Mataayo 12

Yeesu niwe omukuru wa orusuku rwa Insabhaato

(Maariko 2:23-28; Ruuka 6:1-5)

1Rusuku rumwi iri Nsabhaato,#12:1 Nsabhaato. Ringira riingʼana Insabhaato mu-Mangʼana Amakomeeye. Yeesu ꞉aariga ˆnaatura mu-masambu ga ingano, ari amwi na abheeyigira bhaaye. Abheeyigira bhaaye mboongwa omweko, mbaamba okubhutura ebhyangara bhya ingano, mbarya obhweke. 2Bhunu Abhafarisaayo ꞉bhaarorere gayo, mbabhwira Yeesu ati, “Ringira, abheeyigira bhaawo abhakora ganu gateesire okukorwa ku-rusuku rwa Insabhaato!”#12:2 Ringira Obhungʼaanyi 20:8-11.

3Yeesu ˆnaabhasubhya ati, “Mukyariga okusoma mu-Makaamo Amataakatiifu kutyo Dawudi ꞉aakorere bhunu omweko ꞉gwamurumire ari na abheejaabho?#12:3 Ringira 1 Samweri 21:1-6. 4Dawudi ꞉eengiiye mu-nyumba ya Nyamuwanga. Mu-nyumba muyo ꞉gyariga girimo emikaate ginu ꞉gyasoosibhwaga ku-Nyamuwanga. Mmbe, Dawudi ˆnaagigega, ˆnaarya! ˆNaayaana na abheejaabho, bhoone kutyo ꞉bhaariga bhateesire okugirya okuriingʼaana na ebhiraagiro bhya Musa, tari ꞉gyaribhwaga na bhashengesi era. 5Na mukyari okusoma mu-bhiraagiro bhya Musa bhinu ebhyaikira abhashengesi bhanu abhakoraga emirimu mw-iyekaru rya Nyamuwanga ku-rusuku rwa Insabhaato?#12:5 Ringira Obhubhasi 28:9-10. Bhatakugwatira ebhiraagiro bhya okusiga okukora emirimu ku-rusuku ruyo, nawe Nyamuwanga atakubhabharira ati ni bhakayi. 6Woori, enibhabhwira ati, anu kiri anu, ariwo omuunu unu kaakira riiyekaru rya Nyamuwanga. 7Nawe raabhe mukamenyere insonga ya amangʼana ganu ati, ‘Eneenda abhaanu bhafwiranire ekigongo okukira okusoosha ekimweso,’#12:7 Ringira Woseya 6:6. mutaakaramuriiye abhaanu bhanu bhatari na kikayo. 8Omwana wa Adaamu, niwe omukuru wa Insabhaato.”

Okukora amajomu ku-rusuku rwa Insabhaato

(Maariko 3:1-6; Ruuka 6:6-11)

9Yeesu ˆnaasooka ayo, ˆneengira mw-isunagoogi ryebhwe. 10Mw-isunagoogi muyo, ꞉aariga arimo omuunu afuuyega okubhoko kwaye okumwi. Na Abhafarisaayo bhanu ꞉bhaariga mbeenda okusakya Yeesu insonga bhamusitaakye bhoone ꞉bhaariga bharimo. Mmbe mbamubhuusha ati, “Angu, okuriingʼaana na ebhiraagiro bhya Musa, iisire okuwosha omuunu ku-rusuku rwa Insabhaato?”

11Yeesu ˆnaabhasubhya ati, “Ni niga agati weemwe unu ari na ngʼondi yaaye yimwi, iingʼondi iyo ikagwa mw-itoko ruri rusuku rwa Insabhaato, atakuyikurura ayisooshe-mo? 12Nawe, Nyamuwanga keegana omuunu muno okukira iingʼondi! Mmbe woori, iisire muno okukora amajomu ku-rusuku rwa Insabhaato.”

13Kimwi Yeesu ˆnaabhwira omuunu unu ꞉aariga afuuye okubhoko ati, “Iimusha okubhoko kwawo.” Omwene woone ˆnaakwimusha, ayoayo nkuwora, nkubha rwa okubhoko kwaye okundi. 14Mmbe, Abhafarisaayo mbawuruka anja, mbaaikana kutyo bhareete Yeesu.

Yeesu niwe omujuuma unu asorerwe na Nyamuwanga

15Bhunu Yeesu ꞉aamenyere ganu Abhafarisaayo bhayo ꞉bhaariga mbaaikana okukora, ˆnaasooka-wo. Abhaanu bhaafu muno mbamuseeta ˆnaawosha bhanu ꞉bhaariga bharwaye bhoone kutyo. 16Nawe, ˆnaabhagaanya ati bhaasiga okubhwira abhaanu ati omwene ni niga, 17insonga riingʼana rinu Nyamuwanga ꞉aaikire okuturira ku-muragi Isaaya rikuumire ati,

18“Unu niwe omujuuma waani unu nisorere.

Unu niwe omwende waani,

niwe omutima gwani ogujomererwa.

