मत्ति 6
6
येसुडे़ॽ धरम करममि खा इःॽपॽआ
1येसुडे़ॽ लुसुजि, “होसियार ले़टानिङे, हे़निङे़ॽ याॽमिजि खाङ्मुमामि लागि धरम करम ए़ले़टानुमे, मोडोॽ ले़टानुमहोङ्गो थाङ्सिरिबेॽ टुये निवाहाङ पाबाबाङ इमाङ्सो इनाम चुप्टानुम्नि।
2 “हे़निङे़ॽ इमाङ मे़ॽनिङ्हा याॽमिजि पिबॽआ खा हाइखाजिडे़ॽ लेसुजिरो लुनुङ खाङ्मुसाङ ए़ॽपिसानुमे, मोडोॽको याॽमिजि खाङ्मुमामि धरम ले़ःॽखुबा याॽमिजिडे़ॽ, यहुदिजि सुम्ढाम खिमराजिनुङ रामराजि याॽमिजिबाङ ओहाङ चुप्मामि ले़न्डुजे। चइबानोॽ के़ॽ हे़निङ लुनिम्ने़, माहाजिडे़ॽ चुप्मे़ इनाम चुप्पेटुजे। 3हे़ने़ॽ चुप्थिङ हुगे़ॽ पिबॽआ ए़ङ्सिङ हुगे़ॽ मे़लेडोक्टुरो। 4इडोॽ हे़ने़ॽ पिमाबेॽ खुस्रिङ्मु पिसे मोबा खुस्रिङ्मु पिबॽआ लेडोक्खुबा हे़ने़ए़ निवाहाङ पाबे़ॽ हे़न इनाम पिये।
येसुडे़ॽ पारथनामि टुम्बेॽ इःॽपॽआ
(लुका ११:२-४)
5 “हे़निङे़ॽ पारथना ले़ःॽमाबेॽ कप्टि याॽमिजिडे़ॽ ले़टिडोॽ ए़ले़टानुमे। खोजिगो हाइखा याॽमिजि खाङ्मुमामि लागि यहुदिजि सुम्ढाम खिमनुङ राम के़क्राजि येःप्नुङ बेॽए सेम्लाडे़ॽ वोमा मिङ्इम्मे। हे़निङ लुनिम्ने़, मोडोॽ ले़ःॽखुबाजिडे़ॽ खोजिमि इनाम चुप्पेटुजे। 6तर हे़न चाहिँ पारथना ले़ःॽमाबेॽ खिमहोङ्सिॽयु खे़ॽनुङ राम्डेम से़क्नुङ खाङ्डोक्निबा निवाहाङ पाबानुङ पारथना ले़टे मोबा असे़ॽसो मे़लेरेॽ ले़ःॽपॽआ योम्बोक लेघुबा निवाहाङ पाबे़ॽनोॽ हे़न इनाम पिये।
7 “पारथना ले़ःॽमाबेॽ अयहुदिजिडोॽ योम्बोक मे़ॽनिङ्हा खा ए़मे़डानुमे। माहाजिगो बेॽलो इमाबेॽरेॽ खोजिमि चापजिडे़ॽ खेम्इन्डुए लुनुङ मिङ्इम्मे। 8तर हे़निङ माहा याॽमिजिडोॽ ए़ले़टानिङे। इन्ढोङ्होङ हे़निङ इमाङ खा पाप्मिटे़ मो हे़निङ्मि निवाहाङ पाबे़ॽ याक्लोनोॽ लेबेन्डुए। 9हे़निङ चाहिँ इडोॽ पारथना ले़टानिङे,
‘हे थाङ्सिरिबेॽटु पेङ्खुबा कानिङ्मि निवाहाङ पाबा,
हे़ने़ए़ निङ पबित्रा लिरो।
10 हे़ने़ए़ राज्य लेङ्रो,
