Matalikilo 16
16
Makani aa Hagaa a Isyimayeli
1Lino Salayi mukaintu wa Abulamu taakwe naakazyala bana. Pele wakalijisi musimbi muzike wakazwide ku Ijipiti wakali kutegwa Hagaa. 2Salayi wakaambila Abulamu kuti, “Bona, mebo Mwami Leza tandipede luzyalo. Ino mbuti kuti wanjila mumuzike wangu ooyu kuti ambweni inga walo ulakonzya kundizyalila mwana?” Abulamu wakaazumina majwi aaya. 3Aboobo Salayi wakapa muzike wakwe Hagaa kuli Abulamu. Eeci cakacitika Abulamu kali wakkala kale myaka iili kkumi mu Kenani. 4Nkabela Abulamu wakanjila muli Hagaa, nkaako muzike wakamita. Lino Hagaa naakaziba kuti wamita, wakatalika kulisumpula akusampaula Salayi. 5Mpoonya Salayi wakanyemena Abulamu akumwaambila kuti, “Yebo nduwe waambila Hagaa kuti kanga kandisampaula akundinyansya. Kwalo mebo lwangu ndime ndakakupa muzike wangu, Lino mbwaabona kuti uliminsi, watalika kundisampaula. Ndakumbila Mwami Leza kuti abeteke akati kandime anduwe omulumaangu, kubona kuti naa nguni uuluzi.”
6Abulamu wakaingula kuti, “Tee kayi, Hagaa mmuzike wako alimwi nduwe oomweendelezya, ulakonzya kucita coonse ncoyanda kuli nguwe.” Nkaako Salayi wakatalika kumupenzya cakuti limwi Hagaa wakatija kuzwa mumunzi.
7Mungelo wa Mwami Leza wakaswaangana anguwe kukasensa kamaanzi kali munkanda, munzila iiya ku Syuu. 8Mpoonya wakati kulinguwe, “Hagaa, omuzike wa Salayi, ino wazwidayi, alimwi uya kuli?” Hagaa wakamwiingula wati, “Ndatija kuzwa kuli namalelo.”
9Mungelo wakati, “Koya, ujokele kuli Salayi, ukalitesye cakulibombya kulinguwe.” 10Alimwi mungelo wakaamba kuti, “Ndiyookupa bana banji cakuti tabakooyoobalika. 11Kusaanguna uuyoozyala mwana mulombe ngoyooulika kuti Isyimayeli, nkaambo Mwami Leza wakumvwa kulila kwako kwakupenga. 12Nikubaboobo mwanaako ooyo uyoopona mbuli mbongolo nkali iitakwe butambye. Uyoolwana abantu boonse, alimwi awalo bantu boonse bayoomulwana. Unoolipambula kuzwa kubantu bakwe boonse.”
13Lino Hagaa wakalyaambauzya lwakwe mwini kuti, “Sena ndamubona ncobeni ooyo uundibona mumapenzi aangu kwamana ndicipona?” Aboobo Hagaa wakaita Mwami Leza kuti, “Nduwe Leza uundibona.” 14Nkakaambo aaka bantu ncibaita mukalo uli akati ka Kadesyi a Beledi kuti, “Biyalahailoi,” nkokuti “Mukalo wayooyo Uupona Uundibona.” 15Ciindi nicakasika Hagaa wakazyala mwana mulombe, mpoonya wakamuulika kuti Isyimayeli. 16Ciindi eeci Abulamu wakalaamyaka iili makumi aali lusele acisambomwe.
Jelenleg kiválasztva:
Matalikilo 16: Tonga96
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Tonga Bible © United Bible Societies, 1994.
