Matie 26

Nyɩkpa plä ‑kpläkplä ‑yä wa 'kä Zozii 'bhlä

(Makö 14.1‑2; Lukö 22.1‑2; Zään 11.47‑53)

1Zozii ‑bhɩä ylä wälɩnɩ 'fɩɩn cilɩ nä, kɔ ‑soo ɔɔ' 'kʋgënyʋa, 2ɔ lä a ‑yi sɔɔ nynä ‑ɔ ‑too yɩ ‑mɔɔ ylɩɩ 'sɔ ‑yä Pakö‑glɩsɩɩsɩɛ 'kä ŋëë. ‑Mä Nyɩkpɔɔ ‑Yowli nä, wa yio ‑sä 'nɩ wa yio 'kusu 'yii 'bhlää. 3Naa, 'tänyɩ ‑kʋ ‑lɔɔ 'nɩ 'Cibhisänyʋaa' 'cifinyʋa ‑yä 'bhlɩɛ 'mnö ‑Dɔɔpänyʋa 'wlää‑ 'Cibhisänyɔ 'kädɔɔ daa 'wlu. Ɔmɔ wa laa bhä Kayifʋ. 4'Nɩ wa yi 'kʋ 'ŋʋʋ nynä wa 'kä ‑kpläkplä plä ‑yä wa 'kä Zozii klä ‑yä wa 'kɔ 'bhlä. 5‑Mä wa soo bhä wa yëku, wlä ‑a 'nä bhlünöɔ lä ‑glɩsɩɩsɩɛ' 'tänyɩɛ 'mnö 'kʋ ‑mä nyɩkpaa' kɩ ‑kä kplü 'kʋ ‑sää.

'Ŋnɔ ‑jɛɛ Zozii ‑daŋwɩ 'wluu

(Makö 14.3‑9; Lukö 7.36‑50; Zään 12.1‑8)

6'Tänyɩ ‑bhloo' Zozii ‑mʋ Betanii‑duu', 'nɩ ɔ ‑plä guzälʋ‑bhlänyɔ Simɔɔ' daa 'kʋ. 7‑Mä lü‑tänyɩ ‑ŋëë 'nɩ wa lü bhlä nä, 'ŋnɔ ‑bhlo ‑yi 'nɩ ɔ bhɛɛ‑ bhä ‑daŋwɩɩ 'kplä. 'Kplaa nä, cɛkʋʋ‑ plöö‑ lä alabatö#26.7 alabatö: Cɛkʋʋ' 'cë ‑bhlo lä. Kʋ 'lelee 'mʋ. Wa bhlu bhä 'kʋ 'nɩ wa tɛɛ 'kpälö ‑yä ‑flʋbhöö. nä, ʋmʋ wa bhlüü‑ 'kʋ 'nɩ wa ‑tɛnöa bhlä. A yie‑ bhä 'ŋnumʋ‑daŋwɩɩ 'kʋ. 'Nɩ 'ŋnɔɔ yie Zozii 'wlu jɛɛ. 8‑Mä Zozii' 'kʋgënyʋa nii‑ lä wälɩɩ 'yi nä, kɩ ‑kamänʋwa yëkuu'. Wlä ‑mänɩ ‑ɔ ‑kʋ bhä ‑lɔɔ 'nɩ 'ŋnɔɔ nyima bhä ‑daŋwɩɛɛ? 9‑A yie bhä 'kpä 'ŋʋ, 'nɩ ‑a yi bhä moniibhë 'ni. 'Nɩ moniinɛ, ‑a yie bhä ŋäzönyʋa 'nyɛ nä! 10‑Mä Zozii ‑fä bhä waa' ciciwälɩɩ plɛkʋ. 'Nɩ ɔ yiwa soo, ɔ lä a ‑sä 'ŋnɔɔ nëkʋ! ‑Ɔnöza bhä 'nɩ a ŋʋɔ bhä nyäkälɩɩ? Wälɩklëa ɔ ‑nʋ lä nä, 'nägägbɩ‑ ɔ ‑nʋnö'ö lä yëku. 11Ŋäzönyʋa, ‑lää wa ‑yä anyɩ 'sɔ ‑kʋ lä 'kɔɔkɔ. ‑Mä ‑amʋ nä, n ‑yä anyɩ 'sɔɔ ‑wʋ 'kɔɔkɔ ‑za ‑lää ‑kʋ. 12‑Daŋwɩɩɛ ɔ ‑jɛnö'ö lä 'kʋ nä, 'naa 'kuylɩɩ 'mɩ ɔ 'tɔɔ‑ lä 'yikʋ 'nɩ ɔ paa‑ lä 'naa 'yɛkɛɛ ‑daŋwɩɩ ‑yä 'tänyɩɛ kä ‑lɔɔ ‑ŋëë nä, wa 'kɛ glu 'ŋʋ. 13N sonö'anyɩ ‑nʋawlɛɛ 'mnö nynä ‑mä, 'ylʋnʋzɔɔ' däfɩɩn wa yi lä Laagɔɔ' 'Nägädöö fä nä, 'ŋnɔnɔɔ' wälɩklëa ɔ ‑nʋ lä nä, nyɩkpa yia 'kɔɔkɔ 'dö 'kʋ ‑sää.

