Makö 12

Lebhenʋnyʋaa' ‑nyunɔɔ' nyädlaa

(Matie 21.33‑46; Lukö 20.9‑19)

1'Nɩ Zozii yiwa ‑nyädlä soo, ɔ lä nyɩkpɔ ‑bhlo, ɔmɔɔ‑ ‑goo lä ɔɔ' divaa‑gälöklä. Ɔ ‑vë 'klaa ‑gbugbë 'yikʋ 'nɩ ɔ ‑nʋ ‑mɔɔ divaa‑gälöö' 'ylüüdä. 'Klaa' 'kʋ dɩdɛlɩɩ' ‑za, ɔ slää‑ ‑mɔɔ ‑papä. 'Nɩ ɔ ŋʋʋ‑ ‑mɔɔ lebhe‑nʋnyʋä ‑yä wa 'kä lebhe nʋ ‑yä ɔ ‑yʋwa 'sɔ 'kä dëë. 'Nɩ ɔ yi 'plö 'nɩ ɔ yi lowluu' mʋ. 2Divaa‑gälöö' zää‑tänyɩɛ ‑ŋëë ylä nä, 'nɩ ɔ yi ɔɔ' ‑gänʋnyʋaa' ‑bhlo lobho nynä ɔ mʋ ‑yä ɔ 'ni lebhe‑nʋnyʋa 'yi ‑yä sä ‑wa ‑yɔsɔ ŋʋʋ‑ bhlä nä, wa 'kä yɩ sɔɔ dëë. 3‑Mä nyɩkpɔɔ ‑mʋ lä nä, wa ‑klɔ 'nɩ wa ‑bhütüo, 'nɩ wa yio 'tlü. Ɔ nää‑ wlɩ wlɩ 'nɩ ɔ yi 'ylɩbhɔ. 4'Nɩ 'klaa käänyɔ yi bʋkʋ ɔɔ' ‑gänʋnyʋaa' 'sɔnalɔɔ lobho. Wa ‑klɔ lä 'sɩɩ nä, kwa wlänöɔ ‑kwätlö 'wlu, 'nɩ wa yio ‑sʋkpa. 5'Nɩ 'klaa käänyɔ yi bʋkʋ ɔɔ' ‑gänʋnyɔ ‑bhlo lobho. Wa ‑klɔ lä nä, kwa bhlɔɔ‑ 'nɩ ɔ yi 'ku. Ɩ ‑kʋ sɔɔ 'nɩ ɔ ‑lobho bʋkʋ ‑mɔɔ ɔɔ' ‑gänʋnyʋaa' ‑bhutukpä. ‑Mä lebhe‑nʋnyʋa ‑bhütë ‑nänʋä, 'nɩ wa bhlää‑ ‑nänʋä.

6Ɩ ‑kʋ bhɛ lä sɔɔ nä, ɔɔ' 'yuo ‑bhlo ɔ ‑kä bhlä nä, ɔɔ' ‑wawayuo, ɔmɔ ɔ ‑lobho yɩ gbäbhɩädä. Ɔ bhobho bhɛ nynä sä ɔɔ' 'yu lä nä, wa kɔ 'yi nii‑ nä, wa yio 'klʋkpää' 'ŋʋ. 7‑Mä wa nio‑ lä 'yi nä, kwa ‑sonö ‑sonö, wlä ‑ɔ 'gä lä 'klaa jaa 'kʋ lüü nä, ɔmɔɔ‑ yi lä ‑mɔyɩ! A yi ‑a 'bhlɔɔ ‑yä 'klaa 'kä ‑anyɩa laa 'plöö!

8Wa ‑klɔɔ 'nɩ wa yio 'bhlä 'nɩ wa yi ɔɔ' ‑gɛzɛɛ 'klä 'pä. 9Nä 'klaa 'bä kä ‑yi nä, sä ɔ 'kä bhä nʋʋ? Ɔ kä ‑yi nä, kɔ 'kä lä 'klaa 'mnö lebhe‑nʋnyʋa 'bhlä, ɩyä ɔ 'ka 'yigäda‑nyɩkpa 'mnö 'ŋʋ.

10A yä ylä wälɩklënä Laagɔ‑bɔɔgʋʋ 'mnö zɛnöö? Kɩ ‑jɩjlɔ lä nynä

Cɛkʋbhëa ‑bhitislänyʋaa' bhɔɔ lä 'mänyɩ‑ nä,

Amää‑ ‑kään ylä ‑bhutuu sä.

