Yohaannisi 1
1
qaaleta caatta
1Paayyota qara qaaleta ca. Ini qaaleta kidamo nefo Waaqa kapa ca, qaalese nefo Waaqa. 2Isha paayyota qaraayyew Waaqa kapa ca. 3We piisa ka ishannew uumamen; umma wa uumame pisa oppaayye wa isha mali uumame takkan nefo in caan. 4Caatta ishan caade. caattose nefo kan la'ayta orra. 5La'ayta tukkantoppa'e ila'ayni, umma tukkanta la'aytan punni in kitto.
6Nama takka Waaqa kapa erkame Yohaannisi kidammo ca. #Maati 3:1; Maari 1:4; Luqa 3:1-2 7Akka maakkumaadi qudan nama piisa amano'e, isha qoota la'aytati desa maakkitta kodde ka de'e. 8Isha qoota la'aytati desa maakkuma de'e diisheey, isha mattaadi la'aytan. 9La'aytase a dukaata nama piisa la'ayno, siti piita qaropa deena qara ca.
10Isha turan piita qara ca, piita nefo ka ishannew uumamte. Piita xoori isha in upnaanne. 11Isha sanynyeetaadi kapopa de'e. Sanynyeese xaadi xoori isha in teyyanne. 12a kodditoma, orra isha teyyade ka ma''aadi amane piisa'e, mapteeta a ishin hellaa Waaqa koddane ishootta daashe. 13Ishootta nefo Waaqa oppa daladen diisheey, sanynyeeta nama taaki heenna a nama oppaayye in dalanne.
14Sede qaaleta kidame nefo, nama kodde ka daassata Waaqa isho dukaata immakaade ka otantinno oppa kallaade. Ino ka a inna sene takkan a aappa ulfeena, a'appaaysho kapa qapan akkine.
15Yohannise ka maakkummi ka kiini “Isaase an ishina lele ka kide ‘Ini ana kammaayye de'o qoota ana turan co malla, a kuttati ana qara qapa.’ Tin ini isha.”
16Daassatase xaadi a Waaqa eyye immakaatte oppaayye, ino piisantin daassatase a Waaqa qara'ew daassata Waaqa teyyanne. 17Seera, Muuse qudanne daasame, daassata Waaqa isho dukaata xoori Yesuusi Kiristoosi qudanne de'en. 18Nama Waaqa akke takka nefo in co. a koddito ma, innasene xaadi takkan Waaqa Aappa kapa ca, patta isha la'ayshe.
Maakkuma a Yohaannisise pishaan orra jaqnooti
Maati 3:1-12; Maari 1:1-8; Luqa 3:1-18
19Ukkumampaya Yihuta ayno akkima kodde akka isha kaassadane'e, ete Yursaalamiiyyi desa qeesewwa isho Lawaata Yohaannisi kapopa erkeneeyye; maakkuma a ishootta daashe sede arepa xata co.
20Isha in marmanne ma, imaakume ka kide, “Anti an Kiristoosin.”
21Ishootta ka isha kaassaden ka kidene, “Ka kuli atti a ayno? Hela a Eeliyaasi?”
Isha ka ishootta oorshe ka kide, “Inna!”
Ikka kideneewwe, “Hela atti a xuumampaytase kiinaane ‘Ide'a’ ?”
Isha ka kideewwe, “Inna!” #ooreta 18:15, 18; Mil 4:5
22Ishootta ka isha kideneewwe, “Ka kuli, atti a ayno? Akkan orra ino erke malseeta oorinno'e, atti qoota mattaaytiti desa maana' kiini?”
23Isha ka kide, “Akka xuumampaytase Issayyaasi haasawade mina'e, anti an nessa namase koommaytoppa ullupno ka kiino, ‘Pora Poqalla qajeelshaati.’” #Issa 40:3
24Orrose Feresaata kapa erkame.
25ka semmalla isha kaassade ka kide, “Atti oto a Kiristoosin taaki a Eliyaasi, taaki a xuumampaytase kiinaane ide'a, a koddininiiyyi, kuli maana'e pishaan orra jaqqini?”
26Yohaannisi ka ishootta oorshe ka kide, “Anti pishaannen orra jaqqini ma, takka a ishina a upnini ishinoppa qa'anni. 27Isha ana kamma desa de'a, umma anti an teeppa xopaadi mikka isha kelaayye fura mina an qanne.”
28Sede nefo katamasene a Pittaaniya kirrase a Yurtaanoosi a karaayye Yohaannisi pishaan orra jaqqinooti kama disiti ca kara'e asse koddite.
