LUQAASI 11

YESUUSI ROSAANOSIRA HUUCCATTO ROSIISI

(Mat 6:9-15; 7:7-11)

1Yesuusi mitte hige mitto darga huuccatto assi'ri. Huuccatto gudita rosaanote giddonni mittichu, «Mooticha, Yohaannisi rosaanosira rosiisinte gede, ninkerano huuccatto rosiisinke» yii. 2Yesuusi qole, huuccidhinanni woyite,

« ‹Annanke gordoho hee'rattohu,

su'mikki qullaawa ikko.

Gashshootikki dayo;

3techo barrita sagalenke uyinke.

4Wolootu sao agurreemmonte gede,

ninke saono agurinke;

bushu coyiwiinni gatisinke ikkinnina,

jifammeemmo gede assitootinke›

yitine huuccidhe» yiinsa.

5Rosaanosira lede, «Ki'ne giddonni mittu hashshu mereero jaalisi minira mare, ‹Jaala'ya ballo sase tima liqiissie. 6Mittu jaali'ya xeertote gobbanni kae dayenna itisi'reemmore hoogoommo› yaanno. 7Jaalisi qole, ‹Eeggatena qarrissootie; minu cufamino; ooso'yano daallasaho ledo'ya goxxe no. Kunnira kae sagale aammohera didandeemmo› yaannoni? 8Jaaloomisi daafira yee kae aa hoogiro nafa, qarrisinosi daafira kae hasi'rannore baala aannosi.

9«Anino, ‹Huuccidhe, uyinanni'nena. Hasidhe, afidhinannina. Waalcho ganganne fannanni'nena› yeemmo'ne. 10Huucci'rannohu baalu adhanno. Hasi'rannohuno afi'ranno. Waalcho ganganannohura fannannisi. 11Ki'ne giddo anna ikke hee're, beettisi [tima huucci'reenna kincho aannohu nooni?]#11:11 Qoqqowu giddo noohu mite mite keeshshitinotera angatenni borreessinoonni borro giddo dino. Qulxu'me huucci'reenna hamashsho aannosini? 12Woy quuphe huucci'reenna idda aannosini? 13Ki'ne bushuulle ikkitine heedhinenni ooso'nera dancha coye aa egentinoonniha ikkiro, gordoho noohu Anni'ne huuccidhannosirira hakkiinni roorse Qullaawa Ayyaana hiitto aa hooganno?» yiinsa.

YESUUSINNA BIELIZEBUULI

(Mat 12:22-30; Maq 3:20-27)

14Yesuusi mittu manchi giddonni danqicha durriisa fushshi. Durriisu fulita danqe keeshshino manchi coyi'ra hanafi. Mannuno konne coye lae dhaggeeffati. 15Gamu manni kayinni, «Durriisa fushshinohu Durriisu roorrichi Bielizebuuli wolqanniiti» yitu. 16Wolootu qolte fonqoltasira hedde gordunni mitto malaate aannonsa gede xa'mitusi. 17Yesuusino hedonsa afino daafira, «Mimmitu ledo gosooma kalaqi'ranno gashshooti ba"anno. Babbadamanno ayiddino billaalle ba"anno. 18Sheexaanu gashshootino babbaxxannoha ikkiro, hiitto ikke hee'ra dandaanno? Ki'ne, ‹Isi durriisa fushshannohu Bielizebuuli wolqanniiti› yitinanni. 19Ani durriisa Bielizebuuli su'minni fushsheemmoha ikkiro, ki'ne hoode hadhannori hiitto assite fushshitannoyya? Kunnira ki'ne, hoode'ne hadhannori yoo yitanno'ne. 20Ani durriisa Maganu wolqanni fushsheemmoha ikkiro, kuni coyi Maganu Gashshooti ki'newa iillinota leellishanno.

21«Wolqaataamu manchi bagadosi baala gamba assi're qaesi agadhiro jajjisi dieddaramanno. 22Iso roorino jawaati daye gawajje qeelisiro kayinni, hexxinoha bagadosi adhanno. Qeele adhinoreno woleho beehanno. 23Ane ledoha ikkinokkihu baalu ane giwanno. Ane ledo xaadannokkihu billaallisi'ranno.

BATTETE AYYAANI GALAGALE MAYIRA HIGANNO

(Mat 12:43-45)

24«Battete ayyaani mannuwiinni fule fooliishshi'rannowa hasi'ranni, moola gobba ha'ranno; fooliishshi'rannowa hoogiro, ‹Galagale fulummo minira ha'reemmo› yaanno. 25Galagale daye mine feyame biifinoha afanno. 26Hakkunni gedensaanni ha're lamala isinni roore bushuulle durriissa adhe daanno. Insano dagge hakko heedhanno; manchohono gedensiidi heeshsho albitenni roore busha ikkitanno» yii.

HALAALAANCHO MAASSO

27Yesuusi konne coye coyi'rita, mannu giddonni mitte mancho qoonqose naggi assite, «Ate ilte qansidhu ama maassantinote» yitu. 28Yesuusi qole, «Maassantinori Maganu qaale macciishshite hajajantannoreeti» yii.

