MATIYUT 7
7
”Kit maluk o, kinoone perak togon yoriyak mage o,” yoragagerak wone
(Luk 6:37-38,41-42)
1Yorage nagagirik, ambinom yorage logonet, ”Ala nen perak togon, Kit maluk eekotak o, yinuk, yokkirage kero, kit nen aap ambi eeremenggerak paga, Kat maluk eekendak o, yinuk, kinoone omaawi paga perak togon yoriyak mage o. 2Kit maluk eekotak o, yinuk, kinoone omaawi paga perak togon yorogwe kiinok, Ala nen kit togop aret yokkirage kaamunggup o. Wakkagak nogo paga wakkaanok aakumi wogorogo monggotak nogo ndak-ndak wakkaanok wokkirage kaamunggup o. 3Eyo nggwok mbanak kinigen me milinik wonage maloppega'lek logonet, kit kinore enegen anggup nonggop nduk maloppogo ogotik? 4Ndi, eyo nggwok mbanak kit kinigen me worek-kaga'lek logonet, kinore nogo, Kenegen anggup worekkeya o, yinuk, nonggop togon yoriyak mbakop? 5Aap pilit pugungga kit aret o. Eyo nggwok mbanak kinigen me milinik wonage nogo, aa'nduk mbo nappunuk, kinore enegen anggup worekkoorak tena'me kaamunggup o.
6Nggeewo nen melak togon ineyak mbangginakwi iyo, Ala ake leenak abe mendek nogo wogoraagup o. Ndi, wam iniyok aan lebenogo pit nogwe iyo, wu kirin negen wam wonogwe me, inenggela'me mbo nappugup o,” yinuk, yoragagerak.
Nggino yogwi, kwaakwi, Tu paa'niyet, yogwi, eeko logorak wone
(Luk 11:9-13)
7-8Yorage nagagirik, ambinom yorage logonet, ”It aakumi nggino yorogwe iinok, wogorogwe, kwaakwi iinok, kwaakkologwe, Tu paa'niyet, yorogwe iinok, paariigwi, eeko menggaarak me, nggino yogwi kiinok, wokkirage, kwaakwi kiinok, kwaakkirage, Tu paa'niyet o, yogwi kiinok, paakkiige, eeke kaabagip nduk, kit nen nggino yogwi, kwaarit nugwi, Tu paa'niyet, yogwi, eeko logonip o. 9Kinapuluk ambi nen, Mbi wo'niru o, yokkirage kenok, yugum aret wogoriyak mbakop? 10Ndi, Ikan ambi wo'niru o, yokkirage kenok, waalo aret wogoriyak mbakop? 11Lek o. Kit aap maluk mendek kwe, kinapurilogwe nen yokkirogwe iinok, obeelom mendek wogorogo monggotak nogo ndak-ndak, kit kinogoba mbogut paga mendek nogo nggino yogwi kiinok, at togop aret obeelom mendek mondok wokkirage kaamunggup o.
12It aakumi nen, Ndogop eeppinanuwak lak ao, mbako monggotak nogo ndak-ndak aret eeppiigo logonip o. Ala wone lengganak inom, it Ala wone aa'nduk yorogo nogogwaarak inoone yugu inom, eebe ti aret me, eeko logonip o,” yinuk, yoragagerak.
Tunggambe mbuuluk paga unggwi noorak wone
(Luk 13:24)
13Yorage nagagirik, ”Aakumi kobak ari nogo menggam unggwi noorak tu ngga'nggi nggwok mbanak, ndi, tu nogo menggam kunduk mbelak aago yarak kenok, aakumi ambik tu ti paga nogo menggaarak kwe, kit perak, tu ngga'nggi mbuuluk nogo paga unggwi nogo logonip o. 14Ineenik ogo menggam unggwi noorak ti, tu ngga'nggi mbuuluk mbanak, ndi, tu nogo menggam kunduk kunik me, aakumi mbere iluk mban kwaakkologo nagaatik, unggwi nogo menggaarak o,” yinuk, yoragagerak.
