Génesis 17
17
Abraham señalakunqan
1Abram isqun chunka isqun (99) watayuq kaykaptinmi Tayta Dios yuripuykur nirqan: <<Noqam kä El-Shaddai.#17.1 El-Shaddai ninanqa llapanpä poderyuq Dios ninanmi. Ninqäkunata cäsur jutsata mana ruraypa imayyaqpis kaway. 2Qamwan pactuta ruranqätam cumplishä.#Gén. 12.2-3. Tsaymi qampita miraqkuna atskaman mirayänanpä bendicionnïta churashä>>.
3Tsaynö niptinmi Abram jinan höra lätaykurqan. Tsaychömi Tayta Dios nirqan: 4<<Pactu ruranqäta cumplirmi atska nación runakunapa papänin kanaykipä churashayki. 5Kananpitaqa manam Abramnatsu jutiki kanqa, sinöqa Abrahamnam.#17.5 Abraham ninanqa atska runakunapa taytan ninanmi. Tsaynö jutiki kanqa atska nación runakunapa papänin kanaykipä churashqa kaptïmi.#Rom. 4.17-18. 6Qampita miraqkunaman bendicionnïta churamuptïmi atska nacionkunapis y reykunapis paykunapita kayanqa.
7<<Kay pactuqa manam qamllapätsu kanqa, sinöqa tsurikikunapä, willkaykikunapä, willkaykikunapa tsurinkunapä y paykunapita mas miraqkunapäwanmi. Kay pactutaqa imaypis cumplishämi. Qampa Diosniki kanqänömi qampita miraqkunapapis Diosnin kashä. 8Qorpanölla taykanqayki Canaánchö markakunatam entregashayki. Tsaynöllam qampita miraqkunata entregashä imayyaqpis tsaychö täyänanpä.#Hech. 7.5-6. Qampita miraqkunapa Diosninmi imaypis kashä>>.
9-10Mastam Abrahamta Tayta Dios nirqan: <<Pactu ruranqäta chaskiyänaykipä qampis y qamwan llapan ollqu kaqkunapis penqaynikikunachö señalakuyay. Tsaynölla señalakuyätsun qampita miraqkunapis.#Hech. 7.8; Rom. 4.11. 11Señalakur penqaynikipa punta qaranta roquyanki. Tsaynö señalakurmi pactu ruranqäta chaskiyanki. 12Kananpita ollqu yuriq kaqtaqa puwaq junaqyuqllata pallunta señalayanki. Makikichö yuriqkunata y juklä nacionpita sirvishunaykipä rantinqayki runakunatapis tsaynölla señalayanki. 13Pactu ruranqäta imaypis yarpäyänaykipä llapayki mana qonqaypa señalakuyanki. 14Mayqanpis mana señalakurqa pactu ruranqäta manakaqmanmi churan. Tsaynö kaqtaqa qamkunapita qarqunki>>.
15Mastam Abrahamta Tayta Dios nirqan: <<Kananpitaqa warmikipa jutin manam Sarainatsu kanqa, sinöqa Saranam.#17.15 Sara ninanqa princesa ninanmi. 16Payman bendicionnïta churaptïmi tsuriki yurinqa. Tsaymi warmiki kanqa atska nacionkunapa maman. Paypa wamrankunapita miraqkunam reykunapis kayanqa>>.
17Tayta Dios tsaynö niptinmi yapay lätaykur Abraham shonqullanchö asikur nirqan: <<Pachak (100) watayuq kaykarnaqa ¿imanöpatä warmïtapis qeshyaqta ruräman? Sarapis isqun chunka (90) watayuqna kaykarqa ¡imanöpanash wamrayuq kanman!>>
18Tsaymi Tayta Diosta Abraham nirqan: <<Taytay, tsurï Ismaelman bendicionnikita churaptiki allim kanman>>.
19Tsaynö niptinmi Tayta Dios nirqan: <<Manam Ismaelpätsu nï, sinöqa warmiki Sarachö yurinanpä kaq tsurikipämi. Tsay tsurikipa jutinmi kanqa Isaac.#17.19 Isaac ninanqa asin ninanmi. Pactu ruranqäqa Isaacpä y paypita miraqkunapämi imayyaqpis kanqa. 20Mañakamanqaykinöllam Ismaelmanpis bendicionnïta churashä paypita miraqkuna jatun nación kayänanpä. Paypa tsurinkunapis chunka ishkay mandaqkunam kayanqa.#Gén. 25.12-18. 21Peru pactuta ruranqämi sïqa Sarachö yuriq tsuriki Isaacpä kanqa. Watan kaynö witsanqa wamrayuqnam Sara kaykanqa>>.
22Tsaynö niskirmi tsaypita Tayta Dios aywakurqan. 23Tsay junaqmi Tayta Dios ninqannölla makinchö kaykaq llapan ollqukunata Abraham señalarqan. Tsaymi tsurin Ismaelta, makinchö yuriq runakunata y sirviqninpä rantinqan runakunatapis señalarqan. 24Tsay señalakunqan junaq Abraham kaykarqan isqun chunka isqun (99) watayuqmi. 25Tsurin Ismaelnam kaykarqan chunka kimsa watayuq. 26Tsay junaqllam Abraham y tsurin Ismaelpis señalakuyarqan. 27Tsaynöllam tsay junaqlla Abraham señalarqan makinchö yuriq ollqu sirviqninkunata y rantinqan jäpa runakunatapis.
Jelenleg kiválasztva:
Génesis 17: qxo
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2002, 2008, Wycliffe Bible Translators, Inc. All rights reserved.
