Luk 1

1Nau u mare vaniho hoe, ia Tiopilas, na tinoni taovia.

E danga noha na tinoni ara tovo nohaa na mare sivoa visa na kokorina ia Jisas te laba lenga levuhamami ihami. 2Ara mare sivoa ira visa na omea tami valingea hami tatadira ira tara ara sanga na morosi matadira kalavata tana nina ago ia Jisas, mara sanga na koriana. 3Minau u vileke odoa visa kode na omea tana tuturihadira ira, mu padaa ke talana ku mare hotosi vaniho ihoe, 4mo ko ni hana talanaa ihoe na manana kode visa na omea tara sasani maiho hoe.

Na enjol e kori lengaa nina bocha Ia Jon Na Tinoni Lesovi Tabu

5Mai tana tahu vahai ia Herod te king vanira ira i Jiudia, me toha chikai tinoni tana tahu nia, asana ia Sekaraea, na tinoni ni kere te vota mai tana lilivuna ia Abaeja, na vuvunguna ia Eron na tinoni ni kere. Ma na asana tauna ia, koi Elisabet, e vota mai lakamu tana lilivuna ia Eron. 6Mi koera ara ko toha hoto tana matana ia God mara ko toha taonia nina keja ia Mosis. 7Mara ko teha tamani dalekodira rongona koi Elisabet e teha tangomana tamani gari. Mi koera ara ko gosigosi mara ko tugatuga solehana noha.

8Toha me chikai dani na ala-ala ni tinoni ni kere te toha ia Sekaraea lalona tara ago tana vale tabu leho. 9Ira ara gesu vota taonia na naunauna vale tabu leho nia, me vilia ia Sekaraea ke sahe tana jukajuka tabu, me ke behoa na bulu ururu. 10Tana tahu te beho bulu ururu ia, visa kode na tinoni tara sai kuli mai de ara nonginongi dia vania na Taovia.

11Tana tahuna vahai nia, me laba lenga chikai nina enjol Taovia, me tuu tana madoana na jukajuka tabu nia. 12Tahuna ia Sekaraea te haea ia, ia e taora me matahu solehana. 13Ma na enjol nia e kori vahai vania de, “Ko basia hoe na matahu. God e valinge nohaa nimu nonginongi hoe, ma na hamu toha kolu hoe, koi Elisabet, ngeni ba ke vasua chikai na dalemu mane. Mihoe ngeni ba ko soloa asana ia Jon. 14Hoe ngeni ba ko mahe solehana, me danga na tinoni ngeni ba kara mahe lakamu tahuna te ke bocha ia. 15Ia ngeni ba ke pichakae tana matana na Taovia, me ke teha kevu inuvi vuaeni kolu siki inu susuliha laka. Ma na Tarunga Tabu ngeni ba ke sahelia me ke sulatia seisuge tahuna te ke tobahaa vataa ia. 16Ia ngeni ba ke hanaa leoa na tobadira danga tinoni ni Israel, ma kara visu mai tatana Taovia hadira ia God. 17Ia noha ngeni ba ke naho sala vania na Taovia, ma na Tarunga Tabu ba ke sulatia ia vahai te sulatia ia Elaeja, na propet. Ngeni ba ke vahania visa na toha ni gari kara tamania chikai manasa kolu na daledira, me ke leoa tobadira ira na tinoni pejokoe ma kara buke lakaa na manasa talana. Mi ngeni ba ia ke hotosia tobadira ira na tinoni ma kara onioni pitua na maiana na Taovia.”

18Ma ia Sekaraea e gesuaa na enjol nia, “?Ke vahai vei ku vu hanaa nau tina vahai te ke mana nimu kori hoe, matengana nau u tugatuga noha ma na nigu toha kolu e gosigosi lakamu?”

19Me laba na enjol nia me kori vahai de, “Inau ia Gebriel, tu vota mai tatana ia God, ma ia te kejaliu nau ku taha maia na saurongo talana de vaniho hoe. 20Ma na rongona hoe to teha donua nigu kori nau, mi ngeni ba ko utu na valagu, diadia me ke chau tana dani te ke laba lenga na omea tu koria nau.”

21Ira na tinoni nira ara pochoa na pitua ia Sekaraea te ke chulu mai, mara voo ira na hua na rongona e vu toha oka solehana ia tana lalona na vale tabu leho nia. 22Tahuna te chulu sivo mai ia Sekaraea tana vale tabu leho nia, me tovoa ia ke valagu me utu, me titihisi ia bamu tana limana. Tana tahu nia, ara padaa ira, ia e haea chikai na valajaja tana lalona na vale tabu leho nia.

