MAARQOOSI 12

WOYINETE KAASHSHO LOOSSANNORI LAWISHSHA

(Mat 21:33-46; Luq 20:9-19)

1Lede Yesuusi, «Mittu manchi woyinete kaashsho kaasi'ri; gaangeesse huxxa huxxe, woyine huuncinanni baleno ume qixxeessi; woyine agarrannita seeda shaeno kinchunni seekki. Hakkunni gedensaanni gatesi loossannorira guto ee, xeerto gobba ha'ri. 2Woyinete laalo iillituta, beehacho abbannosiha soqqamaanchosi gutanyootunniwa soyi. 3Gutanyootu kayinni soqqamaancho amadde gante ka'e, mulla anganni qolte sokku. 4Layinkimeeshshono kaashshu anni wole soqqamaancho insawa soyi. Gutanyootu hakkonneno gante umo darte, shollishshe sokku. 5Xaano lede soyinoha shitu. Hattono wole lowo manna soyenna, mito gantu; mito shitu. 6Xa, baxannoha mitticho beettosi fushshe soya calla gattino. Kunnira, ‹Beetto'ya ayirrissannoha ikkannona› yee hede, goofimarchoho mitto beettosi soyi. 7Gutanyootu kayinni insa insanaawa, ‹Kuni ragi'raanchohona, amme shinona; baatto ninketa ikkitannona› yite ma'litu. 8Kunnira beettosi amadde shite, woyinete kaashshi giddonni gobba qolte fushshite tuggu.

9«Kunnira, woyinete gati anni ma assa hasiissanno? Annu umisi daanno; gutanyoota shee gudanno; woyinete uullano wolu mannira aanno. 10Anfina,

‹Mine mintannori mishshino kinchi,

mineho gumayicho ikki.

11Konne coye assinohu Mootichaho;

ninkeno illenkenni la'ne maala'linummo›

yinoonni borro dinabbabbinoonni?» yaanni maammaashshunni rosiisa hanafi.

12Ayihudete roorrooti Yesuusi maammaahino maammaashshi kisannonsata affe, iso amaddara yorte manna waajjitino daafira agurte hadhu.

GIWIRE BAATATE DAAFIRA SHIQQINO XA'MO

(Mat 22:15-22; Luq 20:20-26)

13Hakkunni gedensaanni, Yesuusa coyi'ranno coyinni woshshaada hasidhe, Farisootanna Heeroodisi widi manna sokku. 14Insano marte, «Rosiisaancho, ati halaalaancho ikkoottota egenninoommo; manna waajjitenna woleho golante assatto coyi dino. Maganu doogo halaalunni rosiisattoho. Maahoyyena, jawaho Roomu mootera Qeesaarira giwire baata seerahonso seerimalete? Uyinonso agurro?» yite xa'mitusi.

15Yesuusi xagarronsa afinohura, «Coyinni woshshaaddinaera mayira hasidhinanni? Hanni mitte saante haadhine anewa abbe!» yiinsa.

16Insano saante abbiteenna lae, «Tenne saante aana noo misile ayete? Aanaho borreessinoonni su'mino ayeho?» yee xa'minsa.

Insa qolte, «Qeesaariho» yitu.

17Yesuusi qole, «Hakka woyiteetiro, Qeesaariha Qeesaarira, Maganunniha Maganoho uuyye!» yiinsa.

Insano qolino dawarora lowo geeshsha maala'litu.

REYOTENNI KA"ATE DAAFIRA SHIQQINO XA'MO

(Mat 22:23-33; Luq 20:27-40)

18Reyote gedensaanni ka"a noota ammantannokkiri Seduqootu Yesuusiwa dagge, 19«Rosiisaancho, Muse mitto seera borreesse uyinonke; hakkuno, ‹Mittu manchi galte adhe ooso ilikkinni reyiro, rodiisi galtesi ragi're sircho sayisosi› yaannoho. 20Lamalu roduuwi noori giddonni bayiriidihu galte adhe, ooso kayinni ilikkinni reyi. 21Layinki rodiino hatte mancho ragi're, ooso ilikkinni reyi. Sayikkihuno hattonni ikkino. 22Hakko garinni lamalunku sircho sa'ukkinni reyitu. Insa baalunku gedensaanni manchono reyitu. 23Tenne mancho lamalunku roduuwi adhitinona, reyotenni ka'nanni waro, ise hiikkunni galte ikkitanno?» yite xa'mitusi.