11 ‑A gɩɩ 'mnö wloo nä,

Ɩ ‑glö plɛkʋ 'ninie‑wälɩ.

Kwlienyɔ Laagɔ‑ 'mɔɔ‑ ‑gbä lä 'nɩ

Ɩ plöö‑ lä sɔɔ 'kʋ. # 12.11 Ɩ bha Lɔlɔ 118.22‑23.

12‑Mä Zozii ci bhlä sɔɔ nä, 'Zufʋnyʋaa' 'cifinyʋa ‑yi bhä sɔɔ nynä wamä ɔ sä bhlä. Ɩ ‑kä 'ŋnö nä, wa tään bhɛ nynä wa 'kɔ 'bhlä, ‑mä sä wa ‑guu bhlä ‑jlëa nä, kä wa ‑bhɔɔ yëku 'nɩ wa yi mʋ.

'Loyo 'kädɔɔ Sezaa' lapoo

(Matie 22.15‑22; Lukö 20.20‑26)

13'Nɩ wa yi Falizɩɛnyʋä ‑yä Elodöö' ‑jɛnyɩɛɛ' nyɩkpa ‑zio lobho nynä wa yi ‑yä wa 'kä Zozii ‑zɔɔ 'pä ɩyä ɔmɔ 'titii' në 'kɔ gbʋ klaa. 14Wa ‑yi lä 'nɩ wa yio 'ylä, wlä Cɩanyɔ‑, ‑a ‑yi sɔɔ nynä ‑mä ‑n ‑glö ‑nʋawlɛɛ‑cinyɔ. Kä ‑n cɩa nyɩkpa Laagɔɔ' ‑blɔɔ 'kʋ ‑nʋawlɛɛ. Nyɩkpɔɔ' kʋkʋsä, sɔɔ ‑nn wloo ‑wʋ 'nɩ ‑n 'gä ci. 'Nɩ ‑nn ‑guu ‑wʋ 'sɩɩ nyɩkpɔɔ' 'klʋ ciciwälɩ. Nä, ‑n sonö‑anyɩ ‑wʋ saa. Laagɔɔ' ‑Jlämaa ci bhä nynä ‑mä ‑a 'pɛɛ 'loyo 'kädɔɔ Sezaa' lapoo ‑a? ‑A 'pɛɛnʋ bhä ‑a, ‑mä ‑aa 'pɛɛnʋ ‑lä bhä ‑a?

15‑Mä Zozii nii‑ bhɛ lä waa' ‑kpläkplaa 'yi nä, kɔ cii‑, ɔ lä ‑ɔnözä 'nɩ a sä'ä bhä ‑zɔɔ? A lä'ä ‑wʋ saa ‑flëëgie ‑yä n 'kɛ 'ni! 16Wa ‑lɔɔ lä ‑flëëgie nä, 'nɩ ɔ yiwa 'ylä, ɔ lä nyɩkpɔɔ ‑ɔnö 'wluu wa ‑bhütëë lä 'flëëgie 'klʋ, 'nɩ ‑ɔnö 'ŋnöö wa ‑jɩjlä lä ‑lɔɔ nä, lɔɔ ‑sa bhää? Wlä 'loyo 'kädɔɔ Sezaa 'mɔɔ‑ ‑kʋ lä ‑lɔɔ. 17Zozii lä ‑aaa! Nä, ‑ɔ gä sɔɔ nä, daa‑ plöö‑ lä Sezaa' dä nä, a 'nyɛ ‑lɔɔ Sezaa, ɩyä daa‑ plöö‑ lä Laagɔɔ' dä nä, a 'nyɛ ‑lɔɔ Laagɔ! ‑Mä Zozii cii‑ lä sɔɔ nä, kä nükpëë' ‑slʋwa.

