Matiyə̈ 13

Ndoka pâ ndjî rəgʉ

(Mar 4.1-9; Luk 8.4-8)

1Tə̂ lo nə̈ lâme, Jezü wûtu lə̂ nda nə̈ kə̈ ê kə̈ sə̂ ë maga gbölö kpakpa ngû. 2Gbölö kpûlû azü tâkpa ndə̂ yê. Käko tche â lə̂ ngâ külû kə̈ sə̂ bêche. Kpûlû azü nə̈ krʉ̂ tə̂ maga ngû nə̈. 3Tche tô pö sə̈ andjê tə̂ gbölösə̂nə̈ la ndoka, kə̈ tô rə̂ päkëdə̂: «Ngâ köchë wütu, kə̈ ê ndə̂kə̂ gɨ ndjî rəgʉ ndə̂ yê. 4Ndə̂ tche âsə̈ gɨ ndjî rəgʉ nə̈ lə̂ kɨ̈ndɨ̈ ndə̂ yê, angânə̈ nə̈ tû bêche ndroma köbo. Anyïɛ̈nə̈ nə̂ kə̈ dê rə̂ gbɛ̂. 5Ngânə̈ tû pâ cho ndə̂ âwâ la täme, cho wâbo sə̂ tchô nə̈ tə̂ gbölösə̂nə̈-a. Ndjî rəgʉ nə̈ kʉ̂ kə̈ kpô wândâ wändä bëte cho nə̈ lîâbo-a. 6Ndə̂ lo tâ tə̂ gbölösə̂nə̈, ndjî rəgʉ nə̈ hrô-ê, bëte chëchë nə̈ lîabo atə̂lə̂ cho-a. 7Angânə̈ tû lə̂ achi, kə̈ kpô la chi nə̈ hroa balë, chi nə̈ vû pânə̈. 8Angânə̈ tû lə̂ tchôtchô cho, rəgʉ nə̈ kpô kə̈ lê. Ngânə̈ balë lê ngbangbo balë, angânə̈ lê tə̂ azü vötaâ, angânə̈ lê tə̂ akrə gbɛ̂ la tchêpâ nə̈ lə̂ könô gbɛ̂. 9Akrə ndə̂ tche wâ la tü ndə̂kə̂ dje pö, äwäpä tche dje pö âtə.»

Jezü tö pö la ndoka bëte giamâ?

(Mar 4.10-12; Luk 10.9-10)

10 Adjisîpili nə̂ ndola Jezü kə̈ yû tchë päkëdə̂: «Bëte giamâ kä ndə̂ mo tô pö sə̈ andjê la ndoka?» 11Tche tô rə̂ ndə̂nə̈ sə̈ andjê päkëdə̂: «Andə̂ nye nə̈, Ndjapä zä rə̂ sə̈ nyê ndə̂kə̂ wunsə̂ alëge pö ndə̂ Gbölö gö-gbïɛ̈ ndə̂ tchêlafô ndə̂ âwâ wü. Andə̂ andjë nə̈, Ndjapä zâbo rə̂ sə̈ andjê ndə̂kə̂ wunsə̂ nə̈-a. 12Bëte akrə ndə̂ tche wâ la rə, a âkʉadje ngânə̈ ëpânə̈ sə̈ tchë, ânyë tche wa la rə tə̂ gbölösə̂nə̈; praâbalë akrə ndə̂ tche wâbô wâ la rə-ê, a âji ndjë kpîɛ̂kpîɛ̂ nə̈ ndə̂ tche wâ la rə̂#13.12 Nyë dɨ̈ 25.29.. 13Djusə̂nə̈ kä ndə̂ mê to pö la ndoka sə̈ andjê, bëte andjë kä lakə̂ wun tchô, kə̈ wûn-âbo rə-a. Andjë kä lakə̂ dje pö, praâbalë andjë djêâbo pö-a, kə̈ djêâbo ndjë tchə̂lə̂ pö nə̈-a. 14Bëte rə̂ kä ndə̂ pö ma Ndjapä ndə̂ Ezayï tô rə̂ pâ andjê alême mbô gundə̂sə̂ nə̈. Tche tö rə̂ päkëdə̂:

‹Nyê djeadje pö la köbo nə̈,

praâbalë nyê djeabô tchə̂lə̂ nə̈ tee-a,

nyê wun-adje tchô djîrə̂,

praâbalë nyê wun-abô ngâ rə balë tee-a.

