Matiyə̈ 15
15
Kə̂ mbo rə gundə̂sə̂ ndïɛ̈ ndə̂ araâta
(Mar 7.1-13)
1 Afarizïɛ̈n la a-earə̂ kə̂ nyisə̂ ndïɛ̈ tô bhâ Jerûzalêmo kə̈ nə̂ ndə̂kə̂ wun Jezü, andjë yû tchë päkëdə̂: 2«Bëte giamâ kä ndə̂ adjisîpili ndə̂ zə̈ kôsə̂ ndïɛ̈ ndə̂ araâta, ânyë kə̈ djûtuabô könô andjê djûtu dokʉ̈tchê ânyë kə̂ zɨ rə?» 3Jezü tô rə̂ ndə̂nə̈ sə̈ andjê päkëdə̂: «Â nyënyê, bëte giamâ kä ndə̂ nyë kôsə̂ ndïɛ̈ ndə̂ Ndjapä ndə̂kə̂ mbo rə lə̂ köbosə̂ ndïɛ̈ ndə̂ araâta nyê? 4Bëte Ndjapä tö rə̂ päkëdə̂: ‹Amö lusə̂ bha la anyï zə̈!› Tche kâ tô rə̂ sə̈ andjê päkëdə̂: ‹Akrə ndə̂ tche tô ngbongbo pö tə̂ bha la anyï nə̈, äwäpä a won tchë-ê.› 5Praâbalë andə̂ nye nə̈, nyë tö rə̂ päkëdə̂: Akrə ndə̂ tchê toadje rə̂ sə̈ bha nə̈ âdəndjë anyï nə̈ päkëdə̂: ‹Më nyï âme ndə̂kə̂ za rə sə̈ mö, praâbalë rə nə̈ lâme wâ nə̂ ngbî bëte Ndjapä.› 6Tchâme, a zâbo tchë la gbôgbô ndə̂kə̂ pa tche lusə̂ bha nə̈-a. Ädə̈ käko ânyë nyë gbôtə̂ pö ma Ndjapä ndə̂kə̂ mbo rə ndə̂ araâta nyê! 7Nyënyê ndə̂ pö ma nyê wâ ngbî tə̂kə̂ mbo rə ndə̂ nyê âtə, Ezayï tö lëge ndə̂ma Ndjapä pâ nyê alême päkëdə̂:
8‹Azü âtə lüsə̂ mê kütû lə̂ ma andjê,
praâbalë su andjê wätə̂ mê ngrɨ̈.
9Kə̂ voga mê ndə̂ andjë voga mê lâme, äwä ämbämbänə̈,
bëte rə ndə̂ andjë nyisə̂ nə̈
wätə̂ andïɛ̈ ndə̂ azü mbô rə̂#15.9 Nyë dɨ̈ Eza 29.13, ndə̂ âwâ lə̂ bəndɨ Mbëtï Ndjapä la ma gerêke..›»
Arə ndə̂ âmbo rə̂ pä azü wa la kâkpö
10La tchêngbâ nə̈ Jezü ê kpûlû azü nə̈, kə̈ tô rə̂ sə̈ andjê päkëdə̂: «Nyë djë mê, kə̂ dje tchə̂lə̂ pö âtə djîrə̂ ânyë: 11Âdə̂âbo rə ndə̂ âli atə̂lə̂ akrə kä ndə̂ âmbo rə̂ pä tchë wa la kâkpö-a. Praâbalë rə ndə̂ âwutu lə̂ ma akrə kä ndə̂ âmbo rə̂ pä tche wa la kâkpö.»