Zuda Sikalɩɔtö 'nyigë‑ Zozii

(Makö 14.10‑11; Lukö 22.3‑6)

14‑Bhlɛ, Zozii' 'kʋgënyʋa 'kʋgbä 'sɔ nëëdëë' ‑lɔɔ wa laa bhlä Zuda Sikalɩɔtö nä, ɔ ‑mʋ 'Cibhisänyʋaa' 'cifinyʋa yëku, 15'nɩ ɔ yiwa soo, ɔ lä n ka'anyɩ Zozii wlɩɩ' pënö nä, ‑zio a yi'i bhä 'nyɛɛ? Ɔ cii‑ lä sɔɔ nä, nyɩkpaa ‑zɛɛ ‑flëëgiyii' glʋ 'nɩ 'kʋgbä, 'nɩ wa yionyɩ 'nyɛ. 16'Bhää bhɛ ‑lɔɔ 'kʋ nä, kä Zudaa tään bhɛ nynä ɔ 'kä Zozii pëë.

Pakö‑glɩsɩɩsɩɛ' ŋënü 'kä pio

(Makö 14.12‑16; Lukö 22.7‑13)

17'Tänyɩɩ wa lü lä Pakö‑glɩsɩɩsɩɛ' 'flɔɔ ʋʋ 'bha ‑wʋ lä nä, ɩɩ' tɛɛtɛɛylʋʋ 'kʋ, Zozii' 'kʋgënyʋa ‑yi 'nɩ wa ylɔɔ‑, wlä Cɩanyɔ‑, däsä ‑n ‑waa bhä nynä ‑mä ‑a pii Pakö‑glɩsɩɩsɩɛɛ' ŋënüü? 18Zozii lä a mʋ ‑mɔɔ 'yikʋ 'duu 'mnö ‑yä, nyɩkpɔ ‑bhlo ‑kʋ ‑mɔɔ nä, a sonöɔ nynä ‑mä Cɩanyɔɔ lä ɔɔ' 'tänyɩɛ yä 'mɛmɛ nä, ‑naa duu' ɔ ‑yä ɔɔ' 'kʋgënyʋa 'sɔ 'kä lä Pakö‑glɩsɩɩsɩɛ 'nii. 19'Nɩ 'kʋgënyʋa yi mʋ 'nɩ sä Zozii cii‑ bhlä nä, wa yi sɔɔ nʋ. Wa ‑göglä bhɛ Pakö‑glɩsɩɩsɩɛɛ' ‑dʋdʋkʋ.