15Bëte su azü âtə kpö,

andjë bë tü andjê, andjë gʉ̈ä la andjê

ndə̂kə̂ pa andjë wun-abô tchô wûn-î, ânyë kə̂ djeabô pö djê-ê.

Bëte rə̂ kä ndə̂ andjë djêâbô tchə̂lə̂ apö djê,

ânyë kə̈ gbôâbô gbôtə̂ bəndɨ kə̂ mbo rə ndə̂ andjê-ê,

käko ânyë mê tcha andjê#13.15 Nyë dɨ̈ Eza 6.9-10, ndə̂ âwâ lə̂ bəndɨ Mbëtï Ndjapä la ma gerêke.!›

16«Andə̂ nye nə̈, nyë kä la mômô bëte la nyê kä lakə̂ wun tchô, ânyë tü nyê kä lakə̂ dje pö! 17Ɛn-ɛn, tə̂ lëge nə̈ më tö rə̂ sə̈ nyê päkëdə̂: Angbängbä a-earə̂ ndə̂ma Ndjapä dokʉ̈tchê la adjîrə̂ azü nyïndə̂ kə̂ wun rə ndə̂ nyë wûn rə̂ âtə, praâbalë andjë wûn-âbo rə̂-a. Andjë nyïndə̂ kə̂ dje pö ndə̂ nyë djê rə̂ âtə, praâbalë andjë djêâbo rə̂-a.»

Jezü nyïsə̂ dju ndoka pâ ndjî rəgʉ

(Mar 4.13-20; Luk 8.11-15)

18«Nyë djë tchə̂lə̂ ndoka ndə̂ köchë ndə̂ tche ê ndə̂kə̂ gɨ ndjî rəgʉ ndə̂ yê âtə. 19Azü ndə̂ andjë dje pö ndə̂ Gbölö gö-gbïɛ̈ ndə̂ tchêlafô ânyë kə̂ djeabô tchə̂lə̂ nə̈ djê, andjë wä batə̂ tchô ndroma köbo ndə̂ ndjî rəgʉ tu tâ. Ngbongbo akrə nə̂, ânyë kə̈ krʉ̂a rə ndə̂ a lû rə̂ lə̂ su azü nə̈. 20Angâ azü wä batə̂ cho ndə̂ âwâ la täme ânyë ndjî rəgʉ nə̈ tû tâ. Andjë djë pö nə̈, kə̈ gâmba rə̂ la mômô, 21praâbalë pö Ndjapä nə̈ mbôâbo chëchë yê bhâtə̂ su andjê-a. Andjë djë rə̂ la su andjê ndə̂ ngâ kpîɛ̂kpîɛ̂ lö, ngâ gbôgbô rə âsə̈ mbo tə̂ andjê, âdəndjë rə̂ ndə̂ a sə̂ lakə̂ mbo andjê la yûkü bëte pö nə̈, djîrə̂, andjë gbotə̂ köbo nə̈-ê. 22Angâ azü wä batə̂ cho ndə̂ âwâ lə̂ chi, ânyë ndjî rəgʉ tû tâ. Andjë djë pö nə̈, praâbalë kə̂ dɨ su andjê pâ rə tchêbêche, la gʉ kə̂ gbo arə tchêbêche rôpâ pö Ndjapä nə̈ ânyë âlêâbô lê-ê. 23Angâ azü wä batə̂ tchôtchô cho ndə̂ ndjî rəgʉ tû tâ. Andjë djë pö nə̈, kə̈ djê tchə̂lə̂ nə̈, andjë lë: Angânə̈ lë ngbangbo balë, angânə̈ lë tə̂ azü vötaâ, angânə̈ lë tə̂ akrə gbɛ̂ la lə̂ könô gbɛ̂.»

