Matie 20

'Klaa lebhe‑nʋnyʋaa' ‑nyädlä

1Zozii lä a ni Laagɔɔ' 'Leyiduu' panalɩɩ' 'cë ‑bhlo. 'Klaa käänyɔ 'mɔɔ‑ ‑bha lä zëplü 'pii 'kʋ 'nɩ ɔ yi lä lebhenʋnyʋä 'ghäyɩ ‑kää mʋ. Ɔ lä wa yi ‑ya wa 'kä ɔɔ' divaa‑gälöklaa 'mnö lebhe nʋ. 2‑Mä ɔ niwa‑ lä nä, kɔ ‑yʋwa 'sɔ 'ŋʋʋ 'kʋ nynä ɔ yi nyɩkpɔ nyɩkpɔ ylʋʋ' lebhee' monii 'nyɛ. 'Nɩ ɔ yiwa yɩ ‑mɔɔ 'klaa 'mnö lebhe nʋ ‑kää fä. 3‑Mä 'gliyi ‑pɛɛnä 'tänyɩɩ, 'klaa käänyɔ nii‑ bʋkʋ nyɩkpa. Wa ‑kʋ bhä 'clɩkpää' sä 'nɩ waa' bhɔɔ nʋnʋlʋʋ ‑kä. 4'Nɩ ɔ yiwa soo, ɔ lä anyɩ ‑mä 'sɩɩ, a mʋ ‑mɔɔ 'naa divaa‑gälöklaa 'mnö yä a 'kä 'naa lebhe nʋ ‑mä n yi'anyɩ ylʋʋ' lebhee' monii 'nyɛ. 5'Nɩ lebhe‑nʋnyʋänä wa yi ‑mɔɔ klaa 'mnö mʋ. 'Ylʋ ‑ŋëë lä ‑tiin 'kʋ nä, 'klaa käänyɔ wlʋʋ‑ bʋkʋ ‑zɔɔ 'nɩ ɔ nii‑ lebhenʋnyʋä. ‑Kugbëë' 'gliyi taa ‑klä lä 'sɩɩ nä, säbhlo ‑säbhlo. 6Bʋkʋ 'nɩ ‑kugbë‑gliyi ‑ngbüü' 'tänyɩɩ 'klaa käänyɔ wlʋʋ‑ ‑zɔɔ 'nɩ ɔ nii‑ lebhe‑nʋnyʋää' 'yigädalʋä. Waa' bhɔɔ lebhe nii‑ nä, wa ‑kʋ bhä ‑lätee ‑lɔɔ 'clɩkpää'. 'Nɩ ɔ yiwa 'ylä, ɔ lä ‑ɔnözä 'nɩ ‑zɩkää' ylʋʋbhë ‑ylʋbhëa 'mnö, a ‑kʋ bhä ‑lää 'clɩkpää' 'nɩ aa nʋ bhä lʋʋ? 7'Nɩ yio soo, wlä ‑aa ‑wʋ lebhe nii‑, 'ɩzä ‑a ‑kʋ lä ‑lää. 'Nɩ ɔ yiwa soo, ɔ lä anyɩ ‑mä 'sɩɩ, a mʋ ‑mɔɔ 'naa 'klaa 'mnö ‑yä a 'kä 'naa lebhee nʋ.