12Käko, adjisîpili nə̂ ndola Jezü kə̈ tô rə̂ sə̈ tchë päkëdə̂: «Mo wûn-âdje sə̂nə̈ nə̂ pä pö ndə̂ mo tô rə̂ lâme, äkʉ̈ afarizïɛ̈n tə̂ gbölösə̂nə̈?» 13Jezü tô rə̂ ndə̂nə̈ sə̈ andjê päkëdə̂: «Ayö gbɛ̂ ndə̂ Bha mê bhâ lafô lûâbô rə̂ lû-î, a âsuadje rə̂ gbɛ̂ ëbêche. 14Nyë gbötə̂ andjê, a-earə̂ föla kä ndə̂ ânyisə̂ köbo sə̈ angâ andjê a-earə̂ föla. Âdə ngâ earə̂ föla ânyisə̂ köbo sə̈ ngâ yê earə̂ föla, andjê bïchuû gbɛ̂ teadje atə̂lə̂ kudû!» 15Pîêre zâ pö kə̈ tô rə̂ sə̈ Jezü päkëdə̂: «Amö nyisə̂ dju ndoka lâme sə̈ ârâ.» 16Jezü tô rə̂ päkëdə̂: «Nyënyê ndjë gbɛ̂ nyë wûn-âbo sə̂ rə? 17Nyë wûn-âbo sə̂nə̈ pä rə gbɛ̂ ndə̂ âli âtə̂lə̂ ma akrə, ärö atə̂lə̂ akrə dokʉ̈tchê ânyë kə̂ e âtə̂lə̂ güsü? 18Praâbalë rə ndə̂ âwutu lə̂ ma akrə tö bhâlə̂ yê, ârə̂ kä ndə̂ âmbo rə̂ pä tche wa la kâkpö. 19Arə batə̂ ngbongbo kə̂ rɨ tchə̂lə̂, kə̂ won akrə, kə̂ pu ɛ̈chë âdəndjë köchë ndə̂ ngâ akrə, kə̂ pu aɛ̈chë âdəndjë aköchë katchôgbɛ̂, kə̂ zɨ ngbä, kə̂ mo yepa lə̂ ngbanga lakə̂ dro tchô; ätö gbɛ̂ lə̂ su akrə ânyë kə̂ wutu. 20Arə lâme kä ndə̂ âmbo rə̂ pä azü wa la kâkpö. Praâbalë kə̂ zɨ rə la kâkpö könô, ndə̂ âwâbô wâ gundə̂sə̂ ndïɛ̈ ndə̂ araâta lâme, mbôâbo rə̂ pä azü wa la kâkpö-a.»
Ngâ ɛ̈chë ndə̂ tche wâbô wâtə̂ juîfu zä su yê sə̈ Jezü
21Jezü âlafô tchâme, kə̈ ê âtə̂lə̂ agö ndə̂ Tîre la andə̂ Sidön. 22Ngâ ɛ̈chë ndə̂ tche sə̂ bhâ Kanän nə̂ kə̈ sə̂ lakə̂ ta wârə̂ lakə̂ to rə̂ päkëdə̂: «Gbölö Gbïɛ̈, Modô ndə̂ Davîdi! Amö wun nyonyo mê! Ɛ̈wünrə ndə̂ mê kä la ngbongbo tchozö lə̂ yê, tche mbö tchë tə̂ gêgêe nə̈.» 23Jezü tôâbo ngâ pö balë ndə̂nə̈ sə̈ tchë-a. Adjisîpili ndə̂ yê nə̂ ndola tchë kə̈ yû tchë päkëdə̂: «Amö gro tchë, bëte tche sə̈ lakə̂ ta wârə̂ lakə̂ za tchêngbâ azə̂.» 24Jezü tô rə̂ ndə̂nə̈ sə̈ andjê päkëdə̂: «Ndjapä wän mê kütû sə̈ azü ndə̂ Isarayële ndə̂ andjë wâ batə̂ aɛ̈bro-ngbaga ndə̂ andjë yû.» 25Praâbalë ɛ̈chë nə̈ nə̂, kə̈ gʉ̂te tchâtchâ Jezü, kə̈ tô rə̂ sə̈ tchë päkëdə̂: «Gbölö Gbïɛ̈, za könô sə̈ mê.» 26Jezü tô rə̂ ndə̂nə̈ sə̈ tchë päkëdə̂: «Âwâbo la köbo nə̈ ndə̂kə̂ za kɨ̈zɨ̂ ndə̂ abechë kə̂ yi rə̂ sə̈ akûtchïɛ̈ ɛ̈vrô-a.» 27Ɛ̈chë nə̈ kä tô rə̂ sə̈ tchë päkëdə̂: «Lëge pö kä, Gbölö Gbïɛ̈, akûtchïɛ̈ ɛ̈vrô zɨ̈ ndjë kʉzro kɨ̈zɨ̂ ndə̂ âtu tchâtchâ ɛ̈ gbalâka kɨ̈zɨ̂ ndə̂ a-earə̂ andjê.» 28Jezü tô rə̂ ndə̂nə̈ sə̈ tchë päkëdə̂: «Ɛ̈chë, kə̂ za su zə̈ sə̈ Ndjapä wätə̂ gbölö nə̈, äwäpä mo gbo rə ndə̂ mo nyîndə̂ nə̈ lâme.» Posə̂nə̈, ɛ̈wünrə ndə̂ yê nə̈ tchâ-ê.