Nyɩkpɔɔ‑ 'gä lä Zozii pëë nä wa yɔ yibhë

(Makö 14.17‑21; Lukö 22.21‑23; Zään 13.21‑30)

20‑Kugbë‑tänyɩɩ' ‑ŋëë ylä nä, Zozii ‑yä ɔɔ' 'kʋgënyʋa 'kʋgbä 'sɔ ‑kʋ bhä lüdä 21'nɩ ɔ yi ci, ɔ lä ‑nʋawlɛɛ 'mnö n sonö'anyɩ nynä ‑mä, anyɩa' nëëdëë' nyɩkpɔ yi'i pëë! 22Ɔ cii‑ lä sɔɔ nä, kä wälɩɩ ‑kamänʋwa yëkuu. Ɩ ‑kä 'ŋnö 'nɩ nyɩkpɔ nyɩkpɔ ylä bhɛ Zozii nynä ‑mä ‑amʋ bhä ‑a, Kwlienyɔ‑? 23'Nɩ Zozii yiwa soo, ɔ lä anyɩ nëëdëë' nyɩkpɔɔ ‑ɔ ‑yä ‑amʋ 'sɔ fä lä ‑dɔkɔɔ ‑bhlo 'mnö wlɩ nä, ɔmɔɔ‑ gä'ä lä pëë. 24Kä Nyɩkpɔɔ ‑Yowli mʋ ylä! Kɔ mʋ ylä 'kudukʋ, sɔɔ ɩ ‑jɩjlɔ lä ɔɔ' ‑za nä. ‑Mä nyɩkpɔɔ' ‑lɔmɔ ‑ɔ 'gɔ lä pëë nä, ɔ yä mie! Ɩ ‑ŋwa bhä 'kʋ nynä ‑mä ‑lɔɔ' nyɩkpɔɔ wa 'nä gänöɔ ‑lä bhɔɔ! 25‑Maa, Zudaa, waa' nëëdëë' ‑lɔɔ ‑ɔ 'gɔ bhlä pëë nä, ɔ ‑sä në, ɔ lä Cɩanyɔ‑, ‑amʋ bhä ‑a? Zozii lä ‑mɔɔ yɩ lä ci!

Kwlienyɔɔ' Kplɔɔkplɔɔ‑ŋënüü

(Makö 14.22‑25; Lukö 22.15‑20; 1 Kolɛ 11.23‑26)

26Wa ‑kʋ lä lüdä nä, Zozii bhlüü‑ 'flɔɔbhë 'kʋ. Ɔ ‑bhään 'fɩa Laagɔ, 'nɩ ɔ yia 'mö ‑döödö, 'nɩ ɔ yia ɔɔ' 'kʋgënyʋa dëë. Ɔ lä a 'bhlü 'kʋ ‑yä a lü! A lü ‑mä, ‑näna plöö‑ 'naa 'yɛkɛɛ! 27'Nɩ ɔ yi bʋkʋ divaa' pliie 'kʋ 'bhlü, 'nɩ ɔ yi Laagɔ bhään. 'Nɩ ɔ yiwanyɛ 'nyɛ, ɔ lä anyɩ 'fɩɩn a 'mnä! 28A 'mnä ‑mä, ‑näna plöö‑ 'naa doluu! Dolunʋ 'mʋʋ‑ plöö‑ lä Mɛnʋ‑doluu ‑ʋ ‑jɛɛ lä bhutukpää' ‑za sä nä. Ʋ ‑jɛɛ sä ‑yä nyenyi 'kä cienöɔ. 29N sonö'anyɩ nynä ‑mä, ‑a 'bhää ylä ‑zɩkä ‑lää 'kʋ nä, nn' ‑läyɩ bʋkʋ divaa‑gälönʋ 'mnä ‑aaa, 'nɩ ‑ɔnö yɩ ‑mɔɔ ‑a 'Bää 'Leyiduu 'mnöö‑. ‑Mɔɔ ‑tɛɛ n ‑yä anyɩ 'sɔ 'kä ylä divaa' ‑lɛɛ lëlë 'mnää.

Zozii lä Pɩɛlö yio cɛɛ

(Makö 14.26‑31; Lukö 22.31‑34; Zään 13.37‑38)

30Zozii ‑sonʋwa ylä sɔɔ nä, wa ‑bhlɩ 'fɩa Pakö‑glɩsɩɩsɩɛɛ' 'lɩɩ, 'nɩ wa yi 'kʋ ‑bha 'nɩ wa yi Olivie‑kükëa' 'wlu mʋ.

