Luk 7
7
Jisɔs ɔgbana ori okɨmkɨm oni ɔta-iku
(Mt 8:5-13)
1Ndi Jisɔs owukanɛ bani mbɛ bayumɛ ratu birɛ mbi fɛb, oruŋɛ Kapanɔm. 2Ɔkɨmkɨm oni oju-reku ŋɔ osi Rom ŋɔ ɔra kafa ɔfɔnɔ ori ŋɔ ɔfɔnɔ rɔraganɛ na amɔ; bofiɛ bɔnyakanɛ mɔ ɔra na ɛyɔ rɔbɔ. 3Ndi ɔkɨmkɨm oni ŋɔ ofugɛ ratanɛ ɔbaŋa Jisɔs, otigɛ banintɨma bani Jus bajuju kɔkpɔlɛ mɔ ya owu gban ori ɔmɔ. 4Ndi bakɨmanɛ Jisɔs, bakpɔlɛ mɔ na etima na etima, “Oni ŋɔ ɔra oni ŋɔ anyaŋɛ. 5Ɔfɔnɔ rɔraganɛ na bani bayua mɨnɛ ori yu ɔsam-rɔrɛ.”
6Jisɔs oruŋɛ na abɛ. Ndi owura kpirekpirɛ na ɛtɔ, ɔkɨmkɨm oni ŋɔ otigɛ bacɛmɛ bamɔ ya bakakanɛ mɔ ya, ‘Ɔkɔ-Rokuku, kajuŋanɛ ɛkpaju ɛyɛ, nkifu ŋɔ aŋuɛ na ɛtɔ emia. 7Na mbubosi na nkiwu amiokikɔ ndi nkibigɛ kowu ɛyɛ ɛyɛ. Junɛ sɛ remu, ɛkpaju kuesi ori omia. 8Ami mɨnɛ, nra oni ŋɔ nra irɨma ntunɛ bani mbɛ bacia mi, mɨnɛ nfɔnɔ baju-reku mbɛ bara irɨma ntunɛ imia. Nkanɛ ŋɔ mɔ, ‘Taŋɛ,’ mɨnɛ okoru. Nkanɛ ojuju mɔ, ‘Wu!’ Mɨnɛ okowu. Nkanɛ ori omia, ‘Si mbu!’ Mɨnɛ okosi bu.”
9Ɛkpaju ɛyɛ Jisɔs ndi ofugɛ ramu kɔtanɛ ndɛ; ocimɛnɛ ɔkanɛ bani mbɛ bakpunɛ banyɛgɛ mɔ, “Nkanɛ nu, nkiginɔŋɔ fɛ ɔkɨmkɨm renyiɛ-etima aya ndi, tum na Isɨrɛl!” 10Bacɛmɛ mbɛ otigɛ baŋbɨnɛnɛ na ɛtɔ ɛmɔ bafɛ ori ɔcɛmɛ ɔbɛ na kotigiri ɛkpaju.
Jisɔs ofiɛ oburɛ wɔ orumanɛ ɔwanɛ ekud na rɔbɔ
11Egbigbɨra kegbu Jisɔs na banyɛgɛ mɔ bara na ɛyɔ baruŋɛ rɔrɛ Nai, mɨnɛ ɛrɨm bani bakpunɛ banyɛgɛ bɛ. 12Aya ɔjaga na okegere ekuma rɔrɛ kandu, bafɛ bani mbɛ basɔgɛ obureburɛ bajaga na rɔrɛ, wɔ orumanɛ ŋɔnɛŋɔnɛ ŋɔ ɔwanɛ ekud ŋɔ ɔfɔnɔ. Mɨnɛ bani ecii mbɛ basi kafa na rɔrɛ kandu bara banyɛgɛ ɔwanɛ ekud ŋɔ. 13Ndi Ɔkɔ-rokuku ɔfɛ ɔwanɛ ŋɔ, erun esi mɔ mɨnɛ ɔkanɛ mɔ ya, “Kabi.”
