Matiyu, echî 6

Nne Obhasi a kâ tóŋe biji

1“Kó ebhú o kâ tóŋe biji se we ó yimá ekpin ka ekpak nji Obhasi a wóme. Ó toŋe biji ka ekpak njí, Obhasi Ńsé owa nnyo a ri ka ósô, á bhó karé wâ ekəp.”#Mat 23.5.

Ka tóŋé biji se ó nyaŋe ntem

2“Nne á ka fon ejûm kən o nyáŋe yê na ńjə́ne, o kâ sə́re ngun ndə́m se ó nyaŋe nne ányo. Nâ noŋ ane áfúbhí á yíma ka óchâm Obhasi na kpe bhaghé mbá ka eték, sê á wóma ane á káre ábho nkat. Deê ń sə́ré ên bəre ta á fon ekəp ábho chénchén ebhú jə́t. 3Kən ájoé ó nyaŋe ntem nnyo a ri ka eket, gyinî ogyiní kpe ntem i ḿbə́ŋé owa o kâ sə́re. 4Deê é jóe ejûm ebhə̂t. Ka ekpak njí, Ńsé owa Obhasi nnyo á yena achot kpe á rî ka ebhə̂t, tîk a káre wâ ekəp.”

Ka tóŋé biji se o kí goré Obhasi

(Luk 11.2-4)

5“Ebhú o kí goré Obhasi, ka yim noŋ ane áfúbhí. Ane áfúbhí á gyíma ka óchâm Obhasi na ndûm éré sê ane chénchén á yén noŋ ábho á góra Obhasi. Deê ń sə́ré ên bəre ta á fon ekəp ábho chénchén ebhú jə́t.#Luk 18.10-14. 6Kən ebhú nji o kí wom ó góre Obhasi, choŋ ka mmon-i-njû enuŋ owa, gyê, o bhâm njû. Gorê mân Ńsé owa, Obhasi, nnyo we ó bhó yen. Ńsé owa Obhasi fə́ne nnyo á yena nji ó yimá ka ebhə̂t, tîk a káre wâ ekəp.

7“Ebhú o kí goré ên Obhasi, o kâ chôt ên etî-etî achot mma á ká fon echî. Nâ noŋ ane mba á ká məŋé Obhasi á yíma, á kera sê otî nchot nâ Obhasi á yugha. 8Ka fóŋé ên ábho, ka Obhasi Ńsé owəné ta a mə́ŋe ejûm nji ó woma kən ta ó bhə́p yê ńjə́ne. 9Deê nne a goré Obhasi ka ekpak njí.

Obhasi Ńsé owəré nnyo a ri ka ósô,

deê mbiŋ eya a fon ekpatə́m ejík.

10Deê otúi obhâ ó bhá.

Deê nji we o wóme,

é jóe ka nsi noŋ é rî ka ósô.

11Karê êt nji e kí di égyé.

12Ri nsôn su obhí mbi e yimî

noŋ êt fə́ne é rik nsôn

e gyiná mbi ane á yíma êt.

13Ka kâm é gyé ka egaé.

Nyáŋe êt, ikom í Satan í kâ fî êt osʉ́ŋ.#6.13 Onwet mbi tat ó kpê Echî é rî sê, mfoné ekumi otúi, na ikom fép, na ekpatə́m ejík í rî ibhâ ka ótúm-ótúm. Áno.

14Nâ é rî sê ó ri ên nsôn o gyíni ên obhí mbi ane á yími ên, Obhasi Ńsé owəné ka ósô a kí ri fə́ne nsôn a su obhə́né eróŋ. 15Kən ájoé ó bhó ri ên nsôn ó gyíni ên obhí mbi ane á yími ên, Obhasi Ńsé fə́ne á bhó ri nsôn a su mbi o yimî ên yê.”#Mak 11.25-26.

Ka tóŋé biji se ó ka njaé ka obhô Obhasi

16“Ájoé o kí ka njaé se ó jíghí Obhasi, o kâ kə̂t na ochî nsôn-ńsôn noŋ ane áfúbhí á yíma. Á jéna á fará na ochî njaé-ńjáe ane á yén sê ábho á ka njaé á jíghí Obhasi. Deê ń sə́ré ên bəre ta á fon ekəp ábho chénchén ebhú jə́t. 17Ájoé o kí ka njaé, su ochî obhâ, o jóme akʉ́ noŋ ó yimá mbôp nnyí. 18Ka kâm ane etat á mə́ŋe sê o ri ágo o kák njaé təm Obhasi átíŋ nnyo a ri Ńsé owa, kən ó bhó yen yê. Yê nnyo a kí yen nji ó yimá ka ebhə̂t, tîk a káre wâ ekəp.”

