MAARQOOSI 13

YESUUSI QULLAAWU MINI DIIGAMANNOTA HIMANI

(Mat 24:1-2; Luq 2:5-6)

1Yesuusi Qullaawu Mininni fulita, rosaanosi giddonni mittu, «Rosiisaancho'ya, lai! Tini kinnanna kinchunni minnoonni minna hiitto biiffino!» yii. 2Yesuusi qole, «Tenne jajjabba kinnatenni minnoonni minna la"atto? Tini kinna baala diigantanno; kinchu kinchu aana duunamino gedeenni dihee'ranno» yii.

MOOTICHU DAARA ALBAANNI QARRUNNA DARTU DAANNO

(Mat 24:3-14; Luq 21:7-19)

3Yesuusi Qullaawu Minira albaanni Ejedhete Ilaali aana ofolle hee'reenna Pheexiroosi, Yaiqoobi, Yohaannisinna Indiriyaasi calluwu isiwa shiqqi yite, 4«Kuni coyi ikkannohu mamarooti? Kuni baalunku coyi ikkara malaatu maatiro kulinke» yite xa'mitusi.

5Yesuusi qole, «Ayino so'risiisanno'nekki gede qorophe! 6Lowo manni, ‹Ani Kiristoosiiti› yaanni su'mi'yanni daanno. Lowo mannano so'risiisanno. 7Mule'ne ikko xeertote olu duduwo macciishshitinanni woyite massinoonte. Kuni gatannokki coyeti. Goofimarchu kayinni albillitteteeti. 8Gosa gosate aana, gashshootu gashshootu aana ola kayissanno. Addi addi darga baatto huxidhanno; hudeno ubbanno. Kuni coyi ilate game gede qarraho hanafo ikkanno.

9«Ki'ne kayinni umi'nera qorophe! Roorrootaho sayisse uyitanno'ne. Xaadu mini giddo lichetenni gantanno'ne. Ammana'nere farci'rate, ane daafira yitine gashshaanotenna mootoollate albaanni uurritinanni. 10Kuni baalu ikkara albaanni Danchu Duduwi gosa baalate kulama hasiissanno. 11Amande yoote shiqinshi'nero, ‹Ma coyi'neemmo› yitine balaxxine yaaddinoonte. Hakka woyite uyinanni'ne qaale coyidhe. Hakkuno Qullaawu Ayyaaninniiti ikkinnina, ki'ne coyidhinanniha di"ikkino. 12Roduu rodoosi, annu beettosi reyote sayise aanno. Ooso iltinonsarira diina ikkite reyote sayisse uyitannonsa. 13Ane daafira yitineenna, mannu baalu giwanno'nere ikkitinanni; goofimarchu geeshsha cince kaajjannohu kayinni gatanno.

BAOTE BATTE

(Dan 9:27; 11:31; 12:11; Mat 24:15-28; Luq 21:20-24)

14«Baote batte hee'ra hasiissannokki darga noota affinanni woyite, nabbawannohu wodancho. Hakka woyite Yihudu gobbara noohu ilaallate widira hige xooqo. 15Minu aana noohu minisi giddonni mitore adhara dirre minira eoonke. 16Gate loosu giddo noohu uddanosi adhara wirri yee badhera higoonke. 17Hatte yannara godowinni nooriranna qansi'rannorira mageeshshi shettooti! 18Kuni coyi hawadu giddo ikkannokki gede Magano huuccidhe. 19Hatte yannara kalaqamunni kayise, xaa geeshsha ikke egenninokki qarri daanno. Hakkunni gedensaannino hattoo qarri di"iillanno. 20Mootichu hakko barra haransa hoogoommero, ayino digatanno. Maganu doodhino manni daafira yee hakkonne barra haransanno.

21«Ayino, ‹Kiristoosi kuneeti, konne no› yii'nero, woy kayinni, ‹Kuu"uneeti, koo"o no› yii'nerono ammantinoonte. 22Kaphaano Kiristoosootinna kaphaano himanaano dagganno. Insa dandiitoommero, doorantinore nafa so'risiissara dhaggenna maalale leellishshanno. 23Baalanka coye umo asse kuloommo'nena, xaate jaattine agadhe.

MANCHI BEETTI LAYINKIMEESHSHO DAANNO

(Mat 24:29-31; Luq 21:25-28)

24«Hatte yannara hakko qarri gedensaanni,

arrishsho tunsitanno;

aganuno dixawanno.

25Beeddahe gordunni giggiltanno;

gordu wolqano daaqqanno.

26Hakkunni gedensaanni, mannu Manchi Beetti gomichu giddo hee're, lowo wolqanninna ayirrinyunni daanna la"anno. 27Hatte yannara sokkaasine soyanno; insano shoolenka raga hadhe, gordunna gobba qasidhino geeshshinni Maganu doodhinore gamba assitanno.

YANNA IILLITINOTA KULTANNO BALASE

(Mat 24:32-35; Luq 21:29-33)

28«Balasete masalonni rosse. Sinnase ciirtannonna darose lattanno woyite, badheessu rahinota affinanni. 29Konne coye baala affinanni woyite, yanna shiqqi yite, waalchoho noota affinanni. 30Halaale kuleemmo'ne; kuni baalu ikka geeshsha, tini ilama disa'anno. 31Gordunna baatto sa'anno; qaali'ya kayinni disa"anno» yii.

YESUUSI DAANNO BARRA AFINOHU DINO

(Mat 24:36-44)

32Yesuusi lede, «Hakkonne barranna hattenne saate Maganu Annu ka'a, gordu sokkaasineno ikkito, Beettono ikko, ayino afinohu dino. 33Yanna mamooteetiro diaffinoonnina feeffattine agadhe. 34Kuni coyi, minesi loossannorira loosunnita addi addi annimma ee xeerto gobba ha'rino mancho lawanno. Kuni manchi ha'ri woyite, assitannore kule, qae agarannohuno jaate agaranno gede hajajino. 35Kunnira, minu anni daanno yanna diaffinoonnina, miteekke waarete, woy hashshu mereero, woy baqqinateho, woy lukkichu gananna daannoha ikkannona, jaattine agadhe. 36Hedeweelcho daye, goxxine ba'ine heedhineenna afoonke'ne. 37Ki'ne yeemmonte gede, wole baalanka, ‹Jaatte!› yeemmo» yiinsa.

Jelenleg kiválasztva:

MAARQOOSI 13: QulMax

Kiemelés

Megosztás

Másolás