MAARQOOSI 15

YESUUSI PHILAAXOOSI ALBIRA YOOTE SHIQI

(Mat 27:1-2,11-14; Luq 23:1-5; Yoh 18:28-38)

1Soodo guto Qeesootu Roorrooti geerru, Muse Seeri rosiisaanonna Aliidi Yoo Mini Gaamo baalu ledo xaadde amaalantu. Hakkunni gedensaanni, Yesuusa usurte massite Philaaxoosira sayisse uyitu. 2Philaaxoosi, «Ati Ayihudete Mooteetini?» yee xa'misi.

Yesuusi qole, «Atinni yootto» yiisi. 3Qeesootu Roorrooti kayinni Yesuusa bushiishshe lowo coye kultu. 4Kunnira Philaaxoosi Yesuusa, «Togo batinye coye kulle bushiinshannahe sammi yaatto? Mittoreno diqolatto?» yee lede xa'misi. 5Yesuusi kayinni mittoreno diqolino; sammi yaasira Philaaxoosi dhaggeeffati.

YESUUSIRA REYOTE YOO YITU

(Mat 27:15-26; Luq 23:13-25; Yoh 18:39-40; 19:1-16)

6Philaaxoosira, Agure Sa"ate Ayyaani daanno kiiro mannu, «Tirinke!» yaannoha mitto usuranya tira rosoho. 7Hatte yannara gashshoote qoxxisse, manna shite usurantinori haxawarrooti giddo, Barbaani yinanni manchi no. 8Mannu Philaaxoosiwa mare, «Rosinke garinni manna tirinke!» yee xa'mi. 9Philaaxoosi, «Ayihudete Moote tireemmo'neta baxxinannini?» yee xa'minsa. 10Hatto yiinohu Qeesootu Roorrooti Yesuusa dhiibbetenni sayisse uyitinota afinohuraati.

11Qeesootu Roorrooti kayinni, Yesuusa agure, Barbaani tirannonsa gede, Philaaxoosi xa'mate manna kakkayissu. 12Philaaxoosi, «Konne, Ayihudete Mooteeti yitinanniha hiitto assoyya?» yee xa'minsa. 13Insa qolte, «Suti!» yitanni cancitu. 14Philaaxoosi, «Isi assino bunshe maati?» yiinsa.

Insa kayinni, «Suti!» yite ledde cancitu.

15Philaaxoosi manna hagiirsiisara yee, Barbaani tire, Yesuusa kayinni lichetenni gansiise, suntanni gede sayise uyi.

GAADDO YESUUSA QACIFATTUSI

(Mat 27:27-31; Yoh 19:2-3)

16Gaaddo Yesuusa haadhe gobba gashshe noo manchi hoowe massitusi; gattino gaaddono ledde woshshitu. 17Duume xiillitte uddano uddisiisse, utu worraaqqa seekkite umoho wortusi. 18«Ayihudete Moote, mootimma geedonnita ikkitohe!» yitanni keere haadhusi. 19Siqqotenni umo gantanni, anja tuffanni, balalsitannisi heeshshi yite albasiinni kumbuultu. 20Qacifattusihu gedensaanni, duume xiillitte uddano mulqite, isi umisi uddano uddisiisse suttara haadhe hadhusi.

YESUUSI SUTAMA

(Mat 27:32-44; Luq 23:26-43; Yoh 19:17-27)

21Hadhanni heedheenna, Qereenu gobba mancho Alekisaanderinna Rafoosi anna Simiooni katamaho gobbayidinni daanna affe, Yesuusi masiqala duhanno gede qarrissusi. 22Hakkunni gedensaanni, Yesuusa Golgoota yinanniwa haadhe massitusi. Golgoota yaa, Umu Qooncho yaate. 23Hakkiira iillitu yannara, kaarbete ledo karsinoonnita woyinete xajje uyitusi. Isi kayinni diadhino. 24Hakkunni gedensaanni iso suttu; iillannonsare afate hixa tuqqite uddannasi beeqqitu. 25Yesuusa suttu woyite, yanna soodinni sase saateeti. 26Mayira suntoonnisiro kultannoti, «Ayihudete Moote» yitanno borro masiqalu aana no.