MAALALE LA"ATE HASI'RANNO MANNA

(Mat 12:38-42; Maq 8:12)

29Lowo manni gamba yeenna Yesuusi, «Tini busha ilamaati. Maalale leellinshansara hasidhanno; Yoonaasi maalale agurranna wole diuyinanninsa. 30Himanaanchu Yoonaasi Nennewe mannira malaate ikkinte gede, Manchi Beettino tenne yanna ilamara malaate ikkanno.#Yon 3:4 lai. 31Yoote barra Wodiidi gobba Mootitte tenne ilama ledo ka'e insara yoo yitanno. Ise Selemooni hayyo macciishshitara gobbate qaccenni ka'e daggino. Selemooni rooru kayinni kawiicho no. 32Yoote barra Nennewe gosa tenne ilama ledo ka'e insara yoo yitanno. Nennewe gosa Yoonaasi sokka macciishshitu woyite cubbonsa aagintaabbe higgino. Yoonaasi rooru kayinni kawiicho no» yii.

MANNIMMATE CAABBICHO

(Mat 5:15; 6:22-23)

33Yesuusi lede, «Caabbicho xawisihu gedensaanni go'lino darga woy gimboolaho woroonni worannohu dino. Mannaho eanno woyite xawanno gede caabbicho worranni uduunnichi aana woranno. 34Illekki mannimmakki caabbichooti. Illekki fayyo ikkituro, mannimmakki baala xabbanno. Illekki fayya hoogguro kayinni, mannimmakki baala tunsitanno. 35Giddokki noo xawaabbi tunsannokki gede agadhi. 36Kunnira, mittu dargino tunsikkinni, bisikki gudisame xawaabba ikkiro, caabbichu xawannohe garinni manninatikki baalu wara'a yee xawanno» yaanni rosiisi.

YESUUSI FARISOOTANNA MUSE SEERI ROSIISAANO MISHI

(Mat 23:1-36; Maq 12:38-40; Luq 20:45-47)

37Yesuusi konne coye coyi'ranni hee'reenna mittu Farisichi ledosi sagale itanno gede koyisisi. Isino mare sagale itara ofolli. 38Farisichu Yesuusi itara albaanni anga hayishshi'rinokkita afe, dhaggeeffati. 39Kunnira Mootichu, «Ki'ne Farisootu finiinchohonna xilteho gobbayido seekkitinanni; giddo'ne kayinni xagarronna bunshe wo'mitino. 40Ki'ne gowwootu, gobbayido kalaqinohu giddoyidono dikalaqino? 41Finiinchi'nenna xilti'ne giddo noore buxanete uuyye; hakkunni gedensaanni wo'munku coyi fayyaaleessa ikkanno'ne.

42«Ki'ne Farisootaho aanne'e! Afuduudu, sunkurtunna shaanu giddonni tonnunni mitte anga uyitinanni; wole widoonni kayinni Maganu baxillenna halaale agurtinoonni. Hakkoreno agurtinikkinni konne coyeno agara hasiissanno'ne. 43Ki'ne Farisootaho aanne'e! Xaadu mine ayirrado darga ofolla baxxinanni. Dikkoteno keere haa'na'nera hasidhinanni. 44Mannu afikkinni aanaanni ha'rannota malaatu nookki waamma labbinanni daafira, ki'nera aanne'e» yiinsa.

45Seeru rosiisaano giddonni mittu Yesuusa, «Rosiisaancho, togo yaatto woyite ninkeno xontanniwe nootto» yii.

46Yesuusi qole, «Ki'ne Seeru rosiisaanora aanne'e! Mannaho dandiinannikki duha duhisiissinanni; ki'ne kayinni qubbichunni nafa dikissinanni. 47Himanaanote waammara madaada gantinannirira ki'nera aanne'e; insa shitinorino akaakka'neeti. 48Akaakka'ne shitino himanaano waamma seekka'nera, ki'neno hakkunni bushu loosinsara ledoreetinna naqaashshete. 49Kunnira Maganu hayyo, ‹Insawa himanaanonna soqqamaasine soyemmo. Insa giddonnino gama shitanno; gama gadadissanno.› 50Kalqe kalaqantuhunni kayise himanaanote mundee du'nantinohura, 51Abeelinni kayisse kakkalote darginna Qullaawu Mini mereero shinihu Zakkaariyaasi geeshsha du'nantino mundeera, tini ilama xa'mantanno. 52Ki'ne Seeru rosiisaanora aanne'e! Ki'ne egennote waalcho fannanniricho adhitine ho'litinoonni. Ki'neno die'inoonni; e'annoreno hooltinoonni» yii.

53Yesuusi hakkiinni kae ha'rita Farisootunna Seeru rosiisaano iso qussitanni baca coye coyi'ranno gede assitusi; 54hatto assitinohuno, coyinni sarraaqqe amaddasira hasidheeti.

Jelenleg kiválasztva:

LUQAASI 11: QulMax

Kiemelés

Megosztás

Másolás