Matìyò 4
4
Debrə̀ kwàʼrì Yeso
(Mag 1:12-13; Lug 4:1-13)
1Anyumə̀ ne Yeso ya fə niŋi mənib, Azwighi Ŋwiye ya ghì wì gho inga ibad zɔbi ni gha Debrə̀ kwaʼra aməd. 2Yeso ya chughi njèg chàʼra Ŋwiye angu ineg ìghum ikwè. Anyumə̀ ne ineg ìghum ikwè mbe ya che, njèg yaya zàŋa aməd. 3Debrə̀ ya ghò ibo pè ghà ibo gha, “Àghò mə yaʼ Ŋwan Ŋwiye, ghàma abə iteg gho̰ we bəŋə ane ngə̀ŋ.”
4Yeso ya ywìtì ibo gha, “Àŋwàʼrì Ŋwiye gha, ‹Chəyi wə̀d ya chùghə izɔm igun isəg aŋa məyi imbə̀ʼ ngə̀ŋ. Wə̀d ya chùghə izɔm imbə̀ʼ ìngam ijìm ne dùwə̀ ichug abə Ŋwiye.›”
5Debrə̀ ya niŋ aməd ghò inga aben Jèrusalèm, aben ìzḛzḛ ze, pè ghì wì təm igun idɔm mbàn Ŋwiye. 6Wì ya si ghà ibo gha, “Àghò mə yaʼ Ŋwan Ŋwiye, təm nəg aseg! Mbe ŋwàʼrì gha,
‹Wì biri chà ìmbi mbè angirə̀ mbi kyèʼrì awe,
che awe inga ìtɔb tikye abo
ni gha imbə̀ʼ àghò si nɔ̀ʼ kṵ̀ ìfe ifeg ane iteg.›”
7Yeso ya ywìtì ibo gha, “Mbe bə̀ ŋwàʼrì gha, ‹Imbə̀ʼ àghò kwaʼra awe Anɔŋisəg ìwe Ŋwiye.›”
8Debrə̀ ya ywìrì niŋ aməd ghò kwàʼ ikaŋ iwum kyen ne taŋ sà ikaŋ, chwi iben ijìm igun isəg ijìm fɔrɔ ighi chɔm chɔm mbe ne yaʼi inga iben mbe ibo. 9Wì ya si ghà ibo gha, “Àghò mə gùndi aseg ghùmni amə, mə biri nàʼ ighi mbo̰ ijìm ine.”
10Yeso ya ywìtì ibo gha, “Sàtàn! Sùngə iban inum! A ze inga Àŋwàʼrì Ŋwiye gha, ‹Ghumni məyi Anɔŋisəg ìwe Ŋwiye bə̀ fàʼ məyi ibo.›”
11Ane, Debrə̀ ya kye iban məd, mbè angirə̀ si yèʼe se wètè aməd.
Yeso ko àfàʼì a Galìli
(Mag 1:14-15; Lug 4:14-15)
12Anyumə̀ ne Yeso ya zughi gha mbe fə zì Jɔn we ne yaya nàʼà mənib a ndəŋ, wì ya bə̀ndì ghò a Galìli. 13Wì ya nɔ̀ʼ a Nazarèd si ghò chùghi inga Kàpenàwum. Kàpenàwum ya aben ne yaʼi iban atəŋ kyen ze inga aba aben Zebulùn tì Naftalì. 14Ze ya yaʼ anìŋ ni ghì gha ìngam we ne wə̀dkə̀n Ŋwiye Àzayà ya ghum ghà we duwə ane tesiʼ. Ìngam we ya gha:
15“Aben Zebulùn tì aben Naftalì,
ne yaʼi igun inɔnjì ne ghò igyi tìbà, injḭ igyi Jodàn,
Galìli ne yaʼi asiŋi ne bəd ne kayi mə̀Ju mbe chùghə angu!
16Bəd mbe ne chughi inga isəg firi,
fə bàd ìzḛzḛ kyen.
