Matɨyo 9
9
Jesu poɗɨ ungo gɨ mɨray
(Marg 2:1-12; Lug 5:17-25)
1Jesu nay boy koburo gɨ gumu gɨŋ, haɗɨn̰ kuray gɨ gumu taa taa bɨ jogɨn̰ a cay ƴaadi di Kapɛrnɔm. 2Bɨ ga ma, kalaŋ ga pɨna wo̰, ɨrgan̰ge dan̰ ba-mɨraye gɨ pɨna wo̰, gɨ dɨbiige a cay gasɨlaŋ-jala gaŋ. Kɨɗɨn̰ ga Jesu sol aye kudurɔ koge na, yen̰ ba-mɨraye le hɨn̰: «Kuronɨ, haya kuduron̰, ɨsɨnan̰əŋ kan̰ duroŋ can̰ coŋ ɨni.» 3Bɨ ga ma, ka-gɨlɨn̰ kalaŋ gasɨn̰-kɔl gɨ da Moyis ga pɨna wo̰, yege kuduroyge yege hɨn̰: «Gɨlmi gɨ kɛ le yagɨde na Kumu!» 4Jesu sol ɨrɨme koge lee gɨ ban yege hɨn̰: «Na kɨya wa ma magɨŋ ɨrɨm ɨrɨme gɨ ɨsɨni a kuduroygɨŋ ga? 5Yɔ: “Ɨsɨnan̰əŋ kan̰ duroŋ can̰ coŋ le”, hɨmbaɗɨ ɗɨn̰ yɔ hɨn̰: “Sa daa bɨ ɨran̰ daa.” 6Ama ɨŋ kɨya lɔɔ hɨnga pɨna haw kɛ gɨ kɨya gɨle hɨn̰ gɨ Kumu na bɨn̰ Kurɨn̰-ungo le dɔnɔ di ni dorɨn̰ ɨsɨna cay kalaŋ.» Ɨni na, Jesu yen̰ ba-mɨraye le hɨn̰: «Sa daa, aya gasɨlaŋ-jala kan̰ bɨ ɨra ɨndi.» 7Ɨni na, gɨlmi le say daa bɨ, jogɨ ɨndi toyi. 8Kɨɗɨn̰ ga dɨmdɨrdi kalaŋ solge hɨnga ga nee le na, hundɔrɔ gɨ gumu leege bɨ, kan hɨramge Kumu kɨya gɨ ban bɨn̰ kalaŋ dɔnɔ di hɨn̰ wo̰ bɨ.
Jesu te Matɨyo ɗe na kobɨ kardi
(Marg 2:13-17; Lug 5:27-32)
9Jesu sayga kɨɗɨn̰ ga nee gaŋ ma pɨde na, ban sol gɨlmi gɨ pɨna wo̰, ɨre kɨɗɨn̰ ƴɔɔ hɔgɛ lambo gaŋ. Gɨlmi gɨ nee le gusondi na Matɨyo. Ban yeyi hɨn̰: «Kɨba karɨnɨ!» Ɨni na, Matɨyo de say daa cud bɨ, kobɨn̰ kardi. 10Jesu som kɨbɨ hɨnga ga ni dɔɔ gaŋ a duroy ƴaa gɨ da Matɨyo gɨŋ bɨ ga ma, ka-hɔgɛ lambo dan̰ kondige bɨ, ka-lɔɔ ɨsɨna dan̰ kondige bɨ, ɨrgage diige hɨnga pɨna dan̰ Jesu bɨ ka-aye-cay-tɨbayi bɨ. 11Kɨɗɨn̰ ga Parɨsɨn̰an̰əŋ solge hɨn̰ wo̰ na, ɨngɨrɨn̰ge ka-aye-cay-tɨbayi yen̰ge hɨn̰: «Kɛ na kɨya wa ma, Ba-gɨlgɨŋ hɨnga dii dɔɔ dan̰ ka-hɔgɛ lambo bɨ, ka-lɔɔ ɨsɨna le bɨ ga?» 12Kɨɗɨn̰ ga Jesu je kɔl gɨ nee le na, yege hɨn̰: «Na kalaŋ ga gusɨge woyge kalɨn̰ caŋ caŋ ba geyege dan̰ ka-gasɨɗe naŋ. Ama na ka-hɔmɨn̰ɛ ba ɔrɛ n̰agedɨge. 13Ɨragɨŋ tɨrabe duroy kɔl gɨ da Kumu gɨ ye hɨn̰: “Hɨnga ga ɨŋ gey gusɨgɨŋ le, na sɔlɛ cɨn̰-n̰age wala na bɔgɛ kɨbar naŋ.”#9:13 Ayge na duroy: Osée 6:6. Kɨya wa ɨŋ ɨrga na kɨya tɔgɛ kalaŋ ga ɨrɨmge kuduroyge gɨ ke naa kalaŋ ga dan̰ durɔ ɗɨngar naŋ. Ama ɨŋ ɨrga na kɨya tɔgɛ kalaŋ ga ɨrɨmge gɨ ke naa ka-lɔɔ ɨsɨna.»
