Matiye 10
10
Daw sin Kris mə guɓ wa hoɓo
(Mak 3.13-19; Luk 6.12-16)
1Zezu ɗe sum ta zə rum mə guɓ wa hoɓ ɓay ne gbəgboŋ ne nday kədan handay 'way gam, ɓay kədan handay car sôwâ məni kə gaɓ kə sôwâ məni kə rəɓo daŋ'ŋ. 2Semɗe sum sin mə guɓ wa hoɓ kuni ni na: Cop rum Simoŋ (mə ɗe kə Piyer) kə njər rum Andre, Zakə kə njər rum Zaŋ, handay daw Zebede. 3Filip kə Bartelemi, Tomas kə Matiye, bə ɓawa grama, Zakə mə vay Alfe kə Tade. 4Simoŋ, swə mə nyen peɗ kə sây' zə nya um kə Yudas Iskariyot məni ar Zezu ta ɓa sum sî umu.
Zezu sin sum ta zə rum mə guɓ wa hoɓo
(Mak 6.7-13; Luk 9.1-6)
5Zezu sin sôwâ mə guɓ wa hoɓ kə dan dlay mə ni kuna: «I də nya sôwâ məni cu zə saŋ sôwâ Zuwif mi nə mi, ɓay i cok də so mə nya Samari mi. 6Ama i də du sôwâ Israyel məni vi' ce' ndə cime. 7Kəri məni hi wə də, i ta' dan mə ni na: Ri məni Ifray wə də suk jwə wa ri nə həre'e! 8I car sum gaɓ, i car i sum mar, i gi mgbo' faŋ həraŋ, ɓay i 'way gama. Hi fe uray, i ne uray ta'a. 9I ra' səlay gew mə bondo ko mə ɓu, ko mə tlew njay wə jiba mi mi. 10I ra' mbu zə vari rəkway mi. I ra' mbraw hoɓ wə ɓa mi, ko tərak, ko dliwi. Zə bə sin nde i fe kwati umu si. 11Kəri məni hi ta day wə so mə mbri ko pəɗak rum, i keɓ swə məni kə mê' mi ve, ɓay i gay' wə so um hâ day ri 'ya mi. 12Kəri məni hi cok də rawti so, i ini: Heɓ mə ke kə ri. 13Sôwâ so rum la' ve ni si, kaw jeɓ mi mə ne heɓ də ke kə ndaya. Ama handay la' cu ve ni mi si, i tle kaw jeɓ mi mə ne heɓ nə faŋ kə ndi si. 14Sôwâ mə rawti so ko sôwâ so mə mbri la' cu ve ni, ko cu mun dan mi mi si, i 'ya ar ri rum ɓay tu' ɓərim sem ri. 15Na in mi ne, kəzini: Kə bəka dan ɓok, boni də ke ɓayrum wa sôwâ so rum pâ boni məni ke wa sôwâ mə so Sodomə kə so Gomorə.»
Cik məni də mba
(Mak 13.9-13; Luk 21.12-17)
16«I mun ri'i! Na mi sin ce' ndə cime wə du dəghawa. I ke kə gwet ce' ndə wu', ɓay i ke dan dan mə bro' ce' ndə kuruku. 17I ji tu ri, zə sôwâ də mi ar də ɓa sum ɓok dan, ɓay handay də mi pe kə ləva wə rawti so Ifray ndaya. 18Handay də mi ra' də kor sum rôwâ nya kə sum jwə zə rin kədan hi gak in njeŋ dan wa rin kor nday, ɓay də kor sôwâ məni cu zə saŋ sôwâ Zuwif mi. 19Kəri məni handay də mi ar də ɓa sum ɓok dan, i ɗik dan wa dan məni hi wə də in, ko kə vari dan məni hi wə də in nə mi, zə hi də fe dan məni hi wə də in kə ri rum ɓo. 20Dan rum cu də car mbə hay' ri mi, ama Simbeɗ Ba mi məni wə vunduk ri wə də in dan rumu.» 21Vay ya də ar njər rum də ɓa sôwâ kədan sôwâ um ci, ɓay ba daw də gi ndəna' kə daw nday ta'a. Daw də faŋ car wa sôwâ nday kədan handay nday ci. 22Sôwâ daŋ' də mi sî zə rini. Ama swə məni car ŋgəɗiŋ' hâ ndo' rum, bə rum də ke kə nyî mə də hâ. 23Kəri məni sôwâ də keɓ zu ri wə so ɗaw, i ne də so məsini. Na in mi ne, kəzini: Hi cu də gaŋ ndap so Israyel daŋ' cop mbə Vay sumra' mi. 24Bə wum kwa cu pâ bə ta' kwa um mi. Bə sin cu pâ bârî um mi. 25Nde i kədan bə wum kwa faŋ ce' ndə bə ta' kwa um, ɓay kədan bə sin faŋ ce' ndə bârî umu. Sôwâ la' ɗe bə so kə Belzebul si, handay də ne semɗe mə bro' ne kə sôwâ so um pâ semɗe rumu!
