Yohaannis Mishiraachcha 8

Saa'llu'uuyyi Amadanto'i Meentichchi Bikkina

1Ihukkaarem Yesuus Wee'l duunanne firukko. 2Yesuus la'm balla soodaraar daram Keesammi Mine daba'llaa marukko. Manni hundim ixxi beyyo waarukkaare ixxi afuuraa losisukko. 3Saa'llu'uuyyi amadanto'oo mat meentichcho seera losisaanii Farisaawe'uwwii wotta'a ixxuwwi lambe'enne uullissa'a 4Yesuusina «Losisaancho! Tu meentichcho saa'llu'uuyyi amadanto'ookkotane. 5#Qes 20:10; Se'l 22:22 Ni Seeranne Muse'e kido'i meento kininne aphphinsaa shinoommisina ijaajaakko. Kaba at mayyitootto?» yito'o. 6Ixxuwwi eekka yito'ok ixxo kasassam googo siidda'a woshshinne digaaddeena hassa'atette hee'ukko. Ihukkaarem ixxi qubbaa maxxaarinne uullanne kitaabam hee'ukko.

7Ixxo dabaransita'a xa'mmito'i ammanenne uullaa ixxuwwina «Ki'nnuwwi lambe'iinsi baaxiil bee'ek gaassaa kina huushaa ise aphphisona» yukko. 8Eehid yaa odim qubbaa maxxaarinne uullanne kitaabukko. 9Ixxuwwi eekka macceesso'i ammanenne lommanniinsi ki'issa'a mat mat ikku'uuyyi utta'a matto'o. Yesuus ixxi illagenne uullita'a hee'llo'i meentichchonne maqirem mullam gatukko. 10Yesuus ee meentichcho xabbaa moo'aa isena «Taa meentichche, kabaxxi manni hanno affo'o? Ayyim keesenne oogatukkoyyonnihe?» yukko. 11Isem «Moollanna! Matim eesenne oogatukkoyyo» yito'o. Yesuusim «Anim keesenne oogatoommoyyo, mare! Od baaxiilo baxxitte» yukko.

Yesuus Ka Uullina Caakki Ihukkisa

12 # Mat 5:14; Yoh 9:5 Odim Yesuus «An ka uullina caakka. Eese awwonookkok ayyim heechcha uwwoo caakka siixxookko bagaan tuunsonne hee'ooyyo» yukko. 13#Yoh 5:31 Ee bikkina Farisaawe'uwwi «At ki gagina ku'llitoolli ihu bikkina woccoo woshshi hanqayyo» yito'o. 14Yesuus dabaraa «An i gagina ku'llummaare waarummi beyyoo maroommi beyyoo la'oommi bikkina an kuroommok hanqa. Ihukkaarem ki'nnuwwi an hanniinsi waarumda'e te'im hanno maroomda'e laqqakkamoyyo. 15Ki'nnuwwi oogattakkamok manni sawwixxisa. Ihukkaarem an ayyennem oogatoommoyyo. 16Ihona bagaan an oogatummaarem oogatoommok mullatte ihoo'n eese asse'u Iyyanninne maqirette ihu bikkina an oogatoommi oogato'i hanqo'ane. 17#Se'l 19:15 Ki'nnuwwi seeranne lam manchi naqqassolas oo naqqasso'i woshshi hanqi ihukkisa kitaabamaakko. 18An i gaqqi bikkina kuroommo; eese asse'u Iyyannim i bikkina kurookko» yukko.

19Ee bikkina ixxuwwi ixxena «Kiyyanni hannonnette?» yito'o. Yesuus dabaraa «Ki'nnuwwi eesem Iyyannam laqqakkamoyyo. Eese laqqakko'oohan ihuta'n Iyyannam laqqakkam hee'llakko'o» yukko. 20Yesuus kaka wocukkok Keesammi Minenne losisukkuuyyi Waa'ina diinate uwwakkam mu'uxxi gadanonnette hee'ukko. Ihukkaarem ixxena amman afubee'i bikkina ayyim ixxo amadukkoyyo.

