Luka 11

Yesu ákangirisa ebanafunzi bai ekwéma Ongo

(Mat 6:9-13; 7:7-11)

1Lusuku luuma, Yesu ábaa émera mu chisiki chiuma. Ábere era àmalaa kwéma, muuma mwa banafunzi* bai era kumubura mbu: «Yowani Mubatisayi ákangirisaa ebanafunzi* bai ekwéma Ongo. Rero nao, Enawetu, ùtukangirisaa ekwéma.»

2Yesu era kubabura mbu: «Mango mwéma Ongo, bacha ku mundaa mwáteta:

«‹Tata, esina lyao líye ngulu!

Ebwimi bwao bubáhaa!

3Úndaa wátweresa ebiryo byetu bya chira lusuku.

4Úndaa wátubabalira ebibi byetu,

bushi netu twénde twábabalira boshi ba bàtuiririre emabi.

Uténdaa wáreka twěngirire mwa muereko.›»

5Kanji Yesu era kubura ebanafunzi* bai mbu: «Tutólaa ono muanyi: Mundu muuma mwa kachi-kachi kenyu àngaba éte mwira wai. Oyu mwira, ánamuendera kachi-kachi ka butufu na ámubura mbu: ‹E mwira wanyi, unyênjika mikati ehatu, 6bushi mwira wanyi muuma àikire, naínyire ne'kalyo ka nyìngamwêresa.› 7Akaba oyu ùli mwa nyumba àngamwǎkula mbu: ‹Unyíkulaa kwe'mufubya tulo! Nachíngire elwisi mira. Kanji nyono ne'bana banyi twàonjire mira. Ndàngachiala kwîmuka nyikwêrese emikati.› 8Nábabura kwa chiro mbu àtangemuka àmwêrese'i bushi análi mwira, si àngemuka anámwerese byoshi bya áhonda bushi ne'kuchànda kwai.

9«Nanyi nábabura: Mundaa mwéma, eri mwèresibwa. Mundaa mwáhonda, eri mwàbona. Mundaa mwákongota, eri babáboorera elwisi. 10Bushi chira mundu ola wěma, iwénde wêresibwa. No'la wáhonda, iwénde wábona. No'la wákongota, i'bénde bábooerera elwisi. 11Nde eshe we'mwana mu'mwabo, ola muala wai àngěma efi ánamweresa enjoka? 12Nesi ola muala wai àngěma ei ánamweresa engùtú? 13Chiro mbu mutúla babi, si mutúla mwìshi kwêresa ebana benyu ebindu bya bikomire. Rero Eho wenyu ola ulí kwa nguba, kute àngafundwa kwêresa ba bénde bámwěma eMuchima Mubuya-buya?»

Yesu âmbula echihwasi

(Mat 12:22-30; Mar 3:22-27)

14Lusuku luuma, Yesu ábaa âmbula echihwasi cha chábaa cháhubise mundu muuma kuba musuru. Mango echi chihwasi chátengaa kwo'yu musuru, unao-unao era kutangirisa áteta. Eluamba lwe'bandu lwera kusanwa busese. 15Si bauma mwa'bu bandu, bera kutangirisa báteta mbu: «Oyu mundu, emukulu-kulu we'bihwasi mbu i'Belisebuli iwénjire wámweresa ebuashi bwe'kwâmbula'bi!» 16Ne'banji bábaa báhonda bamúteye mwasi. Bera kumwěma mbu àbaíriraa chisomerano chiuma cha chátenga kwa nguba.

17Si Yesu ábaa àmenyire emianyisa yabo. Era kubabura mbu: «Akaba bandu ba bwami buuma bàngalwa beine kwa beine, eri obu bwami bwàhandukere. Na akaba bandu ba ngumo nguma nabo bàngalwa beine kwa beine, ei ngumo kuika ináhandukale. 18Rero, akaba Wamusimu nai àngachílwisa yeine, kute ebwami bwai bùngachîmanga? Nàtechire bacha, bushi mwàtechire mbu nénjire nâmbula ebihwasi kwa buashi bwa Belisebuli. 19Akaba nénjire nâmbula ebihwasi kwa buashi bwa Belisebuli, rero ebana benyu nabo bénjire bâmbula'bi kwa buashi bwande? Bushi no'ku, abu bana benyu beine bu bakánabachinjibusa. 20Si nyono, akaba kwa buashi bwa Ongo ku nénjire nâmbula ebihwasi, kukuteta mbu eBwami bwa Ongo* bwàbaikirire mira.