31'Nɩ Zozii yi ɔɔ' 'kʋgënyʋa soo, ɔ lä 'sabonö ‑bhlobhlo, anyɩ 'fɩɩn, a yi'i 'yi dloo. ‑Ɔnöza bhää? Ɩ ‑jɩjlɔ Laagɔ‑bɔɔgʋʋ 'mnö nynä ‑mä, n yi 'bhabhlöö' kpanyɔɔ 'bhlä 'nɩ 'bhabhlöö yi dloo.#26.31 Ɩ bha Zaka 13.7.

32 Ɔ lä ‑mä n kä yɩ 'kuëë ‑glɔɔ nä, n yi'anyɩ Galilee' ‑bɛɛ ‑kää mʋ. 33Ɔ cii‑ lä sɔɔ nä, Pɩɛlö lä Cɩanyɔ‑, sä wamä 'fɩɩn yi‑i 'yi dloo ‑kaa nä, ‑amʋ, n 'nö‑ö ‑lä 'kɔɔn yëku ‑bha. 34'Nɩ Zozii yio soo, ɔ lä Pɩɛlö‑, n sonö‑ö ‑nʋawlɛɛ 'mnö nynä ‑mä, ‑zɩkää' 'sabonö ‑bhlobhlo, 'fɩa ‑yä zözädö‑kɔkwɛɛ 'kä wälɩ 'pä nä, ‑n yi'i 'ci taa cɛnö nynä ‑n nö'ö ‑wʋ ‑yi. 35Pɩɛlö lä sɩ yi kʋmɔ ‑kʋmɔ ‑kaa nä, kä n ‑yä ‑mɔɔ 'sɔ yi lä plä ‑tɛɛ. Nn' ‑lä 'kɔɔ mii, 'nɩ n 'kä‑ä cɛɛ. ‑Mɔɔ' 'kʋgënyʋa ‑mä 'sɩɩ, säbhlo ‑säbhlo wa cii‑.

Zozii bhibhie Gesemanii' ‑gboo 'mnö

(Makö 14.32‑42; Lukö 22.40‑46)