21Odim Yesuus Ayihuxxi mannina «An uraa maroommaare ki'nnuwwi eese hassakkamo; ihukkaarem ki'nnuwwi baaxiilinnem letakkamo. An maroommi beyyo mattakkeena xantakkamoyyo» yukko. 22Ee bikkina Ayihuxxi manni «Ku ixxi ‹An maroommi beyyo mattakkeena xantakkamoyyo› yukkok ixxi gaga sheena hasaatennihe?» yito'o. 23Yesuus ixxuwwina «Ki'nnuwwi ka uulliinsette. Ihukkaarem an iimaniinsette. Ki'nnuwwi ka uulliinsette. Ihukkaarem an ka uulliinseyyo. 24An ki'nnuwwina ki'nnuwwi baaxiilinnem letakkamo yoommok ee bikkinatte. An anette ihummisa amma'nnitakkobeelas baaxiilinnem letakkamo» yukko. 25Ixxuwwi ixxena «At ayyette?» yito'o. Yesuus ixxuwwina «An luxxaanniinsim ki'isaa ki'nnuwwina kuraammo. 26An ki'nnuwwi bikkina wocoommokii oogatoommi luwwii lobakat luwwi yookko. Ihukkaarem eese asse'ukkok hanqo'an ihu bikkina ixxeensi macceesummi luwwa ka uulli minaadabina kuroommo» yukko. 27Yesuus wocukkok Waa'i bikkinatte ihukkisa ixxuwwi qoossito'oyyi hee'ukko. 28Ee bikkina Yesuus «An anette ihummisaa Iyyanni losisukkisaa wocoommo bagaan i malaayyinne maham issoombee'isa Manchi Beeto saqaltakkam ammane laqqakkamo. 29Eese asse'ukkok iinninne maqirem yookko. An hundem ammanem ixxo liiransoo luwwa issoommi bikkina eese mulla urooyyo» yukko. 30Ixxi eekka wocukkisam lobakat keen ixxonne amma'nnito'o.

Baaxii'l Agiddaniinsi Wolabbano Firimmi Bikkina

31Yesuus ixxonne amma'nnita'a hee'llo'i Ayihuxxi mannina «An yummisa hee'llakkolas ki'nnuwwi hanqo'i i losaano. 32Ki'nnuwwi hanqa laqqakkamo. Hanqim ki'nnuwwa wolabbanonne fissookko» yukko. 33#Mat 3:9; Luq 3:8 Ixxuwwi dabatta'a «Neese Abrihaam shumo'o! Ayyenam agiddano galloommoyyo. At neese hinkid ‹Wolabbanonne fittakkamo› yitoolla?» yito'o.

34Yesuus ixxuwwina dabaraa «Hanqinam an ki'nnuwwina kuroommo; ayyim baaxiilo baxookkok baaxiilina agishsho. 35Ihu ammanem agishshi gaqqi qachchisa ihaa minenne hee'ooyyo. Ihukkaarem Beet heer heerinam gaqqi qachchi ihaa minenne hee'ookko. 36Ee bikkina Beet ki'nnuwwa wolabbanonne fissulas hanqinam wolabbanonne fittakkamo. 37Ki'nnuwwi Abrihaam shumo'i ikkakko'isa la'oommo. Ihukkaarem an wocoommi woshsha aa'llakkobee'i bikkina eese shitakkeena hassakkamuulla. 38An wocoommok iina Iyyanni moo'isu luwwa. Ihukkaarem ki'nnuwwi issitakkamok ki'nnuwwi anniinsi macceessakko'i luwwa» yukko.

