Yohanes 10
10
Kapalendano dhagano dhumba metaano lalo
10:1-21
1Nopugaumo Yesus ambano, “Amohatokoomu, kotu-kotuꞌu sasuka mesuano weo katondono dhumba miina namangka ne fointo, tamaka nekamponea pagala, mie aitu kasoꞌo bhe karampasi. 2Tamaka mie mesuano noangka ne fointo anoamo itu dhagano dhumba. 3Tungguno katondo nelengkaane fointo pakade dhumbano dotandaiꞌe suahano. Dhagano dhumba noloꞌoi neando seꞌulu-seꞌulu maka noatoda we simbali. 4Dopuli kaowu nofolimbada, dhaga anaꞌa nopaꞌinduluandamo, maka dhumbano doangkafie hampano dopandeꞌaanemo suahano. 5Tamaka ane nandoo seemie mengkahatono tetewei pae damangkafie, tadamilei hampano suahano miina damandeꞌaanea.”
6Pedamo anaꞌa kapalendano Yesus ne andoa, tamaka miina dalumosangiea o ae maꞌanano pugauno maitu. 7Yesus nopugaumo toha ambano, “Amohatokoomu, kotu-kotuꞌu Idimo ini fointo kaangkaꞌando dhumba anaꞌa. 8Kosasawindo maino maꞌinduluki kanau, sanea kasoꞌo bhe karampasi, dadiꞌanomo o dhumba dokiido dametingkeda. 9Idimo ini fointo, sasuka dhumba mesuano noangka ne Idi nasumalamati, tanamesua tanalumimba naepoꞌawaꞌao oti nehumaano. 10Kasoꞌo nomai kaowu nosibu, nofopongko bhe nofofekabinasa, tamaka o Idi amai so daeꞌawaꞌao dadi, bhe dadumadi napontalabhi-labhi.
11Idimo ini dhagano dhumba metaano lalo. Dhaga metaano lalo nopotahoꞌao inawano so dhumbano. 12Nopoꞌala bhe mie mealano ponambo, anoa maitu suano dhagano dhumba, suano dua kodhumbano. Mie medano aini, sanowoha daꞌu ngkahoku nomai, tanohunsada dhumba maitu maka nofilei. Dhumba andoa naꞌa nohontopidamo daꞌu ngkahoku bhe nopogasa-gasaanda. 13Kafileiꞌano mie amaitu neala kaowu ponambo, dadiꞌanomo miina napokihaꞌianda dhumba andoa maitu.
14Idimo ini dhagano dhumba metaano lalo. Dhumbaku apandeꞌaanda, andoa dopandeꞌa kanau dua. 15Tapedamo Amaku nopandeꞌa kanau, Idi apandeꞌaane dua. Idi ini apotahoꞌao inawaku so dhumbaku. 16Nandoo dua dhumbaku sigaoꞌano tapa maiꞌaono ne katondo aini. Andoa maitu tetewei dua amatoda maka datumandaiꞌe dua suahaku, dadiꞌanomo daembalimo naseguluma, dhagando naseemie. 17Amaku noasi kanau, mbaꞌinomo afowaꞌao inawaku, neanomo sumuli aꞌumawae. 18Bhe naseemie miina bhe so malano inawaku, tamaka afowaꞌane hampano kahelasino Wutoku. Idi akokuasa afowaꞌane, akokuasa dua sumuli atumahimae. Ainimo taka netahimaku ne Amaku.”
19Hampano pugauno Yesus maitu miendo Yahudi dewalamo, tadopotaga-tagalimo. 20Dobhahi mugauno ambado, “Anoa nobheemo, nopesuakiemo seetani. So dua ae metingkeꞌaoꞌomu pugauno?” 21Tamaka nandoo dua mugauno, “Pedando maitu suano pugauno mie nepesuakino seetani, bhahaa naembali dua seetani naefekantalea matano mie kabunto?”
