Matthew 15
15
Tey aa wa tang tatal
(Mark 7:1–13)
1Jerusalem wang Phorisi tang etho thong tataltey tang Jesu relnáng thu eq pitta, 2“Ba jiphantey tang aa hiqtang tey aa wa tang aa tatal koshing taphi ri, chamlang ma dan aa? Ning thongaley na bat aa thimal phaksat ma jak khol moq.”
3Jesu aa batta, “Nim thongaley rangma, Shkewa thong chamlang ma dan inn? 4Chammatakoi Shkewa batta, ‘Nim nu ni wa rangka inn’ etho ‘Nim nu ni wa ma manthun ko inn jo tatik eq chak phanin.’ 5Etharin nim aa miqtang ma irimal tatal ko inn, ‘Nim nu ni wa ma bat inn, “Í aa nim ma bara kot ching, esha í aa Shkewa ma kot rangma rangtum ti.” 6Eshimal raaq ijo, nim nu ni wa ma rangka kot ma ràa moq.’ Irimal wang nim thongaley rangma Shkewa raaq dan aa. 7Nim takhi eq somtey tang! Nim rangma rangsamal Isaiah khakla batta:
8 ‘Iri miqtang rey nung wang hun nga rangka phang,
etharin ning tin iching wang alo halna.
9 Ning aa nga thang hung na shumnuk phang,
chammatakoi ning aa miqtang thong sha i thong ta bat eq tatal kot aa.’”
Miq thanaan raaq
(Mark 7:14–23)
10Jesu aa miqtang tha urel náng hal eq batta, “Tat inn, etho sam inn. 11Nung o wang phan shey miq sha thanaan moq. Etharin nung wang chamlang thalat aa, iri wang hun miq sha thanaan aa.”
12Ujiphantey tang thu eq piq ma batta, “Nang aa bat tu raaq shey Phorisi tang tin takta ta nang aa usam eq tu i?”
13Jesu aa thawel batta, “Bari bang raa rangmungtan na tongtey Iwa khey moq angta eshi tang sha uching wang hun phi chakna. 14Req ning raaq ri lakchak inn! Ning aduk tang ma aduk bantey! Etho aduk eq adak aduk ma lam takhi ajo ning ni haqbing náng qhat wang na.”
15Peter aa batta, “Iri raaqshiton ri í ma lak eq bat phu.”
16Jesu aa batta, “Nang aa thang nángduk jin sam wey mu i? 17Nang aa sam wey mu i, nung o wang phan sha wok náng wang aa etho miq wok wang hangnáng thalat aa. 18Etharin, nung wang thalat aa sha utin wang thalat aa, etho irimal wang hun nim thanaan phin. 19Chammatakoi jashit tinthin, tikwat, sathuk etho irimal thaji jashit jaksom, hut hut, hut dip etho adak miq ma jashit raaq kot, iri tang raa tin mong wang thalat aa. 20Iri tang wang hun miq thanaan na. Etharin jak khol hung aa phaksat shey miq sha thanaan moq.”
Ashey Canaan tey miqnu Kam
(Mark 7:24–30)
21Jesu ethi haq tha shing chak eq, Tyre ni Sidon samhaq tang mung náng kata. 22Ethi mung na tongtey ashey Canaan tey miqnu Jesu jamnáng kata etho piq aa qhap eq batta, “Teyhungwa, David Miqwasa, nga ma tinshit phu! Isa miqnu sa tha thangwa eq khak eq rapney shi aa tha shing aa.”
23Etharin Jesu piq ma raaq shey tho bat moq angta. Req ujiphantey tang ka eq Jesu ma batta, “Piq ni phanchak u! Piq rapney ajong hal raaq eq hiqtang jináng kapha.”
24Jesu aa batta, “Nga raa Israel tang wang matwang tey kelwut tang relnáng hun takat taphang.”
25Etharin ethi miqnu tha Jesu relnáng ka eq bon ta, etho batta, “Teyhungwa, nga ma tinshi phu.”
26Jesu aa thawel batta, “Nijangsa tang phaksat sha som eq hi tang ma bichak kot sha qhal moq.”
27Miqnu they batta, “Teyhungwa, ira khakla, etha otho him tangtey khúng wang qhat aa phaksat sha hi tang eq tho jin phak eq aa.”
28Etho Jesu aa piq ma thawel batta, “Miqnu, ba kam rapney ajong! Nang aa cham ta chutu, eshimal hun nang ma angna.” Etho eshi rangham tho, piq miqnu sa tha aqhal sey angta.
Jesu aa daqhan miqtang taqhal aa
29Jesu aa ethi haq tha shingchak eq Galilee shitim kang náng katta. Etho piq ashey kan náng ka eq tong ta. 30Ahan miqtang ujamnáng thuta, etho jakung, miikduk, jakeq, angong etho daqhan adak dak takasa miqtang tha ning aa sol eq thuta etho Jesu jakho o shingta etho Jesu aa ning thaji tha taqhal ta. 31Angong tang mey raaq sey ang ta etho jakeq tang uqhal sey ang ta etho jakung jin qhing sey ang ta etho miikduk tang aa ukhi sey ta, eshi tang sha khi eq ning patja ta etho Israel Shkewa tha tasapsey ta.
Jesu aa hayat bali miqtang ma taphaksat aa
(Mark 8:1–10)
32Jesu aa ujiphantey tang tha hal eq batta, “Nga iri miqtang ma rapney tinshi ang. Ning ijamoq saal tom sey tong aa etho ning phaksat uthun sey angta. Nga ning raa chamlal eq takat ma nuk mong chammatakoi ning him náng thuwey moq o ngak wang angna.”
33Ujiphantey tang aa pitta, “Iri changpol haq ro, itan miqtang ma hiqtang aa chamal jin taphak sat ni?”
34Jesu aa pitta, “Nim ching na chamtan banlo aa?”
Ujiphantey tang aa thawel batta, “Sanat banlo etho amaan dan aming ngaqsa atha.”
35Jesu aa miqtang ma haq o tong ma batta. 36Etho piq aa sanat banlo nia ngaqsa tha pin eq, Shkewa ma kechu ajong kota, etho pin eq ujiphantey tang ma kota. Etho ujiphantey tang aa miqtang ma kota. 37Ethi miqtang they wok taphut la phaksat ta, etho ujiphantey tang aa udak phaksat sannat khong na ushey thajoq ta. 38Ethi haq wang miqnu tang etho nijang tang dak chak eq hayat bali miqwa tang angta.
39Ethi jio, Jesu aa miqtang tha takat ma kota, etho ashey waqwan na tong eq Magadan mung náng kata.
Jelenleg kiválasztva:
Matthew 15: Mmmm
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
CC BY-NC-ND 4.0