Ndoka pâ ngbongbo bë

24Jezü kä tô ngâ ndoka sə̈ andjê päkëdə̂: «Gbölö gö-gbïɛ̈ ndə̂ tchêlafô wä batə̂ rə ndə̂ mê nyisə̂ nə̈ âtə. Ngâ köchë gɨ̈ atchôtchô ndjî rəgʉ lə̂ kɨ̈ndɨ̈ ndə̂ yê. 25Lə̂ bütchî, ndə̂ azü gbɛ̂ lô, earə̂ kə̂ kosə̂ yê nə̂ ânyë kə̈ lû angbongbo bë lə̂ gûtə̂ atchôtchô ndjî rəgʉ nə̈ kə̈ rô etə̂. 26Ndə̂ andjî rəgʉ nə̈ kʉ̂, kə̈ kpô ânyë kə̈ jêtə̂ kə̂ le, angbongbo bë wûtu ndjë. 27Azü ndə̂ andjë mbo kua sə̈ earə̂ kɨ̈ndɨ̈ nə̈ nə̂ kə̈ tô rə̂ sə̈ tchë päkëdə̂: ‹Gbölö akrə, âdə̂âbo atchôtchô ndjî rəgʉ kä ndə̂ mo gɨ̂ rə̂ lə̂ kɨ̈ndɨ̈ ndə̂ zə̈ âtə alême? Angbongbo bë nə̈ âtə tö andə̂ ye nə̈ bhâ tchêbâ?› 28Tche tô rə̂ ndə̂nə̈ sə̈ andjê päkëdə̂: ‹Ngâ earə̂ kə̂ kosə̂ akrə kä ndə̂ âmbô rə âtə.› A-earə̂ kə̂ mbo kua nə̈ tô rə̂ sə̈ tchë päkëdə̂: ‹Mo nyïndə̂ nə̈ pä ârâ e kə̈ sû angbongbo bë nə̈ ëbêche?› 29Tche tô rə̂ ndə̂nə̈ sə̈ andjê päkëdə̂: ‹Nyë süäbô rə̂ sû-ê. Âdə nyë âsə me lakə̂ su angbongbo bë nə̈, ambêteko nyê su ndjë atchôtchô rəgʉ nə̈. 30Nyë gbötə̂ arə nə̈ gbɛ̂ âkpo lə̂ köbo nə̈ balë zoo âwutu tə̂ lo kə̂ soa arəgʉ nə̈. Âdə lo kə̂ soa rəgʉ nə̈ âwutu nə̂, mê toadje rə̂ sə̈ a-earə̂ kua ndə̂ mê päkëdə̂: Nyë sü angbongbo bë nə̈ dokʉ̈tchê kə̂ pala rə̂ kə̂ cho rə̂. Pânə̈ nyê roa atchôtchô blë nə̈, kə̂ kʉ rə̂ lə̂ gro ndə̂ mê.›»

Ndoka pâ ndjî mütârede

(Mar 4.30-32; Luk 13.18-19)

31Jezü kä tô ngâ ndoka sə̈ andjê päkëdə̂: «Gbölö gö-gbïɛ̈ ndə̂ tchêlafô wä batə̂ ndjî mütârede. Ngâ akrə kʉ̂ rə̂ ânyë kə̈ gɨ̂ rə̂ lə̂ kɨ̈ndɨ̈ ndə̂ yê. 32Ndjî nə̈ wä kpîɛ̂kpîɛ̂ rə̂ kə̈ rô adɨ̂ andjî rəgʉ gbɛ̂. Praâbalë âdə ndjî mütârede nə̈ âkʉ, kə̂ kpo, kə̂ ro akʉ̈kʉ̂-gûsû gbɛ̂, kə̂ wa ndjë tə̂ ngâ gbölö yö ânyë anyïɛ̈nə̈ nə kə̂ mbo kʉ̂mâ andjê tə̂ matö nə̈.»

Ndoka pâ djëvö

(Luk 13.20-21)

33Jezü kä tô ngâ ndoka sə̈ andjê päkëdə̂: «Gbölö gö-gbïɛ̈ ndə̂ tchêlafô wä batə̂ djëvö ndə̂ ngâ ɛ̈chë kʉ̂ rə̂, kə̈ gîâ rə̂ la gbölö zûwü zoo nyînyî nə̈ sûku.»

Jezü to pö la ndoka bëte giamâ

(Mar 4.33-34)

34Jezü tö apö lâme gbɛ̂ sə̈ akpûlû azü lə̂ köbosə̂ andoka. Tche tö pö sə̈ azü logbɛ̂ lə̂ köbosə̂ andoka. 35Tche mbö rə̂ käko ndə̂kə̂ pa pö ndə̂ earə̂ ndə̂ma Ndjapä mbo gundə̂sə̂ nə̈. Tche tö rə̂ päkëdə̂:

«Mê toadje pö sə̈ nyê lə̂ köbosə̂ andoka.

