّبّ يِدَوْرهُمْ.› وَ بَيْدَا، يِخَلُّوهُمْ يَجُوا عَجَلَةْ.»
4وَ بِقِي مِثِلْ دَا أَشَانْ كَلَامْ اللّٰهْ الْقَالَهْ النَّبِي يِتِمّ. النَّبِي قَالْ:
5<قُولُوا لِنَاسْ جَبَلْ صَهْيُون الْمِثِلْ بِنَيَّةْ:
«دَاهُو مَلِكُّو جَايِ لَيْكُو.
وَ هُو مِسْكِينْ وَ رَاكِبْ فِي حُمَارْ.
أَيْوَى، هُو رَاكِبْ فِي دَحَشْ وِلَيْد حُمَارَةْ.»>#21:5 الكلام دا تلقوه في زَكَرِيَّا 9:9.
6وَ التَّلَامِيذ الْإِتْنَيْن سَوَّوْا مِثِلْ عِيسَى قَالَهْ لَيْهُمْ. 7وَ جَابَوْا الْحُمَارَةْ بِدَحَشْهَا وَ شَالَوْا خُلْقَانْهُمْ وَ فَرَّشَوْهُمْ فِي الْحُمَارَةْ وَ فِي الدَّحَشْ وَ عِيسَى رِكِبْ. 8وَ نَاسْ كَتِيرِينْ مَرَّةْ وَاحِدْ لَمَّوْا وَ فَرَّشَوْا خُلْقَانْهُمْ فِي الدَّرِبْ. وَ نَاسْ آخَرِينْ قَطَعَوْا فُرُوعْ الشَّدَرْ وَ فَرَّشَوْهُمْ فِي الدَّرِبْ. 9وَ نَاسْ كَتِيرِينْ جَايِينْ مَعَ عِيسَى قِدَّامَهْ وَ وَرَايَهْ وَ كُلُّهُمْ قَاعِدِينْ يَشْكُرُوا بِحِسّ عَالِي وَ يُقُولُوا:
«الْمَجْد لِإِبْن دَاوُدْ!
<مَبْرُوكْ لِلنَّادُمْ الْجَايِ بِأُسُمْ اللّٰهْ!>#21:9 الكلام دا تلقوه في زَبُور 118:26.
<أَحْمُدُوا اللّٰهْ فِي الْعَالِي!>»#21:9 الكلام دا تلقوه في زَبُور 148:1.
10وَ وَكِتْ عِيسَى دَخَلْ فِي مَدِينَةْ الْقُدُسْ كُلَّ نَاسْ الْمَدِينَةْ حَرَّكَوْا وَ أَسَّاءَلَوْا أَمْبَيْنَاتْهُمْ وَ قَالَوْا: «النَّادُمْ دَا يَاتُو؟» 11وَ النَّاسْ الْجَايِينْ مَعَ عِيسَى رَدَّوْا لَيْهُمْ وَ قَالَوْا: «دَا عِيسَى النَّبِي مِنْ حِلَّةْ النَّاصِرَةْ فِي دَارْ الْجَلِيلْ.»
المسيح في بيت اللّه
12وَ عِيسَى دَخَلْ فِي بَيْت اللّٰهْ وَ طَرَدَاهُمْ لِكُلَّ النَّاسْ الْقَاعِدِينْ يِسَاوُقُوا فِي الْفَضَايْ. وَ شَقْلَبْ كُلَّ طَرَابِيزْ النَّاسْ الْيِبَدُّلُوا قُرُسْ وَ كُلَّ بَنَابِرْ النَّاسْ الْيِسَاوُقُوا حَمَامْ. 13وَ عِيسَى قَالْ لَيْهُمْ: «فِي الْكِتَابْ، اللّٰهْ قَالْ: <بَيْتِي يِسَمُّوهْ بَيْت الصَّلَاةْ>#21:13 الكلام دا تلقوه في إشَعْيا 56:7. وَ لَاكِنْ إِنْتُو <سَوَّيْتُوهْ بَيْت السَّرَارِيقْ.>»#21:13 الكلام دا تلقوه في إرْمِيا 7:11.