27Manna mulqidhannore lame mannoota abbite, mitto qiniitesiinni, mitto gurasiinni suttu. 28Kunni garinni, «Garimalu manni ledo kiirami» #Isa 53:12 lai. yinoonni himani wo'mi.#15:28mite mite angatenni borreessinoonni borro albite giddo lemiina settikki kiiro dino. 29Mulesiinni hige doogo sa"anno manni malxifatanni, «Qullaawa Mine diigge sasu barrinni minattohu, 30hanni xa masiqalu aaninni dirrite umokki gatisi!» yee ajiiffatisi. 31Kunni garinni Qeesootu Roorrootinna Muse Seeri rosiisaanono insa insanaawa, «Wole gatisinona, umosi kayinni gatisa didandaanno. 32Buuraminohu Israeelete Moote, hanni xa masiqalu aaninni dirrossiyya; ninkeno la'ne ka'ne ammanneemmosina!» yite qacifattusi. Ledosi sutante noorino arrassitinosi.

YESUUSI REYO

(Mat 27:45-56; Luq 23:44-49; Yoh 19:28-30)

33Barrunni lee saatenni kayise honse saate geeshsha baatto baala tunsitu. 34Honse saate ikkita Yesuusi, «Eloyi! Eloyi! Lama Sabaqitani?» yee lowo qaalinni coyi'ri. Hatto yaano, «Magano'ya, Magano'ya, mayira agurittoe?» yaate.

35Hakko uurrite noori giddonni mitu mitu macciishshite, «Kuneeti, Eeliyaasi woshshanni no» yitu. 36Insa giddonni mittichu dode mare, haanxicho shiishu giddo cuue, Yesuusi aganno gede siqqote umira wore ee, «Hanni agarre! Eeliyaasi daye masiqalu aaninni dirrisannasi la'neemmona» yii.

37Hakkunni gedensaanni Yesuusi lowo geeshsha raare kaeenna foolu fulisi.

38Qullaawu Mini dukko alinni woro geeshsha dadhante lamewa fultu. 39Yesuusa sunti masiqali albaanni uurre noohu mittichu xibbe olanto roorrichi, Yesuusi raare kae#15:39 raare kae yaannohu, mite mite albi borro angatenni borreessinoonnite giddo dino. ikke reyi gara lae, «Kuni manchi halaalintanni Maganu Beettooti» yii.

40Hatte yannara shiimu meenti xeertote uurre la"anni no. Insa giddo Megidelitte Maariyaami, maa'niidihu Yaiqoobinna Yoosa ama Maariyaaminna Saloomeno ledo no. 41Yesuusi Galiilaho hee'ri yannara, kuni meenti Yesuusi hoode ha'rino. Qoleno towatinosiho. Ledosi Yerusaalame dayinohu wolu lowo meentino hakko no.

YESUUSA WAAMMOONNI GARA

(Mat 27:57-61; Luq 23:50-56; Yoh 19:38-42)

42Ga'a gede Ayihudete Fooliishsho Barra ikkanna, techo gede qole, Qixxaawote barraati. 43Ayihudete Aliidi Yoo Gaamo miili, mittu ayirradu manchi Armaatichu Yooseefi kae dayi. Isino Maganu Gashshooti daa galaalchanni hee'ranno manchooti. Ruxxi yiikkinni Philaaxoosiwa mare, Yesuusi reeshsha aannosi gede huucci'ri. 44Philaaxoosi, Yesuusi rahe reyinota macciishshe maala'li. Xibbe olanto roorricha woshshe, reyinkunni keeshshinoro xa'mi. 45Xibbe olanto roorrichi Yesuusi reyinota kulisihu gedensaanni, Yooseefira, Yesuusi reeshsha adhe ha'ranno gede fajjisi. 46Yooseefi Yesuusi reeshsha masiqalu aaninni dirrise, dancha biiffino seemma hire kafane, kincho kurkurre seekkinoonni waamma giddo madaarisi. Madaarihu gedensaanni lowo kincho gongo'mishe, waammate afoo tui. 47Hatte yannara, Megidelitte Maariyaaminna Yoosa iltino Maariyaami Yesuusa madaarriwa la"anni no.

Jelenleg kiválasztva:

MAARQOOSI 15: QulMax

Kiemelés

Megosztás

Másolás