8‑Kugbësä ‑ŋëë ylä nä, kä 'klaa käänyɔ ‑soo yɩ ɔɔ' ‑gänʋnyɔɔ‑ klä lä ɔɔ' monie 'nää nä, ɔ lä ‑n laa lebhe‑nʋnyʋa ‑yä ‑n 'pɛɛ nyɩkpɔ nyɩkpɔ! ‑N cie gbäbhɩä ‑lʋa 'kʋ ‑aaa ‑yä ‑n ŋëë tɛɛtɛɛlʋa ‑yi lä nä 'kʋ! 9Nä, lebhe‑nʋnyʋa, ‑kugbë‑gliyi ‑ngbüü' ‑lʋa ‑yi lä gbäbhɩäda nä, wamä nyɩkpɔɔ 'pɛɛ tɛɛ. Ɔ nyɛɛ‑ nyɩkpɔ nyɩkpɔɔ' ylʋʋ' lebhee' moniee. 10‑Mä ɔ 'pɛɛ‑ lebhe‑nʋnyʋa sɔɔ ‑aaa, 'nɩ ɔ yi ‑wa ‑yi bhlä tɛɛ nä 'kʋ ŋëë. ‑Mä ‑wa ‑yi bhlä tɛɛ nä, wa bhobho bhɛ nynä waa' 'pɛɛ kɛ 'kä gbäbhɩä ‑lʋa 'pɛɛ 'kʋ zi. ‑Mä, sä ‑gbäbhɩä ‑lʋa nii‑ lä nä, sɔɔ wamä ‑mä 'sɩɩ wa nii‑. Ɔ nyɩwa‑ yɩ ylʋʋ' ‑bhloo' lebhee' monii. 11‑Mä ɔ nyɩwa bhlä nä, wa gbään bhä 'mnö. 12Wa ‑soo 'klaa käänyɔ, wlä ‑maa lebhenʋnyʋa ‑n laa‑ lä gbäbhɩädä nä, waa' ‑kä lebhenʋdä ‑gwlɛ. 'Sää 'titi ‑za nä, wa ‑nʋ 'gliye ‑bhlo 'coo lebhe. 'Nɩ sɩ ‑kʋ bhä 'nɩ ‑n 'pɛɛnʋwa‑ bhä ‑anyɩmɔɔ‑ ‑yi lä tɛɛ nä 'bhisäkʋ ‑a? ‑Anyɩ‑ 'ylʋ ‑zälʋʋ bhlää‑ lä ‑kaaa 'nɩ ‑a ‑nʋ lä lebhe 'ylʋʋbhë ‑ylʋbhëa 'mnö! 13‑Mä 'klaa käänyɔ ylää‑ waa' nëëdëë' lɔɔ ‑bhlo, ɔ lä ‑aawli! Kä n ‑lüü bhä ‑bi 'kʋ ‑a? Kä n ‑yä ‑mɔɔ 'sɔɔ 'ŋʋʋ‑ 'fɩa 'kʋ ‑nä. Ylʋʋ' lebhee' monii‑ ‑a 'ŋʋʋ ‑kä bhlä 'kʋ! 14Nä ‑naa 'pɛɛ, ‑n 'bhlie 'kʋ ‑yä ‑n mʋ! ‑Nɔnɔ ‑ɔ ‑yi lä gbäbhɩäda nä, ɔ ‑yä ‑mɔɔ 'sɔ, säbhlo ‑säbhlo n 'kanyɩ lä 'pɛɛ! 15‑Amʋ 'titi 'naa monii lä nä, sä n ‑waa lä nä, sɔɔ n nʋɛ. ‑Ɛɛ ‑wʋ sɔɔ ‑a? ‑A nä, ‑amʋ 'naa plɛkʋ nanɔɔ 'mʋʋ‑ sie‑e plɛkʋ ‑a? 16'Nɩ Zozii yi ci, ɔ laa nyɩkpaa' ‑lʋa ‑kʋ lä klë nä, wa yi 'yikʋ 'plöö, 'nɩ ‑wa ‑kʋ lä 'yikʋ nä, wa yi klë 'plöö.

Taanadä‑ Zozii ci lä nynä ɔ yi 'kʋ 'nɩ ɔ yi 'kuëë glɔɔ

(Makö 10.32‑34; Lukö 18.31‑34)

17'Nɩ Zozii yi Zolizalɛmʋ‑duu' ‑blɔɔ plää, ɔ ‑yä ɔɔ' 'kʋgënyʋa 'kʋgbä 'sɔ. ‑Mä, ɔ lanʋwa‑ gbäkö 'kʋ 'nɩ ɔ yiwa soo, 18ɔ lä ‑a gä Zolizalɛmʋduu' ‑mʋ nä, Nyɩkpɔɔ ‑Yowli wa yio 'Cibhisänyʋaa' 'cifinyʋa ‑yä ‑Jlämöcɩanyʋa wlɩɩ' pënö. Wa yio ‑sä 'nɩ wa yio 'bhlä. 19Wa yio lowie wlɩɩ' pënö. Wa yio nyɩä, 'nɩ wa yio bhütë, 'nɩ wa yio 'kusu 'yi bhoo 'nɩ ɔ yi 'ku. ‑Mä ɔ kä kuu‑ nä, taanaylʋʋ 'kʋ ɔ yi 'kuëë glɔɔ.

Zebedee ‑yowlie wa 'nɔ

(Makö 10.35‑45; Lukö 22.25‑27)

20‑Mä Zebedee 'ŋnɔ ‑yä ɔ ‑yowlie 'sɔ, wa 'jloo‑ Zozii yëku 'nɩ 'ŋnɔɔ yio dëlü ‑kokoowli glu 'pä, ‑yä ɔ 'kɔ wälɩklë 'ylää. 21'Nɩ Zozii yi 'ŋnɔɔ 'ylä, ɔ lä ‑n ylä bhää? 'Ŋnɔɔ lä bheeje, ‑mɔɔ ‑naa 'Leyiduu 'mnö nä, ‑n gbä ‑yä 'naa 'yuënä 'sɔ wa kʋ‑ʋ yëku sä. ‑Bhlo kʋ ‑naa lüüklä 'kʋ ɩyä ‑bhlo kʋ ‑naa mëëcë 'kʋ! 22Zozii lä wälɩklëa a ylä lä nä, aa' ‑wʋ aa' gbaa ‑yi. Nyäkälɩɩ' 'pliie n 'kä lä 'mʋ 'mnää nä, a yi bhä mii 'nɩ a yie 'mʋ mnää ‑a? Wlä ‑ɛɛɛ, ‑a yi mii! 23Zozii lä nyäkälɩ pliie n 'kä lä 'mʋ 'mnää nä, a yie 'mʋ 'mnää 'zaazɩ. ‑Mä ‑ɔ plöö‑ lä nynä ‑mä ‑nɔnɔ 'kä 'naa lüüklä 'kʋ sä kʋ, ɩyä ‑nɔnɔ 'kä 'naa mëëcë 'kʋ sä kʋ nä, ‑lɔɔ' 'klüü ‑amʋʋ‑ nʋɩ ‑wʋ. Nyɩkpaa ‑wanözä n 'Bä ‑nʋ lä ‑lɔɔ' kʋda nä, wamää‑ 'gä lä ‑lɔɔ kʋ.