'Kudukua 'kuëë glɔɔlɩɩ' yëkuu' wälɩ

(Matie 22.23‑33; Lukö 20.27‑38)

18'Zufʋnyʋaa' ‑jɛnyɩɛ wa laa lä Sadisɩɛnyʋa 'nɩ ‑waa laa bhɔɔ lä 'kudukuë' 'kuëë glɔɔlɩ nyaasäsä nä, wa ‑yi Zozii yëku 'nɩ wa yio 'ylä, wlä 19Cɩanyɔ‑, Moyizöö' ‑Jlämaa ci nynä nyɩkpɔ ‑yä ɔ 'ŋnɔ 'sɔ 'nö 'yu ‑gään 'nɩ ɔ kä kuu‑ nä, ɔ bheli 'bhlü 'Kuzëlü‑ŋnɔɔ 'kʋ ‑yä ɔɔ' 'lɔlʋʋ' kä ‑kä mnɔ.#12.19 Ɩ bha Detlo 25.5. 20Nä, ‑n ni bhelie ‑ngbɔɔsɔ ‑kʋ bhä ‑lɔɔ. Tɛɛtɛɛlɔɔ nöö‑ bhä 'ŋnɔ, ‑mä ɔ ‑yɔsɔ ‑wʋ 'yu ‑gään, 'nɩ ɔ yi 'ku. 21'Nɩ 'sɔnalɔɔ yi 'kuzëlü‑ŋnɔɔ 'kʋ 'bhlü. Ɔ ‑yɔsɔ ‑wʋ 'sɩɩ 'yu ‑gään 'nɩ ɔ yi 'ku. 'Nɩ taanalɔɔ yio 'kʋ 'bhlü, ‑mä säbhlo ‑säbhlo, ɔ ‑yɔsɔ ‑wʋ 'sɩɩ 'yu ‑gään. 22‑Mä bhelia kuu‑ sɔɔ ‑aaa, 'nɩ wamä ‑ngbɔɔsɔ ‑bhɩä. 'Nɩ 'ŋnɔɔ ‑mä ɔ yi 'sɩɩ ‑mɔɔ plä 'nɩ ɔ yi 'ku. 23Naa, bhelia ‑ngbɔɔsɔ ‑wa nönöɔ‑ bhlä nä, 'kudukua kä 'kuëë glɔɔ nä, waa' nëëdëë' lɔɔ ‑sä 'titi ‑ɔ 'gä bhä 'ŋnɔɔ 'kʋ 'bhlüü?

24'Nɩ Zozii yiwa soo, ɔ lä sa bhobho lä ‑lɔyɩ nä, a yä mnɔ. ‑Ɔnöza bhää? Laagɔwälɩɩ a ‑zɛɛ lä nä, a 'nɩ ‑wʋ 'mʋ nuu‑, 'nɩ Laagɔɔ' 'päwaa' sä a ‑kʋ lä nä, aa ‑wʋ 'sɩɩ sɔɔ ‑yi. 25Sɩ ‑kʋ lä na, 'kudukua kä 'kuëë ‑glɔɔ nä, nönölɩɩ' wälɩɩ' ‑läyɩɔ kʋ. ‑Mɔɔ Laagɔ yëku nä, kä nyɩkpa 'kä lä kʋ nynä ‑Laagɔzizi. 26Moyizöö' 'bɔɔgʋʋ 'mnö wälɩklëa ‑a ci lä ŋnäŋnä‑kpäkaa' yëkuu' wälɩ nä, a 'nöa ‑wʋ 'mʋ nuu‑ ‑a? ‑Ɔ plöö‑ lä 'kudukuaa' glɔɔlɩɩ nä, Laagɔ lä, ‑amʋʋ‑ plöö‑ lä Ablaamʋʋ' Laagɔ, n plöö‑ Yizaköö' Laagɔ, 'nɩ n plöö‑ Zakɔpʋʋ' Laagɔ. 27Laagɔɔ' ‑wʋ 'kudukuëë' Laagɔ plöö‑ ‑mä ʋ ‑glö ‑yäyänyʋaa' Laagɔ. Nä sä a cii‑ lä nä, ka mnɔɔ‑ lä 'titi.

‑Jlämöö 'fɩɩn ‑lɛkäda

(Matie 22.34‑40; Lukö 10.25‑28)

