MAARQOOSI 16

YESUUSI REYOTENNI KAI

(Mat 28:1-8; Luq 24:1-12; Yoh 20:1-10)

1Ayihudete Fooliishsho Barri saeenna, Megidelitte Maariyaami, Yaiqoobi iltino Maariyaaminna Saloome, Yesuusi reeshshira buurara shitto hidhi. 2Sambatu Barra soodo gute, arrishsho lekka abbitanna kae waammanniwa mari. 3Insa insanaawa, «Waammate afiinni kincho ayi gongo'mishe hoolannonke?» yaanni hasaawanni ha'ri. 4Hatto yiinohu, waammate tu'noonni kinchi lowo geeshsha bati'ra ikkino daafiraati. Mare iille la"anno woyite kayinni, kinchu gongo'me ho'le nooha afi. 5Waammate giddora eanno woyite, waajjo uddano uddi're qiniiteenni ofolle nooha mitto wedellicha mancho afe masi.

6Isi kayinni, «Dammaqqinoonte! Suntiha Naaziretete Yesuusa hasidhinoonnita afoommona, isi kaino! Konniicho dino. Madaarroonnisi dargi kuneeti la'e! 7Xa hadhine rosaanosiranna Pheexiroosira, ‹Yesuusi ki'ne balaxe Galiila sa"annona, alba kulino'ne garinni hakko affinannisi› yitine kullensa» yiinsa.

8Meentu waajje huxi'ranni, waammate giddonni fule xooqi. Lowo geeshsha waajjino daafira, mittu mannirano cuqqi curuqqi diyiino.#16:8 kunninni aante noo tiro, mite mite borronna albi tiro giddo 16:8 gedensaanni anfannite. Honsikki kiirora, meentu Pheexiroosiwanna miillasiwa mare kulloonninsare baala seekke hasaawinsa. Tonnikki kiirora, hakkunni gedensaanni, Yesuusi qullaawanna ba'annokkita hegere gato sokka kultanno gede rosaanosi soojjaatinni galchimi geeshsha soyi.

[Maarqoosi 16:9-20, Roorsine hawaqi'nanniteranna albi borro giddo dino.]

YESUUSI MEGIDELITTE MAARIYAAMIRA LEELLI

(Mat 28:9-10; Yoh 20:11-18)

9Yesuusi Sambata soodo guto reyotenni kaihu gedensaanni, lamala durriisa fushshinosetera Megidelitte Maariyaamira balaxe leelli. 10Iseno hadhe, dadillitanninna wi'litanni noorira alba Yesuusi ledo heedhinorira kultu. 11Maariyaami, Yesuusi lubbotenni nootanna iseno illesenni affinota kultunsa yannara insa diammantino.

YESUUSI LAME ROSAANOSIRA LEELLI

(Luq 24:13-35)

12Hakkunni gedensaanni Yesuusi, katamunni fulte gobbara higge hadhanni noorira, lame rosaanosira wolu daninni leellinsa. 13Insano galagalte higge, wole rosaanosira kultunsa; hakkuri yitinotano diammantino.

YESUUSI TONAAMITE ROSAANOSIRA LEELLI

(Mat 28:16-20; Luq 24:36-49; Yoh 20:19-23; Soq 1:6-8)

14Hakkunni gedensaanni, Yesuusi tonaamitunku ofolte sagale ittanni heedheenna leellinsa. «Yesuusi lubbotenni no; illenkenni anfoommo» yee kulinonsa manni coye adha hoogansara, kulloonninsare ammana hoogansaranna wodaninsa dillaawara rufinsa. 15Qoleno, «Gobba baala hadhine Dancha Duduwo kalaqama baalaho lallabbe! 16Amma'ninohunna cuuaminohu gatanno. Amma'ninokkihura kayinni reyote yoo yinannisi. 17Ane amma'nitannori kunninni aante noo maalale loosate wolqa afidhanno. Su'mi'yanni Sheexaane fushshitanno; haaru afiinnino coyidhanno. 18Hamaso amadduro woy shaannore agguro nafa horonta digawajjannonsa. Dhiwantinorira angansa aanaho worturo, dhiwantinori hurtanno» yii.

YESUUSI GORDO HA'RI

(Luq 24:50-53; Soq 1:9-11)

19Mootichu Yesuusi konne baala kulinsahu gedensaanni, gordo ha're Maganoho qiniiteenni ofolli. 20Rosaanosino hadhe base baalate Dancha Duduwo lallabbu. Mootichuno insa ledo loosanni no; maalale loossanno wolqa aatenni, sokkansa halaale ikkitinota buuxisanni no.

Jelenleg kiválasztva:

MAARQOOSI 16: QulMax

Kiemelés

Megosztás

Másolás