Génesis 21
21
Isaac yurinqan
1Abrahamta Tayta Dios awninqannöllam Saraqa qeshyaq rikakurqan. 2Abraham rukuna kaykaptinpis Tayta Dios jitapanqan killachömi ollqu wamrata Sara qeshyakurqan.#Heb. 11.11-12. 3Sara qeshyakuskiptinnam Abrahamqa tsurinpa jutinta churarqan Isaacta. 4Yurinqanpita puwaq junaqyuq kaykaptinmi Tayta Dios ninqannölla tsurinpa penqayninta señalarqan.#Gén. 17.12; Hech. 7.8. 5Abraham pachak (100) watayuq kaykaptinmi tsurin Isaac yurirqan.
6Tsaypitanam Sara nirqan: <<Wamrayuq kanäpä Tayta Dios willamaptinmi asikurqü.#Gén. 18.12-15. Wakin runakunapis wamrayuq kanqäta musyarmi kushikur asikuyanqa. 7Wamrayuq kanäpä kanqanta ¡pirä Abrahamta ninman karqan! Runä rukuna kaykaptinpis wamrä kaykunrämi>>.
Agarta wamrantinta Abraham qarqunqan
8Isaac jatunyarkuptinnam maman wasqirqan. Tsay junaqmi Abraham kushikuypita fiestata rurarqan. 9Tsay junaqmi Agarpa wamran Ismael Isaacta pukllapar burlakuykaqta Sara rikarqan. 10Tsaymi Abrahamta Sara nirqan: <<¡Tsay sirviqtaqa wamrantinta ras qarquy! Tsay warmipa wamranqa manam wamrä Isaacwan herenciata rakipänakuyanmantsu>>.#Gál. 4.30.
11Tsaynö niptinmi Abrahamqa pasaypa llakikurqan Ismaelpis tsurin kaptin. 12Tsaymi Abrahamta Tayta Dios nirqan: <<Tsuriki Ismaelpä y sirvishuqniki warmipäqa ama llakikuytsu. Qamta awninqäqa tsuriki Isaacpä y paypita miraqkunapämi. Tsaynö kaykaptinqa Sara nishunqaykita ruray.#Rom. 9.7; Heb. 11.18. 13Sirvishuqnikipa wamran Ismaeltapis tsuriki kaptinmi atskaman mirar jatun nación kananpä alli rikashä>>.
14Tayta Dios tsaynö niptinmi Abrahamqa tsaka tsakalla waraynin wäray Agarta millkapata y yakutapis alistaparqan. Tsaykunata aparirkatsirmi wamrantawan despacharqan. Tsaymi Agarqa wamranwan Beerseba desiertuman chaykur pantakashqa puriyarqan. 15Apanqan yaku ushakaskiptinmi wamranta jacha chakinchö dëjaykurqan. 16Yakunaypita wamran wanuqta rikayta mana munarmi tsaypita karu niraqman aywaykur jamakuykurqan. Maman karuchö jamaraykaqta rikarmi wamraqa alläpa waqarqan.
17Ismael waqanqanta wiyarmi Tayta Diospa angelnin ciëlupita qayakamur nirqan: <<¿Imatä päsashunki, Agar? Ama mantsakaytsu. Tayta Diosmi wiyashqa wamrayki waqanqanta. 18Kutir wamraykita shoqarnin ama dëjaynatsu. Paypita juk nación mirananpämi bendisashä>>.
19Tsaypitanam Agarta Tayta Dios rikatsirqan pözuchö yaku kaykaqta. Tsaymi yaku puritsikunanman wishirkur wamranta uputsirqan. 20Tayta Dios yanapaptinmi wamra shumaq wiñarqan. Desiertuchö tärarmi yachakurqan flëchawan jirka ashmakunata wanutsiyta. 21Paykuna täyarqan Parán desiertuchömi. Jövinyarkuptinnam Egipto jipashwan maman tätsirqan.
Abrahamwan Abimelec pactuta rurayanqan
22Tsay witsanmi rey Abimelec#Gén. 26.26. soldädunkunapa capitannin Ficolwan aywayarqan Abrahamwan parlayänanpä. Chaykurmi niyarqan: <<Llapan ruranqaykichö Tayta Dios yanapashunqaykitam tantiyarqü. 23Tsaymi kanan shayämurqü shumaq willanakunantsikpä. Tayta Diospa jutinchö jurar awnimay noqawan alli kanqaykinö tsurïkunawan y paykunapita miraqkunawanpis alli kanaykipä. Tsaynölla kaychö täraqkunawan imaypis alli kaykullay>>.
24Tsaynö niptinmi Abraham nirqan: <<Diospa jutinchömi awnï nimanqaykinö ruranäpä>>.
25Tsaypitanam Abimelecta Abraham nirqan: <<Sirvimaqnïkuna yakuta jipiyämunanpä uchkuyanqan pözutam sirvishuqnikikuna qechuyämashqa>>.
26Tsaymi Abimelec nirqan: <<Taytay, tsaytaqa kananyaq manam mayarqütsu. Qampis manam tsaytaqa willamarqaykitsu. Manam musyätsu mayqan sirvimaqnï tsayta ruranqanta>>.
27Tsaynö willanakuskirnam Abrahamqa Abimelecta qararqan üshakunata, cabrakunata y wäkakunata. Tsay junaqmi Abrahamwan Abimelec pactuta rurayarqan imaypis alli kawayänanpä. 28Tsaynöllam üshankunapita qanchis masta Abraham rakirqan. 29Tsaynö rakiqta rikarmi Abimelec tapurnin nirqan: <<¿Imapätä tsay qanchis üshakunata rakirquyki?>>
30Tsaymi Abraham nirqan: <<Kay qanchis üshakunatam rakirqü chaskimaptiki tsay pözupa duëñun kanqäta pïmaypis musyayänanpä>>.
31Tsaychö pactuta rurayanqanpitam tsay partipa jutinta churayarqan Beerseba#21.31 Beerseba ninanqa Juramentu Pözu ninanmi. kananpä. 32Beersebachö pactuta ruraskirnam Abimelecwan Ficol kutikuyarqan filisteo runakuna täyanqan partiman. 33Beersebachömi Abraham plantarqan tamarisco jachata.#21.33 Tsay jachatam plantarqan Tayta Dios yanapanqanta yarparänanpä. Tsaychömi imayyaqpis kawaq Tayta Diosta mañakur adorarqan. 34Abrahamqa atska watam filisteo runakuna täyanqan partichö täkurqan.
Jelenleg kiválasztva:
Génesis 21: qxo
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2002, 2008, Wycliffe Bible Translators, Inc. All rights reserved.
