Matthew 13
13
Uwontey raaqshiton
(Mark 4:1–9; Luke 8:4–8)
1Ethi saal tho Jesu him wang thalat eq shitim kang náng ka eq tong ta. 2Daqhan miqtang piq relna thajoq ta, ethi rangma Jesu waqwan o qhung eq tong ta, etho thaji miqtang tha shitim kang na langta. 3Piq aa miq waan tang ma raaqshiton wang daqhan raaq batta.
“Ashey miqwa pik náng uli won kat ma kata. 4Piq aa uli tang won chey atho, chamtey tey uli tang tha lamna qhat ta etho wo tang thu eq tun tu chakta. 5Chamtey tey uli tang tha longkit na qhat ta, eshina buk aney angta. Eshi uli tang tha kalo hapta, chammatakoi buk amaan sa angta. 6Etharin rangsal tha thalat atho, uli hapta tang tha qhuk tita chammatakoi uchíng sha awung náng wang moq angta. 7Chamtey tey uli tha su thamna qhatta, etho eshi tang tha tat phuk eq cha atho sutham they qhipchak eq ti ta. 8Chamtey tey uli tang tha haq qhal haq na qhatta, etho ubang tha jong eq tingo ta! Chamtey tey bang na shashey, chamtey tey bang na roktharok, etho chamtey tey bang na roktom tingo ta.”
9Iri jio Jesu aa batta, “Utang ma naq atha, tat inn.”
Jesu aa chamma raaqshiton bat aa
(Mark 4:10–12; Luke 8:9,10)
10Ujiphantey tang Jesu relnáng thu eq pitta, “Miqtang ma nang aa chamma raaqshiton o bat u?”
11Jesu aa batta, “Rangmungtan apu ashim raaq nim aa sam eq inn, etharin adak miqtang aa jin sam moq. 12Utang ma chamlilang atha, piq ma rap kot eq na etho piq ching na ahan angna! Etho utang ching na ahung, bara piq ching na atha, esha tho som chuwan na. 13Iri tungkang o, nga ning ma raaqshiton o batphang, chammatakoi ning aa usiin eq aa, etharin khi moq etho ning aa utat eq aa, etharin tat moq etho chamtho jin sam moq. 14Req rangsaamal Isaiah iri raaq raa batta sha ning o asing angta,
‘Ning aa salwet tat na, etharin sam moq,
ning aa salwet usiin eq na, etharin khi moq;
15 Chammatakoi ning tin raa achet hal,
etho ning aa naq eq tat moq,
etho ning aa miik tha thaduk ta;
Etha ang moq ang ajo ning aa miik eq khina,
etho ning aa naq eq tatna,
etho tin o sam na;
Etho ning i ching konáng ngik na,
etho nga ning raa taqhal náng.’”
16 “Nim miik sha sunmaan chammatakoi nim miik eq jin khi eq inn. Etho nim naq sha sunmaan chammatakoi nim aa naq eq jin tat eq inn. 17Nga asing batphang, nim aa bara jin khi inn, iri tang raa siin ma daqhan rangsamal tang etho daqhan asing miqtang nukta, etha otho ning aa jin siin moq angta; nim aa bara tat inn, iri raaq tang raa ning aa tat ma nukta, etha otho ning aa jin tat moq.”
Jesus aa uwontey raaqshiton lak eq bat aa
(Mark 4:13–20; Luke 8:11–15)
18 “Tat inn, nga uwontey raaqshiton lak eq batphang. 19Lam na qhat aa uli sha iri miq mal, bara rangmungtan raaq tat aa, etha otho sam moq. Thangwa thu eq ning tin mong na chamli kheyta tha, som chuwan na. 20Longkit náng, amaan sa buk náng qhat aa uli sha iri miq mal, bara Shkewa raaq tat eq, sungrang eq iri raaq raa kalo kap aa. 21Etha otho ning tin mong náng awung eq wang moq etho chomrey saal ma hun angna. Shkewa raaq kam tungkang o tsamnang etho thahikham thu pha jo, ning aa kalo hun kam sha shingchak aa. 22Su bangna qhat aa uli sha iri miq mal, bara Shkewa raaq tat aa etha otho iri rollung tinthin etho tanglom angma tinthin eq Shkewa raaq sha damnak aa etho ning thiwang bangti tingo moq. 23Etho jaqhal haq na qhat aa uli sha iri miq mal, bara Shkewa raaq tat aa etho sam eq aa, ning aa bangti tingo kot aa; chamtey tey shey pangshashey, chamtey tey shey pang roktharok etho chamtey tey shey pang roktom kot aa.”
Naamthing raaqshiton
24Jesu aa ning ma adak raaqshiton batta, “Rangmungtan raa irimal: ashey miqwa aa upik na aqhal cham li kheyta. 25Rangpal o, miq thaji ujip tok o, uralwa thu eq, cham li jaktung na naamthing li bichak eq qhing chuwang ta. 26Cham li phukta etho uti thalat ma ang atho naamthing tha tho thalat phukta. 27Piq sanga tang thu eq pik tangteywa ma batta, ‘Tangteywa, nang aa jaqhal li pichak tu, etharin naamthing bari wang phukta?’ 28Piq aa batta, ‘Ashey ralwa eq irimal somlo ta.’ Usanga tang aa pitta, ‘Í ka eq naamthing lat kaphi i?’ 29Piq aa batta, ‘Ang moq, nim aa irimal somlo inn jo, jaqhal champhuk tang sha tho thalat ang wangna. 30Champhuk etho naamthing thani kashey o hun cham khan tok náng cham cha aa. Etho nga cham khantey tang ma bat náng, naamthing thajoq eq kashey o khak eq tak chak inn, eshi jio cham tang ni khan inn etho kashey thajoq som eq, chamtap na shing inn.’”