Yesus dobansie miendo Yahudi
10:22-39
22Miina naompona nohatomo hohaeaꞌa Kafeꞌulaino Katipesuakiꞌano Toha Lambuno Lahataꞌala we Yerusalem. #10:22 Weo hohaeaꞌa Kafeꞌulaino Katipesuakiꞌano Toha Lambuno Lahataꞌala naꞌa, miendo Yahudi dofeꞌulai putae Lambuno Lahataꞌala suli dengkohafie bhe dofekangkiloe, kapaꞌamo padamo dengkohafie bhe dofekaharamue tantara miendo Yunani neowano Antiokus Epifanes. Ne naꞌa tantara miendo Yahudi noowada Yudas Makabe, kadhadhiano ne taꞌu 165 SM. Ampa aitu hohaeaꞌa aini dokonae Hanukka tawa hohaeaꞌano Kantalea. Wakutuu anaꞌa wulano use. 23Yesus nekala-kala weo kadeteno Lambuno Lahataꞌala, we tambi bhalano nekonando Tambino Salomo. 24Miendo Yahudi dolibue bhe dopugau ambado, “Tana seꞌae kaomponanoa kumataho kainsami tapoibhaha peda ini? Ane hintumo ini Mesias Omputo Fosalamatino fohato kainsami mentalea-mentalea.” 25Notobhoosidamo ambano, “Ingka padamo afohatokoomu, tamaka miina marasaeaꞌomu. Sabhaha kahadhaa nehabuku weo neano Amaku, aituꞌaemo ingka sanea sakusiiku. 26Tamaka hintimiu miina marasaeaꞌomu, hampano miina mesuaꞌomu gulumano dhumbaku. 27Dhumbaku dotandaiꞌe suahaku, Idi apandeꞌaanda, andoa doangkafi kanau. 28Andoa awaꞌanda dadi suhue dhamani, tetewei pae dabinasaa suhue dhamani bhe naseemie pae bhe so magoida maiꞌao ne limaku. 29Kapaꞌamo Amaku maꞌa kanau andoa maitu, nofofoliu kabhalano kuasano. Dadiꞌanomo bhe naseemie pae bhe so mondoino so magoida ne limano Amaku. 30Idi bhe Amaku taseꞌise.”
31Miendo Yahudi desangkemo toha kontu dabhatuhi Yesus. 32Tamaka ambano Yesus, “Nobhahi habu metaa nefotakano Amaku padamo afotiwohaangkoeꞌomu. Habu medando ae bhahaa so katibhatuhiꞌaku?” 33Dotobhoosimo miendo Yahudi ambado, “Suano mbaꞌinomo habu metaa nehabumu so katibhatuhiꞌamu, tamaka mbaꞌinomo fekaꞌaebu Lahataꞌala. Mahinggamo hintu itu seemie manusia melaa, pototoꞌao wutomu bhe Lahataꞌala.”
34Ambano Yesus, “Ingka notibuhi weo Kitabino Musa nefintahakimiu, ‘⸤ Nokobhoasaomo Lahataꞌala ne miendo Yahudi⸥ , ‘Hintimiu itu kalaha-lahataꞌala.’ ’ #Mzm 82:6 35Ingka dopandeꞌaanemo wambano Kitabi nolaku ampa suhue dhamani. Dadiꞌanomo, ane andoa tumahimano bhoasaono naꞌa nokonada kalaha-lahataꞌala, 36noafaꞌao dua ambamiu afekaꞌaebu Lahataꞌala mbaꞌinomo akona wutoku Anano Lahataꞌala? Gahaꞌaitumo Idimo nefopoolino Amaku bhe netuduno we dhunia ini. 37Ane pae ahumabu kahadhaano Amaku, koemo parasaeaꞌomua. 38Tamaka ane ahumabue, gahaꞌa nandoo mongaheomu marasaeaꞌomu ne Idi, taparasaeamoomu ne kahadhaaku itu. Ane nada anaꞌa mandeꞌaaneomu bhe lumosangieꞌomu ingka Amaku noseꞌise bhe Idi, o Idi aseꞌise bhe Amaku.” 39Andoa fendua toha dahumakoe, tamaka Yesus nolapa.
Yesus we sewetano umeleno Yordan
10:40-42
40Palusi anaꞌa Yesus nosulimo we sewetano umeleno Yordan, ne kafokadiuꞌano Yohanes endefiꞌini maka neate ne itu. 41Dobhahi mie maiꞌie bhe dopugau ambado, “Daanumo Yohanes miina sepaliꞌa naehabu tanda timenteꞌaono, tamaka kosasawiꞌae nepulaoꞌaono ne mie aini nokotuꞌu.” 42Sampe dobhahi mie ne itu marasaeano ne Yesus.
Jelenleg kiválasztva:
Yohanes 10: mnbSD
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2022, Wycliffe Bible Translators, Inc. All rights reserved.