14Jisɔs oruŋɛ ɔkakpɨm nkpukpu obureburɛ, bani mbɛ basɔgɛ mɔ babara, mɨnɛ Jisɔs ɔkanɛ ya, “Orindi! Gbɛ, nkanɛ wu!” 15Obureburɛ ɔgbɛ otumetumɛ ɔbɨnɛ kɔtanɛ, mɨnɛ Jisɔs ɔsɛ mɔ ibɔ ɔjɛ minka.
16Oni naŋɔnɛ ŋɔ ɔra kafa ɔra na bofu mɨnɛ baka Ɛbrɔkpabi. Batanɛ ya, “Okɨmkɨm ɔkanɛ-rotuma Ɛbrɔkpabi ɔranka nfa na ayu! Ɛbrɔkpabi ewu kɔnyaŋɛ bani bamɔ.” 17Kɔtanɛ resi Jisɔs ndi kokudkanɛ Judia ndɨm na kwa nancɛnɛ na irɛ nji ira mbari kaŋɔ.
Banyiɛ-rotuma Jɔn oruŋɛ-raku
(Mt 11:2-19)
18Ndi banyɛgɛ Jɔn bakanɛ mintɛ ɔbɛ gbanambunɛ mbu batanɛ babaŋa Jisɔs, Jɔn ojia bɛ iti ifa 19otigɛ bɛ ɛyɛ Ɔkɔ-rokuku ya bakasɨn mɔ ya, “Awu mɔ ara oni ŋɔ okowu, din refumanɛ oni ojuju-ɛ?”
20Ndi bawu ɛyɛ Ɔkɔ-rokuku, bakanɛ mɔ ya, “Jɔn oruŋɛ-raku mɔ otigɛ yu ya rɛsɨna ara awu mɔ ara oni ŋɔ okowu, din refumanɛ oni ojuju-ɛ?”
21Ndi bani mbɛ Jɔn otigɛ bajaga kafa, Jisɔs ɔra ɔgbana bani ecii ifiɛ na bɔlɨŋa na bɔlɨŋa, okpu bɔkɔ-bobi, mɨnɛ osi bajaga jɛnɛ ecii bafɛ ɛyɔ. 22Jisɔs ɔkanɛ bani mbɛ Jɔn otigɛ ya, “Ŋbɨnɛnɛ nu kakanɛ Jɔn mbu mimbɔfɛ mɨnɛ minfugɛ. Bajaga-jɛnɛ bafɛŋɛ ɛyɔ, mambɨni bagbɛ rɔcɛ, ɛkpaju etigiri bafimɛ bafun, mɨnɛ balagatuŋ bafugɛ ɛyɔ. Babureburɛ bafiɛ na rɔbɔ, mɨnɛ baram bafugɛ brika ramu. 23Ɛbrɔkpabi kuɛjɛ oni naŋɔnɛ reŋunɛ ŋɔ ɔbɔ okikɨna mi na mbu nsiŋɛ.”
24Ndi bani mbɛ Jɔn otigɛ baŋbɨnɛnɛ, Jisɔs ɔbɨnɛ kɔkanɛ bani mbɛ babɨbi kafa ratanɛ ɔbaŋa Jɔn: Baga kɛlɨŋa oni mɔ minrua kɔfɛ na kwa bani babɔbatumɛ? Ɔra gbanta aya bowuliwaŋa mbu ɔfɨm owuɛ ɔjɛ kofiri na koruma-ɛ? 25Minrua kaka minkafɛ bu? Oni ŋɔ oyuɛnɛ na brika bɔfɔ-ɛ? Bani mbɛ bayuɛnɛ kanya batumɛ na rokpin jɔgjɔg batumɛ na ɛsa bakɨm. 26Kanɛ mi, minrua kaka minkafɛ bu? Ɔkanɛ-rotuma Ɛbrɔkpabi-ɛ? Kpikpɛ, na mbu ɔra! Nkanɛ nu minfɛ mbu bocia Ɔkanɛ-rotuma Ɛbrɔkpabi. 27Jɔn mɔ ɔra oni ŋɔ manrɛ Ɛbrɔkpabi mankanɛ ya, Ɛbrɔkpabi ya:
“Kuntigɛ onyiɛ-rotuma omia ɔbɛ wu rɔsɔ.