Jungqhang li raaqshiton
(Mark 4:30–32; Luke 13:18,19)
31Jesu aa ning ma adak raaqshiton batta, “Rangmungtan raa irimal: Ashey miqwa jungqhang li som eq upik náng won katta. 32Iri jungqhang li raa thaji li pheynáng eq tho aming, etha otho uchat ang ajo, thaji pal bang náng eq tho ajong phuk aa. Etho wo tang thu eq uking uphak o, ning tip thok hun na.”
Thawung phan raaqshiton
(Luke 13:20,21)
33Jesu aa ning ma adak raaqshiton batta, “Rangmungtan raa irimal: Miqnu ashey aa thawung phan amaan dan sa som eq, ahan ban jamoq nolta. Etho jang jang eq thaji thanol eq wung ti ta.”
Jesu aa chamlang ma raaqshiton o bat aa
(Mark 4:33,34)
34Jesu aa raaqshiton tang o miqtang ma iri thaji raaq raa batta, piq aa raaqshiton bat hung aa cham raaq tho bat moq angta. 35Rangsamal aa chamta batta, irimal asing angta,
“Nga raaqshiton phan eq ning jamoq wan náng,
nga iri mingkang phang wang tapu raaq tang raa ning ma bat náng.”
Jesu aa naamthing raaqshiton lak eq bat aa
36Etho miqtang thaji shingchak eq Jesu himmong náng wang ta etho ujiphantey tang thu eq, piq ma batta, “Naamthing li raaqshiton shi lak eq í ma tatal phu.”
37Jesu aa thawel batta, “Aqhal cham li wontey miq sha Miqna Sa! 38Pik sha iri mingkang! Jaqhal cham li sha mungtan miqtang! Naamthing li sha Thangwa miqtang! 39Naamthing li wontey ralwa sha Thangwa. Cham khan sha iri mingkang thom saal, etho cham khantey tang sha rangkamwa tang. 40Naamthing phi eq kashey o khak eq takchakta mal iri mingkang uthom saal otho irimal angna. 41Miqna Sa urangkamwa tang takat na etho ning aa thaji ngarey jaksom somlot tey tang ma etho thaji jashit jaksom somlot tey tang tha piq mungtan wang latchak na. 42Etho rangkamwa tang aa ning sha wal bung náng bichak na etho eshina ning qhap eq paa tachik kakna. 43Etho asing miqtang sha rangsal mal ning wa mungtan na lip na! Utang ma naq atha, tat inn.”
Ngintik bungshing raaqshiton
44 “Rangmungtan raa iri mal! Ashey miqwa eq pik na ngintik bungshing ta tha kap khita. Piq aa esha wey hop shingta etho rapney sungrang eq kata etho piq aa phanrip thaji tha sang ta, etho ethi ngintik shiwang iri pik raa ri ta.”
Thangchan nginwang raaqshiton
45 “Etho Rangmungtan raa irimal! Ashey sangtang tey aa thangsan nginwang ma bi kata. 46Etho esha kap atho, piq ka eq, piq rang thaji tang tha sangta, etho ngin shiwang iri thangsan nginwang raa rita.”
Chak raaqshiton
47 “Rangmungtan raa irimal! Chamtey chak haltey aa chak shitim o halta etho mama ngaqsa kapta. 48Chak ushey sey ang atho, ning aa shitim kang náng humta etho tong eq aqhal ngaqsa tha qhak o shingta, etho jashit ngaqsa tha bichak ta. 49Mungkang raa uthom saal otho irimal angna. Rangkamwa tang thu na etho ning aa thaji jashit miqtang tha aqhal miqtang wang phal na. 50Etho jashit miqtang sha wal bung náng bichak na etho eshina ning qhap eq paa tachik kak na.”
Anal nia aking asing
51Jesu aa ning ma pitta, “Nim aa iri tang raa usam eq tin i?”
Ning aa batta, “Inn.”
52Etho Jesu aa thawel batta, “Thaji thong tataltey tang bara Rangmungtan jiphantey tang angta ning irimal. Ning tangwang shing ching katáng wang anal nia aking tangwang lattey him tangteywa tang.”
Nazareth miqtang aa Jesu tha hanmoq ang aa
(Mark 6:1–6; Luke 4:16–30)
53Jesu aa iri raaqshiton tang bat jio, piq ethi haq wang qhing chuwang ta. 54Etho Jesu umung náng wey welta. Piq aa synagogue na batta etho utang eq tat ta ethi tang tha patja ta. Ning aa pitta, “Piq aa itan thung atal etho patja somlot ma bari wang kapta? 55Piq raa bang khantey miqwasa tha ang moq i? Unu Mary ang moq i, etho James, Joseph, Simon, etho Judas ning raa piq pho notang ang moq i? 56Piq no miqnu tang iro tong aa ri ang moq i? Irimal ang ajo, piq aa iri tang ri bari wang kapta?” 57Etho ning aa piq tha jungman chakta.
Jesu aa batta, “Ashey rangsamal eq umung nia uhimtey tang sha dakchak eq thaji adak haq wang piq aa rangka kapna.” 58Etho Jesu eshina aney patja jaksom kap somta chammatakoi ning aa kam moq angta.
Jelenleg kiválasztva:
Matthew 13: Mmmm
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
CC BY-NC-ND 4.0