14وَ وَكِتْ عِيسَى قَاعِدْ فِي بَيْت اللّٰهْ، الْعَمْيَانِينْ وَ الْمَعْضُورِينْ جَوْا لَيَّهْ وَ هُو دَاوَاهُمْ. 15وَ كُبَارَاتْ رُجَالْ الدِّينْ وَ الْعُلَمَاءْ شَافَوْا الْعَجَايِبْ الْعِيسَى قَاعِدْ يِسَوِّيهُمْ وَ سِمْعَوْا فِي بَيْت اللّٰهْ حِسّ الْعِيَالْ الْيَشْكُرُوا بِحِسّ عَالِي وَ يُقُولُوا: «الْمَجْد لِإِبْن دَاوُدْ!» وَ الْكُبَارَاتْ زِعِلَوْا. 16وَ سَأَلَوْا عِيسَى وَ قَالَوْا: «مَا سِمِعْت كَلَامْهُمْ وَلَّا؟» وَ عِيسَى رَدَّ لَيْهُمْ وَ قَالْ: «أَيْوَى، سِمِعْت كَلَامْهُمْ. وَ تَعَرْفُوا كَدَرْ الْكِتَابْ بُقُولْ: <إِنْتَ سَوَّيْت الْأَطْفَالْ وَ الْعِيَالْ الْبَرْضَعَوْا كُلَ يِمَجُّدُوكْ.>»#21:16 الكلام دا تلقوه في زَبُور 8:2.
17وَ خَلَاصْ مَرَقْ خَلَّاهُمْ. وَ مَرَقْ مِنْ الْمَدِينَةْ وَ مَشَى فِي حِلَّةْ بَيْت عَنْيَا وَ رَقَدْ هِنَاكْ.
شدرة التين اللعنها المسيح
18وَ بِفَجُرْ، عِيسَى قَمَّ جَايِ فِي الْمَدِينَةْ. وَ هُو جِيعَانْ. 19وَ شَافْ شَدَرَةْ تِينْ#21:19 تِينْ: التين هو شدرة البيها الأنبياء مثّلوا بني إسرائيل. جَنْب الدَّرِبْ. وَ مَشَى لَيْهَا وَ لَاكِنْ مَا لِقِي عِيَالْ فِيهَا إِلَّا الْوَرْشَالْ. وَ عِيسَى قَالْ لِلشَّدَرَةْ دِي: «بَتَّانْ مَا تَلْدَيْ عِيَالْ مَرَّةْ وَاحِدْ.» وَ عَجَلَةْ كَيْ الشَّدَرَةْ يِبْسَتْ.
20وَ التَّلَامِيذ شَافَوْهَا وَ أَلْعَجَّبَوْا مَرَّةْ وَاحِدْ وَ قَالَوْا: «الشَّدَرَةْ يِبْسَتْ عَجَلَةْ!» 21وَ عِيسَى رَدَّ لَيْهُمْ وَ قَالْ: «نُقُولْ لَيْكُو الْحَقّ، كَنْ آمَنْتُوا وَ مَا تِشَكُّكُوا، إِنْتُو مَا تِسَوُّوا بَسْ مِثِلْ أَنَا سَوَّيْت لِلشَّدَرَةْ دِي. كَنْ قُلْتُوا لِلْجَبَلْ دَا: ‹أَمْرُقْ مِنْ هِنِي وَ أَقَعْ فِي الْبَحَرْ›، خَلَاصْ يَبْقَى مِثِلْ كَلَامْكُو. 22وَ كَنْ عِنْدُكُو إِيمَانْ، كُلَّ شَيّءْ التَّسْأَلَوْه فِي دُعَا، اللّٰهْ يَنْطِيكُو.»
المسيح سألوه ياتو الأنْطاه إذِن
23وَ وَكِتْ عِيسَى دَخَلْ بَيْت اللّٰهْ، بَدَا يِعَلِّمْ النَّاسْ. وَ كُبَارَاتْ رُجَالْ الدِّينْ وَ الشُّيُوخْ جَوْا لَيَّهْ وَ سَأَلَوْه وَ قَالَوْا: «تِسَوِّي الْخِدْمَةْ دِي بِإِذِنْ يَاتُو؟ وَ يَاتُو الْأَنْطَاكْ الْإِذِنْ دَا؟» 24وَ عِيسَى رَدَّ لَيْهُمْ وَ قَالْ: «أَنَا كُلَ عِنْدِي سُؤَالْ نَسْأَلْكُو. كَنْ إِنْتُو تُرُدُّوا لَيِّ، أَنَا نُقُولْ لَيْكُو يَاتُو أَنْطَانِي الْإِذِنْ أَشَانْ نِسَوِّي الْخِدْمَةْ دِي. 25يَحْيَى غَطَّسْ النَّاسْ بِإِذِنْ يَاتُو؟ عِنْدَهْ إِذِنْ مِنْ اللّٰهْ وَلَّا مِنْ النَّاسْ بَسْ؟»
وَ أَشَّاوَرَوْا أَمْبَيْنَاتْهُمْ وَ قَالَوْا: «كَنْ نُقُولُوا: ‹يَحْيَى عِنْدَهْ إِذِنْ مِنْ اللّٰهْ›، أَكِيدْ عِيسَى يُقُولْ لَيْنَا: ‹مَالَا مَا آمَنْتُوا بَيَّهْ؟› 26وَ كَنْ نُقُولُوا: ‹يَحْيَى عِنْدَهْ إِذِنْ مِنْ النَّاسْ بَسْ›، أَنِحْنَ نَخَافَوْا مِنْ كُلَّ الشَّعَبْ. أَشَانْ فِي فِكِرْهُمْ كُلُّهُمْ، يَحْيَى هُو نَبِي.»
