Jenɨzɨzɨ 12
12
Gotɨyai Evɨramɨmɨ wɨdasabyaa'.
(12:1-8)
1-3Gotɨyai Evɨramɨmɨ jaka wɨdɨna “Gɨnnya angebadaa'nyɨ dɨwona! Gɨmɨjɨ avaalyaraavɨ jahalya'makwo! Kwaaka anga dɨmwaaide pɨbanna kagivwarɨdaakwa'mujɨ dɨmwaaideigɨnyɨ. Nɨmɨ sainyɨ gɨnnya kaimɨraayangɨ maremwaalɨdeinyɨ. Gɨmɨrera kwala naanga yɨma'nɨpɨ'dere. Gɨmɨ a'mwe naangei jɨma'nadeigɨnyɨ. Yɨ gɨmɨnyɨ jɨwaalɨvavaavɨna a'mwe kwaakevakɨ yuneba mwaaidɨvɨsaraavɨ tewaanna yɨdere. Kumɨ sarɨmɨnyɨne tewaanna kyapɨjɨ kumɨnyɨne tewaanna yɨdeinyɨ. Kumɨ sarɨmɨnyɨne kayaa'na kyapɨjɨ nɨmɨ kumɨnyɨne kayaa'na yɨdeinyɨra,” wɨda' Gotɨyai.
4-5Gotɨyai Evɨramɨmɨ sara kuda' Evɨramɨ angeba Aaranɨdaa'nyɨ wɨna. Kwaaka Kainanɨnei gannya balaanga Saraayasɨ Lotɨ gathaakaangare gawaalɨsɨ gɨlyɨvɨta yuyajɨ kaanna makuna ya'.
6-7Evɨramɨ angeba Sekemɨ kwaaka Kainanɨ mannɨkeba wavɨla'na yaka yɨ'darya More mwaalɨna. Mwaalɨna kya' Gotɨyai Evɨramɨmɨ wɨda' “Kwaaka Kainanɨ yuneba jɨwaalɨvaangeraavɨ kɨnɨdakaavihɨrɨne yɨhɨzaavɨdeinyɨra.” Mi'na kuda' Evɨramɨ “Nɨmɨ Gotɨyarɨ yɨlaaya yɨgalɨma! Jɨlɨkyaawaryarɨ wɨjaavɨma!” daka simɨnye' lɨvalaanna yaka jɨlɨkyaawarya gaayadɨka mariravake' dɨke' nasɨ'na yakevɨdaasɨ Gotɨyarɨ sɨmatɨrɨnya winna'.
8Dɨvi sagaa' Evɨramɨ mugunyavɨ angeba Betelɨ adaihɨsabanna wɨna. Sabanna wawaka angeba Betelɨ angeba Aayɨ yaareba gannya selɨ-anga madaka Gotɨyarɨna yɨlaaya ya'.
Evɨramɨ Kwaaka Yɨzɨpɨna yagalaawɨna yaka ayɨna byaa'.
(12:9–13:4)
9-13Pɨgaa' wapaaya kunegaa' mɨjɨkegaa' Evɨramɨ Kwaaka Yɨzɨpɨna wɨna. Yɨzɨpɨna wawaka gannya balaangevɨ wɨda' “Gɨmɨ tewaanya'gɨnyɨ. Yɨzɨpɨ mwaalyara gwanganapɨjɨ ‘A'mwe sa' maraana!’ dapɨjɨ nyɨramakɨpɨ'deinyɨra. Gɨmɨ duthathera ‘A'mwe sai nya'mwelyɨra.’ ‘Naramakɨpɨka!’ da'gɨzɨ sara duthathe'gɨnyɨ. Sara kuda'gɨzɨ kave wanganakɨna nyɨpɨ'deinyɨ,” wɨda'.
14-16Yɨzɨpɨ mwaalyara kunnya maremwaalakerɨ wɨdɨna yadɨvɨ' “Peroyaigɨ, nemɨre a'mwe naangeigɨnyɨra.” Peroyare a'mwe naangera Saraayavɨ wanganeva Peroyarɨ wɨde' “A'mwe sa' tewaanyasɨra.” Mi'na kude' A'mwe Pero Saraayavɨ gannya angevɨ wɨmwaaihɨna ya'. Wɨmwaaihɨna yaka Evɨramɨmɨne a'mwerajɨ a'mwejɨ sangɨ wɨdaayadɨvɨsangɨ wɨjaavɨna ya'. Nabaai jɨlɨkyaawarya naanga wɨjaava'.
17-20Gotɨyai Peroyalyɨ gamɨre maremwaaiderajɨ saraavɨ Saraayavɨna kayaaka yɨgaina ya'. Kayaaka yɨgaina kya' Pero Evɨramɨmɨ “Dulaamo!” kuda' Evɨramɨ angevɨ wɨlɨna kya' Pero wɨda' “Baa'na yɨvanɨgɨna? ‘A'mwe' nɨmɨresɨra,’ manyɨjɨwa'dɨnyaigɨ. Dahaa' gɨnnya a'mwevɨ dɨmakwo!” Sara wɨdaka “Evɨramɨjɨ gamɨrerajɨ yarai wɨpɨka!” Pero gannya wɨdaayadɨvɨsaraavɨ “Evɨramɨmɨ wɨdasaawɨna jɨla!” wɨda'.
Jelenleg kiválasztva:
Jenɨzɨzɨ 12: byr
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2013, Wycliffe Bible Translators, Inc. All rights reserved.
