Matie 18

Laagɔduu' ‑lɛ 'kädɔ

(Matie 5.29‑30; Makö 9.33‑50; Lukö 9.46‑50)

1‑Lɔɔ' 'tänyɩɛ ‑bhlobhlo 'mnö nä, 'kʋgënyʋa ‑yi Zozii yëku 'nɩ wa yio 'ylä, wlä Cɩanyɔ‑, nyɩkpɔ ‑sä plöö‑ bhä ‑mɔɔ Laagɔɔ' 'Leyiduu 'mnö ‑lɛ 'kädɔɔ? 2Wa ylää‑ lä sɔɔ nä kä Zozii laa‑ 'yulɛɛ, 'nɩ ɔ yiwanyɔ nëëdë 'ŋʋ 3'nɩ ɔ yiwa soo, ɔ lä ‑nʋawlɛɛ 'mnö, n sonö'anyɩ ‑mä, anyɩa' nʋnʋgbɩ 'nö 'cɩcɩ‑ 'nɩ a 'nö plöö‑ nynä 'yuë 'tɩkɩɩlɩä nä, aa' ‑lä Laagɔɔ' 'Leyiduu 'mnö plä. 4Nyɩkpɔ kä ɔ yëku ‑dʋdʋkʋ ‑lä, 'nɩ ɔ kä plöö‑ nynä 'yunɔ nä, ‑lɔɔ' nyɩkpɔɔ, ɔmɔɔ‑ 'ghlü lä ‑mɔɔ Laagɔɔ' 'Leyiduu 'mnö. 5‑Ɔ gä 'yunɔ 'bhisäkʋʋ 'yu 'nägäsä ‑klä 'naa 'ŋnöö 'mnö nä, ‑lɔɔ' nyɩkpɔɔ, ‑amʋ ɔ ‑klä lä 'sɩɩ 'nägäsä.

Nyɩkpa ‑sä nyenyi gwë

(Makö 9.42‑48; Lukö 17.1‑2)

6'Ɩzä kä nyɩkpɔ kä ‑gbä 'nɩ 'yua ‑wa ‑kä lä 'naa pɔlötɛtɛ nä, waa' pää' lɔɔ ‑bhlo kä nyenyii' ‑bhlüü nä, ‑lɔɔ nyɩkpɔɔ, ɩ ‑ŋwa bhä 'kʋ nynä ‑mä wa gʋänöɔ cɛkʋ 'kädʋ ‑blɩɩ' ‑yä wa pänöɔ jiee'.

7Anyɩ 'ylʋzɔkʋnyʋä, a yä mie! 'Klüü ‑ɩ gbä lä 'nɩ nyɩkpɔ bhlüü lä nyenyii' ɩ ‑zu. ‑Mä nyɩkpɔɔ' lɔɔ‑ yi lä ɔ ‑lie nyenyii' pään nä, ɔ yä mie! 8‑Naa ‑klɔgbä ‑o, ‑naa ‑kokokpë ‑o, a kä gbä 'nɩ ‑n gä nyenyii' bhlüü nä, ‑n ‑döa 'kʋ ‑yä ‑n 'paa 'klä fɛɛn! Sä ‑n 'gä bhɩ 'sɔ kään ɩyä ‑n 'gä sɩ 'sɔ kään ‑yä, ‑kosu‑düdëa ‑aa ŋomo ‑wʋ lä 'kɔɔn nä wa 'kä‑ä maa 'mnö 'pä nä, ɩ ‑ŋwa 'kʋ nynä ‑mä ‑n kään bhoklë ‑o, sɔklë ‑o, ɩyä ‑n 'gä 'pʋpʋɛ 'ni. 9‑Naa 'yie kä gbä 'nɩ ‑n gä nyenyii' bhlüü nä, ‑n ‑sɛɛ ‑mɔɔ ‑yä ‑n 'pɛɛ 'klä fɛɛn! Sä ‑n 'gä 'yi 'sɔ kään ‑yä, ‑kosu‑düdëa ‑aa ŋomo ‑wʋ lä 'kɔɔn nä wa 'kä‑ä maa 'mnö 'pä nä, ɩ ‑ŋwa 'kʋ nynä ‑mä ‑n kään 'yifä ‑yä ‑n 'gä 'pʋpʋɛ 'ni.

'Bhabhlɛɛ ‑too 'nɩ wa nie‑

(Lukö 15.3‑7)

10A luë! Aa' fɛlɩä ‑lä 'yuënää' 'kʋ nyɩkpɔ ‑mä, waa' ‑zizii ‑kʋ lä ‑mɔɔ ‑Laagɔɔ' nä, kɩ ni ylɩɩ' 'fɩɩn 'kʋ ‑a 'Bä 'yi. [11Nä Nyɩkpɔɔ ‑Yowli, nyɩkpaa‑ yä lä too nä, waa' ‑zä ɔ ‑yi lä ‑yä ɔ 'kwa ‑lɔɔ nëë' ‑sä.]