36'Nɩ Zozii ‑yä 'kʋgënyʋa 'sɔ yi dä ‑bhlo ŋëë, ‑lɔɔ wa laa Gesemanii. 'Nɩ ɔ yiwa soo, ɔ lä a kʋ ‑länʋmʋ sä ‑mä, n 'kä gwë ‑sä ‑yä, n 'kä bhibhie. 37Ɔ 'kä lä mʋ nä, ɔ bhlüü‑ Pɩɛlö ‑yä Zebedee ‑yowlia 'sɔ 'kʋ. ‑Maa, Zozii plɛ belio bhɛ 'mʋ, 'nɩ ‑ŋänö yio 'kʋ ‑jɛɛ. 38'Nɩ ɔ yiwa soo, ɔ lä nyäkälɩɩ 'naa 'wugɔɔ ‑kʋ lä 'mnö nä, ɩ yi'i 'kwie 'kʋ fään. Nä, a ‑yä ‑amʋ 'sɔ kʋ ‑lää ‑yä aa' ŋɔɔ lä! 39'Nɩ ɔ yiwa gwë ‑sä 'pɛpɛlɩä ‑yä ɔ 'kä bhibhie. Ɔ paa‑ ‑kokoowli glu, 'nɩ ɔ ‑gla 'wlu sä 'nɩ ɔ yi bhibhielɩ 'kʋ cie, ɔ lä 'oo! 'Bä, ɩ kä ‑kʋ nynä ‑mä nyäkälɩɩ' pliinɛ yi'i gwë ‑sä nä, ‑n gbä ‑yä ɛ ‑sä'ä gwë! ‑Naa nʋ ‑lä 'naa pɔlösaa, ‑mä ‑n nʋ ‑naa pɔlösaa! 40Zozii 'ylɩbhɔ‑ 'nɩ ɔ ‑yiwa ylä yëku nä, ɔ lɔ wloo nä, wa ŋɔɔ. ‑Mä ɔ ‑soo Pɩɛlö, ɔ lä Pɩɛlö‑, ka ŋɔɔ wɛzä ‑a? Aa' ‑wʋ 'kwläkwlä sää mii‑ ‑yä 'gliye ‑bhloo' ‑za a 'kä 'yi welie‑ ‑mä ka ŋɔɔ ‑a? 41A 'nä ŋɔɔ ‑lä ‑yä a bhibhie ‑mä aa' kä ‑kä ‑zɔɔpälɩɩ' bhlüü! Ɔ lä 'wee! Plɛɛ ‑waa bhɛ 'flɛ, ‑mä 'yɛkɛɛ yɩɔ ‑cʋcʋ ‑kä! 42'Nɩ ɔ yi gwë ‑sä 'nɩ ɔ yi 'sɔnadä bhibhie ‑kää mʋ. Ɔ lä 'oo! 'Bä, ɩ kä ‑kʋ nynä ‑mä nyäkälɩɩ' pliinɛ yi'i gwë ‑sä 'nɩ n 'nɩɛ lä 'mnä nä, ‑n gbä ‑yä ɛ ‑sä'ä gwë! ‑Naa nʋ ‑lä 'naa pɔlösaa ‑mä, ‑n nʋ ‑mɔɔ 'titi ‑naa pɔlösaa! 43'Nɩ ɔ yi bʋkʋ 'kʋgënyʋa yëku yi. ‑Mä ɔ lɔ yi nä, wa ŋɔɔ‑ bhɛ bʋkʋ. 'Ylaa yʋwa bhɛ kpänyɩ 'mʋ zii. 44'Nɩ ɔ yiwa bʋkʋ gwë ‑sä 'nɩ ɔ yi taanadä bhibhie ‑kää mʋ. Sä ɔ ‑bhibhie lä tɛɛtɛɛdä nä, sɔɔ ‑säkä ‑säkä ɔ ‑bhibhie. 45'Nɩ ɔ yiwa bʋkʋ yëku yi, ɔ lä ka ŋɔɔ lä, 'nɩ a wɔtɔ lä 'kʋ! A ni kä 'gliyee ŋëë ylä ‑yä Nyɩkpɔɔ ‑Yowli wa 'kɔ gbenyenyinyʋa wlɩɩ' pënö. 46A ‑bha 'kʋ ‑a 'gä mʋ ‑mä 'naa pëënyɔɔ 'mɔɔ‑ yi lä!

Wa yä Zozii 'kʋ bhlü

(Makö 14.43‑50; Lukö 22.47‑53; Zään 18.2‑11)

