Mateo 14
14
1Mwitungo lyenilo mutemi Herode wigagwa mhola yamwa Yesu. 2Na wavawilaga vakumba vakwe, Mwenuyu ali Yohana Moja; wahembukile ku lufu, na kunguno yeniyi nguzu zyenizi zilitumama muwakwe. 3Kwisi Herode waliwamudima Yohana na wamutulaga mu jela kunguno yamwa Herodia, muke wa muduguye Filipo. 4Kwisi Yohana wamuwilaga, Guli mwiko kuwako kuvi nawe. 5Na wakovaga kumuvulaga, alisi vavogohaga vanhu, kwisi vamwilolelaga kitisi ali mufumbuzi. 6Alisi aho sikukulu ya kuvyalwa kumwa Herode yafikaga, mwana mukima wamwa Herodia wanegulaga hambele navo na wamutogezaja Herode. Kunguno yeniyi wamulaganaja na mulahi kumupa icho akumulomba. 7Alisi uyu wasemezivagwa na nina, 8na alihaya, Umpe henaha mutwe gwamwa Yohana Moja mu lubehe. 9Na mutemi wasayaga, alisi kunguno ya mulahi na kunguno ya venavo vikalaga nawe hakulila, walagilaga apiwe. 10Na wamutumizaja munhu, wamutinaga mutwe mu jela. 11Na mutwe gwakwe gwaletagwa mu lubehe, na mwanike wagupivagwa na wamufililaga nina. 12Na vahemba vakwe vagusolaga muvili gwakwe na vaguzikaga; na vajaga vakamupozezaja Yesu.
13Aho Yesu wayigagwa, wafumagako na wajaga mu wato kusika henaho haduhu vanhu; na aho vanhu vigagwa, vamulondaga mbuto lwa magulu kufuma ku makaya gavo. 14Na aho wafumaga wavavonaga vanhu vingi, na wavasayilaga na wavapizaja valwile vavo. 15Alisi aho lyavagi limi lya mhindi, vahemba vakwe vamwegelaga, vuhaya, Henaha ibalangu na limi lyadohaga; uvadahye vanhu, kigele vaje mu tukaya vakigulile chakulya. 16Alisi Yesu wavawilaga, Vakafundile 17kuja, inwe vapagi chakulya. Alisi valimuwila, Tukavile na kinhu henaha, sumbwa mikate itano na masomba avili. 18Alisi alivawila, Mundetele yeniyi.
19Na wavalagilaga vanhu vikale mu maswa; na wayisolaga mikate itano na masomba avili, na walangamilaga kwilunde na wadosaja luvango, na wayimegulaga 20na wavapaga vahemba, navo vavapaga vanhu. Na vose valyaga na vigutaga, na wagasolelaga matonge hogene gasigalaga, na gokalaga matala ikumi na avili. 21Alisi avo valyaga vavagi vagosya fihumbi fitano, kuleka vakima na vana.
22Haho itungo lili wavakungilizaja vahemba kwingila mu wato, vatongele kuvuka kumwambu, aho atali alivadahya vanhu. 23Na aho wamalaga kuvadahya 24vanhu, walinaga ku lugulu kukalomba. Na aho vuziku wila wavagiko inene. Alisi mwitungo lyenilo wato wasegenelaga hagati na nyanza na wayegezivagwa na mavimbi, kwisi muyaga gwavagi gulifuma kumbele yavo. 25Alisi ha zamu ya vunne ya vuziku Yesu wizaga kuwavo aliyumba higulya na nyanza. 26Alisi aho vamuvonaga aliyumba higulya na nyanza vakangagwa, vuhaya, Guli muzimu; na valilaga kunguno ya vova. 27Alisi itungo lili Yesu wayombaga navo, uhaya, Idibagi 28moyo, honene, muleke kogoha! Na Petro wamwitavukaga, uhaya, Guku, ulu uli veve, ndagilage nize kuwako higulya na minzi. 29Na alimuwila, Nzugu! Na Petro wafumaga mu wato na wayumbaga higulya na minzi afike kumwa Yesu. 30Alisi aho waguvonaga muyaga gwa nguzu wogohaga, aho alivukizya kunwivila walila 31muno, uhaya, Guku, umpizye! Haho Yesu wagololaga kukono na wamudimaga, umuwila, Veve wʼisanizyo ido, kuki wasusaja? 32Na aho vamalaga kwingila mu wato muyaga gwalembelaga. 33Alisi venavo vavagi mu wato vamukuvilaga, vuhaya, Loleyene veve uli Mwana wa Mulungu.
34Na aho vamalaga kuvuka, vingilaga mu nsi ya Genezareti. 35Na vanhu va henaho, aho vamumanikaja, vafilaga mhola ku malwande gose, na vamuletelaga vose hovene vavagi vasatu. 36Na vamulombaga, valikumye duhu ibomho lya mwenda gwakwe; na vose hovene valikumaja vapizivagwa.
Jelenleg kiválasztva:
Mateo 14: Nym51
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Nyamwezi New Testament © Bible Society of Tanzania, 1951.