Eyo anggen abe yege menggerak wone
(Luk 6:43-44)
15Yorage nagagirik, ambinom yorage logonet, ”It Ala wone pilit pugunogo yokkirogo menggaarak nogo nen kinambokan laganggwi iyo, tum wako logonip o. It aap ti, inetenggen ndomba enete negen kunggo'nok kinowagam wogwe kwe, iniki ti, nggeewo endekem mendek anini warak pogom wonogwe o. 16It aap nogo ti, eerit nogo logonet, anggen yi'nage paga kineenu arumunggup o. Kit anggur anggen nogo eyo poondo alokwi paga yugu me, waganggwi mbakop? Ndi, eyo ara anggen nogo iri'ngga alokwi paga yugu me, mbanggwi mbakop? 17Lek o. Eyo obeelom mendek kenok ti, anggen obeelom mendek aret yege menggerak. Ndi, eyo maluk mendek kenok ti, anggen maluk mendek aret yege menggerak. 18Eyo obeelom mendek ti, anggen maluk mendek yegeelik o. Ndi, eyo maluk mendek ti, anggen obeelom mendek yegeelik mban o. 19Eyo anggen obeelom mendek yege lek kenok ti, muurogo kani kunik me mambogo menggaarak o. 20Togop aret me, it aap nogo eerit nogo logonet, anggen yi'nage paga kineenu arubagip nduk, yokkiragi o,” yinuk, yoragagerak.
Ninoone yogwe paga lek o. Ata, eebe eekwi paga, ”Woraanip o,” yo'niroorak wone
(Luk 13:25-27)
21Wone ambinom yorage logonet, ”It aakumi inoone paga nen mban, Ai ninogoba, yo'nogo menggaarak nogo abok tigitogon at mbogut paga mendek abu'me piyaagin mondok lek o. An nogoba mbogut paga mendek iniki mbake nogo ndak-ndak eeko menggaarak kenok mban at abu'me piyaagin o. 22O ti eyom paga aakumi apit aret, Ai, ninogoba. Kat kendage paga Ala wone yorogo nogogurak nogo o. Ai, ninogoba. Kat kendage paga kugi nggiginogo wumbiigo nogogurak nogo o. Ai, ninogoba. Kat kendage paga eerubok mendek apit aret eeko nogogurak nogo o. 23Yo'nirumenggaarak kwe, an nen it yorage logonet, Kit maluk eeko monggotak yi, kit an mondok neenggo'lek me, mbet mbaganinip o, yinuk, yoraagin o,” yoragagerak.
Aap wi-abe imbirak o wureegwaarak wone
(Luk 6:47-49)
24Yorage nagagirik, ambinom yorage logonet, ”Ti kenok, yi aap ndi aap an noone inaruk konembunuk, liirogon eeko menggaarak ti, aap iniki warak nen awi yugum paga wureegerak nogo pogom it aret. 25Wuppunuk wonage me, o mayu wage, niyo nggwok wu'nuk wage, o wiya wake, eeke logonet, o wurik panggonggagak eereegerak mendek o nogo yugum paga wurik me, langgongga'lek aret wonagagerak.
26Ndi, it yi aap ndi aap an noone inaruk konembunuk, liirogon eekulik kenok perak, aap iniki lek nen awi mbini paga wureegerak nogo pogom it aret o. 27Wuppunuk wonage me, o mayu wage, niyo nggwok wu'nuk wage, o wiya wake, ee'nuk wage logonet, o wurik panggonggagak eeke logonet, langgonogo yigirik-nonom mondok iya tit eerit nagagerak o,” yinuk, yoragagerak.
Yetut oone omaawi paga yorake kenok, pi wareegwaarak wone
28-29At Yetut nen wone yi nogo abok aret yorage mbareegi, it aakumi kuwak aago nogo at oone mamunirage inaruk konenggo nogogwaarik, ”Ie! Aap yi, it Ala wone liiru mbanak unde nen yo'nirogo mengga kwak yo'nirage lek o. At oone omaawi paga mamunirage yi, wi!” yinuk, pi wareegwaarak.
Jelenleg kiválasztva:
MATIYUT 7: WNO
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
