Matalikilo 3
3
Muntu mbwaakabisya
1Lino nzoka yakalicenjede kwiinda banyama boonse aabo Mwami Leza mbaakalenga. Yakabuzya mukaintu kuti, “Sena Leza wakamwaambila ncobeni kuti tamweelede kulya micelo yamisamu eeyi iili mumuunda?”
2Mukaintu wakaingula wati, “Tulakonzya kulya micelo yamisamu yoonse iili mumuunda, 3pele micelo yamusamu uuli akati kamuunda, Leza wakati tatweelede kwiilya nikuba kwiiguma pe. Kuti twacita oobo tulafwa.”
4Mpoonya nzoka yakati, “Kufwa, peepe, tamukoofwa pe! 5Leza ulizi kuti mwaulya meso aanu aayoojaluka, nkabela muyooba mbuli Leza akuziba bubotu abubi.”
6Lino mukaintu wakabona musamu mbuwakali mubotu kulya ambuwakali kweebeka. Mpoonya wakayeeya kuti naa walya inga waba musongo. Aboobo wakacela walya, eelyo imwi micelo wakapa mwaalumi wakwe, awalo wakalya. 7Mbubakamanina buyo kulya, ameso gwee! Eelyo bakaziba kuti bali aacintanda. Nkaako bakasuma matu aamukuyu basama.
8Kumangolezya ngoonya aayo bakamvwa Mwami Leza keenda mumuunda, mpoonya bakamuyuba akati kamisamu. 9Pele Mwami Leza wakaita Adamu wati, “Ino uli kuli?” 10Mpawo Adamu wakaingula kuti, “Ndakumvwa nooli kweenda mumuunda, nkabela ndayoowa, ndayuba nkaambo ndaacintanda.”
11Leza wakamubuzya wati, “Ino nguni wakwaambila kuti uli aacintanda? Sena walya micelo njindakakwaambila kuti utakiilyi?” 12Adamu wakaingula kuti, “Mukaintu ooyo ngookandipa kukkala aawe nguwandipa micelo, ndiilya.”
13Mpawo Mwami Leza wakabuzya mukaintu kuti, “Ino yebo wacitilanzi boobu?” Mukaintu wakaingula wati, “Pe, nzoka njiyandicenga aboobo ndalya.”
Leza mbwaakaambilizya cisubulo cacinyonyoono
14Lino Mwami Leza wakaambila nzoka kuti,
“Akaambo kaceeci ncoocita,
wasinganyizigwa kwiinda banyama boonse bavubwa abamusokwe.
Kuzwa sunu unookumbya da ansi,
alimwi ivu liyooba ncecilyo cako mubuumi bwako boonse.
15Lino ndiyoobikka lusulo akati kako amukaintu,
aakati kalunyungu lwako alwamukaintu.
Walo uyookupwaya kumutwe ayebo uyoomuluma kukasindi.”
16Kumukaintu wakaamba kuti,
“Ndiyooyungizya mapenzi aako waakumita
akuyungizya kucisa mukutumbuka kwako.
Ucinooyoomuyandisya mulumaako,
walo uyooba ngosimalelo wako.”
17Kuli Adamu Leza wakaamba kuti,
“Yebo mbooswiilila jwi lyamukaintu wako,
akulya micelo njindakakwaambila kuti ‘Utalyi.’
Bulongo bwasinganyizigwa nkaambo wacita boobu.
Uyoobeleka anguzu mubuumi bwako boonse kutegwa ujane cakulya.
18Nyika iyoomena zincenya, mamvwa azisonso,
alimwi unooyoolya zisyumani.
19Uyoobbukwa nkasaalo kuti ujane kulya,
mane do ukabweede kubulongo ooko nkookagwisigwa.
Mbubonya mbookabumbwa kuzwa kubulongo uyoobweeda nkukonya.”
20Lino mwaalumi wakaulika mukaintu wakwe kuti ngu Eva, nkaambo ngobanyina wabantu boonse. 21Nkabela Mwami Leza wakasumina Adamu amukaintu wakwe zyakusama kuzwa kumakutu aabanyama, eelyo bakasama.
Adamu a Eva batandwa mumuunda wa Edeni
22Mwami Leza wakati, “Lino muntu waba mbubonya mbuli mbotubede, waziba bubotu abubi. Tutamulekeli kucela akulya micelo yamusamu uupa buumi nkaambo kuti walya unoopona lyoonse.” 23Aboobo Mwami Leza wakatanda muntu kuzwa mumuunda wamu Edeni kuti akalime bulongo oobo mbwaakabumbizigwa.
24Wakamutanda muntu, alimwi kulubazu lwakujwe lyamuunda wamu Edeni wakabikka bakelibu. Alimwi wakabikka panga livwilima mulilo lyakali kupilamuka koonse-koonse kusinkila nzila iiya kumusamu uupa buumi.
Jelenleg kiválasztva:
Matalikilo 3: Tonga96
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Tonga Bible © United Bible Societies, 1994.
