Lukö 9

Zozii ‑lobho ɔɔ' 'kʋgënyʋa 'kʋgbä 'sɔ

(Matie 10.1‑14; Makö 6.7‑13)

1Zozii laa‑ ɔɔ' lobho lobhonyʋa 'kʋgbä 'sɔ, 'nɩ ɔ yiwa 'tɛtɩ ‑yä 'päwä 'sɔ 'nyɛ nynä wa 'tlü ‑zizinyenyii 'fɩɩn ‑yä wa yamä gupanyʋä. 2Ɔ ‑lobhuwa nynä wa mʋ ‑yä wa bie Laagɔɔ' 'Leyiduu' 'Nägädöö, ɩyä wa yamä gupanyʋä. 3Wä 'kä lä mʋ nä, ɔ ‑sonʋwa, ɔ lä a kä mʋdä ‑kʋ nä, aa' bhɛɛ ‑lä lʋʋ! 'Kʋtëgë ‑yukwee ‑o, badu ‑o, lülülɩɩ ‑o, monii ‑o, aa' bhɛɛ ‑lä ɩɩ' 'kʋʋ lʋʋ! Aa' bhɛɛ ‑lä 'sɩɩ anyɩa' 'mʋ plä ‑kotuu' 'sɔnalʋʋ 4A kä ‑mʋ nä, dä wa 'kanyɩ lä 'kʋplädä nyɛɛ‑ nä, a kʋ ‑lɔɔ ‑aaa ‑yä anyɩa duu' ‑bha‑tänyɩ 'kä ŋëë. 5A kä dä mʋ 'nɩ ‑lɔɔ' nyɩkpaa nö'anyɩ 'kʋplädä nyɛɛ‑ nä, a kä ‑lɔɔ ‑bhadä ‑kʋ nä, a gbɔtɔɔ ‑lɔɔ anyɩa' ‑kokokpü ‑zɔɔ' ‑bhabhuu! Ɩmɩɩ‑ 'gä lä anyɩa' ‑dläfʋɛ lü nynä ‑mä, a ‑gblɩmänʋwa bhä. 6'Nɩ 'kʋgënyʋa yi 'kʋ ‑bha, 'nɩ wa yi Laagɔɔ' 'Nägädöö bie ‑kää mʋ, 'nɩ dää 'fɩɩn wa plö bhlä nä, wa yamä bhä ‑mɔɔ gupanyʋä.

Zozii' wälɩ belie Elodö plɛɛ'

(Matie 14.1‑2; Makö 6.14‑16)

7‑Lɔɔ' 'tänyɩɛ 'mnö nä, Galilee‑bhlɩɛɛ' 'loyoo, Elodö, ɔ nuu‑ lä wälɩɩ 'fɩɩn Zozii nʋ bhlä nä, ɔɔ' 'ni bhɔɔ sɔ 'kɩ lä klä nä. ‑Nänʋä ci bhä nynä ‑mä Zään Badisö 'mɔɔ‑ ‑kʋ lä ‑lɔɔ ‑mä ɔ yä 'kuëë glɔɔ. 8‑Nänʋä lä 'plɔfɛtɩ Elii 'mɔɔ‑ ‑yi bʋkʋ zëkpë 'kʋ. ‑Nänʋä ci bhä 'sɩɩ nynä ‑gɔgɔbhlää' 'plɔfɛtɩnyʋa' lɔɔ ‑bhlo ‑bha lä 'kuëë. 9‑Mä 'loyo Elodö cii‑, ɔ lä n yä bhɛ Zään 'wlu 'kʋ ‑döö nä, nyɩkpɔ‑ ‑sä wa sä bhä? ‑Nɩnɩ ‑kä bhɛ 'ŋnö 'nɩ Elodö tään bhɛ nynä ɔ 'kä Zozii 'yi 'ni.

Zozii ‑zumë 'flɔɔ

(Matie 14.13‑21; Makö 6.30‑44; Zään 6.1‑15)

10'Tänyɩ ‑kʋ ‑lɔɔ 'nɩ Zozii' lobho lobhonyʋa yi 'ylɩbhɔ 'nɩ wa yi yi. Wa ‑yi lä nä, wälɩɩ 'fɩɩn wa ‑nʋʋ lä ‑mɔɔ ‑gbäsɩɩ wa bha lä kä wa ‑sänɩ Zozii. 'Nɩ Zozii ‑yʋwa 'sɔ yi gwë ‑sä. Ɔ ‑yʋwa 'sɔ ‑mʋ Bɛsayidaduu' ‑gbäsɩɩ. 11‑Mä nyɩkpa ‑bhutukpä ‑yibhë lä ‑mɔɔ dä nä, kwa güo‑ 'kʋ. 'Nɩ ɔ yiwa säkʋdä 'nyɛ. Ɔ ‑sonʋwa Laagɔɔ' 'Leyiduu' yëkuu' wälɩɩ. 'Nɩ ɔ ‑yamä 'sɩɩ ‑lɔɔ gupänyʋa ‑wa ‑ŋwa bhlä kläälɩ 'kʋ nä.