12Säsä a bhobho bhä ‑zi wälɩklë nää? Nyɩkpɔ kä 'bhabhlö gwlɩ ‑ngbü (100) ‑kä, 'nɩ ɩɩ' nëëdëë' lɛɛ ‑bhlo kä ‑too nä, 'bhabhlöö' gwlɩ ‑mɔɔnä 'nɩ 'kʋgbä ‑pɛɛnä ‑tonöɔ. ‑Mä ɔ bhɩ yëku 'nɩ ɔ tii ‑mɔɔ 'küküü nëëdë, 'nɩ ‑lɛɛ ‑bhlo ‑ɛ ‑too lä nä, ɔ mʋɛ tään ‑kää. Yio ‑a? 13Ɔ kɛ yɩ nii‑ nä, ‑nʋawlɛɛ n sonö'anyɩ nynä ‑pʋpɛɛ‑ ɔ nʋ lä ɛmɛ ‑bhloo' ‑za nä, ɛ ‑zi ‑mɔɔ' 'bhabhlöö' ‑pʋpɛɛ ɔ ‑kä lä nä 'kʋ. 14Nä, ‑a 'Bäɔ ‑ɔ ‑kʋ lä ‑mɔɔ Laagɔɔ' nä, ɔɔ' ‑wʋ ‑waa nynä ɔɔ' 'yua pää' ‑bhlo 'titi too.

Bheli 'nö 'nää nʋ nä a cienöɔ

15‑N bheli kä‑ä nyenyii' ‑nʋ nä, ‑n mʋnöɔ ‑mɔɔ 'titi ‑yä anyɩ 'sɔ 'cɩɩn kʋ ‑lɔɔ ‑yä ‑n fɔɔ nëkʋ. Ɔ kä‑ä 'nyukwli ‑poo nä, ‑n yɔɔ ‑lɔɔ nëë' ‑sä. 16'Ɩzä ɔ 'nö‑ö 'nyukwli ‑poo nä, ‑n tään bʋkʋ nyɩkpɔ. Nyɩkpɔ ‑bhlo ‑o, nyɩkpa 'sɔ ‑o, ɩyä ‑n ‑yʋwa 'sɔ mʋɔ yëku. Wälɩɩ' cidaa nä, ɩ ‑ŋwa 'kʋ nynä ‑mä ‑dläfʋɛ‑lünyʋä 'sɔ ‑yä taa 'nii ‑lɔɔ.#18.16 Zɛɛ 'sɩɩ Detlo 19.15. 17Bhelio 'kä cii‑ nynä ‑mä, ɔ 'nʋwa ‑lä 'nyukwli poo nä, ‑n mʋ ‑yä ‑n cinɩ 'cɔcɩgbë. Ɔ kä yɩ 'sɩɩ cii‑ nynä ‑mä ɔɔ' ‑lä 'cɔcɩɛ 'nyukwli poo nä, ‑n klä ‑lɔɔ' bhelio nynä nyɩkpɔɔ' lɔɔ ‑ɔɔ ‑wʋ Laagɔ ‑yi nä. ‑N klɔɔ nynä lapoo‑ylänyɔ. 18‑Nʋawlɛɛ 'mnö n sonö'anyɩ nynä anyɩ, a kä lʋʋ ‑mää 'ylʋzɔɔ ‑gʋä nä, ‑mɔɔ Laagɔduu' nä, ‑lɔɔ' ‑lʋʋ yi 'sɩɩ gʋɔ. 'Ɩzä kä a kä lʋʋ ‑mää 'ylʋzɔɔ ‑blisie nä, ‑mɔɔ Laagɔduu' nä, ‑lɔɔ' ‑lʋʋ, ʋ yi 'sɩɩ blisio.

19‑Nʋawlɛɛ 'mnö n sonö'anyɩ nynä anyɩ nëëdë nyɩkpa 'sɔ kä ‑mää 'ylʋzɔɔ 'kʋ 'ŋʋʋ 'nɩ n 'Bäɔ ‑kʋ lä ‑mɔɔ ‑Laagɔɔ' nä, wa kɔ lʋʋ 'ylää nä, ɔ yiwanyʋ 'nyɛ. 20'Nɩ dä nyɩkpa 'sɔ ‑yä taa yi lä 'wlu 'wlää 'naa 'ŋnöö 'mnö nä, n ‑kʋwa nëëdë.

‑Gänʋnyɔɔ' ‑wʋ ɔ ‑liee' cielɩ mii‑

21'Nɩ Pɩɛlö yi Zozii yëku 'jloo, 'nɩ ɔ yio 'ylä, ɔ lä Kwlienyɔ‑, n bheli kä'ä nyenyi ‑nʋ nä, 'ci zio ‑n yio bhä cie? 'Ci ‑ngbɔɔsɔ bha ‑a? 22Zozii lä 'nn! N 'nö‑ö ‑kä ‑soo nynä 'ci ‑ngbɔɔsɔ! ‑N cienöɔ 'ci gwlɩ taa 'nɩ 'kʋgbää' 'ci ‑ngbɔɔsɔ.