Anyɩa pää' ‑lɛ 'kädɔ 'plö anyɩa ‑gänʋnyɔ

(Makö 10.42‑45; Lukö 22.24‑27)

24‑Mä ‑mɔɔ' 'kʋgënyʋa 'kʋgbä nuu‑ lä bhelia 'sɔɔ ciciwälɩɩ nä, kä plɛkʋ ‑siwa waa' ‑za. 25‑Mä Zozii lʋwa‑, 'nɩ ɔ ‑sonʋwa, ɔ lä 'bhlɩɩ nëkʋʋ' kʋnyʋä nä, kwa 'kämä wa ‑liesɩ ‑n ‑nä sä wamää‑ ‑kʋwa lä nä. 'Nɩ nyɩkpa 'kädʋa, wa 'mnää kpänyɩ wa ‑liesɩ 'wluu. 26‑Mä anyɩ nëëdë nä, ɩ 'nä 'plö ‑lä sɔɔ 'kʋ! Anyɩa' nëëdëë' lɔɔ‑ gä ‑waa nynä ‑mä ɔ 'kä ‑lɛ 'kädɔ 'plö nä, ɔ 'plö anyɩa' ‑gänʋnyɔ. 27Anyɩa nëëdëë' nyɩkpɔ gä ‑waa nynä ɔ 'kanyɩ 'yikʋ kʋ nä, ɩ ‑ŋwa 'kʋ nynä ‑mä ɔ 'plö anyɩa' geyu. 28Ɩmɩɩ‑ ‑kä lä 'ŋnö 'nɩ Nyɩkpɔɔ ‑Yowlii' ‑wʋ lä nynä wa 'kɔ ‑gä nʋ. Kɔ ‑yi lä ‑yä ɔ 'kä nyɩkpa ‑gä nʋ, ɩyä ɔ 'kä ɔɔ' zëkpëa ‑sä ‑yä ɔɔ' 'kwiee 'kä nyɩkpa ‑bhutukpä 'mʋ 'kplɩ.

Zozii ‑yamä 'yikpüü' kʋnyʋä 'sɔ

(Makö 10.46‑52; Lukö 18.35‑43)

29'Tänyɩ ‑kʋ ‑lɔɔ 'nɩ Zozii ‑yä ɔɔ' 'kʋgënyʋa 'sɔ ‑kʋ bhä Zelikoo‑duu' ‑bha dä, 'nɩ nyɩkpaa' 'kpä 'kädä güwa‑ bhä 'kʋ. 30‑Mä 'yikpüü' kʋnyʋä 'sɔ ‑kʋ bhlä ‑lɔɔ ‑blɔgbäkö sä. Wa nuu‑ lä nynä Zozii 'mɔɔ‑ plö nä, wa woo bhɛ, wlä Kwlienyɔ‑, ‑a tötɔ Davidö ‑Yowli‑ bheeje, ‑n yibhënö‑anyɩ ŋäzö! 31‑Mä wa woo bhlä 'sɔɔ nä, kä nyɩkpaa fʋwa bhä nëkʋ nynä wa 'kä ‑plɩɩ kʋ, ‑mä waa' 'mänyɩ bhɔɔ 'nɩ wa woo bhä kpänyɩ, wlä Kwlienyɔ‑, ‑a tötɔ Davidö ‑Yowli, bheeje ‑n yibhënö‑anyɩ ŋäzö! 32'Nɩ Zozii yi 'nynigo, 'nɩ ɔ yiwa laa, 'nɩ ɔ yiwa 'ylä, ɔ lä sa ylä bhä nynä ‑mä n nʋ'anyɩ bhä ‑gää? 33Wlä Kwlienyɔ‑, bheeje, ‑n gbä ‑yä ‑anyɩa 'yii welio ‑yä ‑a 'gä sä 'ni! 34‑Mä Zozii waa' ŋäzö ‑jɛnöɔ 'kʋ, 'nɩ ɔ yi waa' yii 'taa. Ɔ 'tanɩ lä 'gää nä, kɩ welio‑ 'nɩ wa ni bhɛ sä wɩaa, 'nɩ wa yio 'kʋ 'gë.

Jelenleg kiválasztva:

Matie 20: god

Kiemelés

Megosztás

Másolás