Jesu ye kɔl gɨ ojɨ cay haye-kɨbɨ
(Marg 2:18-22; Lug 5:33-39)
14Bɨ ɨni na, ka-aye-cay-tɨbay Ja̰ ba-lɔɔ batɛm ɨrgage gusi Jesu bɨ, ɨngɨriige yege hɨn̰: «Kɛ na kɨya wa ma, ni-gandi bɨ, Parɨsɨn̰an̰əŋ bɨ, ni hayde kɨbɨni, ama ka-aye-cay-tɨban̰ kan̰ge hayde kɨbɨge coŋ ga?» 15Bɨ Jesu dɨbge cay nee yege hɨn̰: «Kalaŋ ga molgege ɨrga gɔrɛ gɨŋ dɔɔ hɨnga le, gɨ ɓalege tagɨn̰e cɨndɨge kɨɗɨn̰ ga ba-gɔrɛ ƴaa ɨre danage nee ga? Na hɨn̰ wo̰ naŋ. Ama wɔlɛ kɨya caga gɨ kan kɨya dɔrɛ ba-gɔrɛ ƴaa le duroyge. Na nee dɨm ma kan kɨya haydege kɨbɨge ƴee.
16«Ungo wala kɨbɨ badɨge ga hɨrɨwa dɨbɨn̰ ɓade ga ɨlgi naŋ. Kɨya wa kɨbɨ badɨge ga hɨrɨwa ga kan dɨbɨn̰ge ɓade le, kɨya sɔgɛ kɨway badɨge ga ɨlgi le dɔrɛ, lɔɔ gɨ araŋdɨge kɨya gɨmɨwa cɨla coŋ ƴee. 17Bɨ kalaŋ bɨgage cɛrɛ di suru gɨ jali a boy idili gɨ ɨlgi gɨŋ naŋ, naŋ na cɛrɛ di suru gɨ jali le, na sɨbɨn̰ na kɨya wale idili gɨ ɨlgi le bɨ, cɛrɛ di suru le kɨya bugoŋ coŋ bɨ, idili gɨ ɨlgi le kɨya mundoŋ coŋ bɨrɨŋ bɨ. Ama kan beege cɛrɛ di suru gɨ jali, na boy idili gɨ hɨrɨwa gɨŋ, hɨn̰ wo̰ na, cɛrɛ le bɨ, idili le bɨ, kɨya mundoŋge naŋ.»
Jesu poɗɨ tama bɨ lɨbɨ turmɔ di ma bɨ
(Marg 5:21-43; Lug 8:40-56)
18Jesu ɨre ar kɔl danage ƴee hɨn̰ wo̰ bɨ ga ma, ba-sɔmɛ a cay ƴaa-daye-di-da-Jubɨn̰əŋ gɨ pɨna wo̰, ɨrga poy gɨbayi dugo tumoy Jesu bɨ, yeyi hɨn̰: «Turmonɨ hɨmbɨ na haw dugo kɛ ƴee, ama ɨre dɨbɨ kobɨn̰ caa na, hɨndi kɨya bɔyɛ lɨbe.» 19Jesu say daa kobɨ kardi dan̰ ka-aye-cay-tɨbayi.
20Bɨ ga ma, tama di pɨna wo̰, di kɨbar gɨ ɨsɨni or gusoo gɨloo-cɨn̰ ɓal ɨlge mɔjɨ-cay-sɔɔ, ɨrga jɨn̰ kardi Jesu bɨ, cɨl kɨbɨ badɨge kayi. 21Kɨya wa hɨndi ye kudurɔ hɨn̰: «Hɨn̰ gɨ ɨŋ na ɨsɨbɨ kɨbɨ badɨge kayi ƴɔbɨ na, ɨŋ kɨya pɔɗɛ.» 22Ama Jesu pɨlɨn̰ sɔlɔɔ bɨ yoo hɨn̰: «Turmonɨ, haya kudurɛɛ! Aye kudurɔ kɛ poɗɨne.» Ɨni na, kɨɗɨn̰di ga nee gaŋ le bɨ, te kɨbar le ayaŋ coŋ.
23Kɨɗɨn̰ ga Jesu bugoŋ a da ba-sɔmɛ cay ƴaa-daye-di-da-Jubɨn̰əŋ bɨ, sol ka-lɨme tɛgɛ bɨ, dɨmdɨrdi kalaŋ ga noyge ye gɨrdɨm bɨ na, 24ban yege hɨn̰: «Andaŋgɨŋ doŋ. Kɨya wa turmɔ le mara naŋ. Hɨndi woy na kuŋ ƴɔbɨ.» Bɨ kan sogiige dugo. 25Kɨɗɨn̰ ga kan andaŋge doŋ nɔm coŋ ɨni na, ban andaŋ ƴen̰, ƴom kobɨ turmɔ le bɨ lɨboo daa. 26Koldi ye ƴee cay gɨsəŋ ga nee le nɔm.