23Tahuna te kode nina tahu ni ago ia Sekaraea tana lalona na vale tabu leho nia, me visu ia verana. 24Teha ba oka ia, me mahara tauna ia Sekaraea, koi Elisabet, mi lalona chehe vula e toha kakanau bamu gosi nia i valena. 25Me kori vahai gosi nia de, “Na Taovia te agosia na omea de vaniu nau. Ma na Taovia e talana solehana vaniu nau tana tahu de. Ia e taha chonia hagu vahamaa nau tana matadira ira na tinoni.”

Na enjol e kori lengaa nina bocha ia Jisas

26Tana ononina vulana koi Elisabet, ia God e kejalia ia enjol Gebriel ke dia i Nasaret, e chikai na vera i Galili. 27E tahaa na sau rongo me dia vania chikai na garidaki vaolu te teha vata toha kolu siki mane tara ane vania chikai na mane, asana ia Josep, na vuvunguna ia Deved, na tinoni taovia leho i sau. Ma na garidaki nia, asana koi Meri. 28Ma na enjol e laba mai tatana koi Meri ma ia e kori vahai vania de, “!Daki niho, ihoe ko mamahela! Matengana na Taovia God e aneho me toha koluho hoe.”

29Me taora koi Meri me toba sahata na valingeana nina kori na enjol nia, me tovoa ia ke pada taonia. 30Ma na enjol nia e kori vahai vania koi Meri de, “Basia hoe na matahu. Ihoe chikai na daki te aneho ia God me mamahela koluho. 31Ke chikai dani hoe ngeni ba ko mahara mo ko vasua chikai na garimane, mo ko soloa asana ia Jisas. 32Ia ngeni ba na tinoni taovia ma kara solo vahania na Dalena ia God Picha Kae. Ma na Taovia God ngeni ba ke livu kaea ia vahai chikai na tinoni taovia leho, vahai ia Deved na tutugana ia. 33Ma ia lakamu ngeni ba na tinoni taovia savaliu vanira ira na Israel, ma nina susuliha ni morosi taonia nina tinoni ba ke utu ke vu kode.”

34Ma koi Meri e kori vahai vania na enjol de, “?Vahai vei ke labatiu nau na kori de rongona nau u teha vata na toha kolua siki mane?”

35Ma na enjol e kori visu vahai vania koi Meri de, “Na Tarunga Tabu ngeni ba ke kauliho ma nina susuliha ia God ke ravisiho. Ia vahai na rongona ngeni ba na dalemu tabu hoe, ba kara solo vahania ira na Dalena ia God. 36Mo ko hana lakamua hoe na kamamu, koi Elisabet, e mahara lakamua chikai na garimane, seisuge ia e gosigosi me teha tangomana tamani gari. Mi tahuna de, e kode ono na vulana ia. 37!Teha siki omea te ke utu vania ia God!”

38Me kori vahai koi Meri de, “Inau nina nonoru Taovia. Talasangaa ke labatiu nau na omea vahai noha to koria ihoe.” Mi tana tahuna vahai nia, ma na enjol e dia basiaa koi Meri.

Koi Meri e chihoa koi Elisabet

39Bukena na enjol te basiaa koi Meri, me tu koi Meri me onioni tangochaku me dia chihoa koi Elisabet tana vera vuvungana tana provins i Jiudia. 40Me sahe tana valena ia Sekaraea me kori mamahela vania koi Elisabet. 41Tahuna vahai koi Elisabet te valingea nina kori mamahela koi Meri, me gani na gari tana lalo tobana ia, me sivolia koi Elisabet na Tarunga Tabu. 42Ma koi Elisabet e valagu leho vania koi Meri, “Ia God e talana solehana vaniho tana levuhana visa na daki kode kolu na gari tana lalo tobamu hoe. 43?Vahai sahata vei e vu mai labatiu nau na omea leho de, te mai laba na tinana nigu Taovia me chihou? 44Tahuna vahai tu rongosia nau nimu kori mamahela hoe, na gari tana tobagu nau e mahe me gani. 45!Me talana solehana vaniho ihoe rongona hoe o donua na manana na hua te kori vaniho na Taovia!”

Koi Meri e linge me livu kaea ia God

46Ma koi Meri e linge me pachaa,

“Na mamaurigu nau e livu kaea na Taovia

47ma na tobagu nau e mahe rongona ia God te vani mauriu nau.

48Ma ia e sahaviu nau nina nonoru, na daki sekomala.

Tuturiha tana dani ngeni de me ke dia, visa na tinoni kode ba kara koria ia God e talana vaniu nau,

49tana rongona na omea taengana nira ia God Susuliha te goni vaniu nau.

Ia e tabu picha kae.

50Ia e sahavira ira tara tamani kukuni tatana ia,

vota tana bela vata ma na bela vata.

