Matiu 7

E möa tego ona mena milimiou a tana katuun

(Luk 6:37-38,41-42)

1Be Iesu e rangana me poeiena, “Möa tu ona raiam a palair u katuun, be Sunahan tema ona has ranoui limiou. 2Temar ona mera milimiou a palai, nonei has tena mar ona meraroi limiou. Na temar tara mera milimiou a palair u katuun, nonei has tena mar tara meraroi limiou. 3Aha te tara sile milö a tsi bita i matana e toulamölö, ba lö tema taremi a makumun palang i matamölö pouts? 4Ime te markato uanen balö te poeiem tere toulamölö ‘Lama, ba lia te luba negu a tsi bita i matamölö’ tara pöata te kana a makumun palang i matamölö pouts? 5Alö a katuun a gamogamo, alö go luba mamin a makumun palang i matamölö pouts, ba lö te töan tara haniga mou bate luba nem a tsi köahu i matana e toulamölö.

6“Möa tu hala rami u muki a ka te göagonona. Na e möa tu lapo namia u beröana turu poum, taraha nori e namots tö hohomie ren bate habiritsir bate koto lileke rariou limiou.”

Alimiou go rangataiam, ne go sakeiam, ne go porokoiam

(Luk 11:9-13)

7Be Iesu e rangana me poeiena, “Rangataiam ba limiou te lue moen. Na limiou go sakeiam ba limiou te sabie mouen. Na limiou go porokoiam ba tamana te kalata beranou limiou. 8Taraha, u katuun te rangatar e lue rouen, na u katuun te saker e sabie rouen, na u katuun te porporokor, a tamana e kalata bera nouen. 9Esi i tamilimiou te tatei hale nei a pien tson i tanen a hatu te singoe nen ta tsi beret? 10Na esi te tatei hale nei a pien i tanen a kökötsi te singoenen ta iena? 11Alimiou e ka memiou a markato a omi, kaba limiou e hala noa has namiou a manka man niga tara galapien i tamilimiou. Na e Tamamilimiou i Kolö e hala has ranoui limiou a manka a man niga te singo uamia limiou i tanen. 12Na tara mamanaka, te ngile milimiou u katuun egi katoeien i tamilimiou, alimiou go kato hasemen i taren. Nonei a mouna u raranga te kana turu buku tere Mosis na turu propet has.”

A makum a tekteki

(Luk 13:24)

13“Alimiou go tasu mia tara tamana a tekteki. A tamana a pannen e la uana tara han a omi, na a parpara koru a katuun te tasu ria tara tamana teka. 14Kaba limiou go tasu sila mia tara tamana a teki, taraha a tamana a tekteki te la uana tara nitöatöa, na ema katuun a para nei tena tasu roa i tanen.”

U ruei na man hua i tanen

(Luk 6:43-44)

15Be Iesu e rangana me poeiena, “Hanei sil raiam u propet u gamogamo. Nori e hererari u muki u hie, kaba nori e gamor bate kato here nari a peisaren u sipsip u alena. 16Alimiou e tatei tara marei sila ramoien tara man hua i taren. E hana, u katuun e antunan patsiki hase ria a huana u grep tara latu a hihitoka? Na a huana u fik tara latu a kits? 17A man ruei a man niga e hua haniga hasir, na man ruei a man omi e hua homi hasir. 18U ruei u niga ema tatei hua homi nei, na u ruei u omi ema tatei hua haniga has nei. 19U mamana u ruei tema hua haniga ri e ngats lupu rariou bate lapo raria turu tula. 20Ba limiou te tara marei mou nori u propet u gamogamo.”

Alia uma mala haniga rai limiou

(Luk 13:25-27)

21Be Iesu e rangana me poeiena, “Ema katuun hoboto nei te ranga ria i tar bate poeier ‘O Tsunono, O Tsunono,’ tena tasu roa tara Nipepeito tere Sunahan. Kaba u katuun puku lasi te kukuteier u ngilngil tere Tamar te kana i Kolö tena tasu riou. 22Nonei turu Lan teka, a parpara a katuun e poeiena romana i tar, ‘O Tsunono, o Tsunono. Alam u hihatuts silaia tara solomölö na lam u tsuga ba has raia u liliahanei u omi tara solomölö, na lam u kato sila has naia a man hiharöto tara solomölö.’ 23Ba lia te ranga meragouen bate poeiegu, ‘Alia ema atei sil ragi limiou. La ba namou lia! Alimiou u katuun u omi.’”

A huol a katunun kukui luma

(Luk 6:47-49)

24Be Iesu e ranga lenina me poeiena, “A katuun te hengoena u raranga i tar, bate kukutie nen e here nei a katuun a atei te hatakeia a luma i tanen ieluna u lapo. 25Ba langits te polona bu uolo te la nama, ba lomolomo pan te bahuna, kaba ema antunan gasenoui a luma teka. Taraha a luma i kuieia ioluna u lapo. 26Kaba u katuun te hengoer u raranga i tar batema kukute rien, nori e hereri a katuun a tutu te hatakeia a luma i tanen turu kotolana. 27Ba langits e polona ba uolo e la nama, ba lomolomo pan e bahuna, be gas harus homin töa nena a luma teka. Ba luma e takupuna be tarura hakapa nitöana.”

A nitsunono tere Iesu

28Pöata te ranga hakapanaia e Iesu a manka teka ba u katuun e asingoto koru ner temar hihatuts uaien. 29Taraha, nonei ema here rai u tson hihatutsura tara Lo, kaba nonei e hihatuts here ii a katuun te kamena a nitsunono.

Jelenleg kiválasztva:

Matiu 7: HLA 2020

Kiemelés

Megosztás

Másolás