12'Ylʋ mʋ bhɛ lä bhlü ‑kää nä, kä 'kʋgënyʋa 'kʋgbä 'sɔ ‑yi Zozii yëku, 'nɩ wa yio soo, wlä Cɩanyɔ‑, ‑gbäsɩɩ ‑a ‑kʋ lä ‑mää nä, kä ‑mɔɔ ‑zie kpänyɩ gwë nä, ‑n gbä ‑yä nyɩkpaa 'ylɩbhɔ ‑yä wa mʋ kpëkpë 'kʋʋ 'dii 'mnö. Wa 'kä wa yëkuu' lülülʋʋ tään, ɩyä wa 'kä 'sɩɩ säpudä tään. 13Wa cii‑ lä sɔɔ nä, kä Zozii cii, ɔ lä anyɩ 'titi, a 'nyɩwa lülülɩɩ! 'Kʋgënyʋa lä ‑a ‑kä 'flɔɔbhü ‑ngbü ‑yä zliiyi 'sɔ 'cɩɩn! Nä, kä ‑n ylä bhä nynä ‑mä, ‑a mʋ ‑yä nyɩkpa‑gbʋnʋ, ‑a 'gwa lülülɩɩ zɔɔ ‑a? 14Nyɩkpaa' zunɔ yi bhä nyɩkpaa' ‑bhɛgö ‑ngbü (5.000) ŋëë. 'Nɩ Zozii yi ɔɔ' 'kʋgënyʋa soo, ɔ lä a gbä ‑yä wa kʋ sä 'kpö 'kpö 'kpö! 'Kpä kʋ nyɩkpaa' gwlɩ 'sɔ 'nɩ 'kʋgbä 'mnö. 15'Nɩ wa yi gbä 'nɩ nyɩkpa yi sä kʋ. 16'Nɩ 'flɔɔbhüü ‑ngbü ‑yä zliiyii 'sɔ, ɔ yii 'kʋ 'bhlü. Ɔ ‑wloo ‑laagɔɔ', 'nɩ ɔ yi bhibhie. Ɔ ‑döödönɩ 'mʋ, 'nɩ ɔ yi ɔɔ' 'kʋgënyʋa 'nyɛ nynä wa dënɩ ‑jlëa. 17‑Mä wa ‑dënɩ lä nä, nyɩkpaa 'fɩɩn ‑lü 'nɩ wa ‑loo, 'nɩ lülülɩɩ ‑ji 'kʋ 'nɩ wa ‑fämʋ. ‑Ɩ ‑ji bhlä 'kʋ nä, ɩ ‑nʋ ‑takwü 'kʋgbä 'sɔ.

Pɩɛlö cii‑ nynä Zozii 'mɔɔ‑ plöö‑ Klisöɔ

(Matie 16.13‑20; Makö 8.27‑30)

18'Ylʋ ‑bhlo ‑kʋ ‑lɔɔ 'nɩ Zozii ‑zie gwë, 'nɩ ɔ bhibhie bhä 'nɩ ɔɔ' 'kʋgënyʋa ‑kʋɔ bhä yëku. 'Nɩ ɔ yiwa 'ylä, ɔ lä säsä nyɩkpa ci bhä 'naa ‑zaa? 19'Kʋgënyʋa lä ‑nänʋä ci nynä ‑mɔɔ plöö‑ Zään Badisö. ‑Nänʋä ci nynä ‑mɔɔ plöö‑ 'plɔfɛtɩ Elii. 'Nɩ ‑nänʋä ci nynä ‑mä, ‑gɔgɔbhlää' 'plɔfɛtɩnyʋaa' lɔɔ ‑bhlo ‑glɔɔ lä 'kuëë nä, ɔmɔ ‑n plöö‑. 20'Nɩ Zozii yiwa 'ylä, ɔ lä 'nɩ anyɩ 'titi, a lä n plöö‑ bhää? ‑Mä Pɩɛlö ‑sä në 'nɩ ɔ cii‑, ɔ lä ‑mɔɔ plöö‑ lä Klisöɔ, ‑mɔɔ Laagɔ ‑lobho lä ‑mää 'ylʋzɔɔ!