39Ixxuwwim dabatta'a «Niina anni Abrihaamatte» yito'o. Yesuus ixxuwwina «Ki'nnuwwi Abrihaam oos ikkakkota'n Abrihaam issu luwwa issitakkam hee'llakko'o. 40Ihukkaarem kaba ki'nnuwwi Waa'iinsi macceesummi hanqa kurummi eese shitakkeena hassakkamuulla. Abrihaam ee'isa issukkoyyo. 41Ki'nnuwwi issitakkamok ki'nnuwwi anni issu luwwa» yukko. Ixxuwwi ixxena «Neese hincarabe'uwwayyo. Niina anni mexxo'i Waa'a» yito'o. 42Yesuus ixxuwwina «Waa'i ki'nnuwwina anni ihuta'n Anni Waa'i beyyiinsi waarummi bikkina eese iittitakkam hee'llakko'o. An waarummok ixxi asse'ukkaarette bagaan i tii'llisayyo. 43An wocoommoka qoossitakkambee'ek mahinatte? An wocoommoka qoossitakkambee'ek i woshsha macceessakkeena hassakkambee'i bikkinatte. 44Ki'nnuwwik anni Sheexaancho; ki'nnuwwi issitakkeena hassakkamokim ki'nnuwwi anni mixano. Ixxi gaassiinsim ki'isaa foore shoohane. Ixxonne hanqibee'i bikkina hanqanne uullooyyo. Ixxi qophphanaanchoo qophphaninam annaa ihu bikkina ixxena qophphano wocimmi aalo'ome. 45Ihukkaarem an hanqa wocoommi bikkina ki'nnuwwi eese amma'nnitakkamoyyo. 46Ki'nnuwwiinsi eese ‹baaxiilaancho› yaa acceeqasookkok ayyette? An ki'nnuwwina hanqa kuroommuulli ihulas eese mahina amma'nnitakkamoyyo? 47Waa'iinsette ihukkok Waa'i sagara macceesookko. Waa'i sagara ki'nnuwwi macceessakkambee'i mashka'i Waa'iinsette ikkakkobee'i bikkinatte» yukko.

48Ayihuxxi manni ixxena dabatta'a «Neese ‹At Samaarekkichcho; keese habus amadaakko› yinummok hanqayyonnihe?» yito'o. 49Yesuusim ixxuwwina dabaraa «An Iyyanna lonsoommuulla bagaan eese habus amadukkoyyo. Ihukkaarem ki'nnuwwi eese sholliissakkamuulla. 50An i gagina lomba hasoommoyyo. Ihukkaarem iina lomba hasookkokii oogatookkokii mat yookko. 51Hanqinam an ki'nnuwwina kuroommo; ayyim an yummi woshsha macceesaa ijaajamookkok ixxi hore'em lehooyyo!» yukko. 52Ayihuxxi mannim ixxena «Keese habus amadukkisa kaba lanqummo. Abrihaam lehukko, hiraagaanim leto'o. Ihukkaarem at ‹An yummi woshsha macceesaa ijaajamookkok ayyim hore'em lehooyyo› yitoolla. 53At lehu niyyanni Abrihaamiinsi lophphitoohonnihe? Hiraagaanim leto'o. Eehaara'i at ki gaga ayyette yitoolla?» yito'o.

54Yesuus dabaraa «An i gaga lonsaqqumta'n i lombi maham awwaadooyyo. Eese lonsookkok ki'nnuwwi niina Waa'a yitakkam Iyyanna. 55Ihukkaarem ki'nnuwwi ixxo laqqakko'oyyo. An ixxo la'oommo. ‹An ixxo la'oommoyyo› yumta'n anim ki'nnuwwisam qophphanaancho. Ihukkaarem an ixxo la'oommo; ixxi sagarinam ijaajamoommo. 56Ki'nnuwwina anni Abrihaam an waaroommi balla moo'eena mixukko. Moo'aatim liiramukko» yukko.

57Ee bikkina Ayihuxxi manni ixxena «At qarantittaanniinsi ontayyi hiinchom ihoo'n hinkid Abrihaama moo'lleena xantitto?» yito'o. 58Yesuus ixxuwwina «Hanqinam an ki'nnuwwina kuroommo; an Abrihaamiinsim gaassaa hee'ummo» yukko. 59Ee bikkina ixxo aphphisseena kina ki'isso'o. Ihona bagaan Yesuus maaxamaa Keesammi Miniinsi firaa marukko.

Jelenleg kiválasztva:

Yohaannis Mishiraachcha 8: KeesKita

Kiemelés

Megosztás

Másolás