Ituʼ fə chəg
igun bəd ne bɔ gha mbɔb biri ku ne chəyi mbi kyeri Ŋwiye.”
17Ni ko anyumə̀ we se ghò imbìghè, Yeso ya se ghàmà Ìngam Ŋwiye. Wì yaya ghàmà gha, “Mbə̀ bəŋə ìtən fìŋ sìkì inug tibɔ̀ŋ imbə̀ʼ icheg ne anug ìfɔ̀n ikaŋ fə tinde.”
Yeso kàrì mə̀mə̀nənùg mbègtog
(Mag 1:16-20; Lug 5:1-11)
18Icheg ne Yeso yaya yḛ̀ iban atəŋ ze a Galìli, wì ya bàd məfi mɔ̀ʼɔ məbe. Ifibì ya Sayimùn we ne mbi yaya kàrà ane Pità. Ìywin ya Andrò. Mbɔb yaya màʼà kyə̀ inga igyi tìbà we imbə̀ʼ icheg ne àzɔb atog àfàʼì yaya ni gwì àgweg. 19Wì ya ghà inɔb gha, “Mbə̀ beni abɔ̀ʼ inum. Mə biri chwi icheg ne mbə̀ biri se ghìyə̀ bəd bene abɔ̀ʼ inum.” 20Mbɔb ya bə̀ sàŋì ìtɔb kyə̀ kwàʼ ati ati bèni abɔ̀ʼ məd.
21Wì ya nɔ̀ʼ angu ghò imbìghè, bə̀ ywìrì bàd məfi ndəŋ məbe. Mbɔb ya yaʼ Jem tì Jɔn, bɔn ìmbi Zebedì. Mbɔb ya yaʼ inga àzɔb abaŋ igyi tì ìwɔb mbaʼ Zebedì. Anyumə̀ we, mbɔb yaya tànga ìtɔb kyə̀. 22Yeso ya kàrì awɔb. Mbɔb ya bə̀ nɔ̀ʼ kwàʼ ati sàŋì àzɔb abaŋ igyi fɔrɔ ìwɔb mbaʼ bèni abɔ̀ʼ Yeso.
Yeso ghàm Ìngam Ŋwiye bə̀ ghù bəd məjìm ne ghɔ̰̀
(Lug 6:17-19)
23Yeso yaya yḛ̀ mà isiŋi ijìm inga Galìli. Wì yaya nè chwìte inug inga ìmbɔb məchamì Ŋwiye bə̀ nè chètè ikən chɔm imbə̀ʼ anug ìfɔ̀n ikaŋ. Wì yaya ghùyə̀ aku aghɔn ajìm ne yaʼi igun bəd. 24Icheg ne wì yaya ghìyə̀ ane, bəd ya ghà inug imbə̀ʼ aməd ghò mà isiŋi ijìm inga Sirìyà. Bəd ya niŋ bəd ighɔn ne ghɔ̰̀ tiku ighɔn nɔʼ nɔʼ ghò ibo. Aku bəd ne wì ya ghu ya; bəd ne isiŋi nyɔd mbe taŋ se, tì bəd ne izwighi tibɔ̀ŋ yaʼi inga inɔb, tì bəd ne izwighi tibɔ̀ŋ yaya chə awɔb, tì bəd aghɔn tìsùʼ fɔrɔ bəd ne ya buʼrə. 25Tinɔ̰ bəd ya nɔ̀ʼ isiŋi isiŋi bèni abɔ̀ʼ Yeso. Mbi ya nɔ̀ʼ a Galìli tì inga iben kyen kyen mbe ìghum ne mbe kàrà ane Dèkapolìs, tì a Jèrusalèm, tì a Jùdeyà, fɔrɔ inga iba iben mbe ne yaʼi injḭ igyi Jodàn.
Արդեն Ընտրված.
Matìyò 4: MBTP
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2019 CABTAL