Zozii ci ɔɔ' 'kwiee ‑yä ɔɔ' 'kuëë glɔɔlɩɩ' wälɩ

(Matie 16.24‑28; Makö 8.30; 9.1)

21Ɔ cii‑ lä sɔɔ nä, kä Zozii ‑bhuwa ‑kɔkwɩ nynä waa' sonɩ ‑lä nyɩkpɔ.

22'Nɩ ɔ yi bʋkʋ ci, ɔ lä ɩ ‑ŋwa 'kʋ nynä ‑mä Nyɩkpɔɔ ‑Yowli nyɛnɩä kpänyɩ. Ɩyä 'Zufʋnyʋaa' ‑Dɔɔpänyʋa ‑yä 'Cibhisänyʋaa' 'cifinyʋa, ɩyä ‑Jlämöcɩanyʋa, wa cɛnöɔ ‑yä wa 'bhlɔ ‑yä ɔ 'ku, ‑mä taanaylʋʋ 'kʋ nä, ɔ yi 'kuëë glɔɔ.

Zozii' 'kʋgëlɩ

23'Nɩ ɔ yi nyɩkpaa 'fɩɩn soo, ɔ lä nyɩkpɔ kä cii‑ nynä ‑mä ɔ yi'i 'kʋ 'gë nä, ɔ ‑bha ɔ yëkuu' gbʋʋ'. Ɔ bhɛɛ ɔ yëkuu' 'kusuu ylɩɩ 'fɩɩn 'kʋ, ɩyä ɔ gë'ë 'kʋ. 24‑Ɔ gä tään nynä ‑mä ɔ 'kä ɔɔ' zëkpë 'kʋ bhlää nä, ɔ yia të. 'Ɩzä ‑ɔ gä cii‑ nynä ‑mä, ɔ yi ɔɔ' zëkpë të 'naa ‑za nä, ɔ yia 'ni. 25Nyɩkpɔ kä 'ylʋzɔɔ' leylüü 'fɩɩn nii‑ 'nɩ ɔ kä too 'nɩ ɔ kä ɔ yëku nuë nä, ‑bʋzʋɛ ‑sä ɔ nii‑ bhää? 26Nä 'naa zoo kä nyɩkpɔ 'bhlä 'nɩ 'naa ciciwälɩɩ' zoo kɔ 'sɩɩ 'bhlä nä, Nyɩkpɔɔ ‑Yowli ‑mä 'sɩɩ ‑lɔɔ' nyɩkpɔɔ' zoo yio 'bhlä. 'Tänyɩ ɔ 'kä lä ɔɔ' 'klʋagba ‑yä ɔ 'Bää 'klʋagba ‑yä kplɔɔkplɔɔ‑zizii' 'klʋagba 'mnö yii nä, ‑lɔɔ' nyɩkpɔɔ' zoo yio 'sɩɩ 'bhlä. 27N sonö'anyɩ ‑nʋawlɛɛ' nynä ‑mä, nyɩkpa ‑kʋ'anyɩ ‑lää nëëdë 'nɩ waa' ‑lätee kuu‑ 'nɩ wa yi Laagɔɔ' 'Leyiduu 'yi 'ni.

Zozii ‑kʋ bhibiedä 'nɩ ɔɔ' kʋkʋsaa ‑jöjlä

(Matie 17.1‑9; Makö 9.2‑10; 2 Pɩɛ 1.16‑18)

