Yuxan 2
2
Iysanıń birinshi káramatı
1Eki kún ótkennen soń, Galilanıń Kana qalasında úyleniw toyı boldı. Iysanıń anası sol jerde edi. 2Iysa menen shákirtleri de toyǵa mirát etilgen edi. 3Sharap tawısılǵanda, Iysanıń anası Oǵan:
– Olardıń sharabı tawısıldı, – dedi.
4Iysa oǵan:
– Apa, bul Meniń jumısım emes. Meniń waqtım ele kelgen joq, – dedi.
5Iysanıń anası xızmetshilerge:
– Ol sizlerge ne dese de, sonı isleńler, – dedi.
6Sol jerde diniy ádet boyınsha yahudiyler tazalanıw ushın qollanatuǵın, hár qaysısınıń sıyımlılıǵı eki-úsh metreta#2:6 Eki-úsh metreta – bir metreta shama menen 40 l. alatuǵın altı tas gúze bar edi.
7Iysa xızmetshilerge:
– Gúzelerdi suwǵa toltırıńlar, – dedi.
Olar gúzelerdi awzına deyin toltırdı.
8Sonda Iysa xızmetshilerge:
– Endi bunnan alıp, toy basqarıwshıǵa aparıńlar, – dedi.
Olar alıp bardı. 9Toy basqarıwshı sharapqa aylanǵan suwdı tatıp kórdi. Onıń qayaqtan kelgenin bilmedi, tek alıp kelgen xızmetshiler ǵana biletuǵın edi. Toy basqarıwshı kúyewdi shaqırıp:
10– Hár bir adam aldın jaqsı sharaptı, adamlar más bolǵannan soń pásiregin beredi. Biraq sen jaqsı sharaptı házirge deyin saqlapsań-ǵo, – dedi.
11Iysa bul birinshi káramatlı belgisin Galilanıń Kana qalasında kórsetip, Óz ullılıǵın ayan etti. Shákirtleri de Oǵan isendi.
12Bunnan keyin Iysa anası, tuwısqanları hám shákirtleri menen Kaparnahum qalasına keldi hám ol jerde bir neshe kún qaldı.
Iysanıń Ibadatxanadan satıwshılardı quwıwı
(Mat 21:12-13; Mrk 11:15-17; Luk 19:45-46)
13Yahudiylerdiń Qutqarılıw bayramı#2:13 Qutqarılıw bayramı – sózlikke qarań. jaqınlasıp qalǵanda, Iysa Erusalimge ketti. 14Ibadatxanada iri qara mal, qoy hám kepter satıwshılardı, sol jerde otırǵan aqsha almastırıwshılardı kórdi. 15Iysa arqannan qamshı islep, barlıq sawdagerlerdi, qoylardı hám iri qara mallardı Ibadatxanadan quwıp shıǵardı. Aqsha almastırıwshılardıń aqshaların shashıp, stolların awdarıp tasladı. 16Ol kepter satıwshılarǵa:
– Mınalardı bul jerden joq etińler, Ákemniń Úyin bazarǵa aylandırmańlar! – dedi.
17Sonda shákirtleri: «Seniń Úyińe bolǵan ıqlasım ishimdi jeydi»#2:17 Zab 68:10., – dep aytılǵan Muxaddes Jazıwdaǵı sózlerdi eslerine túsirdi.
18Yahudiy basshıları Iysadan:
– Bulardı islewge biyligiń bar ekenin bizlerge qanday káramatlı belgi menen dálilley alasań? – dep soradı.
19Iysa olarǵa juwap berip:
– Bul Ibadatxananı buzıńlar, Men onı úsh kúnniń ishinde qayta tikleymen, – dedi.
20Olar Iysaǵa:
– Bul Ibadatxana qırıq altı jılda qurılǵan, Sen onı úsh kúnniń ishinde tiklemekshimiseń? – dedi.
21Biraq Iysanıń Ibadatxana dep aytqanı Óz denesi edi. 22Iysa ólimnen qayta tirilgennen soń, shákirtleri Onıń bul sózlerin eslerine túsirip, Muxaddes Jazıwǵa hám Iysanıń bul sózine isendi.
23Iysa Erusalimde, Qutqarılıw bayramında bolǵanda, kópler Ol islegen káramatlı belgilerdi kórip, Onıń atına isendi. 24Biraq Iysa hámme adamlardıń kewillerin bilgenlikten, Ózin olarǵa isenbedi. 25Oǵan adam haqqında hesh kimniń gúwalıǵınıń hájeti joq edi. Óytkeni adamnıń kewlinde ne bar ekenin Ol biletuǵın edi.
Jelenleg kiválasztva:
Yuxan 2: QrqMK22
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Институт перевода Библии, 2022