Mê toadje pö ndə̂ arə ndə̂ âwâ wü,

tə̂ lo nə̈ ndə̂ Ndjapä mbô tchîsûwu zoo ëtə̂ tchô angêta#13.35 Nyë dɨ̈ Aps 78.2..»

Dju ndoka pâ ngbongbo bë

36Jezü gbôtə̂ akpûlû azü nə̈ kə̈ dôtə̂ yê âtə̂lə̂ nda nə̈. Adjisîpili ndə̂ yê nə̂ ndola tchë, kə̈ yû tchë päkëdə̂: «Amö nyisə̂ dju ndoka pâ ngbongbo bë lə̂ kɨ̈ndɨ̈ lâme sə̈ ârâ.» 37Jezü tô rə̂ ndə̂nə̈ sə̈ andjê päkëdə̂: «Akrə ndə̂ tche gɨ̂ atchôtchô ndjî rəgʉ nə̈ wätə̂ Modô ndə̂ Akrə. 38Kɨ̈ndɨ̈ nə̈ wätə̂ tchêbêche âtə. Atchôtchô ndjî rəgʉ nə̈ də̈ azü ndə̂ Gbölö gö-gbïɛ̈ ndə̂ Ndjapä. Angbongbo bë nə̈ wätə̂ azü ndə̂ Ngbongbo akrə. 39Earə̂ kə̂ kosə̂ akrə ndə̂ tche lû angbongbo bë nə̈ lâme wätə̂ Jâbolo. Lo kə̂ soa ndjî rəgʉ nə̈ wätə̂ lo nə̈ ndə̂ Ndjapä wa ngbanga pâ tchîsûwu. A-earə̂ kə̂ soa ndjî rəgʉ nə̈ wätə̂ aânje. 40Batə̂ rə̂ ndə̂ a pala ngbongbo bë ndə̂kə̂ yi rə̂ âtə̂lə̂ wo, rə nə̈ âwa ndjë me käko-ë lo nə̈ ndə̂ Ndjapä wa ngbanga pâ tchêbêche. 41Modô ndə̂ Akrə âwan-adje aânje ndə̂ yê. Andjê paladje azü gbɛ̂ ndə̂ andjë mbô rə̂ pä angâ andjê te lə̂ ngbongbo rə, ndjë la azü gbɛ̂ ndə̂ andjë mbô angbongbo rə, ndə̂kə̂ wutu la andjê kə̂ gi andjê chï tə̂ Gbölö gö-gbïɛ̈ ndə̂ tchêlafô. 42Andjê yiadje azü nə̈ lâme lə̂ gbölö wo; bhâye, kütû kɨ̈ lakə̂ zɨ tchə̂lə̂ da jï andjê wadje tâ. 43Pânə̈ adjîrə̂ azü tadje tä batə̂ lo lə̂ Gbölö gö-gbïɛ̈ ndə̂ Bha andjê. Akrə ndə̂ tche wâ la tü ndə̂kə̂ dje pö, äwäpä tche dje pö âtə.»

Ndoka pâ rə ndə̂ a zâ rə̂ wü la andə̂ kɨ̂dji

44«Gbölö gö-gbïɛ̈ ndə̂ tchêlafô wä batə̂ ngâ rə ndə̂ a zâ rə̂ wü bhâlə̂ kɨ̈ndɨ̈. Ngâ akrə gbô rə̂ ânyë kə̈ kä zâ tchêndə̂ nə̈ wü. Su yê wâ la mômô tə̂ gbölösə̂nə̈ ânyë tche gû, kə̈ kâ arə gbɛ̂ ndə̂ tche wâ la rə̂, ânyë kə̈ yô kɨ̈ndɨ̈ nə̈ lâme.

45«Gbölö gö-gbïɛ̈ ndə̂ tchêlafô wä ndjë batə̂ pö ndə̂ nga earə̂ waɛ̂che ndə̂ tche pû atchôtchô akɨ̂dji ndə̂kə̂ yo rə̂. 46Ndə̂ tche gbô ngâ kɨ̂dji ndə̂ gbölö ngîrî, tche gû kə̈ kâ arə gbɛ̂ ndə̂ tche wâ la rə̂ ânyë kə̈ yô kɨ̂dji nə̈ lâme.»