28Zozii cii‑ lä 'sɔɔ nä, ɩ ‑nʋ 'fɩa ylɩɩ ‑ngbaatä 'bhisäkʋ, 'nɩ ɔ bhlüü‑ Pɩɛlö, ‑yä Zään, ‑yä Zakö 'sɔ 'kʋ, 'nɩ ɔ ‑yʋwa 'sɔ yi 'kükë 'wlu bhibhie ‑kää mʋ. 29‑Mä ɔ ‑kʋ bhibhiedä 'nɩ ɔɔ' 'kʋtakpaa ‑jöjlä. 'Nɩ ɔɔ' 'kwëtii plöö‑ plätätä, 'nɩ ɩ lie bhä 'sɩɩ. 30'Nɩ ‑vaaa! Nyɩkpa 'sɔ yi ‑lɔɔ 'kʋ ghlä. Wa ‑yä Zozii 'sɔ ŋʋ bhɛ 'dö. Moyizö ‑yä Elii 'sɔ bhlä. 31Wa ‑kʋ Laagɔɔ' 'klʋagba 'mnö 'nɩ sɩ 'kä bhlä 'kʋ 'plö ‑yä Zozii 'kä Zolizalɛmʋduu' 'kuu nä, ‑lɔɔ' wälɩɩ wa ‑yɔsɔ cii bhä. 32‑Mä Pɩɛlö ‑yä nyɩkpaa‑ ‑kʋ bhlä ‑lɔɔ nä, 'ylaa bhlʋwa bhä ‑mä wa welie‑ 'yii 'nɩ wa 'nii‑ Zozii' 'klʋagbaa 'mnö 'yi. Ɔ ‑yä nyɩkpaa 'sɔ ‑kʋ bhä ‑lɔɔ. 33‑Mä 'tänyɩɛ 'mnö wa sɔɔ bhɛ lä gwë nä, kä Pɩɛlö cii‑, ɔ lä Cɩanyɔ‑, ɩ nää‑ nynä ‑a kʋ ‑lää! ‑A 'gä ‑papö taa 'slä! ‑Naa laa, Moyizöö' laa, 'nɩ Elii' laa. ‑Mä wälɩɩ Pɩɛlö ci bhlä nä, ɔɔ' bhɔɔ ɩɩ' gba ‑yi 'nɩ ɔ cii bhlä. 34Ɔ ‑kʋɩ cidä 'nɩ 'nyukpɔ yi yi, 'nɩ ʋ yiwa 'kʋ zizie. 'Tänyɩɛ 'mnö 'nyukpɔɔ 'mɩmɩänʋwa‑ lä 'kʋ nä, kä 'kʋgënyʋa ‑ŋänö ‑plʋwa. 35'Nɩ nüwälɩ yi 'nyukpɔɔ 'mnö ghlää, ɩ lä ‑nɔnɔ 'mɔɔ‑ plöö‑ lä n ‑Yowli! Ɔmɔ n ‑sä lä nä, a puo 'nyukwli! 36Nüwälɩɩ ‑bhlü ylä nä, wa lä wa wloo bhɛ nä Zozii' ‑bhlo 'coo‑ ‑kʋ bhɛ ‑lɔɔ. ‑Mä wälɩnɩ 'fɩɩn‑ plöö‑ lä 'kʋ nä, 'kʋgënyʋa 'nɩɩ ‑wʋ nyɩkpɔ ‑soo ‑lɔɔ' 'tänyɩyɩ 'mnö. Kwa ‑klänɩ pleyii 'nää.

Zozii ‑yamä ‑zɔɔ bhlü bhlügu‑bhlänyɔ

(Matie 17.14‑21; Makö 9.14‑29)

37Zeli ‑ze 'nɩ wa bha lä 'kükëa 'wlu nä, kä nyɩkpa ‑bhutukpä ‑yi Zozii ‑blɔkʋ. 38‑Mä ‑jlëa 'mnö nä, nyɩkpɔ ‑bhlo ‑kʋ bhä ‑mɔɔ 'nɩ ɔ ‑woo, ɔ lä Cɩanyɔ‑, bheeje, ‑n 'pä 'naa 'yuoo' ‑za! Ɔmɔ ‑bhlo plöö‑ lä 'naa 'yuŋwadi, 39‑mä ‑zuzunyënyu ‑kʋɔ kätää'. Ʋ kɔ 'kʋ sloo nä kɔ woo lä, 'nɩ ʋ 'sëka sëkanöɔ. Ʋ gbä 'sɩɩ 'nɩ 'fʋflɩɩ ghlɔ nëë'. Ʋ kɔ yɩ sɔɔ kpʋkpɔ‑kälöö' ŋʋʋ‑ ‑aaa 'nɩ ʋ bhɔɔ yɩ kätää'. 40N ‑soo ‑naa 'kʋgënyʋa nynä wa 'tlu, ‑mä waa' ‑wʋ mii‑.