51Ia e tihisia nina susuliha

me piri rarasara ira na tinoni hotuhotu.

52Me taha sivo chonira na tinoni taovia hotuhotu tana malengadira

me livu datora ira hana tara manasa haru sivo.

53E vani masura kolu ira na omea talana ira tara ngalo hahani

me rai chonira ira na tinoni tatamani, mara dia lima ruka.

54E manalia nina valagu vahai te kori luhi nohaa vanira na tutugada i sau,

me sangahita me sahavihita na vangana i Israel.

55Me teha ia purusahania nina vacha vania ia Ebraham

mihita na lilivuna ia, tana dani ma na dani.”

56Koi Meri e toha kolua koi Elisabet e tolu na vula, kode me visu ia verana.

Nina bocha ia Jon Na Tinoni Lesovi Tabu

57Me chau nina tahu ni vasusu koi Elisabet, me vasua ia chikai na dalena mane. 58Mi ira vangana na verana ia ma na kamana ara rongosia na omea talana solehana te tu Taovia me agosi vania koi Elisabet, mi ira kode ara mahe kolua ia.

59Tana alunina#1:59 Tana nidira iju ira na Jiu e alu dani, mi tana iju ni hita ba ke vitu dani, matengana ira ara tuturiha na iju tana dani tara vasua na gari. nina dani na gari pepechi nia, mara mai mara pari papadana ia, mara ngavina ira kara soloa asana gari nia ia Sekaraea, me ke malavu kolu tohana. 60Ma na tinana e tongo vanira me kori vahai de, “!Teha ia! Na asana ia Jon.”

61Mara kori vahai vania ira de, “!Na kamamu nira hoe ara teha tamani siki asa vahai nia!”

62Ba, mara titihisi ira tana limadira vania tohana mara gesuaa, “?Na asa hua ta ka soloa asana gari de?” 63Ma ia Sekaraea e nongira ira kara vania ia siki omea te ke mamare ia tatana, me marea ia na valagu vahai de, “Na asana ia Jon.” Mara tugaleta kode ira. 64Tana tahu vahai nia, me valagu visu ia Sekaraea, me tuturiha na livu kaea ia God. 65Mara matahu kode ira vangana na vera nia, ma na kori nia e talihu laba tana vera vuvungana nira i Jiudia. 66Visa ira tara rongosia na kori de ara livua tobadira mara vaikorihi mara kori vahai de, “?Ba ke vahai nimu vei na gari pepechi de?” Ara gesu vahai ira rongona na susulihana Taovia te laba lenga tatana gari nia.

Ia Sekaraea e linge me livu kaea na Taovia

67Ma na Tarunga Tabu e sulatia ia Sekaraea, na tohana ia Jon, ma ia e tuu me kori lengaa nina valagu ia God, me kori vahai de,

68“!Ihita ka livu kaea Taovia, na God ni Israel!

Ia e mai me sangahita me taha maurisihita, nina tinoni ia.

69Ia e sau vanihita e chikai na tinoni te tangomana na taha maurisihita ia

te liu mai tana lilivuna ia Deved, na nina tinoni ago ia.

70Ia e veke nohaa tana matadira nina propet tabu nira tuu mai noha i sau,

71ngeni ba ke taha maurisihita tana limadira hada hala

mi tana limadira visa ira tara seko vanihita.

72Ma ia e koria ngeni ba ke talana vanira na tutugada i sau

me ke pada tuhua nina veke tabu,

73na vacha te vania na tutugada ia Ebraham

74ke taha maurisihita tana limadira hada hala

ma ka ni teha hita na matahu na ago vania na Taovia

75kolu na tabu ma na hoto visa na dani tana mamaurida.

76“Mihoe, dalegu, ngeni ba kara solo asamu vahai nina propet ia God Picha Kae

mihoe ngeni ba ko ngida vania na Taovia mo ko vati sala vania ia,

77mo ko kori labati vanira nina tinoni kode lalaka, ira ngeni ba kara hanaa tamania na mamauri sali,

rongona ia God ngeni ba ke kori kenihua nidira seko.

78Matengana nina vaisahavi leho ia God ia ngeni ba ke vahania

me ke dato mai na asona na mauri savaliu,

79me ke tuu i heven me ke marara sivo mai vanira ira tara toha tana raravina na mate,

me ke udungihita ma ka ni dia tana salana na rapo.”

80Ma na gari pepechi nia e leho me susuliha na tanona ma na sasahana, me dia me toha tana talu mangu me chau tana dani ia ba ke laba lenga vanira ira na tinoni ni Israel.

Jelenleg kiválasztva:

Luk 1: mln

Kiemelés

Megosztás

Másolás