47Wälɩɩ ‑kʋ ‑bhlɛ Zozii nëë' 'nɩ, ‑bla! Zudaa yä 'kʋ ghlä. Ɔ ‑glö bhä Zozii' 'kʋgënyʋa 'kʋgbä 'sɔ nëëdëë' nyɩkpɔ. Ɔ ‑yä nyɩkpa ‑bhutukpä 'sɔ nää‑ 'nɩ wa bhɛɛ‑ bhä ‑jɛlö ‑yä süklü. 'Cibhisänyʋaa' 'cifinyʋa ‑yä ‑Dɔɔpänyʋa wamää‑ ‑lobhuwa bhlä. 48Kä Zudaa ‑yä nyɩkpaa 'sɔ 'nunu‑ bhä 'mʋ ‑yä wa kä ‑yi nä, sä ɔ 'kä bhlä nʋ ‑yä wa 'kä Zozii yibhë nä, kɔ panʋwa‑ sɔɔ. Ɔ ‑sonʋwa bhä, ɔ lä ‑a gä ‑mʋ nä, nyɩkpɔɔ n 'kä lä gbëë nä, ɔmɔ lä nä, a bhlüo 'kʋ! 49Zudaa ‑yi lä 'gää nä, kɔ ‑mʋʋ Zozii. Ɔ lä ‑ayoo, Cɩanyɔ‑! 'Nɩ ɔ yio gbëë. 50‑Mä Zozii ‑sonöɔ, ɔ lä ‑aawli, ‑lʋʋ ‑n ‑yi lä nʋ ‑kää nä, ‑n nʋʋ! 'Nɩ nyɩkpaa yi Zozii mʋʋ 'nɩ wa yio 'kʋ bhlü. 51‑Mä Zozii 'kʋgënyʋa nëëdëë' lɔɔ ‑bhlo, ɔ ‑kplä lä ‑mɔɔ ‑jlɛɛ nä, 'Cibhisänyɔ 'kädɔɔ' ‑gänʋnyɔɔ, kɔ döɔ‑ 'nyuklu 'kʋ. 52'Nɩ Zozii yio soo, ɔ lä ‑n tlʋʋ ‑naa ‑jlɛɛ' tʋkpää' ‑mä, ‑ɔ bhlü lä ‑jlɛ 'kʋ 'nɩ ‑ɔ bhlä lä nyɩkpɔ nä, ‑jlɛ wa bhlü 'sɩɩ 'kʋ 'nɩ wa bhlɔɔ. 53Kä ‑n bhobho nynä ‑mä, ‑Laagɔzizii' ‑lɩɩ ‑ɩɩ ‑wʋ lä ‑zunɔɔ' 'bɛ nä, n kä ‑pɛpɛɛ n 'Bä wälɩ paa‑ nä, ɔ 'nɩɩ ‑lä lobho 'nɩ ɩ 'kä'ä 'kʋ yi ‑a? Ɔ yi mii 'nɩ ɔ yi ɩɩ' 'kpö 'kädö 'kʋgbä 'sɔ ‑lä 'nɩ ɩ yi 'naa 'wlu vë! 54Sɩ plö lä ‑lää 'kʋ nä, ɩ 'nö sɔɔ ‑kʋ nä, säsä Laagɔ‑bɔɔgʋʋ 'mnö wälɩɩ yi bhä glää? Sɩ ‑jɩjlɔɔ lä nä, sɔɔ ɩ 'kä lä 'kʋ 'plö. 55'Nɩ Zozii yi nyɩkpaa soo, ɔ lä a bhɛɛ‑ ‑jɛlö ‑yä süklü 'sɔ, 'nɩ a ‑yi. A ‑yi ‑n ‑näsä nyɩkpa‑bhlänyɔ 'kʋ bhlü ‑kää a ‑yi lä nä! N ‑kʋ bhä ylɩɩ 'fɩɩn 'kʋ ‑mɔɔ Laagɔ‑bhutu 'kädʋʋ 'mnö, 'nɩ n cɩa bhä, 'nɩ a nö'ö ‑wʋ ‑mɔɔ 'kʋ ‑bhlüü. 56‑Mä sä 'plɔfɛtɩnyʋa ‑jɩjlä bhlä nä, sɔɔ 'kä glää nä, ɩɩ' ‑zä ‑nɩnɩ 'fɩɩn plö lä 'kʋ. ‑Mä sä nyɩkpaa ‑klä lä 'gää Zozii nä, kä ɔɔ' 'kʋgënyʋa 'fɩɩn ‑dloo. Wa guu‑ 'nɩ wa ‑tüo ‑lɔɔ.

Wa yä Zozii 'Zufʋnyʋaa' 'Tütüplä‑jɛnyɩɛ dëlü fä

(Makö 14.53‑65; Lukö 22.54‑55,63‑71; Zään 18.12‑24)

57Wa ‑klä ylä Zozii nä, 'Cibhisänyɔ 'kädɔɔ Kayifʋʋ' ‑gbäsɩɩ ‑mɔɔ wa ‑fɔɔ. 'Nɩ ‑Jlämöcɩanyʋa ‑yä ‑Dɔɔpänyʋa yi ‑mɔɔ 'wlu 'wlää. 58‑Maa, Pɩɛlö gëë‑ bhä Zozii ‑blëlë 'kʋ. Ɔ güo‑ 'kʋ ‑aaa, 'nɩ ɔ ‑plämʋ 'sɩɩ 'Cibhisänyɔ 'kädɔɔ' 'gbëa 'mnö. 'Nɩ ɔ 'plöö‑ 'gbëa 'klʋ ‑bɛɛnyʋa nëëdë 'nɩ ɔ yi sä kʋ ‑yä sɩ 'kä bhlä 'kʋ 'plö nä, ɔ 'kä sɔɔ 'yi 'ni.