Eniija okumutuurira-mo Omwoyo gwani,

insonga araashe amangʼana ga obhwerusha

ku-bhaanu bha mu-bhyaro bhyone kutyo.

19Ataribhambashaanya na muunu amwi

ati kumwayira bhaanu.

Na muunu woonewoone ataryungwa bhuraka bhwaye ku-njira.

20Atarimariisha omuunu unu ayigirwe

rwa omuyere gunu gubhondooywe,

kweki, atarisimya orutambi runu orwituuta ingesi

okuyikira anu arireeta obhurengeresi

bhutunge mu-bhaanu.

21Abhaanu bha mu-bhyaro ebhindi bharimwisiga.”#12:18-21 Ringira Isaaya 42:1-4.

Obhuturo bhwa Yeesu obhukira obhwa omukuru wa ebhiwi

(Maariko 3:20-30; Ruuka 11:14-23)

22Mmbe, abhaanu mbareetera Yeesu omuunu wumwi unu ꞉aariga awungirwe ebhiwi. Omuunu uyo ꞉aariga ari muwofu, na ari mujibhi. Yeesu ˆnaamuwosha, kimwi ˆnaarora, ˆnaamba na okwaika. 23Abhaanu bhoone kutyo bhanu ꞉bhaariga bhari ayo mbaruguura muno, mbaaika ati, “Angu, unu kaatura okubha niwe Omuyiiri Dawudi?”#12:23 Omuyiiri Dawudi. Ringira riingʼana rinu mu-Mangʼana Amakomeeye.

24Bhunu Abhafarisaayo ꞉bhoonguuywe amangʼana gayo, mbaaika ati, “Omuunu unu kaabhirimya ebhiwi ku-bhuturo bhwa Bherijebhuri,#12:24 Bherijebhuri. Ni esiina erindi rya Sitaani. omukuru wa ebhiwi bhyone kutyo.”

25Enu Yeesu amenyere ganu ꞉bhaariga mbeeganiirisha, ˆnaabhabhwira ati, “Abhaanu mu-bhukama obhumwi bhakarema okuungwana, obhukama bhuyo obhugwa. Na, abhaanu bha mu-musi ogumwi amwi nyumba eyimwi bhakarema okuungwana, abhaanu bhayo abhataana. 26Nikwo kutyo, raabhe Sitaani kaabhirimya Sitaani, obhukama bhwaye obhubha bhwatikire, bhutakutura kugenderera okubha-wo. 27Raabhe anye enibhirimya ebhiwi ku-bhuturo bhwa Bherijebhuri, abhaanu bheemwe abhabhibhirimya ku-bhuturo bhwaga? Ku-nsonga iyo, abhaanu bheemwe nibho bharyeresha ati muyabhire. 28Nawe, raabhe anye enibhirimya ebhiwi ku-bhuturo bhwa Mwoyo Omutaakatiifu wa Nyamuwanga, mmbe mumenye ati, obhukama bhwa Nyamuwanga bhwabhayikiriiye. 29Angu, omuunu kaatura kutiki okwingira mu-nyumba ya omuunu unu ari na amanaga okumuteesha ebhiinu bhyaye, akyari okumubhoya okwamba? Akamara okumubhoya kujomu, niwe woori kaatura okumuteesha ebhiinu bhyaye bhyone kutyo.

30“Omuunu woonewoone unu atari ku-rubhaara rwani, uyo niwe omusoko waani. Na woonewoone unu atakukumanya amwi na anye, uyo kaanyaraganya. 31Ku-nsonga iyo enibhabhwira ati, Nyamuwanga kaatura okwabhira ebhikayo bhyone kutyo, na amangʼana ganu abhamujabhura. Nawe abhaanu bhakajabhura Mwoyo Omutaakatiifu bhataryabhirwa. 32Kweki, omuunu woonewoone akaaika amangʼana amabhiibhi aga okurema Omwana wa Adaamu, aryabhirwa. Nawe, omuunu akaaika amangʼana amabhiibhi aga injabhuro ku-Mwoyo Omutaakatiifu, uyo ataryabhirwa. Ibhe ku-kyaro kinu, amwi ati ku-kinu kiriija.”

Abhaanu abhamenyekanira ku-bhikorwa bhyebhwe

(Ruuka 6:43-45)

33“Riiti riijomu eritwasha amatwasho amajomu, riiti riibhiibhi ryone eritwasha amatwasho amabhiibhi. Obhujomu bhwa riiti obhumenyekana okuriingʼaana na amatwasho gaaryo. 34Orwibhuro rwa ebhisoro emwe! Omutura kutiki okwaika amangʼana amajomu enu emwe muri bhakayi? Omuunu kaaroma ganu geejuuye mu-mutima gwaye. 35Omuunu omurengeresi kaaika amajomu okuriingʼaana na amajomu ganu geejuuye mu-mutima gwaye, nawe omuunu omukayi kaaika amabhiibhi okuriingʼaana na amabhiibhi ganu geejuuye mu-mutima gwaye. 36Mmbe, enibhabhwira ati, ku-rusuku rwa indamuro, abhaanu bharibharirwa amangʼana geebhwe goone kutyo aga obhuyagayaga ganu ꞉bhaaikire. 37Nyamuwanga kaakubhara ati uri murengeresi okuriingʼaana na amangʼana gaawo, na okuturira ku-mangʼana gaawo uriramurirwa.”