Koyuɛ ɛyɔ ɛyɛ.” #7:27 Fɛ Malakai 3:1
28“Nkanɛ nu, Jisɔs okuɛ, na bani mbɛ babanɛ bama, oni ɔra ŋɔ ocia Jɔn. Nsu oni ŋɔ ɔra kekurɛ kɛtɨbi na rɔrɛ-rɛkɨm Ɛbrɔkpabi ocia Jɔn.”
29Oni naŋɔnɛ ɔra ofugɛ Jɔn. Abɛ mɨnɛ titi batama bagbuga retu bayɔgɛ ramu Ɛbrɔkpabi mɨnɛ basi mbu bɔra cɛrɛrɛ. Na mbu bosi na banyiɛ Jɔn oru bɛ raku. 30Nsu Bafarisi na bakpɛbɛ Ibina Mosis bakɨna mbu Ɛbrɔkpabi etimanɛ ɛbaŋa bɛ, ndi bakinyiɛ Jɔn oru bɛ raku.
31Jisɔs oruŋɛ rɔsɔ na kɔtanɛ kɔmɔ ya, “Kunku, Nyumɛ bani kɛsɛ nci na bu-e? Bara bagadɔ kɛlɨŋa bani-e? 32Bara aya bimbɔ mbɛ batum na rɛfɨn bakuga bacɛmɛ,
“Rewuɛ ofɨriko ibɨna kɛtɔmɔ
rɛba, minkituba!
Rɛkɔnɔ rabɨna rɔbɔ,
minkibi!”
33Jɔn oruŋɛ-raku owu, ɔkarɛnɛ ŋbɔ, mɨnɛ okiŋɔ mantugi, anu ya, ‘Kɛkɔ-kebi kɛra mɔ na ɛkpaju!’ 34Nsu Wɔ Oni owu, odiŋɛ mɨnɛ ɔŋɔŋɛ, anu ya, ‘ka orumanɛ ŋɔ! “Odiedi na obuma-tugi, ɔcɛmɛ batama bagbuga-retu na basiŋɛ-bobi.” 35Nkatid Ɛbrɔkpabi ɔra kpikpɛ na rokpin bani mbɛ banyɛgɛ ji.
Jisɔs na ɛtɔ Saimɔn ŋɔ Farisi
36Oni Farisi ojia Jisɔs ya orua ɔkadi bedidi korirɛ na amɔ. Mɨnɛ Jisɔs oruŋɛ na ɛtɔ ɛmɔ ɔkatumɛ kodi bedidi. 37Na rɔrɛ kandu ɛfɔnɔ ɔwanɛ ŋɔ ɔra kafa ŋɔ osiŋɛ bobi. Ndi ofugɛ ya Jisɔs ɔra na ɛtɔ oni Farisi odiŋɛ bedidi, owu na keyiyibi akparikpa#7:37 Keyiyibi akparikpa Akparikpa ŋɔ batanɛ nfa, babɛ rata ndɛ raba ogbuga basi, bajiŋɛ dɛ ya alabasta mantana mmɛ manrɔmɔ kɛnyam mɨnɛ mamba rɛfɨn, 38owu bari Jisɔs ɛyɛbirɨma, okunɛ bɔkpaga, obiŋɛ ɔbɛrɛ mɔ bɔkpaga na ijiɛ imɔ mɨnɛ ɔfɔnɔ bu na riria rimɔ, okugɛbu kama, mɨnɛ ɔwa mantana kɛnyam mmɛ na abu.