Mfoné efaŋ é rî ka fan?

(Luk 12.33-36; Luk 16.13)

19“Nne a kâ nôk se yê a gbo efaŋ a ri ka nsi nnyí. Ḿfa ka nsi, oké na ḿfáríkáŋ í kí bhibhi iyîm mbí í káre yê efaŋ. Anyághá-ajʉ̂ á kí gye á jʉ̂.#Jems 5.2-3. 20Kən deê nne a nok a gbo efaŋ nji ósô. Ágo oké na ḿfáríkáŋ í bhó bhibhi efaŋ áji. Anyághá-ajʉ̂ á bhó gye á jʉ́. 21É rî sê, eji ejûm efaŋ ejâ é joé, ḿbə́ŋé eya á joá áfo.

22“Amə̂t á rî noŋ eyâŋ nji é tóŋa biji mbá. Ájoé amə̂t amâ á rî nono, biji ibhâ ndə́m í kí fon ebhát. 23Kən á ro joé, biji ibhâ ndə́m í kí joé ka ejírim. Ájoé mân ejâ ebhát a ri efaŋ í ngun, nâ ekpin ejâ é rî ka ejírim nji é chiŋi obhô.

24“Kpe nne yót nnyo a kí tʉk ásé ábháe cháŋ. A kí kot yót, a mághe yót. A kí karé ḿbə́ŋé eye mbâ yót, a kêp yót fóŋ. Ó bhó joé ḿgbán o káre Obhasi, o jóe o káre efaŋ í ngun ka ebhú jə́t.”

Maghê ên ḿbə́ŋé efíním ka efaŋ í ngun, kêp ên Obhasi ka ochî

(Luk 12.22-31)

25“Nâ echî n kí səre ên bəre nne a kâ káre biji oseŋe ka ejûm nji a kí di na nji a kí gwo kən a fon ekpin. Nne a kâ káre biji oseŋe ka nji a kí kak ka biji. Njə́n nji é chíŋi ochíŋ, ekpin kən édî, biji kən ḿfô? 26Yuŋ ên kpá amə̂t, kép ên nnón mmi ḿ fə́bha ka ósô, édî á bhó kpaŋ kən á fʉ̂, á ká fon eji nji sê á chúi édî á kí. A ri Obhasi Ńsé owəné nnyo a ri ka ósô nâ á gyek ábho. We mân na nnón ámi, nne nnyo a faŋê a chíŋi ntem nâ énê? 27Ka oseŋe mbi ó kará ên áno biji, énê owəné nnyo ofú ekʉ̂ obhê ó si, a bhîk ekpeém ofú bhə́t?

28“Jen nji o kí karé ên biji oseŋe ka nchot i ḿfô? Kêp ên mfem nnyi á kua ka ajé etə́m. Ntûm á bhó yim. Ḿfô á bhó yim. 29Kən deê ń sə́ré ên bəre kpe Soromon na njok efaŋ ejê, á ka fon ḿfô nnyi a nobhê a sî mfem nnyí.#1 Atúi 10.4-7; 2 É fâp 9.3-6. 30Obhasi nâ á sobhá ajé ka etə́m. Ajé mma, égyé á rî mfá, ójô á kpo, á kak ngûn á righi. Ájoé Obhasi a kí sobhe ajé ka ekpak njí, ó kere ên mân sê tîk á bhó sobhé ên a? Jen nji ó bhó ki ên ḿbə́ŋé sê Obhasi tîk a yîm noŋ a chorê?

31“Ájoé ó ki ên ḿbə́ŋé na Obhasi, o kâ kpô karé biji oseŋe ka nji o kí di ên na nji o kí gwo na nji o kí kak ka biji? 32Ḿfa nâ mfoné-mfoné íkíkéré mfi ane mba á ká ki ḿbə́ŋé na Obhasi. Kən ên, Obhasi Ńsé owəné ka ósô a mə́ŋe se o ri ên ka eket iyîm mbí chénchén. 33Nâ deê ó nót ên kpá otúi obhê na ekpin ka nnyen-i-mbá, tîk yê a káre ên chénchén iyîm mbí. 34Ka kúmi ên mân o kérá ójô-ójô. Ójô ábhi ó fon ifê íkíkéré. Kpe bhaghé ofú ngun ó fon amê achot mma á bhíghi na ḿbə́ne.”

Jelenleg kiválasztva:

Matiyu, echî 6: ETUNT

Kiemelés

Megosztás

Másolás