41Nyɩkpɔɔ cii‑ lä sɔɔ nä, Zozii lä ‑ɔɔɔ! Anyɩ nä, a ‑glö sää 'titiclö nyɩkpaa' lʋä ‑waa ‑wʋ lä Laagɔɔ' pɔlötɛtɛ ‑kä nä! 'Nɩ anyɩa' nʋnʋgbɩ ‑nyu 'sää kpänyɩ! Ka bhobho nynä n yi 'kɔɔkɔ sɔɔ plɛkʋ 'tɛmä, 'nɩ n yi'anyɩ nëëdë kʋ ‑a? ‑N ‑lä'ä ‑mää ‑n ‑yowli! 42Wa ‑kʋ lä 'yuo ‑lädä nä, kä ‑zuzunyënyu pänöɔ‑ sä 'nɩ ʋ 'sëka sëkanöɔ bhä. ‑Mä Zozii 'ŋʋʋ‑ ‑zuzuu 'yizlɛ 'kʋ 'nɩ ʋ yi 'yuo kätää' ‑bha. Ɔ ‑yamä lä 'yuo nä, 'nɩ ɔ yio ɔ 'bä 'nyɛ. 43Wälɩnɩ ‑gbä 'nɩ nyɩkpaa' 'fɩɩn nii‑ Laagɔɔ' 'päwaa' 'ghlünɔɔ 'yi.

Zozii lä nyɩkpa yio pëë

(Matie 17.22‑23; Makö 9.30‑32)

Mä Zozii' nʋnʋgbɩɩ 'ninie bhɛ nyɩkpɔ nyɩkpɔ plɛkʋ. 'Nɩ ɔ yi ɔɔ' 'kʋgënyʋa soo, 44ɔ lä anyɩ nä, a poo 'nägäsä 'naa ciciwälɩɩ 'nyukwli! Nyɩkpɔɔ ‑Yowli nä, wa yio nyɩkpa wlɩɩ' pënö. 45‑Mä wälɩnɩ ɔ ci bhɛlä nä, kɩ ‑zizio bhä 'kʋ waa' ‑za nä, waa' 'nu bhɔɔ ɩɩ' ‑zɔɔ. 'Nɩ wa gu bhlä 'sɩɩ nä, waa' ‑wʋ mii‑ 'nɩ wa 'kɔ ylää‑.

Zozii pana 'kʋgënyɔɔ' ‑lɛ 'kädɔ nä

(Matie 18.1‑5; Makö 9.33‑37)

46'Tänyɩ ‑bhloo', Zozii' 'kʋgënyʋa bhlää bhä wälɩklë 'kʋ. Ɔ plöö‑ bhlä waa' nëëdëë' ‑lɛ 'kädɔ nä, wa ylä bhä nynä wa 'kɔ yibhë. 47Mä Zozii ‑yi bhlä sä wa bhobho bhlä nä, kɔ bhlüü‑ 'yulɛɛ 'kʋ, 'nɩ ɔ yio ɔ yëku yëku 'ŋʋʋ. 48'Nɩ ɔ yiwa soo, ɔ lä ‑ɔ gä 'yunɔ 'nägäsä ‑klä 'naa 'ŋnöö 'mnö nä, ‑amʋ 'titi ‑lɔɔ' nyɩkpɔɔ ‑klä lä 'nägäsä. 'Nɩ ‑ɔ gä'ä 'nägäsä ‑klä nä, ‑ɔ ‑lobho'o lä nä, ɔmɔ ‑lɔɔ' nyɩkpɔɔ ‑klä lä 'nägäsä. Nä, ‑ɔ plöö‑ lä anyɩa nëëdëë' ‑lɛ 'tɩkɩɩlɛɛ nä, ɔmɔɔ‑ plöö‑ lä anyɩa' ‑lɛ 'kädɔ.

‑Ɔ 'nö‑anyɩ ‑zɔɔ nä kɔ ya‑anyɩ 'sɔ plöö‑

(Makö 9.38‑41)

49Zään lä Cɩanyɔ‑, dä ‑a ‑mʋ lä nä, ‑a nii‑ nyɩkpɔ 'nɩ ɔ tlü bhä ‑zizinyenyi ‑naa 'ŋnöö 'mnö, ‑mä sä ɔ ‑yanyɩ 'sɔɔ nää ‑wʋ lä nä, ka ‑a 'täpʋnöɔ‑. 50Zään cii‑ lä sɔɔ nä, Zozii lä a ‑tanöɔ 'yi ‑mä, nyɩkpɔɔ' lɔɔ ‑ɔ nö'anyɩ ‑wʋ lä ‑zɔɔ nä, ɔ ‑glö anyɩa lɔɔ.

