मर्कुस 6
6
नासरतनाइ येसुलाइ बिस्वास बइगर्लाइ
(मति १३:५३-५८; लुका ४:१६-३०)
1ह्व ठउँ छाडिके येसु आफि हुर्किल सहर नासरतनाइ फर्किले। येसुराइ चेलालत पुनि सँगिन जाइला। 2बिस्राम-दिननाइ येसुन सभाघरनाइ सिछ्या देइ लाग्ले। येसुकर सिछ्या सुनिके धेराइ मान्छेलत छक्क पर्तिन इत्तिके बाजइ लाग्ला, “ह्य मानुसिन इन्खा कुरो कछ्यान सिक्ले? हेइनिन पाइल बुद्दि किन्खा हो? किनिखे इन्खा अचम्मकर काम हेइनिन गरइ सक्छइ? 3ह्य होइ मरियमकर बेटाक काठे कर्मि बया र? केति ह्य याकुब, योसेफ, यहुदा र सिमोनकर दाजेक बया र? हेक्रि बइनेकलत पुनि ता हाइसिन ने आछत!” इत्तिके होल्किन येसुलाइ तुच्छ ठान्ला।
4अनि येसुन होल्काइ बल्-ल्याक,“अगमबक्ताकाइ आफ्ने गाउँ, आफन्त र परिवारकिन बाएक सेब्बे ठउँकराइ मान्छेल्किन आदर गर्छत।”#युह ४:४४
5उछिराइ मान्छेल्को बिस्वास बइहक्ल हुदान येसुन उछिका केइ बिरामिल्काइ मात्र आफ्ने हात धरिके बिसेक पार्नार काम बाएक आने कुनइ अचम्मकर काम गरइ बइसक्ले। 6होल्किन बिस्वास बइगर्ल देखिके येसु छक्क पर्ले।
येसुन बार चेलाल्काइ पर्चार गरइ पाठाइल
(मति १०:५-१५; लुका ९:१-६)
अनि येसु गाउँ-गाउँनाइ जाइके मान्छेल्काइ सिकाइतिन हिन्ले। 7येसुन आफिन छान्लाइ बार चेलाल्काइ बालाइके भुत आत्मा निकाल्नार सक्ति र अधिकार दिके होल्काइ दुइ-दुइटाइ गरिके पाठाइल्याक। 8अनि येसुन होल्काइ आग्या दिल्याक,“बाटकर लागि टेक्नार लउरि बाएक आने केइ जुनबोको, न ता खाइनार कुरो, न ता झोला, न ता पट्कानाइ पइसा किछुनि जुनबोको। 9जुत्ता लाओ, तर आने फेर्नार लुगा जुनबोको।” 10येसुन होल्काइ अजइ बल्-ल्याक,“कुनइ गाउँनाइ पुग्तिन तोरा जुन घरनाइ पोस्छो, ह्व गाउँ नछाडुन्जेलसम्म होइ घरनाइ ने बसइ। 11यदि कुनइ ठउँनाइ पुग्तिन मान्छेल्किन तोराल्काइ स्वागत बइगर्ला र तोराल्को कुरो सुनइ बइमान्ला भने, ह्व मान्छेल्काइ परमेसोरिन गर्नार न्यायकर दिननाइ साछि देइलाइ पइतलाकर धुलो टकटकाइकइ ह्व गाउँलाइ छाड्देइ।”#लुक १०:४-११; पे १३:५१
12ह्व पछि चेलालत जाइला अनि मान्छेल्काइ, “आ-आफ्ने पाप मानिलिके छाडो” बाजिके पर्चार गर्ला। 13होल्किन धेराइ मान्छेल्कोबान भुत निकाल्ला र धेराइ बिरामिल्काइ तेल लाइके बिसेक पार्ला।#याकु ५:१४
बप्तिस्मा दिनार युहन्नाकर मिर्त्यु
(मति १४:१-१२; लुका ९:७-९)
14येसुकर चर्चा चारेदिस फइलिल हुदान हेरोद राजान पुनि येसुकर बारेनाइ सुन्ले। कत्ताल्किन बाज्तेला, “बप्तिस्मा दिनार युहन्ना मर्लबान जिउँते हक्लसइ, होइहुदान हेइनिन सक्तिसालि कामलत गर्छइ।”
15तर आनेल्किन बाज्ला, “ह्य ता एलिया हो।”
र अजइ आनेल्किन बाज्ला, “ह्य ता उइलेकर अगमबक्तालत जिन्खाए एक अगमबक्ता हो।”#मति १६:१४; मर्क ८:२८; लुक ९:१९
16ह्य कुरो सुन्ल पछि हेरोदिन बाज्ले, “ह्य ता युहन्ना ने हो। हेक्र कापाल ता मुइनिन काटइ लाइल हो, तर ह्य मर्लबान फेरि जिउँतिलसइ!” 17हेरोदिन आफ्ने भाएक फिलिपकरि बोहेक हेरोदियासलाइ ब्याहा गर्ल रइल। होइनिन हेरोदियासकर कारनिन युहन्नालाइ आठाइके झ्यालखन्डनाइ थुन्ल रइल। 18किनारइभने युहन्नान हेरोदलाइ बलि धर्तेल्ति, “परमेसोरकर नियम अन्सार आफ्ने भाएरकरि बोहेक धरइ मजार बया।”#मति ४:१२; लुक ३:१९-२०