28 ‑Jlämöcɩanyʋaa lɔɔ ‑bhlo ‑kʋ bhä ‑lɔɔ, 'nɩ ɔ ‑puwa bhä 'nyukwli. Ɔ nii‑ lä 'yi nynä Zozii ŋoo‑ 'nägäsä Sadisiɛnyʋa' 'kwäslɛɛ 'kʋ nä, kɔ 'jluo‑ yëku 'nɩ ɔ yio 'ylä, ɔ lä Cɩanyɔ‑, ‑Jlämä ‑sä plöö‑ bhä Laagɔɔ' ‑Jlämöö nëëdëë' ‑lɛkädää? 29Zozii lä ‑Jlämaa 'mnöö ‑lɛkädaa, ka ci lä nynä ‑mä, A poo 'nyukwli 'Yizlɛnyʋänyɩ‑! Kwlienyɔ Laagɔ, ‑anyɩa' Laagɔɔ, ʋmʋ ‑bhlo plöö‑ lä Kwlienyɔ! 30Ɩ ‑ŋwa 'kʋ nynä Kwlienyɔ ‑naa Laagɔ, ‑n wamänöɔ ‑naa pleyii 'fɩɩn, ‑n wamänöɔ ‑naa 'wugaa 'fɩɩn 'mnö, ‑n wamänöɔ ‑naa bhobholɩɩ 'fɩɩn 'mnö, ‑n wamänöɔ ‑naa 'tɛtɩɩ 'fɩɩn 'mnö.#12.30 Ɩ bha Detlo 6.4‑5. 31'Sɔna ‑jlämaa‑ ‑gbɛɛ lä ‑näna kätää' nä, ka ci lä nynä ‑mä, sä ‑n ‑waa lä ‑n yëku nä, ‑n wamä sɔɔ ‑n ‑lie.#12.31 Ɩ bha Levi 19.18. ‑Jlämää' yɩɔ bʋkʋ ‑mɔɔ klë ‑kʋ 'nɩ a 'kä yɩ ‑Jlämönö 'sɔ 'kʋ ‑zi.

32'Nɩ ‑Jlämöcɩanyɔɔ yi Zozii soo, ɔ lä 'zaazɩ Cɩanyɔ‑, ‑n cii‑ ‑nʋawlɛ nynä Kwlienyɔ Laagɔ ‑bhlo plöö‑ Laagɔ. Laagɔɔ' yɩɔ bʋkʋ ‑kʋ 'nɩ ‑ɛnö ʋmʋ ‑bhlo. 33Ɩ ‑ŋwa 'kʋ nynä nyɩkpɔ wamä Laagɔ ɔɔ' pleyii 'fɩɩn, ɩyä ɔɔ' bhobholɩɩ 'fɩɩn 'mnö ɩyä ɔɔ' 'tɛtɩɩ 'fɩɩn 'mnö. Ɩyä sä ɔ ‑waa lä ɔ yëku nä, ɔ wamä sɔɔ ɔ ‑lie. ‑Jlämönö 'sɔ ‑zi 'cibhisälɩ ‑yä bʋbɔɔlɩɩ 'fɩɩn 'kʋ.

34Zozii nii‑ lä 'yi nynä ‑mä nyɩkpɔɔ nuu‑ 'nägäsä ɔɔ' ciciwälɩɩ 'mʋ nä, kɔ ‑sonöɔ, ɔ lä ‑mɔɔ nä, ‑nn yɩɔ Laagɔɔ' 'Leyiduu dä ‑tlʋ. Ɔ cii‑ bhɛ lä sɔɔ nä nyɩkpɔɔ' yɩɔ mii‑ 'nɩ ɔ 'kɔ bʋkʋ 'kwäslɛ 'kʋ ylää‑.

Klisöɔ ‑zi 'loyo Davidö 'kʋ

(Matie 22.41‑46; Lukö 20.41‑44)

35Zozii ‑kʋ bhä Laagɔ‑bhutu 'kädʋʋ 'mnö cɩadä 'nɩ ɔ ylää‑, ɔ lä ‑ɔnözä 'nɩ ‑Jlämöcɩanyʋa cɩa bhä nynä ‑mä, Klisöɔ ‑glö Davidöö' 'yuu? 36‑Bhlɛ Davidö 'titiclö, 'tänyɩɩ Kplɔɔkplɔɔ‑wugɔɔ kwlinöɔ‑ bhlä 'kʋ nä, ɔ cii‑, ɔ lä

Kwlienyɔ Laagɔ ‑soo 'naa Kwlienyɔ nynä

‑N kʋ 'naa lüüklä 'kʋ sä!

‑N kʋ ‑lɔɔ ‑yä ‑naa ‑zɔbhlɛgbänyʋa,

N 'kwa ‑naa 'kʋ nämnö ‑gwädɛ 'kʋ nʋ. # 12.36 Ɩ bha Lɔlɔ 110.1.

