মথি 2
2
গিত্তেল যীশুখো হা·আইগিবা মান্দিরাং সান্দিনা রি·বাআ
1হেরোদ রাজানি সময়ও যিহূদিয়া হা·দকনি বৈৎলেহম সংচা যীশু আৎচিয়ামিং। সালারামচানি মিত্তাম হা·আইগিবা মান্দিরাং যিরূশালেমচানা রি·বাএ আগানজক, 2‘‘যিহূদীরাংনি রাজা আৎচিগিবা বাও চিংআ সালারামচা সিলগাও বিনি আস্কিখো নিক্কে বিখো অলাখিনা রি·বাজক।’’
3ইয়া খাৎথাখো খিন্নাএ রাজা হেরোদ আরো বিমুং যিরূশালেমনি গিম্মিকান জাজ্রেংজক। 4হেরোদ গিম্মিক খামাল দাল·গিবারাংখো আরো শাস্ত্র স্খিগিবারাংখো রিংগামে খ্রীষ্ট বানো আৎচিনুয়া উখো সিং·জক। 5বিসং বিনা আগানজক, ‘‘যিহূদিয়ানি বৈৎলেহম সংও বিয়া আৎচিনুয়া, মুয়ানা আগানসোগিবা ইয়া খাৎথাখো চক্কে দন্না:
6যিহূদা হা·সংনি বৈৎলেহম,
যিহূদানি গিসেপো না·আ মামুং দাক্কেবা চনবাতজা,
মুয়ানা নাং·ওনিন ইন্দাকগিবা শাসন দাকগিবা সাকসা হং·খাতনুয়া
জে আংনি মান্দি ইস্রায়েলরাংখো নিরক্ষিনুয়া।’’
7উনোন হেরোদ উয়া হা·আইগিবা মান্দিরাংখো সিউল দাক্কে রিক্কামজক আরো বাগিবা সময়ও আস্কিখো নিক্কামিং উখো নাম্মে দাক্কে হা·আইএ রা·জক। 8উয়া হা·আইগিবা মান্দিরাংখো বিয়া বৈৎলেহমচা ইন্দাকে আগানে ওয়াত্তেতজক, ‘‘না·সং রি·য়াংএ নাম্মেদাক্কে উয়া বি·সাখো সান্দিবো। আরো বিখো নিকমানোদে আংনাবা আগানবো জেদাক্কে আংআবা রি·য়াংএ বিখো অলাখিনা মা·ন্না।’’
9রাজানি অাগানাখো খিন্নাএ হা·আইগিবা মান্দিরাং রি·য়াংজক। সালারামচা বিসং জে অাস্কিখো নিক্কামিং উয়া বিসংনা স্খাং স্খাং রি·জক। জেও বিসং দংঅামিং উয়া নকনি সাক্কাওনা সক্কাংএ দংদিপখুজানা দিপ্পাৎ উয়া অাস্কি থম·থমগিজা রি·জলজলজক। 10-11আস্কিখো নিক্কে বিসং নাম্মেন খুসি হং·এ নকনিং·আচা নাপজক আরো উয়া বি·সাখো বিনি মা·গিবা মরিয়মচা নিকনা মান·জক। উনোন বিসং হা·আও থুগোপে উয়া বি·সাখো অলাখিজক আরো আন·থাংথাংনি গাম দনচাকানিরাংখো এংএ বিনা সোনা, কুন্দুরু আরো সিম্মিলগিবা তেলখো হন·জক। 12জা·মানো হেরোদচা ফি·ল্লাংজাখানা ইসল বিসংখো জুমাংচা বেং·জক। উনোন বিসং গিপ্পিন রামা গিত্তা সংথাংচানা রি·য়াংজক।
গিত্তেল যীশুখো হেরোদনি সান্দিয়া
13হা·আইগিবা মান্দিরাংনি রি·য়াংআনি জা·মানো গিত্তেলনি সাকসা সা·গ্রে যোষেফনা জুমাংচা মিকখাং ফা·এ আগানজক, ‘‘চাখাতবো, বি·সাখো আরো বিনি মা·গিবাখো রিম্মে মিসর হা·সংচা খাত্তাংবো আরো আংনি নাং·খো আগানজা দিপ্পাৎ উনোন দংবো; মুয়ানা বি·সাখো স·ওতে গালনা হেরোদ বিখো সান্দিনুয়া।’’
14-15উনি ওয়াল্লোন যোষেফ চাখাত্তে উয়া বি·সাখো আরো বিনি মা·গিবাখো রিম্মে মিসর হা·সংচানা রি·য়াংজক আরো হেরোদনি সিখুজানা দিপ্পাৎ উয়োন দংজক। ইরাং হং·আ জেদাক্কে আগানসোগিবাচা গিত্তেলনি আগানগিবা ইয়া খাৎথা চু·সকা:
আংআ মিসরওনি আংনি দেফান্থিখো রিংগামে রা·বাজক।
16হা·আইগিবা মান্দিরাং বিখো থগিজক ইন্নে হেরোদ নাম্মেন খা·আওনাংবিজক। উয়া হা·আইগিবা মান্দিরাংচা নাম্মেদাক্কে সিং·এ জে সালখো বিয়া হা·আইএ রা·আমিং উয়া সালনি হিসাব গিত্তা বৈৎলেহম আরো উনি সামবাজলরাংনি বিলসি গ্মি আরো উনা চনবাত্তা গিম্মিক বি·সারাংখো স·ওতে গালনা গি·য়েৎজক। 17উনি গান্দা আগানসোগিবা যিরমিয়নি আগানা ইয়া খাৎথা চু·সকজক:
18রামাও গ্রাপারাংখো খিন্নানা মা·ন্নিংআ;
রাহেল দেথাংরাংনা গ্রাপিংআ,
মামুংওবা থম·থমজা,
মুয়ানা বিসং দংজাজক।
19হেরোদনি সিয়ানি জা·মানো গিত্তেলনি সা·গ্রে সাকসা মিসর হা·সংচা যোষেফনা জুমাংচা মিকখাং ফা·এ আগানজক, 20‘‘চাখাতবো, বি·সাখো আরো বিনি মা·খো রিম্মে ইস্রায়েল হা·সংচা রি·য়াংবো। বি·সাখো জেরাং স·ওতনা হা·ম্মামিং বিসং সিথকজক।’’
21উনোন যোষেফ চাখাত্তে উয়া বি·সাখো আরো বিনি মা·খো রিম্মে ইস্রায়েল হা·সংচা রি·য়াংজক। 22উয়া সময়ও যিহূদিয়া হা·সংও হেরোদনি জা·মানো বিনি দেগিবা আর্খিলায় রাজা হং·আমিং। ইখো খিন্নাএ যোষেফ উয়োনা রি·য়াংনা খেনজক। জা·মানো জুমাংচা ইসলনি গি·য়েতাখো মা·ন্নে বিয়া গালীল হা·দকচা রি·য়াংজক, 23আরো নাসরত মিংগিবা সংচা রি·য়াংএ সংদংএজক। ইরাং হং·জক জেদাক্কে আগানসোগিবারাংনি আগানগিবা ইয়া খাৎথা চু·সকা: ‘‘বিখো নাসরতনি মান্দি ইন্নে মিংনুয়া।’’
Արդեն Ընտրված.
মথি 2: GLNT
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
This translation was published by The Bangladesh Bible Society in 2004 © BBS 2004.