Jezü tchä angbängbä azü la tə̂kömbô
29Jezü âlafô tchâme, kə̈ ê atə̂ maga gbölö kpakpa ngû ndə̂ Galilë. Tche kênga atə̂lə̂ küma aga kə̈ sə̂ ëbêche. 30Kpûlû azü nə̂ pu tchë. Andjë kʉ̈ azü ndə̂ da andjê ndɨ̂, la a-earə̂ föla, la azü ndə̂ ngâ tchâme-tə̂ andjê ndɨ̂, la amangbɨ̈lə̈ la angâ a-earə̂ tə̂kömbô tə̂ gbölösə̂nə̈, kə̈ nə̂ la andjê sə̈ tchë. Andjë gbôtə̂ andjê ëtchâtchâ yê, tche tchâ andjê. 31Tchə̂lə̂ küma andjê gbɛ̂ djîngɨli lakə̂ wun a-earə̂ mangbɨ̈lə̈ ndə̂ andjë pô, la azü ndə̂ ngâ tchâme-tə̂ andjê ndɨ̂, âdâka-ê. Azü ndə̂ da andjê ndɨ̂, andjë sə̂ lakə̂ nə, a-earə̂ föla wûn tchô ngrôô. Käko andjë sə̂ lakə̂ voga Ndjapä ndə̂ Isarayële.
Jezü kʉ̈ kɨ̈zɨ̂ sə̈ aköchë sâke voanə̈
(Mar 8.1-10)
32Jezü ê adjisîpili ndə̂ yê kə̈ tô rə̂ sə̈ andjê päkëdə̂: «Nyonyo kpûlû azü âtə mbö mê. Bëte lə̂ lö vötaâ ndə̂ andjë sə̂ ndrotə̂ mê, andjë wâbo la kɨ̈zɨ̂ ndə̂kə̂ zɨ rə̂-a. Më nyîâbo ndə̂kə̂ gbotə̂ andjê pä andjë gu la gʉ ânyë kə̂ yorotoabô yôroto gbɛ̂ la gʉ lə̂ köbo-ê.» 33Adjisîpili yû tchë päkëdə̂: «Ârâ âgbo kɨ̈zɨ̂ bhâ tchêbâ lə̂ gbâkü tchô âtə ânyë kpûlû azü nə̈ zɨ rə̂ âle andjê?» 34Jezü yû andjê päkëdə̂: «Nyë wä la mâpa atöko?» Andjë tô rə̂ ndə̂nə̈ sə̈ tchë päkëdə̂: «Mïndûu manə̈ bïchuû la angâ akanyïɛ̈ agiangû.» 35Jezü zâma sə̈ kpûlû azü nə̈ ndə̂kə̂ sə bêche. 36Tche kʉ̂ mâpa mïndûu manə̈ bïchuû la agiangû lâme, kə̈ zâ ayîabâ sə̈ Ndjapä, kə̈ tchô tchə̂lə̂ nə̈, kə̈ kʉ̂ rə̂ sə̈ adjisîpili ânyë andjë krʉ̂ tchə̂lə̂ nə̈ tə̂ kpûlû azü nə̈ gbɛ̂. 37Akrə balë balë zɨ̂ rə̂ âlê tchë. La tchêngbâ nə̈ adjisîpili nə̈ pâla adɨ̂ andöma nə̈ âsɨ̂ gbasa mïndûu manə̈ bïchuû. 38Aköchë gbɛ̂ ndə̂ andjë zɨ̂ kɨ̈zɨ̂ lâme wä sâke voanə̈ (4 000). A dɨ̂âbo aɛ̈chë la abechë-a. 39La tchêngbâ nə̈ Jezü grô kpûlû azü nə̈, kə̈ â lə̂ külû, kə̈ ê âtə̂lə̂ gö ndə̂ Magadän.
Jelenleg kiválasztva:
Matiyə̈ 15: lnl
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Wycliffe Bible Translators, Inc.