21«Mango emunyake ola wéte echikaya che'kulwa álanga enyumba yai, ebikulo byai byénde byálangibwa kubuya. 22Si akaba unji munyake kumurenza àngaika kumutabalira na ámuima, a aola ánere ámunyaa echi chikaya abáa àlangalire, na kuaba ebindu byoshi bya àmunyáaa.

23«Ola utáli kwa lunda lwanyi, eri àli murenda wanyi. No'la ùtanyiasa kulunda-lunda, eri kuhandabanya ku áhandabanya.»

Ekufuluka kwe'chihwasi mwa mundu

(Mat 12:43-45)

24Yesu era kuendekera áteta mbu: «Mango echihwasi chénde chátenga kwa mundu, chénde chaya kuuna-una mwa buyeye*. Chénde chába cháhonda ala chìngatamukira. Chítabonyire'o, chánere cháteta mbu: ‹Nyingáfuluka mwa nyumba yanyi era nátengeraa'mo.› 25Mwa kuika'mo, chánabúana ìbisibwe na kukunganyisibwa kubuya. 26Bushi no'ku, echi chihwasi chánere cháya kureta binji bihwasi birinda bya bìbiire busese kurenza'chi. Byoshi byánêgirira mwe'i nyumba na byáchěkalira'mo. Oyu mundu ánere ába kubi busese kurenza kwa abáa àli lyebere.»

Ekuáhanyirwa kwe'kanangana

27Ábere Yesu anáchiri áteta ei myasi, mukasi muuma mwa luamba lwe'bandu era kuteta na murenge munene mbu: «Emukasi ola wákubutaa ne'kukonza aáhanyirwe!» 28Si Yesu era kwǎkula mbu: «Ba bǎhanyirwe kanangana, bàli ba bénde bômva eChinwa cha Ongo ne'kuira kwa chìtechire.»

Ebandu báhonda balósibwe kalorero

(Mat 12:38-42)

29Mango bandu banene bábaa bera báchilunda ofu na Yesu, era kutangirisa áteta mbu: «Ebandu be'sine suku bàli babi! Bénjire báhonda balósibwe kalorero. Si kutali kalorero ka bangálosibwa, kureka ekalorero ka murebi* Yona. 30Yona ábaa kalorero ku besha Ninawi.#11:30 Somaa Yona 3:3-5. Nanyi nyi Mwana we'Mundu, kuno'ku ku nyingánaba kalorero kwa bandu be'sine suku.

31«Kwa lusuku lwe'buchinjibusi, Mwamikasi kutenga kwa lunda lwera bufuli#11:31 Somaa 1 Bami 10:1-10. àkômokera kuuma nenyu mu bandu be'sine suku kwa kubasitaka. Bushi yeke átengeraa burerere busese àya kûmvirisa kwa myasi ye'bwenge ya mwami Solomono. Rero, anola àli ola ulí mukulu-kulu kurenza Solomono!

32«Mango olu lusuku lwe'buchinjibusi lukáika, besha Ninawi nabo bakômokera kuuma nenyu mu bandu be'sine suku kwa kubasitaka. Bushi beke mango bômvaa kwa myasi era Yona áhubanganyisaa'bo, bera kubinduka kutenga mwa bibi byabo. Rero, anola àli ola ulí mukulu-kulu kurenza Yona!»

Emeho li'tara lye'mubiri

(Mat 5:15; 6:22-23)

33Yesu era kuhuba kuteta mbu: «Kutali mundu ola wénde wákoresa etara chasinda ánalibisha, nesi ánalifunyikira ne'chitonga. Si énde ábika'li kwa kakondo, chasiya ebandu ba bêngira mwa nyumba balóle kwa bulangare. 34Emeho li'tara lye'mubiri. Akaba emeho mao machíri màtungenene, emubiri wao woshi ánaba mwa bulangare. Si akaba emeho mao màngalaka, emubiri wao nao ánaba mwa musimya. 35Bushi no'ku, ùchilanga-langaa, chasiya ebulangare bwa bùli mwa ndanda sao bùtabindukaa kuba musimya. 36Rero akaba emubiri wao woshi àli mwa bulangare busira chiro na chitera cha chìri mwa musimya, oyu mubiri wao woshi àngaba mwa bulangare kanangana, ngo'kwa etara lyénde lyákulomekera kurengera ebulangare bwa'li.»