19होइहुदान हेरोदियासिन युहन्ना उप्रान इख धर्लि रइलि, र होलाइ मारइ चाइतेलि, तर होइनिन सक्लि बइरइलि। 20किनारइभने युहन्ना धर्माति र पबित्र मानुस हो बाजिके हेरोदलाइ था रल्ति, अनि हेरोद डाराइतेल होइहुदान युहन्नालाइ सुरछित धर्ल रइल। युहन्नाकर सिछ्या सुन्तिन हेरोदकर मननाइ छट्पटि हक्तेल्ति, ता पुनि खुसि हकिके सुन्तेल।
21एक दिन हेरोदिन आफ्ने जन्म दिननाइ बड्खो भोज लाइल रइल, ह्व भोजनाइ मन्तिरिलत, सेनापतिलत र गालिल पर्देसकराइ मुख्य-मुख्य मान्छेल्काइ बालाइल रइल। ह्य समय हेरोदियासलाइ बदला लिनार मउका मिलल्ते, 22जब हेरोदियासकरि आफ्ने बेटेक भित्र आइके नाच्लि। तब होक्र नाच देखिके हेरोद र होक्र सेब्बाइ पाउनालत खुसि हक्ला। होइहुदान राजान होलाइ बलल्ते, “तुइलाइ जे इछ्या लाग्स्यास ह्व माग मुइ तुइलाइ दिनारआछु।” 23राजान कसम खाइतिन बाज्ले, “तुइनिन मोर आदा राज्य माङ्तिन पुनि मुइ तुइलाइ दिनारआछु।”
24अनि होइनिन बाइर निस्किके आमेकलाइ सोद्लि, “आमा मुइ केति मागु?”
आमेकिन बलल्ते, “बप्तिस्मा दिनार युहन्नाकर कापाल माग।”
25ह्व झ्वाट्टइ राजा हक्लनाइ जाइके बाज्लि, “मुइ चाइछु, अखय ने बप्तिस्मा दिनार युहन्नाकर कापाल काटिके थालनाइ देउ।”
26ह्य सुनिके राजा एकदम दुखित हक्ले, तर राजान भोजनाइ आइलाइ पाउनाल्को अगाडि कसम खाइके दिछु बल्ल कुरो बइदिउ बाजइ बइसक्ले। 27होइहुदान राजान झ्वाट्टइ एउटो सिपाइलाइ युहन्नाकर कापाल काटिके आन्नार हुकुम गर्ले। अनि होइनिन झ्यालखन्डनाइ जाइके युहन्नाकर कापाल काट्ले, 28तब कापाल थालनाइ धरिके छुनेनिलाइ दिल्ते, र छुनेनिन लाकाइके आफ्ने आमेकलाइ दिल्ते। 29जब युहन्नाराइ चेलाकिन ह्य कुरो सुन्ला अनि होलत आइके युहन्नाकर लास लाकाइके चिहाननाइ गड्काइला।
येसुन पाँच हजारकाइ ख्वाइल
(मति १४:१३-२१; लुका ९:१०-१७; युहन्ना ६:५-१३)
30बार पेरितलत फर्किके आइल पछि येसु हक्लनाइ जम्मा हकिके आफिन गर्ल र सिकाइल सेब्बे कुरो येसुलाइ सुनाइला। 31अनि येसुन होल्काइ बल्-ल्याक,“हाइ एकान्त ठउँनाइ जाइके केइ समय थाकाइ मारु।” किनारइभने उछिका धेराइ मान्छेलत आइनार जाइनार गर्तेला, होइहुदान होल्किन मजसिन खाइसम्म फुर्सद बइपाइला। 32होइहुदान होलत लाउनाइ चडिके सुटुक्क एकान्त ठउँनाइ जाइला।
33तर धेराइ मान्छेल्किन होलत जाइधर्ल देखिके धेराकिन चिन्ला, अनि सेब्बे सहरबान मान्छेलत होलत जाइलाग्ल ठउँनाइ कुत्तिन जाइला र होलत भन्दा अगाडि ने उछि पुग्ला। 34जब येसु लाउबान झर्ले उछिका येसुन मान्छेल्को बड्खो भिड देख्ले, र येसुकर मन दयान भरल्ते। किनारइभने होलत गोठ्ला बिनाकर भेडि जिन्खाए रइला। तब येसुन होल्काइ धेरइ कुरो सिकाइ थाल्ले।#गन्ति २७:१७; १रा २२:१७; २इति १८:१६; इज ३४:५; मति ९:३६ 35जब घाम अस्ताइ लाग्ल रल्ति तब चेलालत येसु हक्लनाइ आइके बाज्ला, “ह्य एकान्त ठउँ आछि, र साँझ परइ लागि सकल्ते। 36हेल्काइ बिदा दिखन, र होलत नजिककर गाउँनाइ जाइके केइ किनिकइ खाइदिखन।”
37तर येसुन चेलाल्काइ बल्-ल्याक,“तोराल्किन ने हेल्काइ केइ खाइ दिखन।”
तर चेलाल्किन येसुलाइ बल्ला, “केति हाइनिन दुइ सय चाँदिर सिक्काकर पिठो किनिकइ हेल्काइ खाइ दिनार र?”