Laaha Waaqa
Maati 3:13-17; Maari 1:9-11; Luqa 3:21-22
29Parraytaadiiyyi Yohaannisi, a Yesuusi isha kapopa deeno akke ka kide, “Tin laahase a Waaqa juppoota piita alle pashsho. 30Namase an ishina' lele ka kide, ‘A ana kammadesa de'o, qoota ana turanneew co malla, a kuttati ana qara qapa.’ Ini isha. 31Anti nefo mattiyyo'e turan isha an upnaanne ma, akka isha samayta Isira'eeli tura akkaado'e anti pishaan orra jaqqaannen de'e.” 32Kamma desaaw Yohaannisi imaakkume ka kide, “A Hapura Qulqulloota moonte xata a elela mina lekkanno ka isha qara kutiinon akke. 33Anti mattiyyo turan isha an upo ma, isase akkan pishaan orra jaqqo'e ana erke, isha ana' lele ka kide, ‘Nama a Hapura Qulqulloota lekkanno ka isha qara kutiino a akkito, namoose, isha Hapura Qulqullootatin orra jaqqa.’ 34Anti ka sede akke ka semmalla akka isha inna Waaqa kodde maakkummi.”
Tamaarewwa a Yesuusi a paayyota
35Parraytaadiiyyi, Yohaannisi tamaarewwaadi lakki olliiyyi eyye qa'ade. 36Yohaannisi ka Yesuusi a eeppa desa tarpino akke ka kide, “Tin laahase a Waaqa!”
37Tamaarewwasene a Yohaannisi lakki ka a Yohaannisi asse kiino dakayen ka Yesuusi kamma aanen.
38Yesuusi ka desa tiitaawe ka ishootta a isha kamma deena akke ka ishootta kide, “Maana faanittan?” Ishootta ka ka isha kidene, “Repi, atti ayshaayye kalta?” (Repi kideese nefo, “Kollissampayto” kideeta.)
39Isha ka ka ishootta kide, “Xooya tooyya.” Ikka aanen ka pora oppa kalo akken ka kuyyaaseti isha olli nakayen. Siti nefo letta saateta kudan mina'e kitta.
40Tamaarewwasene wa a Yohaannisi haasawade dakaye ka Yesuusi kamma aane oppaayye, takka Intiriyaasi inna a opa Simooni Peetiroosi. 41intiriyaasi paayyota qara innaasso Simooni kapopa aane ka ishi kide, “Ha ino Mesihin akkane!” #1:41 “mesihi” mesihi taaki Kiristoosi kideeta, “dinshanpaytase awaaqa reexade” kideeta. “Mesihi” kideese nefo, Kiristoosi kideeta. 42Se kammaayye intiriyaasi ka Simoonin Yesuusi kapopa de'e. Yesuusi ka Simooni tooyyade ka quda ilda kode ka ishi kide, “Atti a Simooni a inna Yoona ma, arepa desa ‘Kefa’' kidamta.” (Kefa kideese nefo, Peetiroosi taaki shila kideeta.
Yesuusi akkima Filippoosi isho Naatina'eli hale
43Parraytaadiiyyi, Yesuusi piita Kelila opa anta heena ka Filippoosi akke ka ishi kide, “Ana kamma' xooye.” 44Filippoosi a intiriyaasi isho a Peetiroosi mina'en nama katama Peetesayda. 45Filippoosi ka Naatina'eli akke ka ishi kide'e, “Ha ino isase a Muuse qootaadi desa mataafa seera oppa' taafe, xuumampaya kuli ka qootaadi desa mataaffa a xuuma oppa taafenen akkanne. Isha nefo inna Yoosefi, Yesuusise a katama Naasirati.”
46Naatina'eli xoori i'ishi kide, “Katama Naasirati kara wa paxaara te'atta i'ettanshane?”
Filippoosi ka ishi kide, “Xooye tooyye!”
47Yesuusi ka a Naatina'eli a isha kapopa deeno akke ka qootaadi desa haasawade ka kide, “Tin nama Isira'eeli a dukaata, a darta kara in kinnin.”
48Naatina'eli ka ishi kide, “Aysha ana upnaatte?” Yesuusi ka isha oorshe ka kide, “A Filippoosi ke in haleenin turanne, a qoyra hilteeta kela kittooyyen ke akke.”
49Sitiiyyi Naatina'eli ka ka kide, “Kollissampayto, atti a inna a Waaqa! ka a nuqusa Isira'eeli!”
50Yesuusi ka kide, “Hela atti qootan ke kide'e, ‘Aqoyrase a hilteeta kela kittooyyen ke akke’ malla amante? Wa sene qaropa qapa'e amma akkita. 51Anti dukaatannen ishina kiini, a moonta panamto, erkampattowwa Waaqa ka inna a nama qareela fayyannaan ka lekkannaane akkitan.” #uuma 28:12
Jelenleg kiválasztva:
Yohaannisi 1: MaQu
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