Wa ‑fä Zozii 'Cibhisänyʋaa' 'cifio dëlü

(Makö 14.53‑65; Lukö 22.56‑62; Zään 18.12‑18)

59‑Mä 'Cibhisänyʋaa' 'cifinyʋa ‑yä 'Tütüplä‑jɛnyɩɛ 'mnö nyɩkpaa 'fɩɩn nä, ‑kpläkplö ‑dläfʋɛɛ' lɛɛ‑ yi bhlä 'ŋnö kää 'nɩ wa yi Zozii gbʋ klaa 'nɩ wa yio lä 'bhlä nä, wa tänɩɛ bhä. 60Bhutukpä ‑yi ‑kpläkplö ‑dläfʋɛ lü ‑kää, 'nɩ wa 'nyɛnöɔ bhä 'flɛflɛ gbɩ. ‑Mä gbëgëdëë' bhɔɔ waa' ciciwälɩɩ 'mnö ‑kʋ. Nyɩkpa 'sɔ ‑yi 'nɩ wa cii‑, 61wlä ‑nɔnɔ cii‑ nynä ‑mä, ɔ yi Laagɔ‑bhutu 'kädʋʋ wlä, 'nɩ ɔ yi ylɩɩ taa 'kʋ 'bhlü 'nɩ ɔ yiu bʋkʋ 'slä. 62‑Mä 'Cibhisänyɔ 'kädɔɔ ‑bha 'kʋ, ɔ lä ‑weyia! ‑Mänɩ ‑mɔɔ wa 'nyɛɛ lä gbʋ ‑bhlobhlo nä, nn' döö ‑wʋ gbʋ ‑a? 63Ɔ ylää‑ lä sɔɔ nä, Zozii 'nöɔ ‑wʋ në ‑slä, kɔ bhlɔɔ‑ nübhëë'. 'Nɩ 'Cibhisänyɔ 'kädɔɔ yi ci, ɔ lä bheeje! ‑Yäyä Laagɔɔ' 'ŋnöö 'mnö, ‑n sonö‑anyɩ! Klisöɔ, Laagɔ ‑Yowli, ‑mɔɔ plöɔ lä ‑a? 64Zozii lä ɩmɩ ‑n ci lä. ‑Mä kä n mʋ'anyɩ yɩ 'sɩɩ soo ‑kää nynä ‑mä, ‑a 'bhää ylä ‑lää 'kʋ nä, a yi Nyɩkpɔɔ ‑Yowli 'yi 'ni 'nɩ ‑ɔ ‑kä lä 'Päwaa nä, ɔ yi ɔɔ' lüüklä 'kʋ sä kʋ. Bʋkʋ 'nɩ a yi ɔɔ' yiyilɔɔ ‑laagɔɔ' 'nyukpɔɔ 'klʋ 'yi 'nii. 65Zozii cii‑ lä sɔɔ nä, kɩ ‑kamä 'Cibhisänyɔ 'kädɔɔ yëkuu'. Ɩ ‑kä 'ŋnö 'nɩ ɔ 'ŋätlö‑ ɔ yëkuu' ‑bänaa. Ɔ lä ‑mänɩ ‑dläfʋɛɛ' lünyʋä ‑sä ‑a tään bhä ‑pɛɛ bʋkʋʋ? Anyɩ 'fɩɩn, anyɩa' 'klʋ 'nɩ ɔ zie lä Laagɔ ‑dii nä, sa ci bhää? 66'Nɩ nyɩkpaa yio soo, wlä ɩ ‑ŋwa 'kʋ nynä ‑mä, ɔ 'ku! 67Ɩ ‑kʋ bhɛ lä sɔɔ nä, wa pä bhɛ Zozii ‑dlɛɛ 'klʋ. Wa bhlɔɔ bhɛ ‑tukwlüü'. 'Nɩ wa pɔɔ bhä 'kpeyi. 68Wa sonöɔ bhä, wlä Klisö‑, ‑n 'pä plɛ ‑yä ‑ɔ bhlä‑ä lä nä, ‑n zɛnöɔ 'ŋnö!