हे़ने़ए़ निवे़ॽ मिॽपॽआनोॽ थाङ्सिरिॽटु पुरा लिडिडोॽ, इगो मक्खाम्डेमबेॽसो पुरा लिरो।
11 सानिङ्डोॽ आयुसो कानिङ चामा पिमायो,
12 कानिङे़ॽ कानिङ्मि सतुरजि आम्लाङ पिडिडोॽ
कानिङ्सो आम्लाङ पिमायो।
13 कानिङ पापि योम्बोकपेॽ ए़सिॽमेॽमा,
तर दुस्टबाङ जोगा ले़ःॽमा। [इन्ढोङ्होङ राज्य, बोलनुङ महिमा सानिङ्नोॽ हे़ने़ए़न्नोॽ ले़ये] आमेन।’
14 “इन्ढोङ्होङ हे़निङ्मि बिरोधबेॽ पाप ले़ःॽखुबा याॽमिजि आम्लाङ पिसानुमहोङ थाङ्सिरिॽटु टुघुबा निवाहाङ्डे़ॽसो हे़निङ आम्लाङ पिये। 15तर हे़निङे़ॽ हाइखाजि आम्लाङ मे़म्पिसानुमहोङ, निवाहाङ पाबे़ॽसो हे़निङ आम्लाङ पिनिबा।
मे़न्जारेॽ पेम्मे टुम्बेॽ सिक्छे
16 “हे़निङ मे़न्जारेॽ पेम्माबेॽ कप्टिजिडोॽ नजिक सुम्नुङ ए़ॽपेनानिङे। कप्टिजि मे़न्जारेॽ पेम्माबेॽ याॽमिजि खाङ्मुमामि नजिक सुम्नुङ पेङ्इम्मे। के़ॽ लुनिम्ने, माहाजिडे़ॽ टाङ्बामि खोजिमि इनाम चुप्पेटुजे। 17तर हे़न चाहिँ मे़न्जारेॽ पेम्माबेॽ नजिक वासोगे, निन्डवाँबेॽ केवा सिःॽनुङ पेने। 18इडोॽ हे़ने़ॽ मे़न्जारेॽ पेम्बॽआ खा याॽमिजिडे़ॽ ने़ॽनि, तर खाङ्डोक्निबा निवाहाङ पाबाडे़ॽ खाङ्डोक्नुङ हे़न इनाम पिये।
थाङ्सिरिबेॽ सुम्मा खे़ये याङ्सरावा
(लुका १२:३३-३६; १६:१३)
19 “टाङ्बामि लागि इगो मक्खाम्डेमबेॽ याङ्सरावा ए़ॽनोःक्युक्सानुमे, इगोबेॽ पुजिक्नुङ खियाडे़ॽ चोबेन्डुहानुङ खुसुबाङ्जिडे़ॽ खुघे़न्डुजे। 20तर टाङ्बामि लागि याङ्सरावा थाङ्सिरिॽटु नोःक्युक्सानुमे, मोबेॽ पुजिगे़ॽ, खियाडे़ॽ नासि ले़टुनि, खुसुबाङजिडे़ॽसो खुघे़ॽहेसुजिनिबा। 21इन्ढोङ्होङ हाम्बेॽ हे़ने़ए़ याङ्सरावा टुहा, मोबेॽनोॽ हे़ने़ए़ निवासो पेङ्इये।
22 “मिक चाहिँ हिङामि लागि उःप्चिरा ले़ये। मिक चङ्गा ले़ःॽहोङ चोप हिङाबेॽनोॽ उज्यालो लिये। 23तर हे़ने़ए़ मिक धोमिलो ले़ःॽहोङ, हिङा चोपनोॽ सेन्जुगुप लिये। मोडोक्नोॽ हे़ने़ए़ निवाबेॽ टुये उज्यालो चाहिँ सिघे़ॽहोङ, मो इन्डोक सारो सेन्जुगुप लिइ होला!
