Lubaakico N̰amaakeetee Iisa Masi 3

Piyer ma giiti Yaaya rayyadda ruŋguyne

1Gaa meene kaƴi, ga Piyer ma giiti Yaaya katawɗo girti Mellayi ma saha subba ta ooriti. Kaaka pa ay wikinne maa gu giimi enewɗiya Mella kulla meene. 2Gaa saripti biití burgo ta girti Mellayi maa gu kolaa goo ‘Burgo ta Samaane’, ga lekkiɗo ruŋguyne maa gu asawwiki. Gata pa gu weewiya saa goŋŋa. Kulla meene aɗe gu asawki gu dowɗiya iŋaa, ga ŋarayɗo min oko giimi ma on̰aa aatti girti Mellayi. 3Gaa wikinne maa ga ruŋguyne elliɗiy ini Piyer ma giiti Yaaya guu on̰aa iŋaa, gaa inniɗiy gaa gu bire maatiki. 4Maa gu giyyicca inniti taata pa, gu warre, guu elelɗiya ƴoy. Gaa Piyer beneyyiyyee gaa: «Ellini ƴa samaane!» 5Gaa elelɗiy gaa walaŋ pe gu beree maatiki. 6Gaa Piyer beneyyiyyee gaa: «Naa lekka ɗa gurus, o na lekka ɗa dahamne. Latta maa na lekka soopa na beramga. Ma semeetee Iisa Masi ka Nazaret, ki wacu ki tan̰n̰iɗo!»

7Gaa Piyer baamiyya min pitti ka tiyaawa ga gaayiyya wacaawi. Gaa kaytiŋ ka gu beɗeŋertee ipirɗe, guu asintee warriɗe talta. 8Gaa waciɗe partakan̰ ga warriɗe, gaa diiliɗe tan̰n̰o. Gaa marriyyoo gu un̰n̰iɗe dooranti girti Mellayi ma n̰amaakeetee Iisa sawa, gaa tan̰awɗo o ga torossa o ga logokkaa Mella. 9Guu giimi paracco elliyya maa ga tan̰awɗo o ga logokka Mella. 10Maa gu ibinniyya kadar ga ay gimu kee aɗe ma nowotta kulla meene biiti Burgo ta Samaane ta girti Mellayi ga ŋarayɗo, guu ajjibiɗe maani ta kaw oko gaari ma asiyee kotti.

Piyer beneyyayo oko giimo girti Mellayi

11A mileŋ ga miiɗi kee pa maa gu rayyide jobokkay missa ini Piyer ma giiti Yaaya, gu giimi paracco gaɗɗeero gu asiyyoo asan gu ajjibe maani ta kaw oko gaari kotti. Guta pa aaye zuba ta doorane ta girti Mellayi maa gu kolaa goo ‘Zubaati Suleman’. 12Maa ga Piyer elliɗiy giimi ku maani kotti ma asiyoo, gaa beneyyiyyoo gaa: «Kuŋ giimi ku Isirayel, ayme ku ajjabɗe oko gimu keeke ma rayyide? Ayme ku doroyɗini goŋŋa elliti? Kuu walaŋ ga nii rayyidiya gimu keeke ma gudirantini ka e? E baŋ ku leewe kuu ni bakammiya ƴiila botol ka Mellayi e? 13Mella Milti Biraayim, o ka Isaaka, o ka Yakub, o ka kookuweetine un̰n̰iya lubaakati kee Iisa. Gaa kunta aɗe biriyyooga oko taattuweyyo. Gaa guberner kee Pilat aŋkiɗo ga cappiyyee, kuu poociɗe unti. 14Gata pa, ay gimu maa ga Mella n̰akamme o ga ɗayaŋ unti. Gaa ma kaaka aɗe ku poociyya, gaa diyaawa ka giimo deeɗitoŋ ƴiila daanatoŋ, kuu inniɗe kuu gu cappe oko ma leewa miɗɗa. 15Kuu deeɗiya gata ma ay Miltí hayaatanti. Gaa Mella naɗiyya min aacco giimi ku mattenta. Nii pa ay suyuudigeetee Iisa ma naɗe. 16Haŋka pa ku ella gimu keeke o ku ibinya. Ay ma amanno oko gudirane ta semeetee Iisa Masi ga karilɗe. Ay amanno oko gudiranti Iisa Masi ma rayyidiya ta kaw. Ay keeke appe maa ku ella.»

17«Seneeta, keeke soopa na lekkee kabarre kadar ga kuŋ o taattuweetoŋ poociya Iisa asan ku ibiniy ɗa dagganco gaari kooko. 18Innasoopa ga Mella leyya goŋŋa ku maa ga beneyti maa gu nabiinigee paracco beneyye min tippa asiɗo butulti. Gata pa beneyye gaa ga Masi, gata maa ga aparre, akka diigiya. 19Haŋka pa ku meeloŋgu gaartoŋ ku miɗɗa kuu jobbiyya ka Mellayi. Gaa cimmittoŋgu zunubgeetoŋ. 20Mella Miltine pa akka itira wikinne ka nambiti. Gaa n̰aamittoŋga Iisa ma ay Masi, gata maa ga aparritoŋ min omma. 21Oko haŋka soopa, ga Iisa nowotta samaani, namma ya meene maa ga Mella asiɗiy pana lawwi paracco gu deeɗo marawta, aleŋ maa ga beneyye tippa ma nabiinigeetee. 22A Muusa pa beneyye gaa: “Mella Miltoŋ akkitoŋ cimma min aacco seneetoŋ nabiinice kaƴi ma ay aleŋ naata. Gaa ase asa pa, ku giyyoŋga beneyti paratti. 23Gimu soopa ma jobbiya ɗa beneyti kaaka ɗakko ɗa ma gimtee Mellayi, o gu akkiya dee pe ta kaw#3.23 Elloŋ Ɗillico Hukumnigeyyo 18.15, 18.18-19..” 24Nabiinigee paracco beneyye min tippa ma gaari ku meeni kotti min oko wikinniti nabiinice Samiyel o nabiinigee ma danniya. 25Beneyti Mellayi keeke maa ga beneyyiyoo oko nabiinigeyyo pa ay oko kuŋ. Kuŋ pa ay giimi ku liŋgane maa ga Mella onokke ma kookuweetoŋ maa ga Mella beneyyiyee oko Biraayim gaa: “Na baarakkay ballee paracco ku kiɗaati ma giimi ma ay koo ku balcum#3.25 Elloŋ Diilo ta Lawwi Paracco 22.18..” 26Gata pa ay oko kuŋ appe ƴa omma ga Mella n̰aamiya lubaakati kee Iisa, ku maa ga asittoŋ baarika, gaa gaarittoŋ botol ku maa ga kulla kaƴi aɗe uttiyyo oko gaartee ku miɗɗa.»

Jelenleg kiválasztva:

Lubaakico N̰amaakeetee Iisa Masi 3: mmy

Kiemelés

Megosztás

Másolás