37Davidö 'titi laa ‑kä ‑bhlɛ Klisöɔ ɔɔ' Kwlienyɔ, nä sɩ yi bhä bʋkʋ kʋ 'nɩ ɔ yi bhä ɔɔ' 'yu 'plöö? ‑Mä Zozii ci bhlä sɔɔ nä, nyɩkpa ‑bhutukpä ‑puo bhä 'nyukwli 'nɩ 'mnö mɛnʋwa‑.

Zozii lä wa fä ‑Jlämöcɩanyʋaa' nʋnʋgbɩɩ plɛ

(Matie 23.1‑36; Lukö 20.45‑47)

38Ɔɔ' cɩalɩɩ 'mnö nä, kɔ ci bhä, ɔ lä ‑Jlämöcɩanyʋa wa ‑yä ‑bänö ‑belii 'sɔ ‑waa bilɩ. 'Nɩ wa ‑waa 'sɩɩ nynä nyɩkpaa 'fɩɩn bhänönʋwa ‑jlünëëdü. Nä, a fä waa' nʋnʋgbɩɩ plɛ! 39Wa kä Laagɔ‑bhutuu 'mnö ‑plä nä, wa ‑waa 'yikʋʋ këkpüü' 'mnö kʋlɩ. Wa kwa 'sɩɩ ‑glɩsɩɩsɩ 'kʋ laa‑ 'nɩ wa kä ‑yi nä, nyɩkpa 'kädʋaa' 'këkpüü 'mnö ‑mɔɔ wa tään nynä wa 'kä kʋ. 40Wa yi 'sɩɩ 'nɩ wa 'nyigë 'kuzëlü‑ŋwnɩa 'nɩ wa sʋwa waa' kääkäälɩɩ 'fɩɩn. 'Nɩ wa kä bhibhie dä ‑kʋ nä, wa tlʋmä 'kpokposä 'mʋ ‑yä nyɩkpa 'kwa 'yikʋ 'ŋʋʋ. N sonö'anyɩ nynä ‑mä ‑lɩɩ 'fɩɩn wa nʋ lä nä, wa yi ɩɩ' dlu 'kädʋ plʋʋ Laagɔ dëlü.

Ŋazö‑ŋnɔɔ nyɛɛ‑ 'nɩ ɔ ‑zi lɛkäänyʋa 'kʋ

(Lukö 21.1‑4)

41Zozii ‑mʋ 'nɩ ɔ 'plöö‑ Laagɔ‑bhutuu 'mnö kwänɩsɩɛ 'bhɔklɔɔ yëku 'nɩ ɔ yi sä kʋ. ‑Lɔɔ ɔ ‑kʋ 'nɩ ɔ wloo bhä nyɩkpaa‑ ŋʋ bhlä ‑mɔɔ 'bhɔklɔɔ 'mnö monie nä. Lɛkäänyʋä ‑bhutukpä yi 'nɩ wa ŋʋ bhä ‑mɔɔ monii ‑bhutukpä. 42‑Mä 'kuzëlüŋnɔ ‑bhlo ‑yi, ɔɔ' ‑lɔɔ ŋäzö bhlä bhlä nä, ɔ bhɛɛ‑ ‑pikinilɩä 'sɔ 'nɩ ɔ yiwa ‑mɔɔ pään. 43Zozii nii‑ lä ‑nɩnɩ 'fɩɩn 'yi nä, kɔ laa‑ ɔɔ' 'kʋgënyʋa 'nɩ ɔ yiwa soo, ɔ lä ‑nʋawlɛɛ 'mnö, n sonö'anyɩ nynä 'kuzëlü‑ŋnɔnɔ ŋäzöö bhlä lä nä, ɔmɔɔ‑ nyɛɛ‑ kpänyɩ 'nɩ ‑ɔ ‑zi lä nyɩkpaa 'fɩɩn‑ ŋʋʋ‑ lä ‑mɔɔ monie nä 'kʋ. 44‑Mɔɔ' ‑lʋa nä, monie ‑lɛɛ wa nyɛɛ‑ lä nä, ɛ 'nʋwa ‑wʋ gbʋ kää. ‑Mä ɔmɔ nä, dä ɔ ‑kä bhlä ‑yä ɔ 'kä 'kudublɔ 'kʋ biebie nä, ‑lɔɔ ɔ nyɛɛ‑ lä.

Jelenleg kiválasztva:

Makö 12: god

Kiemelés

Megosztás

Másolás