MARCOS 1

1Nu gaṉle laa naa csilo gzodiidz naa, miṉe beeṉ Jesús, Meṉ ne bneele Dios cxeeḻ me lo guidzliu.

2Lo guits ne pquiaa Isá, tib meṉ ne biadteed xtiidz Dios padzeela, lo co zhobnee gaṉle ible laa Dios no cxeeḻ me. Rneew, glo cxeeḻ me tib zha ne tedner, guiaadnie diidz. Znu zhobnee lo guits co:

Sxeḻ naa tib zha ne tedner lo luu,

zeeṉa zha co gzhixcuaa nëz ne ted luu.

3Dan tso zho,

zon miech zeeṉe laa tsi zho zëëb gnee zho:

“Goḻzhixcuaa nëz ne ted meṉ ne rnabey,

goḻsaan grë guieḻntseeb ne ruṉ to.”

4Ni nligaa scase goca, zeeṉe laa Juan Bautist biaad, dan bio me rchoobnis me miech; rnee me lo zho csaan zho xquieḻntseeb zho gbig zho lo Dios, ni chobnis zho, zeeṉa csilaa Dios zho lo grëtaa xtoḻ zho. 5Dzigo rriee miech grë guiedz ne ngab Judé, dib lad guiedz Jerusalén, riequiaadiag zho zhiwseed me; ni rxobdoḻ zho grë xtoḻ zho, dzigo rchoobnis me zho leṉ guiubee Jordán.

6Guits lad camell niaa xab me, ncuaaṉe rzhidoo leṉ me guid niaaw ni niapse nguzhanch ni dzin dan row me. 7Zeeṉe rseed me grë miech co, rnee me lo zho:

―Iraa ziaad meṉ ne mazdraa non lo naa. Teḻ naa peet nond naa, tib guieḻnzaac nroob ga ygaa naa teḻne niaca miṉe grieelo maase lab me glit naa; per na ni miṉ co rdziṉd naa. 8Laa naa rchoobnis to niina con nis; saṉgue me con Espíritu Sant cchoobnis me to.

Brobnis Jesús

(Mt. 3:13‑17; 4:1‑17; Lc. 3:21‑22; 4:1‑15)

9Leṉ ngbidz coquew, laa Jesús briee guiedz Nazaret xtan zha Galilé, güey me pchoobnis Juan me leṉ guiubee Jordán. 10Laa me norieedze lo nis, zeeṉe goṉ me laa zhan gbaa bzhial, laa meṉ ne nac Espíritu Sant biet gbaa zig tib palom laa me ziad-zëëb guic me. 11Ni lëëtaque zëëb tib tsi meṉ co gbaa, rnee me:

―Xin, rleynie naa luu goṉ, nziuu luu lo naa.

12Zeeṉe blozh brobnis me, dzigo güeynie Espíritu Sant me tib dan ngan, zaatne no grë ma ntseeb; 13bio me ga choo ngbidz. Ga no me güey Satanás (ma ne rnabey lo grëse meṉdox), gocladz ma niuṉgüet ma me.

Bdedse ga, güey grë xanjl Dios güeygaṉ zho me.

14Leṉ ngbidz co bnabey Herod bio Juan ladzguiib. Ladzguiible no Juan zeeṉe briee Jesús güeyted me grë guiedz ne ngab Galilé güeyseed me miech Xtiidz Ndzon Dios, 15rnee me lo zho:

―Laa dze ne gnabey Dios ziaadgaxle, laaw bdziṉ dzele. ¡Goḻsaan grë xquieḻntseeb to, goḻnab perdon lo Dios; dib zdoo to goḻliladz Xtiidz me!

Tap zha ne quia gooz meḻ

(Mt. 4:18‑22; Lc. 5:1‑11)

16Tib dze zieded Jesús ro Nisdoo ne lë Galilé, goṉ me laa Simón grop Ndrés quia gooz meḻ lo nis co; sac ible dziin co nac xtsiiṉ zho. Grop bets zho laa zho noroṉ guiex ne rgaa meḻ lo nis. 17Dzigo bredz me zho, rëb me lo zho:

―¡Goḻtë, goḻtënaḻ zhits naa! ¡Laa naa cxeḻ to tsie to stib gooz, tsietop to grë miech ne sëëb xnëz Dios!

18Horcogazh psaṉ zho guiex ne rnaaz zho meḻ ga, laa zho zienaḻ zhits me.

19Zhisaque bzë Jesús ro nis co, goṉ me laa Jacob ni Juan no tib leṉ barcw noquiaabdie zho guiex ne rnaaz zho meḻ, lëë grop xingan Zebedé ga; 20dzigo bredz me zho. Zigne bredz me zho, zoque Zebedé lo barcw ga grë xmoz Zebedé, laa zho zienaḻ zhits me.

Tib mgui ne nosacsi meṉdox.

(Lc. 4:31‑37)

21Laa zho bdziṉ guiedz ne lë Capernaum. Zeeṉe goḻ dze ne rdziiladz zho lo dziin nëz Israel, güey Jesús yadoo win ne zob lad guiedz co güeyseed me miech. 22Grë miech ne ndxie leṉ yadoo ga, rzee zdoo zho raṉ zho zha rnee me, sac rlu meṉ rnabey nac me; led yed me rseed zigne rseed grë zha ne nac maistr ley.