Ndoka pâ gbânda

47«Gbölö gö-gbïɛ̈ ndə̂ tchêlafô wä ndjë batə̂ ngâ gbânda ndə̂ a yî rə̂ lə̂ gbölö ngû ânyë âkʉ̂ agiangû tə̂ manə̈ balë balë gbɛ̂. 48Ndə̂ gbânda nə̈ sɨ̂, a-earə̂ kə̂ pu agiangû nə̈ gbɨ̂tɨ rə̂ ëmaga ngû nə̈. Pânə̈ andjë sə̂ bêche kə̈ sə̂ lakə̂ rʉa tchə̂lə̂ agiangû nə̈: Andjë kʉ̈ atchôtchô agiangû nə̈ ëlə̂ agbasa ânyë andjanə̈ ndə̂ andjë wâbô wâ ndə̂kə̂ pa a mbo ngâ rə balë la andjê lâme, andjë yï andjê fiî. 49Lo nə̈ ndə̂ Ndjapä wa ngbanga pâ tchîsûwu, rə nə̈ âwa ndjë me käko-ë. Aânje ânəadje ndə̂kə̂ krʉ tchə̂lə̂ angbongbo azü la adjîrə̂ azü. 50Andjê yiadje angbongbo azü nə̈ lə̂ gbölö wo; bhâye, kütû kɨ̈ lakə̂ zɨ tchə̂lə̂ da jï andjê wadje tâ.»

Atäfo rə la abəndɨ nə̈

51Jezü yû adjisîpili ndə̂ yê päkëdə̂: «Nyë djê tchə̂lə̂ apö lâme nə̂ gbɛ̂?» Andjë tô rə̂ ndə̂nə̈ sə̈ tchë päkëdə̂: «Ɛn-ɛn». 52Tche tô rə̂ sə̈ andjê päkëdə̂: «Earə̂ kə̂ nyisə̂ ndïɛ̈ ndə̂ tche wâtə̂ djisîpili ndə̂ Gbölö gö-gbïɛ̈ ndə̂ tchêlafô, tche wä batə̂ ngâ earə̂ nda ndə̂ tche wûtu la atäfo rə la abəndɨ nə̈ lə̂ gro ndə̂ yê gbɛ̂ ësûwu.»

Azü gö ndə̂ Näzärête kösə̂ kə̂ za su andjê sə̈ Jezü

(Mar 6.1-6; Luk 4.16-30)

53Ndə̂ Jezü nyîsə̂ rə sə̈ andjê lə̂ köbosə̂ andoka gbɛ̂, tche âlafô tchâme kə̈ rô etə̂. 54Tche ê atə̂ Näzärête, gö ndə̂ tche kʉ̂che lə̂nə̈, kə̈ sə̂ lakə̂ nyisə̂ rə sə̈ azü lə̂ anda kə̂ voga Ndjapä ndə̂ andjê. Tchə̂lə̂ küma azü nə̈ gbɛ̂ djîngɨli, ânyë andjë sə̂ lakə̂ yutə̂ andjê päkëdə̂: «Küma yê ndə̂ âwâ lanə̈ âtə tö bhâ tchêbâ? Tchabâ âzâ gbôgbô ndə̂kə̂ mbo akpɨ̈ngbɨ̈ rə âtə sə̈ tchë? 55Âdə̂âbo modô ndə̂ sarpandë kä âtə? Âdə̂âbo Malê kä ndə̂ âdə̂ anyï nə̈? Âdə̂âbo Jâke la Jozêfu la Chemön la Jûde kä ndə̂ âwâtə̂ ayîngâ yê? 56Âdə̂âbo anyînə̂ nə̈ kä ndə̂ âsə̂ lə̂ gbâtə̂ azü âtə? Tchabâ âzâ gbôgbô nə̈ âtə sə̈ tchë?» 57Arə lâme gbɛ̂ mbö rə̂ ânyë andjë zâbô su andjê zâ sə̈ tchë-ê. Käko Jezü tô rə̂ sə̈ andjê päkëdə̂: «Lə̂ agö gbɛ̂ a lüsə̂ earə̂ ndə̂ma Ndjapä, praâbalë âdə̂âbo azü lə̂ gö ndə̂ yê âdəndjë tchâalê ndə̂ yê kä ndə̂ âlusə̂ yê-a.» 58Jezü mbôâbo akpɨ̈ngbɨ̈ rə tə̂ gbölösə̂nə̈ tchâme-a, bëte azü nə̈ zâbo su andjê sə̈ tchë-a.

Jelenleg kiválasztva:

Matiyə̈ 13: lnl

Kiemelés

Megosztás

Másolás