Ebubi bwe'Bafarisayo ne'bakangirisi be'Mwaso

(Mat 23:1-36; Mar 12:38-40)

37Ábere Yesu era amálaa kuteta ei myasi, Mufarisayo* muuma era kumubura mbu abáhaa kulya kwa biryo mwa mwai. Yesu era kwêngira mwa nyumba, na ékala álye. 38Oyu Mufarisayo*, era kusanwa mwa kulola kwa Yesu álya busira kwôwa kukulikana ne'myanya yabo.

39Enawetu era kumubura mbu: «Mwabo mu'Bafarisayo* mwénde mwálonga emuongo we'ngumbu ne'we'mbare. Si mwa michima yenyu mutúla mwehwíre ebuhuma-huma bwe'bwisi ne'manji mabi. 40Mwabo mutúla mbuta! Mùteshi kwo'la wábumbaa emuongo, iwábumbaa ne'ndanda? 41Mundaa mwáasa ebakene ne'bindu bya bìri mwe'si ngumbu, nesi bya bìri mwe'si mbare. Aola, ebinji byoshi bingánakomisibwa* ku mwabo.

42«Mùli bânya, mu Bafarisayo*! Mwénde mwâna echiuma che'kumi che'hoo ne'sheya, nesi cha chisi nyanyi, si mwénde mwákena ekuíra bya bìtungenene na kukena kusima Ongo. Rero, ebyera bi mwabáa mwěmire kunde mwáira, busira kureka kunde mwâna echiuma che'kumi che'bi binji byoshi.

43«Mùli bânya, mu Bafarisayo*! Mutúla musimire kwíkala kwa bifumbi bye'ra muhondo mwa mashenge menyu me'Bayuta*. Kanji mutúla musimire kunde mwákesibwa ne'tunda mwa bisiki bye'nyibuanano. 44Mùli bânya! Mutúla nga shinda sa sitéte kalorero, sa bandu bénde bálambaira'ko busira kumenya.»

45Muuma mwa bakangirisi be'Mwaso* era kubura Yesu mbu: «Mukangirisi, netu wàtukambire mwa kuteta bacha.»

46Yesu nai mbu: «Nenyu mùli bânya, mu bakangirisi be'Mwaso*! Mwénde mwêsa ebandu emisio era isitoire, si mubeine mùtanaba nga mwábika kwe'mutoke chiro na hicha kwa kubaasa.

47«Mùli bânya! Mwénde mwáimbira eshinda se'barebi* ba beho bétaa. 48Mwa bacha, nenyu mwanálosise changanama kanji mwànêmerere bya beho báiraa. Bushi bu béndee bêta ebarebi*, nenyu mu mwénjire mwáimbira'bo eshinda. 49Bushi no'ku, Ongo mwa bwenge bwai átetaa mbu: ‹Nyikátumira'bo ebarebi* ne'ndumwa*. Si bakénde bêta bauma mubo, na kulibusa ebanji.› 50Echera chi chikátuma emikira ye'barebi* boshi ba bêchibwaa kutengera ekubumbwa kwe'butala, yába kwe'twe lye'bandu be'sine suku. 51Oku kwichibwa kwátangiriraa ku Aberi, kuikira ku Sakariya#11:51 Sakariya: Mwa Chilaano cho'kwa Mira, eBayuta beke bábaa banêshi kwa ola wêchibwaa mubere-bere ábaa Aberi, ne'musinda-sinda kwichibwa ábaa murebi Sakariya. Somaa Ndangiriso 4:8; 2 eMyasi ye'bianda 24:20-22. ibêchiraa mwa Luhu lwa Ongo*, ala kachi-kachi ke'kahaha ke'mitulo*, ne'Chisiki Chibuya-buya*. Kubinali, nábabura kwe'mikira ya'bu bandu boshi ikába kwe'twe lyenyu mu bandu be'sine suku.

52«Mùli bânya, mu'bakangirisi be'Mwaso*! Mwénjire mwábisha ebanji bandu elufunguro, chasiya bàtengira mwa chisiki cha bàngakangirisibwa'mo ekumenya Ongo. Mubeine mutahónda kwengira'mo, na ba báhonda kwêngira'mo, mwénjire mwângika'bo.»

53Mango Yesu ábaa era àulukaa mwe'i nyumba, ebakangirisi be'Mwaso* ne'Bafarisayo* bera kumusibukira busese, na kumubusirisa myasi inene. 54Bábaa báhonda bamútee mwasi, chasiya babóne echinwa cha bàngemangira'ko kwa kumusitaka.

Jelenleg kiválasztva:

Luka 11: tbt

Kiemelés

Megosztás

Másolás