23Lad grë miech co no tib mgui ne nosacsi meṉdox, tibaque zeeṉe nguiedz pcooptsie ma mgui, 24rnee ma:

―¿Pe guṉ luu no Jesús Nazaren? ¿Ziaad luu lëë par gnitlo luu no? Ruṉbey naa luu, tib meṉ peet xtoḻd nac luu ni Dios pxeeḻ luu.

25Dzigo goctox Jesús lo ma, rëb me:

―¡Psioog ro luu! ¡Na zeeṉa psaan meṉ qui!

26Horco masaque beeṉcxidz ma mgui co, ni rquiaadan ma redz laa ma psaan mgui. 27Grëse miech ne ndxie ga, bzee zdoo zho rnabdiidzlsa zho rnee zho:

―¿Bay cho nac meṉ qui? ¡Wseed cub i goṉ ziaadnie me! ¡Rlu zha rnabey nac me, zha haxta meṉdox rdzieb zeeṉe ractox me lo ma!

28Znuse brieets bliaaḻ diidz zha beeṉguiac Jesús mgui co; grëse guiedz ne ngab Galilé gocnaṉ miecha.

Biac xniadzoop Simón Pedr

(Mt. 8:14‑17; Lc. 4:38‑41)

29Ga briee Jesús güey me lidz Simón grop Ndrés gza me Jacob ni Juan. 30Bdziṉ zho, lëëtaque laa xniadzoop Simón nix rlan xlëë, nacne rëb zhow lo me. 31Dzigo bded me zaatne nix zhuz co, bzheṉ me nia me, blische me me. Horcogazh laa zhixlëë me blëz, guche me ga psilo me beeṉlo ncuaaṉe dow zho.

32Ziedzele dzew, laa ngbidz rzëëblew, zeeṉe psilo grë miech co zo zo rdziṉnie zho grë meṉ rzacnë, grë zha ne nosacsi meṉdox ne; bioogse ro yu co ndxie miech. 33Zootle zig grëse miech ne no lad guiedz co pcaalsa ga.

34Ndal grë meṉ rzacnë co zhaase zhaase guieḻguidz ne rzac zho, per beeṉguiac Jesús zho; zha ne nosacsi meṉdox, beṉcxooṉ me grë meṉdox ne nosacsi zho. Goctox me lo ma, ib bdeete me diidz nee ma cho nac me, sac ruṉbey ma me.

Pseed Jesús miech Galilé

(Lc. 4:42‑44)

35Silgaw, scase bii ncow rnaw guche Jesús briee me lad guiedz co, güey me zaatne guieṉdraa miech, güeyzodiidznie me Dios. 36Zeeṉe rnit me choot guieṉd; dzigo briee Simón ni zla zha ne nacgza Simón güeyguib zho me. 37Zeeṉe bdziel me, rëbchaa zho lo me laa grë miech co quiaguible me.

38Dzigo pquiab me rëb me lo zho:

―¡Sca ye! Per ib laa ne none goṉ guio grëraa guiedz ne ndxie dib gax nu, zeeṉa ye grë guiedz qui gnee naa Xtiidz Dios lo miech; sac ible miṉ co pxeeḻ me naa ziaḻ naa lo guidzliu.

39Dzigo güey zho grëse guiedz ne ngab Galilé. Zaatne rdziṉtaa zho, rie me grëse yadoo win ne zob lad guiedz rseed me grë miech co Xtiidz Dios, ni ruṉcxooṉ me grë meṉdox ne nosacsi miech.

Biac tib mgui ne rlan lepr

(Mt. 8:1‑4; Lc. 5:12‑16)

40Tib vuelt, wbig tib mgui ne rlan guiedzdox ne lë lepr lo Jesús (masaque riaaḻ dipse guid lad mgui), pquiitsgzhib mgui lo me, rëb mgui:

―Tebaa siguieeḻ luu guṉguiac luu naa.

41Pquia zdoo Jesús mgui, pxobnia me guic mgui rëb me:

―Zuṉguiac naa luu. ¡Niinagazh laa luu guiaaṉmbe!

42Zigne sca bnee me laa mgui co biac, mbese biaaṉ xcuerp mgui. 43Blozh ga bzonëz me mgui, ni pso me diidz lo mgui 44rëb me:

―Bina gaṉle, choot lo gzodiidzd luu goṉ zha biac luu. Bzë, güey lo pxoz, güeysaṉ gon ne rnabey xley Moisés gdeed luu; zeeṉa gaṉ zho gaṉle laa luu biacle.

45Ni zigne briee mgui ga, psilo mgui grë lo miech bzodiidz mgui zha biac mgui. Grëse miech gocnaṉa, nacne brieelodraa neṉlo ndziṉ Jesús grë lad guiedz co. Miṉe beeṉ me, blëz me zaatne choot miech guieṉd; per niicle scaw, miech guizhiu ne rriee grë guiedz co rdziṉ lo me.

Jelenleg kiválasztva:

MARCOS 1: zpm

Kiemelés

Megosztás

Másolás