Abhafarisaayo abheenda ebhigwa okusooka ku-Yeesu

(Maariko 8:11-12; Ruuka 11:29-32)

38Mmbe, abheeyigisha bha ebhiraagiro bhya Musa abhandi na Abhafarisaayo mbabhwira Yeesu ati, “Ee Mwiyigisha, ekyenda ukore ekimenyegesho kikirore, niwe kimenye ati usookere ku-Nyamuwanga.”

39Yeesu ˆnaabhasubhya ati, “Orwibhuro rwa abhakosi bha amabhiibhi, na rutari rwitongeeye mu-meeso ga Nyamuwanga, nsiku gyone kutyo abheenda ekimenyegesho. Nitakubheeresha kimenyegesho kyonekyone. Nawe abhaaja okurora ekimenyegesho kimwi era, rwa kinu Nyamuwanga ꞉aakorere ku-muragi Yoona. 40Rwa kutyo Yoona ꞉eekaaye mu-nda ya riiswi riinene nsiku esatu ngeta na mwisi,#12:40 Ringira Yoona 1:17. nikwo kutyo Omwana wa Adaamu, ariikara mu-mbiiyira nsiku esatu mu-ngeta na mu-mwisi.

41“Ku-rusuku rwa indamuro, abhaanu bha mu-musi gwa Ninawi bhariyambaara na emwe mu-meeso ga Nyamuwanga, mbabharamurira ati muri bhakayi. Kwa okubha abheene bhunu ꞉bhoonguuywe omuragi Yoona ˆnaaraasha iingʼana ya Nyamuwanga ꞉bhaanugire ebhikayo bhyebhwe. Woori enibhabhwira ati, anu kiri, ariwo omuunu omukuru okukira Yoona, nawe mutakwenda okumwikirisha. 42Kweki, ku-rusuku rwa indamuro, omugore wa ebhurimbe ariyambaara na abhaanu bha orwibhuro runu, na aribharamurira ati muri bhakayi. Iribha kutyo kwa okubha omwene ꞉aasookere mu-kyaro kya areera insonga aaje eetegeereshe amangʼana ga obhwenge aga omukama Seremaani.#12:42 Ringira 1 Abhakama 10:1-13; 2 Amangʼana ga Nyakati 9:1-12. Woori enibhabhwira ati, anu kiri, ariwo omukuru okukira Seremaani.”

Yeesu kaagonya abhaanu bhanu bhatakuungwa Nyamuwanga

(Ruuka 11:24-26)

43Yeesu ˆnaagenderera okwaika ati, “Ekiwi kikasooka mu-muunu, ekiiyindayinda anu atari na manji, nkyagara owa okumuunyira, nkibhurwa. 44Nkyaika ati, ‘Enisubha mu-muunu unu ꞉naasookere-mo.’ Ekiwi kiyo kikasubha nkinyoora omuunu uyo ari rwa iinyumba inu itarimo muunu, yeyereeywe, yirooseresiibhwe kujomu, 45ekigenda okwagara ebhiwi ebhindi mungati ebhibhiibhi muno kukira ekyene. Mbiija mbiingira bhyone kutyo mu-muunu uyo. Mmbe omuunu uyo, obhuteero bhwaye obhubha bhubhiibhi muno kukira kutyo ꞉aariga ari ku-bhwambiro. Nikwo kutyo eyiija okubha kw-imwe, emwe abhaanu abhakayi.”

Nyiramwene Yeesu na bhaawaamuwaabho

(Maariko 3:31-35; Ruuka 8:19-21)

46Yeesu ꞉aariga akyaroma na riisangi rya abhaanu bhayo, bhaawaamuwaabho, na nyiramwene mbaaja, mbayambaara anja, mbeenda okuroma nawe. 47Omuunu owumwi ˆnaabhwira Yeesu ati, “Ringira, nyakumwana na bhaawaamuwaanyu bhayambaaye anja, abheenda okuroma na awe.”

48Yeesu ˆnaamusubhya ati, “Maayi ni niga, na bhaawaamuwaasu ni bhaaga?” 49ˆNaasomeeresha abheeyigira bhaaye, ˆnaaika ati, “Ringira, bhanu nibho bhaamaayi na bhaawaamuwaasu! 50Omuunu woonewoone unu kaakora ganu Raata Nyamuwanga wa mu-rwire keenda, uyo niwe omumura waasu, maayi, na omusubhaati waani.”

Jelenleg kiválasztva:

Mataayo 12: kya

Kiemelés

Megosztás

Másolás