27وَ رَدَّوْا لِعِيسَى وَ قَالَوْا: «دَا مَا نَعَرْفُوهْ.» وَ عِيسَى رَدَّ لَيْهُمْ وَ قَالْ: «خَلَاصْ، أَنَا كُلَ مَا نِأَوْرِيكُو يَاتُو الْأَنْطَانِي إِذِنْ أَشَانْ نِسَوِّي الشَّيّءْ دَا.»
مَثَل الأوْلاد الإتْنَيْن
28عِيسَى قَالْ بَتَّانْ: «شُنُو فِكِرْكُو فِي النَّادُمْ دَا؟ هُو عِنْدَهْ أَوْلَادْ إِتْنَيْن. وَ مَشَى لِلْكَبِيرْ وَ قَالْ: ‹وِلَيْدِي، أَمْشِي أَخْدِمْ الْيَوْم فِي جِنَيْنِتِي.› 29وَ الْوِلَيْد قَالْ: ‹لَا، مَا نَمْشِي.› وَ لَاكِنْ بَعَدَيْن الْوِلَيْد نِدِمْ لِلْكَلَامْ الْقَالَهْ وَ مَشَى وَ خَدَمْ فِي الْجِنَيْنَةْ. 30وَ الرَّاجِلْ مَشَى لِوِلَيْدَهْ الصَّغَيَّرْ وَ قَالْ لَيَّهْ نَفْس الشَّيّءْ. وَ الصَّغَيَّرْ قَالْ: ‹أَيْوَى، سَيِّدْنَا، نَمْشِي.› وَ لَاكِنْ مَا مَشَى.
31«مِنْ الْإِتْنَيْن دَوْل يَاتُو سَوَّى الشَّيّءْ الْأَبُوهُمْ يِدَوْرَهْ؟» وَ الْكُبَارَاتْ قَالَوْا: «الْأَوَّلْ.» وَ عِيسَى قَالْ لَيْهُمْ: «وَ نُقُولْ لَيْكُو الْحَقّ، نَاسْ الْيِشِيلُوا مِيرِي وَ الشَّرَامِيطْ يِنْدَسَّوْا فِي مَمْلَكَةْ اللّٰهْ قِدَّامْكُو. 32يَحْيَى جَاءْ لَيْكُو وَ وَصَّفَاكُو دَرِبْ الْعَدَالَةْ وَ إِنْتُو مَا صَدَّقْتُوا كَلَامَهْ. لَاكِنْ نَاسْ الْيِشِيلُوا مِيرِي وَ الشَّرَامِيطْ صَدَّقَوْه. وَ وَكِتْ شِفْتُوهُمْ تَابَوْا مِنْ ذُنُوبْهُمْ، إِنْتُو مَا غَيَّرْتُوا فِكِرْكُو الْأَوَّلْ. وَ مَا تُبْتُوا وَ مَا صَدَّقْتُوا كَلَامَهْ.
