MATHAI 6

A phahlahpaw pehlainah

1A dingpaw rai naa hrepaw khah cawngsaw tah ma hmuh naa he seh tatah cawngsaw hme letah tua ly rua pawtah khei a raering my lo. Ma hraco naa tua caco, naa Paw vaicung leteipaw taitah longmai hmuh a bei he ceh.

2Macawtaco a phahlahpaw cawngsaw naa pehlai tih he tah cungmai raipha sahlo tei cawngsaw tah ma cizaw naa he seh tatei synagog sahlo le langpui sahlo letah aa tualaipaw hratah naa tuapaw cawh hmoka tung tah y khui lai khe lo. Biahmuisui ka ca ching he, aaning sahlo cawh aa longmai khah a tling teitah aa hmuh thah kho. 3Canghrasala a phahlahpaw cawngsaw cawh naa pehlai tih he tah naa cacang lang kih tei a tuapaw cawh naa cavui lang kih khah hnisah khe la, 4ma pawsui co naa pehlainah cawh aparuh a cang a. Mataico naa Paw, a paruh teitah tuapaw a hmuhpaw taco longmai a ca pae he a.

Thlawchangnah

(Luk 11:2-4)

5Taico, thlaw naa chang tihtah cungmai raipha sahlo hratah chang khe lo. Zecawtamaw tatah aaning sahlo cawh cawngsaw tah ma hmuh na he seh tatah synagog le langchai letah a daw lai tei thlawchang khah aa du kho. Biahmuisui ka ca ching he, aaning sahlo cawh aa longmai khah a tling teitah aa hmuh thah. 6Canghrasala, naaning cawh thlaw naa chang tihtah ing chunglang a nae la, ingkaw kha la, naa Paw hmuh khy lypaw khaco chang my lo. Mataico naa Paw, aparuh teitah tuapaw a hmuhpaw taco longmai a ca pae he a. 7Taico thlaw naa chang tihtah lawki cawngsaw sahlo hratah naa rei ciapaw duitei rei cakhawng leimei thlang khe lo, zecawtamaw tatah aaning sahlo taco bia hlupui kaa reinah cawtah hei thuipah kaa cang peh tatah aa rawh kho. 8Aaning hratah cang khe lo, zecawtamaw tatah naa Paw taco naa hiapaw khah naa hae hlai taitah a hni thlang kho.

9Macawtaco thlaw naa chang tihtah ma hrahei chang my lo,

‘Kaa Paw vaicung leteipaw,

Na ming cawh cizaw tah ung ky seh.

10Na painah tlung ky seh.

Vaicung letah na dupaw aa tuapaw hratah,

alui lehei tua hrah he seh.

11Ningting kaa hiapaw batui ma pei my lo,

12kaa cung letei chahlynah a tuapaw cawngsaw sahlo kaa ngethai pawhe hratah,

kaa chahlynah ma ngethai hrah my lo.

13Tuhsonah lang a ma chui kheh la,

mehchaw lypaw taitah ma pachah hri my lo.’#6:13 Painah raang le hmingtuakhynah le rungnawnah cawh chaizaw tah natei a cang, Amen, tatah ahning vytei kih cia thaikheh letah a ung.

14Naa cung letah chahlynah a tuapaw cawngsaw sahlo khah naa ngethai caco he, naa Paw vaicung leteipaw tah a ca ngethai hra he a. 15Canghrasala, cawngsaw aa suanah khah naa ngethai ly caco he, naa Paw vaicung leteipaw tah naa suanah khah ca ngethai hrá bei he.

Batui cahenah

16Batui naa cahe tihtah cungmai raipha sahlo tei mehmechiá tah a ung sahpaw he hratah ung khe lo, zecawtamaw tatah aaning sahlo cawh batui kaa cahepaw ma hnih naa he seh tatah aa mehme a chiasahpaw a cang he kho. Biahmuisui ka ca ching he, aaning sahlo cawh aa longmai khah a tling teitah aa hmuh thah kho. 17Canghrasala batui naa cahe tihtah naa lu letah sathy a thu la, naa hme a pahleh my lo, 18maco cawngsaw tah batui naa cahepaw ca bi be ca he ka, hmuh khy lypaw naa Paw suitei tah a ca bi he a, taico aparuh teitah tuapaw a hmuhpaw naa Paw taco longmai a ca pae he a.