Samaliinyʋa lä Zozii' goo ‑lä waa' 'duu 'mnö

51Zozii 'kä bhɛ 'ylʋzɔɔ ‑bha nä, ɩɩ' 'tänyɩɛ 'mɛmɛ bhɛ. Ɩ ‑kä 'ŋnö 'nɩ ɔ ŋʋʋ‑ nynä ɔ 'kä Zolizalɛmʋduu' mʋ. 52Ɔ ‑lobho nyɩkpa nynä wa 'plö ‑yä wa mʋ ‑mɔɔ 'yikʋʋ' 'dii 'mnö. 'Nɩ wa yi mʋ, 'nɩ wa yi Samalii‑bhlɩɛɛ' 'du ‑bhlo 'mnö plä ‑yä wa 'kä ‑mɔɔ ɔɔ' ‑dʋdʋkʋ göglä. 53‑Maa, sä Zolizalɛmʋduu' ɔ mʋ bhlä nä, Samalii' nyɩkpaa' ‑wʋ ŋoo‑ nynä ɔ goo waa' 'duu 'mnö. 54Nä 'kʋgënyʋa Zakö ‑yä Zään 'sɔ nuu‑ lä wälɩɩ nä, kwa cii‑, wlä Cɩanyɔ‑, ‑n ‑waa nynä ‑mä, ‑a 'kämä ŋnäŋnä‑kosu ‑yä, ʋ ‑bha ‑laagɔɔ' ‑yä ʋ sie nyɩkpanä ‑a? 55'Nɩ Zozii yi 'ylɩbhɔ 'nɩ ɔ yiwa 'yii wloo. 'Nɩ ɔ yiwa ‑kɔkwɩ bhoo. [Ɔ lä ‑lʋʋ ‑ʋ nʋ'anyɩ lä sɔɔ nä, a 'nʋ ‑wʋ ‑yi! 56A ni, Nyɩkpɔɔ ‑Yowli nä, ɔɔ' ‑wʋ ‑yi ‑yä ɔ 'kä nyɩkpa nuë, ‑mä kɔ ‑yi ɔ 'kwa ‑lɔɔ nëë' ‑sä.] Ɩ ‑kʋ bhɛ lä sɔɔ nä, kä wa plöö‑ 'nɩ wa yi 'yigädadu 'kʋ mʋ.

Sä wa gë lä Zozii 'kʋ nä

(Matie 8.19‑22)

57Wa ‑kʋ lä mʋdä nä, nyɩkpɔ ‑bhlo ‑yi 'nɩ ɔ yi Zozii soo, ɔ lä Kwlienyɔ‑, dää 'fɩɩn ‑n yi lä mʋ nä, n yi‑i 'kʋ 'gë. 58'Nɩ Zozii yio soo ɔ lä ‑n ni 'yi na, gbogwli‑zakɔkwɩä ‑kä waa' sukwi, 'nɩ ŋɔkʋʋ' nümnü ‑kä ɩɩ' ‑nünü. ‑Mä Nyɩkpɔɔ ‑Yowli, ɔɔ' ‑wʋ 'wluu puëdä ‑kä!

59'Nɩ ɔ yi nyɩkpɔ ‑bhlo soo, ɔ lä ‑mɔɔ, ‑n gë'ë 'kʋ! Nyɩkpɔɔ lä Kwlienyɔ‑, ‑n nyɛɛ'ɛ 'tänyɩ ‑yä, n 'kä 'fɩa n 'bä zizie. 60'Nɩ Zozii yio soo, ɔ lä ‑n ‑taa 'kudukua 'yi ‑yä wa zizie waa' 'kudukuë, ‑mä ‑mɔɔ nä, ‑n mʋ ‑yä ‑n 'gä Laagɔɔ' 'Leyiduu' 'Nägädöö bie!

61'Nɩ nyɩkpɔ ‑bhlo yi bʋkʋ Zozii soo, ɔ lä Cɩanyɔ‑, ‑amʋ nä, n yi‑i 'kʋ 'gë! ‑Mä ‑n nyɛɛ'ɛ 'tänyɩ ‑yä, n 'kä mʋ n 'kä 'naa gbünyʋä soo. 62'Nɩ Zozii yio soo, ɔ lä nyɩkpɔ kä ɔɔ' 'klää 'mnö ‑dʋdʋ 'kludä ‑kʋ 'nɩ ɔ kä klë wloo nä, ‑lɔɔ' nyɩkpɔɔ' ‑wʋ Laagɔɔ' 'Leyiduu 'mnö 'kʋ ‑ŋwa.

Jelenleg kiválasztva:

Lukö 9: god

Kiemelés

Megosztás

Másolás