24Yesuusi, «Ki'ne sodhinoonnihu, Qullaawa Borro woy Maganu wolqa afa hooga'nenni di"ikkino? 25Reyitinori ka'anno waro, gordu sokkaasine gede ikkitanno ikkinnina, diadhitanno; diadhantanno. 26Reyotenni ka"ate daafira ikkiro kayinni, Maganu Musera citu giira giddo ma yee coyi'rinosiro Muse borro giddo dinabbabbinoonni? Hakkuno, ‹Ani Abirihaami Maganooti; Yisihaaqi Maganooti; Yaiqoobi Maganooti› yaannoho. 27Maganu heedhannori Maganooti ikkinnina, reyitinori Magano di"ikkino. Ki'ne kayinni lowo geeshsha sodhinoonni» yee qolinsa.

HAJAJO BAALA ROORTINO HAJAJO

(Mat 22:34-40; Luq 10:25-28)

28Mittu hasaawansa macciishshanni noohu Muse Seeri rosiisaanchi, Yesuusi dancha dawaro qolinonsata afi. Isino Yesuusa, «Baalanta roortino hajajo hiittenneeti?» yee xa'mi. 29Yesuusi, «Baalanta roortanno hajajo, ‹Israeele macciishshe! Maganinke Kaaliiqi mitto Kaaliiqaati. 30Maganokki Kaaliiqa wo'mu wodanikkinni, wo'ma lubbokkinni, wo'ma hedokkinninna wo'ma wolqakkinni baxi!› yitannote. 31Layinkiti roore hajajo, ‹Manna baala umikki gede assite baxi!› yitannote. Tenne lamenta roortinoti wole hajajo dino» yee dawarisi.

32Seeru rosiisaanchi qole Yesuusa, «Rosiisaancho, ‹Maganu mittoho. Isi ka'a wolu Magani dino› yite coyi'roottoti halaaleho. 33Kunnira, mannu wo'mu wodanisinni, wo'ma hedosinninna wo'ma wolqasinni Magano baxa, hattonni wole mannano umisi gede asse baxa, shilqote kakkalonna wole kakkalono roortannote» yii. 34Yesuusi Seeru rosiisaanchi wodaninni hede qolinosita afe, «Ati Maganu Gashshootiwiinni dixeerti'rootto» yiisi. Hakkunni gedensaanni Yesuusa ugge xa'minosihu dino.

KIRISTOOSI AYE BEETTOOTI

(Mat 22:41-46; Luq 20:41-44)

35Yesuusi Qullaawa Mine rosiisanni, «Muse Seeri rosiisaano, ‹Kiristoosi Daawiti Beettooti› yitannohu mayiraati? 36Daawiti umisi Qullaawu Ayyaani kaa'lannasi,

‹Kaaliiqi Mootichi'yara,

«Baarigaarakki lekkakkira woroonni qolammo geeshsha,

qiniite'yaanni ofolli!» yiinosi›

yii. 37Daawiti umisi, ‹Mooticha› yee woshshannosi. Kiristoosi, hiitto ikke isi beetto ikkannoyya?» yee xa'mi.

Lowo manni Yesuusi yaannore hagiirrunni macciishshi.

YESUUSI MUSE SEERI ROSIISAANO QOROPHISIISI

(Mat 23:1-36; Luq 20:45-47)

38Yesuusi rosiisanni, «Seeda uddano uddidhe, ka'anna kawa ha'rantanni dikkote ayirrinyunni keere haa'nansara hasidhannore, Muse Seeri rosiisaano agadhe! 39Insa, xaadu mine danchu barcimira ofoltaranna jilu mine ayirrinyu darga afidhara qolchantanno. 40Gunnootu mine mulqitanno; mannaho leellantara yite, huuccatto seedissanno. Kunni daafira insara roore qoricha uyinanni» yii.

GUNNITTE MANCHO UYITINO FUSHSHAATE

(Luq 21:1-4)

41Yesuusi mannu Maganu loosira woxe gamba assanno dhaawara albaanni ofolle hee'reenna, mannu woxe tuganna lai. Lowo dureeyye lowo woxe tuggu. 42Mitticho buxicho gunnitte dagge, lame taamuna uyitu; hatto yaano mitte saante yaate. 43Yesuusi rosaanosi woshshe, «Halaale yeemmo'nena, woxe tugi manni baalunkunni aleenni, tini buxicho gunnitte roorsite uyitino. 44Wolu manni baalu, ikke gatinonsahu giddonni uyino. Ise kayinni buxxe heedhenni, mittoreno gatisidhukkinni noosere raabbe uyitino» yiinsa.

Jelenleg kiválasztva:

MAARQOOSI 12: QulMax

Kiemelés

Megosztás

Másolás