Vaicung letah cho

(Luk 12:33-34)

19Luichaw le carih tei aa e khynah le mehru tah aparuh teitah a nae tah aa ruh khynah hminghmaw a cangpaw alui lehei naa cho pacung khe o. 20Luichaw le carih tei aa e khy lynah hming le mehru tah hawhthlah tei aa ruh khylynah hming vaicung letah naa chosung cawh pacung hri my lo. 21Zecawtamaw tatah naa chosung a ungnah letah naa lungthing a ung hrá a.

22Meh heh pung cawtah me-ing a cang. Na meh a chah caco, na pungpaluh cawh khainá tah a chih a. 23Canghrasala na meh a chah ly caco, na pungpaluh cawh muiná tah a chih a. Mataico na chung letei khainah cawh a mui caco, na cawtah zetluh a zingkalupaw maw a cang a.

24Aho tahmai abui pahning aa rai hre khy be. Pakheh a hua a ka, pakheh a do a, a cang ly leh pakheh cung letah zingchui tah ung a ka, pakheh khah zetah rei a be. Khazing rai kha, tangka rai kha, hre pakong khy bei ceh.

Naa lung reithui kheh seh

(Luk 12:22-31)

25Macawtaco ka ca ching he, naa hringnah cawtah zemaw kaa e kaa ding a, a cang ly leh naa pung cawtah a buh a sai ruapaw kong letah naa lung reithui kheh seh. Hringnah heh e le ba navy tah sungnaw vy ka, pung heh chaichi navy tah sungnaw vy bei maw? 26Avai letei a zythipaw pavaw sahlo kheh mingtua hmai o. Thleci cing bei he, saze hre hrah bei he, apaang letah rai hrah bei he. Ma cawh naa Paw vaicung leteipaw tah a cong thlang he. Naaning cawh pavaw navy tah a sungnaw vypaw cang bei he ceh maw? 27Naa hrong letah ahomaw a lung reithuinah rawng tah a hringnah cai suimehlang pakheh chang a chahchi khy?

28Taico zecawtamaw chaichi kong letah naa lung rei a thui? Alui letei a cypaw lili pangpa sahlo kheh mingtua o. Rai hre bei he, chaichi a taw bei he. 29Canghrasala ka ca ching he, siangpahrang Solomon hmai ma tluá khei a laisui thlang naná teitah ma pangpa sahlo letei kung kheh tlua khei hmai pasang cang be. 30Vy naaning zingnah a cawngpaw sahlo, atoning ka cy katei, ningthlamong me lang aa bo thlangpaw araang hmai a pasangpaw Khazing taco naaning cawh pasang lytah maw a ca ung he a? 31Macawtaco, ‘Zemaw kaa e a, zemaw kaa ding a, zemaw ka hrei he peh?’ tatah naa lung reithui kheh seh. 32Zecawtamaw tatah ma hapaw hming sahlo cawh lawki cawngsaw sahlo zong tah aa hui teipaw cang hrah ka, naa Paw vaicung leteipaw tah naa hiapaw khah a hni thlang. 33Ma navy co a painah le a dingnah tukhah hui taw la, ma hming vytei zong heh peh na cang thlang a he ceh. 34Macawtaco ningthlamong kong letah naa lung reithui kheh seh, zecawtamaw tatah ningthlamong taco, ama a kong letah ama teitah a lung rei a thui thlang hrá a. Ningkheh cy tahei azaw pawtah lung reithuinah aa chuakhui hrah.

Jelenleg kiválasztva:

MATHAI 6: zyp

Kiemelés

Megosztás

Másolás