39Ndi orumanɛ Farisi ŋɔ ojia Jisɔs ɔfɛ mbu bɔjaga, ɔkanɛ ɛkpaju ɛmɔ ya, “Ara oni ŋɔ ɔra ɔkanɛ-rotuma Ɛbrɔkpabi nakpikpɛ, kuɔgbɨra ɛdɔ kɛlɨŋa oni ŋɔ ɔwanɛ ŋɔ ɔra ŋɔ ɔkpɨma mɔ nya! Ɛdɔ rokpin bobi ndu ɔra na adu!”
40Jisɔs ɔkanɛ mɔ ya, “Saimɔn, nfɔnɔ gba kɔkanɛ wu.”
Saimɔn ɔfɛlɛ mɔ ramu ya, “Ɔkpɛbɛ, kanɛ mi.”
41Jisɔs ya, “Ɛfɔnɔ bani bafa mbɛ badi ɔfɔrɛ bagbuga mantɨma,” “Ŋɔnɛ odi mɔ ɛgɔd dinarɔs jinɛ irɨma iram itan, ŋɔka odi mɔ iram dinarɔs ifa irɨma jubi #7:41 Dinarɔs Dinarɔs ŋɔnɛ na ogbuga ŋɔ oni rɛsɛ odiŋɛ na rɛsɛ reyi dinɛ 42Abɛ iti ifa oni ŋɔ ɔfɔnɔ bagbuga kɔkɔri mɔ ɔra, osugɛ mantɨma kamɛ ɔjɛ bɛ iti ifa. Na bani mbɛ bafa, ŋɔn mɔ ɔkɔfɔn rɔraganɛ na amɔ ocia?”
43Saimɔn ɔfɛlɛ mɔ ramu ya, “Ŋɔ odi mɔ mantɨma ecii.”
Jisɔs ɔkanɛ mɔ ya, “Atanɛ cɛrɛrɛ.”
44Ocimɛnɛ ɔrɔ ɔwanɛ ŋɔ nsu ɔkanɛ Saimɔn ya, “Ta arigɛ itɨm na ɔwanɛ ŋɔ-ɛ? Ndi Nnɔ na ɛtɔ ɛyɛ, akijɛ mi mani ya Nru bɔkpaga bomia. Nsu ɔwanɛ ŋɔ oru bɔkpaga bomia na ijiɛ imɔ mɨnɛ ɔfɔn bu na riria rimɔ. 45Akiyɛ mi na rekugɛ kama ndi nwu, nsu ɔwanɛ ŋɔ okigiba-kɛkɨbi kokugɛ bɔkpaga bomia bɨnɛ ndi nwu. 46Akiwa mantana olif na retu remia, nsu ɔwanɛ ŋɔ ɔbɛrɛ bɔkpaga bomia na mantana kɛnyam mmɛ mamba rɛfɨn. 47Nkanɛ, wu yɛ, ɔkɨmkɨm rɔraganɛ ndu ɔkɔgɛ, rɔkɔgɛ ya, enyi bobi bɔmɔ kambu ŋbɛ nsugɛ mɔ. Nsu oni naŋɔnɛ ŋɔ bagbɛ basugɛ mɔ na egbigbɨra, ɔkɔgɛ egbigbɨra rɔraganɛ.”
48Jisɔs ɔkanɛ yɛ kaŋɔ ya, “Ŋbɛ nsugɛ wu na bobi bɔyɛ.”
49Bani bajuju mbɛ batum kafa na keti bedidi babɨnɛ kɔtanɛ na bɔkpaju bɔbɛ, “Baga oni mɔnya, ŋɔ ɔgbɛŋɛ osugɛ bani na bobi bɔbɛ?”
50Jisɔs ɔkanɛ ɔwanɛ nsan ya, “Renyiɛ-etima rɛyɛ rɛnyaŋɛ wu; taŋɛ na reŋunɛ.”
Jelenleg kiválasztva:
Luk 7: Olulumo-Ikom
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
©️2022 Luke Initiative for Scripture Translation