Jesu haŋgɨ ti ka-bɨbe won̰ge sɔɔ
27Jesu say ɗe kɨɗɨn̰ ga nee le ɨni na, ka-bɨbe won̰ge sɔɔ kobɨge kardi wɨlalge yen̰ge hɨn̰: «Ay! Kungay Dabid, sɨla cɨn̰-n̰age toni!» 28Kɨɗɨn̰ ga Jesu andaŋ ƴen̰ na, ka-bɨbe le ɨrgage gusi. Ɨni na, ban ɨngɨrge yege hɨn̰: «Kɨŋ ɨrɨm leen̰ cɨndi gɨ ɨŋ ɓal lɔɔ hɨnga ga kɨŋ ɨngɨrəŋ le ga?» Kan dɨbiige cay nee yeyige hɨn̰: «Ho’o Ba-gulɔŋ, ji ɓal lɔɔ han̰.» 29Ɨni na, ban ɨsɨbɨ cɨndɨge bɨ yege hɨn̰: «Kuɗa gɨ Kumu laa danagɨŋ dan̰ gɨyəŋ gɨ da aye kudurɔ kogɨŋ le.» 30Kɨɗɨn̰di ga nee gaŋ le bɨ, cɨndɨge haŋdaŋ solɨn̰ge kɨɗɨn̰ yərərə. Kardi nee ɨni na, Jesu ay noy biige dan̰ dɔnɔ yege hɨn̰: «Jagɨŋ kuɗa, ɗɔɔgɨŋ ungo jɔɔ naŋ pa pa.» 31Ama kɨɗɨn̰ ga kan andaŋge doŋ ɨni na, kan ayge te yɔɔ kol hɨnga ga Jesu lee le, ƴen̰ cay gɨsəŋ ga nee le nɔm.
Jesu poɗɨ ungo gɨ ya kɔl naŋ
(Lug 11:14-15)
32Bɨ kɨɗɨn̰ ga ka-bɨbe ga sɔɔ le andaŋge doŋ bɨ ga ma, kalaŋ ɨrgan̰ge dan̰ ungo gɨ pɨna wo̰ a gusi Jesu. Ungo gɨ nee le turnɔ di ɨsɨni woy kuduroy lee gɨ ban ya kɔl naŋ. 33Kɨɗɨn̰ ga Jesu tay turnɔ di ɨsɨni le coŋ ɨni na, ungo le ay te yɔɔ kɔl. Dɨmdɨrdi kalaŋ ga ɨrege nee le, kɔl kayge sɛl sɛl. Lee gɨ kan yege hɨn̰: «Hɨnga ga hɨn̰ wo̰ le, ungo sɨla cay pɨna a cay gɨsəŋ ga Ɨsɨrayɛl gaŋ naŋ bɨrɨŋ!» 34Ama Parɨsɨn̰an̰əŋ yege hɨn̰: «Na dan̰ gɨyəŋ gɨ da dɔnɔ di da kɨlma gɨ da turnɔn̰əŋ ga ɨsɨndən̰əŋ ma ban tan̰ turnɔn̰əŋ ga ɨsɨndəŋ coŋ.»
Jesu sol cɨn̰-n̰age da dɨmdɨrdi kalaŋ
(Marg 6:6,34; Lug 10:2)
35Jesu gor a cay ƴaa ga gɨmdəŋ gɨmdəŋ gaŋ bɨ, cay karɨn̰ ƴaa ƴaa gaŋ bɨ. Ban gɨlɨn̰ kalaŋ hɨnga duroy ƴaa-daye-di-da-Jubɨn̰əŋ gaŋ bɨ, teen̰ bɛrnɛ Kɔl-gɨ-Ɗari gɨ da dɔɔ-ƴaa di daa nii bɨ, poɗɨn̰ ka-hɔmɨn̰ɛ nɔm bɨ, ka-modoŋ nɔm bɨ. 36Kɨɗɨn̰ ga Jesu sol dɨmdɨrdi kalaŋ ga ɨrgage gusi na, ban sol cɨndɨge ga leeyi n̰age tɔgɨ. Kɨya wa kalaŋ ga nee le gɨlaldaŋge bɨ, togɨyge duroŋ coŋ hɨn̰ gamge ga ba-sɔlɛ kardɨge unɔ wo̰ bɨ. 37Ɨni na, ban yen̰ ka-aye-cay-tɨbayi yege hɨn̰: «Kalaŋ gɨlɨn̰ge na hɨn̰ yage gɨ woli gɨ gasadi na̰a̰ ɨni. Ama kalaŋ ga ka-lɔɔ gɨye duroy nee dḛḛge tɔgɨ. 38Na toy di hɨn̰ wo̰ ma, ulagɨŋ Kumu ba-gulɔŋ di yage ɗe gɨyɨn̰ dan̰ ka-lɔɔ gɨye daye cɨn̰ gasa daa le, jɨn̰ nee nee.»
Արդեն Ընտրված.
Matɨyo 9: gab
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Association pour la Promotion de la Langue Gabri Darbé-Dormon (APLGD) en coopération avec
© 2023, Wycliffe Bible Translators, Inc.