مَثَل الحرّاتين الفسْلين
33«أَسْمَعَوْا، نُقُولْ لَيْكُو مَثَلْ آخَرْ. نَادُمْ وَاحِدْ سِيدْ الْمَالْ مَقَّنْ عِنَبْ فِي جِنَيْنَةْ وَ زَرَبَاهَا وَ سَوَّى فَوْقهَا عَصَّارَةْ هَنَا عِنَبْ وَ بَنَى بَيْت هَنَا حَرَاسَةْ. وَ هُو أَجَّرْ حَرَّاتِينْ أَشَانْ يَخْدُمُوا فَوْقهَا وَ خَلَاصْ خَطَرْ وَ مَشَى فِي بَلَدْ آخَرَةْ. 34وَكِتْ لَمِّينْ الْعِنَبْ قَرَّبْ، هُو رَسَّلْ عَبِيدَهْ لِلْحَرَّاتِينْ أَشَانْ يِشِيلُوا الْعِنَبْ الْوَاجِبْ لَيَّهْ. 35وَ الْحَرَّاتِينْ كَرَبَوْا عَبِيدَهْ وَ الْوَاحِدْ دَقَّوْه وَ الْآخَرْ كَتَلَوْه وَ آخَرْ بَتَّانْ، رَجَمَوْه. 36وَ بَعَدَيْن سِيدْ الْجِنَيْنَةْ رَسَّلْ عَبِيدْ آخَرِينْ، زِيَادَةْ مِنْ الْأَوَّلْ. وَ الْحَرَّاتِينْ سَوَّوْا لَيْهُمْ نَفْس الشَّيّءْ السَّوَّوْه لِلنَّاسْ الْجَوْا أَوَّلْ.
37«وَ خَلَاصْ، رَسَّلْ لَيْهُمْ وِلَيْدَهْ وَ قَالْ: ‹أَكِيدْ يِكَرُّمُوا وِلَيْدِي.› 38وَ لَاكِنْ الْحَرَّاتِينْ شَافَوْا وِلَيْد سَيِّدْهُمْ وَ قَالَوْا أَمْبَيْنَاتْهُمْ: ‹دَا بَسْ الْوَرِيثْ. خَلِّي نَكْتُلُوهْ وَ نِشِيلُوا وَرَثَتَهْ.› 39وَ خَلَاصْ كَرَبَوْه وَ مَرَقَوْه بَرَّا مِنْ الْجِنَيْنَةْ وَ كَتَلَوْه. 40وَ وَكِتْ سِيدْ الْجِنَيْنَةْ يِقَبِّلْ مِنْ السَّفَرْ وَ يَجِي لِلْحَرَّاتِينْ دَوْل، هُو يِسَوِّي لَيْهُمْ شُنُو؟»
41وَ النَّاسْ رَدَّوْا لَيَّهْ وَ قَالَوْا: «أَكِيدْ يَكْتُلْهُمْ لِلنَّاسْ الْفَسْلِينْ دَوْل. وَ يِجِيبْ فِي الْجِنَيْنَةْ حَرَّاتِينْ آخَرِينْ الْيَنْطُوهْ الْعِنَبْ فِي الْوَكِتْ الْوَاجِبْ.» 42وَ عِيسَى قَالْ لَيْهُمْ: «أَكِيدْ قَرَيْتُوا الْكَلَامْ الْمَكْتُوبْ فِي الْكِتَابْ الْيُقُولْ:
<الْحَجَرْ الْبَنَّايِينْ الْبَيْت أَوَّلْ مَا دَوَّرَوْه
بِقِي الْحَجَرْ الْمُهِمّ فِي بُنَى الْبَيْت.
وَ الشَّيّءْ دَا جَايِ مِنْ اللّٰهْ
وَ شِفْنَاهْ عَجِيبْ!>#21:42 الكلام دا تلقوه في زَبُور 118:22-23.
43«وَ أَشَانْ دَا، نُقُولْ لَيْكُو اللّٰهْ يِشِيلْ مَمْلَكَتَهْ مِنْكُو وَ يَنْطِيهَا لِلْأُمَّةْ التِّجِيبْ لَيَّهْ فَايْدَةْ. 44وَ أَيِّ نَادُمْ الْيَقَعْ فَوْق الْحَجَرْ دَا، يِنْكَسِرْ مَرَّةْ وَاحِدْ. وَ كَنْ الْحَجَرْ دَا يَقَعْ فَوْقَهْ نَادُمْ، يَرْحَكَهْ مَرَّةْ وَاحِدْ.»
45وَ كُبَارَاتْ رُجَالْ الدِّينْ وَ الْفَرِيزِيِّينْ سِمْعَوْا أَمْثَالْ عِيسَى وَ عِرْفَوْا كَدَرْ عِيسَى قَاعِدْ يِكَلِّمْ فَوْقهُمْ. 46وَ فَتَّشَوْا فُرْصَةْ أَشَانْ يَكُرْبُوهْ فِي السِّجِنْ لَاكِنْ هُمَّنْ خَايْفِينْ مِنْ النَّاسْ أَشَانْ فِي فِكِرْ النَّاسْ عِيسَى هُو نَبِي.
Արդեն Ընտրված.
مَتَّى 21: ع.د.ت19
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
La Bible en arabe tchadien © Alliance biblique du Tchad, 2019