38येसुन होल्काइ बल्-ल्याक,“तोराल्कोसिन कइटो पिठो आछि? जाइके हेरो।”
हेरि सक्ल पछि आइके होल्किन बाज्ला, “पाँचुटो पिठो र दुइटि माछ।”
39अनि येसुन मान्छेल्काइ हरियो चउरनाइ समुह-समुहनाइ बस्नार आग्या दिल्याक। 40अनि होलत सय-सय र पचास-पचासकर समुहनाइ बस्ला। 41जब येसुन पाँचुटो पिठो र दुइटि माछ लिके स्वर्गदिस हेर्तिन परमेसोरलाइ धन्नेबाद दिल्ते र ह्व पिठोलाइ भाचिके टुक्रा पार्ले, तब होल्काइ बाड्दिखन बाजिके चेलाल्काइ दिल्याक र ह्व दुइटि माछ पुनि येसुन सेब्बाल्काइ बाड्दिल्याक। 42अनि सेब्बाल्किन आघाउन्जेल खाइला। 43चेलाल्किन उघ्रिल माछ र पिठोकर टुक्रालत जम्मा गर्तिन बार डालो उठाइला। 44उछिका पिठो खाइनाराइ अडेलत मात्र पाँच हजार रइला।
येसु पानि उप्रान हिन्ल
(मति १४:२२-३३; युहन्ना ६:१६-२१)
45अनि येसुन तुरुन्तइ चेलाल्काइ लाउनाइ चडाइकइ आफि भन्दा अगाडि तालकर पारपटि बेथसेदा पाठाइल्याक। आफिचाइ भिडकाइ बिदा देइलाइ उछि बस्ले। 46होल्काइ बिदा दिसक्ल पछि येसु पार्थना गरइ डाँरानाइ जाइले। 47रात पर्तिन लाउ तालकर माजनाइ रल्ति। येसुचाइ एक्ले तालकर छेउनाइ रइल। 48चेलाल्काइ लाउ ख्याइलाइ गारो हकिधर्ल येसुन देख्ले, किनारइभने बातास होल्को बिपरित दिसाबान चल्ल रल्ति। ब्यान तिन बजेदिस येसु पानि उप्रान हिन्तिन होलत हक्लदिस आइले र होल्काइ उछनिकइ जाइ आँट्तिन 49चेलाल्किन येसुलाइ पानिउप्रान हिन्ल देखिके भुत आइले बाजिके चिच्याइ लाग्ला। 50किनारइभने होलत सेब्बाइ येसुलाइ देखिके डाराइलाइ रइला।
तुरुन्तइ येसुन होल्काइ बल्-ल्याक,“जुनडाराओ! मुइ हो, आँट गरो।” 51अनि येसु होल्को लाउनाइ चड्ले र बातास पुनि रोकिहालल्ते। ह्य देखिके चेलालत एकदम छक्क पर्ला। 52येसुन पाँच हजारकाइ पिठो ख्वाइल देखिके पुनि होल्किन बुजइ सक्लाइ बइरइला, किनारइभने होल्को मन कठोर रल्ति।
गनेसरेतनाइ येसुन बिरामिल्काइ बिसेक पार्ल
(मति १४:३४-३६)
53होलत तालकर पारपटि गनेसरेतनाइ पुग्ल पछि लाउलाइ छेउ लाइला। 54अनि होलत लाउबान निस्किला उत्तिने खेर मान्छेल्किन येसुलाइ चिनिहाल्ला, 55होइहुदान होलत वरिपोरिकर गाउँनाइ कुत्तिन जाइके येसु आइल खबर फइलाइला। अनि मान्छेल्किन बिरामिल्काइ ओछ्याने सुदा बोकिके येसु हक्लनाइ आनइ लाग्ला। 56गाउँ, सहर, बस्तिनाइ जछि-जछि येसु जाइतेल उछि-उछि ने मान्छेल्किन बिरामिल्काइ लाकाइतेला। अनि बिरामिल्किन येसुकर लुगाकर फुर्का मात्र हक्तिन पुनि छुइ पाउ बाजिके बिन्ति गर्ला र जत्ताल्किन छुइला होलत सेब्बाइ बिसेक हकिहाल्तेला।
Jelenleg kiválasztva:
मर्कुस 6: MAJH
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2024 (Active), Mother Tongue Translators Society and Wycliffe Bible Translators, Inc. All rights reserved.