Pɩɛlö cɛɛ‑ Zozii

(Makö 14.66‑72; Lukö 22.56‑62; Zään 18.15‑18,25‑27)

69‑Mä Pɩɛlö ‑kʋ bhä ‑lätee ‑mɔɔ jlukʋ, 'Cibhisänyɔ 'kädɔɔ' daa. 'Nɩ 'Cibhisänyɔ 'kädɔɔ' ‑gänʋŋnɔ ‑bhlo yi ‑lɔɔ yi, 'nɩ ɔ yi Pɩɛlö soo, ɔ lä ‑mɔɔ ‑mä 'sɩɩ, Galilee' nyɩkpɔɔ wa laa lä Zozii nä, ‑n ‑yɔsɔ nää‑ bhä!

Pɩɛlö cɛɛ‑ Zozii 'sɔnadä

(Makö 14.69‑72; Lukö 22.58‑60; Zään 18.25‑27)

70‑Mä Pɩɛlö cɛɛ‑ nyɩkpaa 'fɩɩn 'klʋ, ɔ lä wälɩɩ ‑n ci lä nä, n 'nɩɩ ‑wʋ ‑yi!

71'Nɩ Pɩɛlö yi 'kʋ ‑bha 'nɩ ɔ yi 'gbëa ‑zɔɔ 'wlʋdaa 'nynigo ‑kää mʋ. Ɔ ‑kʋ ‑lɔɔ 'nɩ ‑gänʋŋnɔ ‑bhlo yio bʋkʋ 'yi 'ni, 'nɩ ɔ nyɩkpaa‑ ‑kʋ bhlä ‑lɔɔ nä soo, ɔ lä nyɩkpɔnɔ ‑yä Nazalɛtöö' Zozii 'sɔ nää bhä. 72‑Mä Pɩɛlö cɛɛ‑ 'sɔnadä. Ɔ lä n 'sɔlɩ, nyɩkpɔɔ a sä lä nä, n 'nöɔ ‑wʋ ‑yi! 73'Föö, 'nɩ nyɩkpaa‑ ‑kʋ bhlä ‑lɔɔ nä, wa yi Pɩɛlö yëku 'jloo, 'nɩ wa yio soo, wlä ‑mɔɔ, ‑a wloo ‑naa 'mʋ ‑sääsa 'nɩ ‑a ‑yi sɔɔ nynä ‑mä ‑n ‑glö 'zaazɩ ɔɔ' 'kʋgënyʋaa' lɔɔ ‑bhlo. 74Pɩɛlö lä 'naa 'gbüa! N 'nöɔ ‑kä ‑yi! N kä ‑kpläkplödö 'ŋʋ nä, Laagɔ ‑sä'ä gbäylö! Pɩɛlöö' nëë' bhlüwälɩ ‑bhlɛ, zözädö‑kɔkwɛɛ paa‑ wälɩ. 75'Nɩ Pɩɛlö yi luë nynä ‑mä Zozii ‑sonöɔ bhä. Kä Zozii' ‑sonöɔ bhlä nynä ‑mä Pɩɛlö‑, 'sabonö ‑bhlobhlo, 'fɩa ‑yä zözädö‑kɔkwɛɛ 'kä wälɩ 'pää nä, ‑n yi'i 'fɩa 'ci taa cɛnö nynä ‑n nö'ö ‑wʋ ‑yi. Ɔ ‑luë bhɛ lä ‑lɔɔ' 'klüü 'kʋ nä, ɔ wlʋʋ‑ ‑zɔɔ 'nɩ, ɔ tuu‑ sää 'titi.

Jelenleg kiválasztva:

Matie 26: god

Kiemelés

Megosztás

Másolás