Swə məni hi gak ne wəlok rumu
(Mak 8.38; Luk 12.2-7)
26«Zə rum, i ne wəlok sumra' mi. Kwa daŋ' məni pe', sôwâ də we, ɓay dan daŋ' məni pe' 'yeŋ, sôwâ də munu. 27Dan məni na in ne ni wə ri mə ura', i faŋ də do dan rum wə ri mə ɓu. Dan məni hi mun 'yeŋ, i do dan rum wa dap so. 28I ne wəlok sôwâ məni wə ci tu ri, ama cu gak ci nyî ri mi mi. Zawa, i ne wəlok Ifray məni gak ɗənok tu ri kə nyî ri hoɓ jak wə ri ku. 29Sôwâ cu coɓ daw i ra' ghər hoɓ kə səlay ɗaw mi su? Ama ko ɗaw du nday cu nde də nya dan Ba mi ne vari rum mi. 30Mə hi, sâ wa ri in si ɗaw ɗaw daŋ'ŋ. 31Zə rum, i ne wəlok mi, zə hi kə mbra' pâ daw i ra' ghər si!»
In dan wa Zezu Kris ko riway wa rumu
(Luk 12.8-9)
32«Sa su daŋ' məni də in kor sôwâ i mum mə na, na də in kor Ba man mə wafray i mum mə na ta'a. 33Ama swə məni də in kor sôwâ i mum cu we nan mi, na də in kor Ba man mə wafray i na cu we num məta'a.»
Heɓ cu mi, ama masəlama
(Luk 12.51-53; 14.26-27)
34«I ɗik i na mbə kədan na ne heɓ ne kə sôwâ nya mi. Na cu mbə kədan na ne heɓ mi, ama na mbə kə masəlama. 35Na mbə kədan na gi vay mə nji ɓul nji kə ba um, vay mə ma ɓul nji kə ya sə, ɓay mok vay ɓul nji kə inja sa: 36Sôwâ cava də sî bə so.»
37«Swə məni bə ba um ko ya um pâ nan si, bə rum cu nde i ta zə rin mi. Swə məni bə vay um mə nji ko vay um mə ma pâ nan si, bə rum cu nde i ta zə rin mi. 38Swə məni cu tle gu gay' tu rum ɓay ta zə rin mi, bə rum cu nde i ta zə rin mi. 39Swə məni wə wa' kədan mum siɗ tu rum, bə rum də mara. Ama swə məni də fe mar zə rin, bə rum də ke kə nyî mə də hâ#Mak 8.35; Luk 9.24; Zaŋ 12.25.»
Bal ciki
(Mak 9.41)
40«Swə məni ve ni, bə rum ve nan ta', ɓay swə məni ve nan, bə rum ve swə məni sin nana#Mak 9.37; Luk 9.48; Zaŋ 13.20. 41Swə məni ve bə ka' dan zə i mum bə ka' dan Ifray, bə rum də fe bal cik məni Ifray wə də ne kə bə ka' dana. Ɓay swə məni ve swə mə njeŋ kor Ifray zə i mum njeŋ kor Ifray, bə rum də fe bal cik məni Ifray wə də ne kə swə mə njeŋe. 42Na in mi ne, kəzini: Swə məni wə ne mbi mə səso' kî ne kə vay nyêw mə du sum ta zə rin zə i mum bə ta zə rin, bə rum də fe bal cik umu.»
Արդեն Ընտրված.
Matiye 10: KMN
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Le Nouveau Testament et Psaumes en Peve © Alliance Biblique du Tchad, 2014.