24 “असे़ॽसो निच्चि मायोङ्बामि सेवा ले़ःॽहेसुनि। इन्डोक्नोॽ ले़ःॽमायोक्माबेॽसो इक्को सिॽचोन्डुए, हाइको चाहिँ नेन्जोन्डुए। इक्को आदर ले़न्डुए हाइको हेला ले़न्डुए। मोडोगे़ॽ हे़निङे़ॽसो निवाहाङ्नुङ याङ्सरावामि सेवा इक्खेप्पेॽ ले़ःॽहेसानुम्नि।
सुरता ए़ले़ःॽमे
(लुका १२:२२-३१)
25 “मोडोगे़ॽ के़ॽ हे़निङ लुनिम्ने़, ‘इमा चामे’, ‘इमा उङ्मे’, ‘इमा चाङ्मे’ लुनुङ टाङ्बामि हिङानुङ सोःक्मामि लागि सुरता ए़ले़टानुमे। इमा हिङ्मवा चामा, उङ्मानुङ चाङ्मे चेॽबाङ हिङा चुरोॽ बेॽए ने़ॽनेन्डे ? 26नान्द्रुङ्मे़ॽटु पेघुबा सोङाजि खाक्सानुमे, खोजि खेतिसो ले़ःॽमिनि, बालिसो हे़क्मिनि, भकारिबेॽसो सुप्सुजिनि तर थाङ्सिरिॽटु पेङ्खुबा हे़निङ्मि निवाहाङ पाबाडे़ॽनोॽ माहाजि हिङ्इन्डुजे। हे़निङ माहा सोङाजिबाङ्गो बेॽलो मुल्यनुङ्मा ले़न्डानिङे ने़ॽनेन्डे ? 27हे़निङ्बेॽ असे़ॽ चाहिँ सुरता ले़ःॽनुङ टाङ्बामि आयु इॽछोॽ येॽहेन्डानुमे ?
28 “मोबा चाङ्मे चेॽमि लागि हे़निङ इन्ढोङ सुरता ले़न्डानुमे ? नाम्भुङ्लाबेॽ फे़ॽइये लिलि उङ खाक्सानुमे, माहा इन्डोॽ वाबोक्इहा, माहाजिडे़ॽ ना योम्बोक ले़न्डुजे, ना चेॽ आॽइन्डुजे। 29तर के़ॽ हे़निङ लुनिम्ने़, हाङ्बा सोलोमनमि मोढे़ॽलो याङ्सरावा काप्टुरोसो खो मो उङ्डोक मे़न्चाक्हेसा। 30आयु मुक्मुक ले़हा, मोबा वागियानोॽ मिबेॽ हिक्खे़हा याॽवानोक्सो मोढे़ॽलो नुरोॽ चाक्खुबा निवाहाङ्डे़ॽ, हे़निङ छना बेॽलो चाक्निबा ? होउ बिस्वास मे़ॽनिङ्हा याॽमिजि।
31 “मोडोगे़ॽ ‘इमा चामे’, ‘इमा उङ्मे’, ‘इमाङ चाङ्मे ?’ लुनुङ सुरता एले़टानिङे। 32इन्ढोङ्होङ इडोक्हा खामि सुरतागो निवाहाङबेॽ बिस्वास मे़ले़ःॽखुबा याॽमिजिडे़ॽरेॽ ले़न्डुजे। तर इघा चोप खा हे़निङ पाप्मिये लुनुङ थाङ्सिरिबेॽ पेङ्खुबा पाबे़ॽ नुरोॽ लेन्डुहा। 33तर याक्लो हे़निङ्मि हिङ्मवाबेॽ निवाहाङ राज्य ले़ःॽमेॽटानुमे, खोमि आग्या पालना ले़टानुमे। मोबा हे़निङ पाप्मिहा चोप थोक येॽपिये। 34मोडोगे़ॽ वागियामि लागि सुरता ए़ले़ॽटानुमे, इन्ढोङ्होङ वागिया पाप्मिहा खा वागियानोॽ पुरा लिहा। आयुहा दुःख आयुमि लागि के़ॽलो टुहा।”
Jelenleg kiválasztva:
मत्ति 6: YAMP
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2023, Wycliffe Bible Translators, Inc. and Nepal Bible Society