23'Nɩ Zozii yiwa ‑nyädlä soo, ɔ lä Laagɔɔ' 'Leyiduu kʋʋ 'mnö wälɩɩ ‑kʋ lä nynä ‑n ‑näsä 'loyo laa lä ɔɔ' ‑gänʋnyʋä ‑yä ɔɔ' dlii wa kä bhlä nä, wa 'kɩ plʋʋ nä. 24‑Mä, ɔ ciwa‑ lä dlu‑ylälɩ 'kʋ nä, ‑gänʋnyɔɔ' ‑lɔɔ ‑ɔ ‑kä bhlä ɔɔ' monii ‑bhutukpää' dluu nä, wa ‑lɔɔ. 25‑Mä ɔɔ' bhɔɔ lʋʋ ‑kä ‑yä ɔ 'kä ɔɔ' dluu plʋʋ. Ɩ ‑kä 'ŋnö nä, ɔɔ' käänyɔ lä wa 'ŋʋɔ 'kpä ɔ ‑yä ɔ 'ŋnɔ, ɩyä ɔɔ' 'yua ‑ya. Ɩyä wa 'ŋʋ 'sɩɩ ɔɔ' kääkäälɩɩ 'fɩɩn 'kpä ‑yä ɔɔ' dluu 'kä plʋnöɔ. 26‑Mä 'loyoo cii‑ lä sɔɔ nä, kä ‑gänʋnyɔɔ pɔɔ‑ ‑kokoowli dëlü glu, 'nɩ ɔ yio bho klä, ɔ lä Käänyɔ‑, ‑n 'tɛmä plɛkʋ ‑mä, n yi ‑naa dluu 'fɩɩn plʋʋ! 27Ɔ cii‑ ylä sɔɔ nä, kä 'loyoo ŋäzö ‑jɛnöɔ 'kʋ. 'Nɩ ɔ yi yɩ ‑gänʋnyɔɔ 'yi ‑taa, 'nɩ ɔ yio 'sɩɩ ɔɔ' dluu cie. 28‑Mä ‑gänʋnyɔnɔ wlʋʋ‑ lä ‑zɔɔ nä, ɔ ‑lie ‑bhlogbee‑ ‑kä bhlä ɔɔ' moniipɛɛ' dlu nä, ɔ ‑yɔsɔ sloo‑. Ɔ nio‑ lä 'yi nä, kɔ ‑klänöɔ ‑blɩɩ 'kʋ klɩ klɩ, ɔ lä 'naa dluu ‑n ‑kä lä nä, ‑n plʋnö 'mʋ yɩ! 29'Nɩ ɔ ‑lio yio ‑kokoowli dëlü glu 'pä, 'nɩ ɔ yio bho klä, ɔ lä bheeje ‑aawli! ‑N 'tɛmä plɛkʋ ‑mä, n yi ‑naa dluu plʋʋ! 30‑Mä ‑gänʋnyɔnɔ, ɔɔ' ‑wʋ ɔ ‑lioo' bhibhielɩɩ 'kʋ ŋoo‑. Kɔ ‑klɔɔ 'nɩ ɔ ŋʋɔ‑ ‑jɩɩ' ‑yä ɔ 'kä dluu 'pɛɛ ‑kaa ‑yä, ʋ 'kä ‑mɔɔ bhɩä. 31‑Mɔɔ' ‑gänʋnyʋa nii‑ lä wälɩɩ 'yi nä, ɩ ‑kamänʋwa kpänyɩ yëkuu'. 'Nɩ wa yi mʋ 'nɩ wälɩɩ 'fɩɩn‑ plöö‑ lä 'kʋ nä, wa yii waa' käänyɔ ‑sää. 32‑Mä wa ‑soo lä waa' käänyɔ nä, kɔ laa‑ ‑gänʋnyɔɔ 'nɩ ɔ yio soo, ɔ lä ‑mɔɔ, ‑n ‑glö 'sää ‑bädaglunyɔ 'titi! ‑N ‑kä 'naa dlu 'kädʋ 'nɩ ‑n ‑bhibhie'e nynä ‑nn ‑wʋ ‑lɔɔ lʋʋ ‑kä ‑yä ‑n 'gʋʋ plʋʋ. Ɩ ‑kä 'ŋnö 'nɩ yi‑i ʋmʋ 'fɩɩn cie. 33Nä, sɩ ‑kʋ bhä 'nɩ sä n ‑yibhënö‑ö lä ŋäzö nä, ‑nn bhä 'sɩɩ sɔɔ ‑n ‑lio ŋäzö ‑yibhë? 34Wälɩnɩ ‑kä bhɛ 'ŋnö nä, kä käänyɔɔ plɛkʋ ‑sio yɩ. Ɔ ‑klä lä ‑gänʋnyɔnɔ nä, kɔ ŋʋɔ jɩɩ' ‑yä ɔ 'kä lebhe ‑klɛ nʋ ɔ 'kä dluu 'fɩɩn plʋʋ. 35Nä, a 'nö a ‑liesɩ cie nä, ‑a 'Bäɔ ‑kʋ lä ‑mɔɔ ‑Laagɔɔ' nä, sɔɔ ɔ 'kanyɩ lä 'sɩɩ klä.

Jelenleg kiválasztva:

Matie 18: god

Kiemelés

Megosztás

Másolás