Panagnaan 12
12
Tuhan nohoꞌ si Ibram lakka man paglahat na
1Pag-anu, lay na baw magpalman Tuhan ni si Ibram, yuk na, “Mbanan nu na lahat nu ka ga kampung nu ka mimon jama lumaꞌ imuwa mmaꞌ nu. Pilay na ko pa lahat ma song pakitahan ku kau. 2Buwanan ta sa ko panubuꞌ paeka. Siga panubuꞌ nu ina mintu dari bangsa balkanan. Supaatan ta sa ko maka patanyag ku du awon nu. Kau na sina mintu poonan supaat ni jama. 3Sagannap ma mitsala kau pa kaayaran, supaatan ku du sina. Sugaꞌ soysoy baw ina numpaan kau, sumpaan ku du. Bbos-bbos kau ina poonan man mimon kabangsa-bangsahan taꞌ babaw junyaꞌ koleꞌ supaat.”
4-5Dari siꞌ, lay na jaꞌ si Ibram ngasip ni panohoan Tuhan sampay lay na ya palakka man Haran. Jaman looy siꞌ, pitumpuꞌ-liman taun na umu si Ibram. Pag lakka na, lay boo na nda na si Saray ka kamanakan na si Lut sampay mimon tindog na ka altaꞌ na ma bay tausaha na halloman da ndooy ni Haran. Pag-anu siꞌ, lay na sila takka pa Kanan. 6Ndooy siꞌ, lay sila patiluꞌ pa daira inawnan Sekem. Takka ndooy, lay sila patagong ni bihing kayu mehe ma tanyag njawom tanaꞌ disu lalla inawnan si More. Sampay ndooy na man da bay matangge siga lumaꞌ luna da. Jaman looy siꞌ, lahat looy bay pinaglahatan meꞌ siga bangsa panubuꞌ si Kanan.
7Pag-anu siꞌ, tinammuhan na baw si Ibram meꞌ Tuhan, yuk na, “Ituu na situ lahat ma pamuwan ku ga panubuꞌ nu bbos-bbos.” Pag-anu, lay nambak si Ibram batu binuwat pangulbanan man na ngulban pa Tuhan batan ndooy man na bay tinammuhan meꞌ Tuhan.
8Paddus mandooy, lay na baw ga si Ibram pilay pa kabuntuꞌ-buntuan huwin pa mataallaw ni sallangan duwa kawum inawnan Betel ka Eyay. Ndooy siꞌ, lay du si Ibram nambak batu binuwat pangulbanan, boꞌ na numba Tuhan.
Si Ibram halin pa Ejip
9Na hallom maka hallom na, lay na baw ga si Ibram halin pabalik song pilay pa Negeb huwin pa sātan. 10Sasang da ndooy ni Negeb, tuwaꞌ gotom na baw ni sikaliput Kanan sampay malasahi na jama. Dari lay na ga si Ibram pawus song pilay pa Ejip huwin pa sātan lagi. Maksud da pahantiꞌ na doꞌ ndooy halloman yaꞌ gi paddus gotom. 11Tapit jaꞌ siꞌ sila pa Ejip, yuk si Ibram ni nda na, “Kau ina Saray, tud mahap ko danda. 12Pag ina ko mintu takita meꞌ bangsa Ejip, mastiꞌ inagaw jaꞌ ko sampay man ku pinapatoy bong mintu katoonan da na aku lla nu. 13Dari pin ku yaꞌ jaꞌ pinapatoy meꞌ da, baan nu sila magdanganakan kita. Meꞌ looy ilay mintu, gam pin pinag-aratan gi ku kalnaꞌ kau.”
14Na takka jaꞌ siꞌ sila ni Ejip, pag ndaꞌ jama ndooy, tud lingkatan banahan si Saray. 15Pag takita leꞌ baanan kunsihal sultan bangsa Ejip, lay du baan da sultan luu danda bahau jaꞌ takka tud lingkatan. Pag-anu siꞌ, ilooy ma lay du si Saray binoo pilay pa astanaꞌ na.
16Dari siꞌ, tud bay pinahāp si Ibram meꞌ sultan kalnaꞌ si Saray. Boꞌ lay gi ya binuwanan ga baanan bili-bili, kambing, sapiꞌ, kuraꞌ, untaꞌ sampay ata, danda-lalla. 17Sugaꞌ labba man sultan sampay na mimon jama astanaꞌ na, lay bay pinatakkahan meꞌ Tuhan saki basag man sabapan si Saray.
18Na tabista jaꞌ siꞌ meꞌ sultan man sabapan si Saray kon da saki, ilooy ma lay tawag na si Ibram. Luu jaꞌ siꞌ, tilaw na, “Ongoy ku bay bbuwat nu meꞌ looy? Ongoy ndang yaꞌ ku bay baan nu nda nu hati ya? 19Baꞌ-bāꞌ nu danganakan nu ya. Bong siꞌ ndang bay katoonan ku nda nu hati ya, yaꞌ du ku bay nohoꞌ iya binoo pa lumaꞌ adak na ga kinawinan! Alu, kaddoun na nda nu boꞌ bi lakka na.” 20Dari siꞌ, lay na sultan magpanohoꞌ ni siga sundalu na nohoꞌ malakka ga si Ibram ka nda na man paglahat da ddas ka mimon altaꞌ da.
Jelenleg kiválasztva:
Panagnaan 12: sjm
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2021, Wycliffe Bible Translators, Inc. All rights reserved.
