Génesis 14
14
Lotta prësu apaykäyaptin Abram kutitsimunqan
1Tsay witsan Sinar markapa mandaqnin reymi karqan Amrafel. Elasar markapa mandaqnin reymi karqan Arioc. Elam markapa mandaqnin reymi karqan Quedorlaomer. Goim markapa mandaqnin reymi karqan Tidal. 2Tsay reykunam guërrachö kaykäyarqan wakin markakunapa mandaqnin reykunawan. Tsay reykunaqa kayarqan Sodoma markapa reynin Bera, Gomorra markapa reynin Birsa, Adma markapa reynin Sinab, Zeboim markapa reynin Semeber y Bela markapa reyninpis. Bela markapa jukaq jutinmi karqan Zoar. 3Tsay pitsqa reykunam soldädunkunata qoriyarqan Sidim pampaman. Tsay pampachömi kananqa Kachi Lamar kaykan. 4Tsay reykunataqa rey Quedorlaomermi chunka ishkay wata poderninchö tsarararqan. Tsaypita juk wata päsaskiptinnam pitsqan reykuna willanakur Quedorlaomerpa contran shäriyarqan.
5Tsaymi juknin wata Quedorlaomer y payta yanapaq reykunapis soldädunkunawan Astarot Karnaimman aywayarqan. Tsaychö pelyarmi refaíta runakunata wanutsiyarqan. Tsaynöllam Ham markapa aywar zuzita runakunatapis wanutsiyarqan. Tsaypita Save-quiriataimpa aywar emita runakunatapis wanutsiyarqan. 6Tsaypitanam Seir jallqakunapa aywar horeo runakunatapis wanutsiyarqan. Wakin horeo runakuna qeshpiyaptinmi qatikachäyarqan Parányaq. Tsayqa kaykan desiertu ñöpanchömi. 7Tsaypita kutimurmi Quedorlaomer y paywan aywaqkuna En-mispatman chäyarqan. Tsaypa jukaq jutinmi karqan Cades. Tsay kinranmi amalecita runakunata ushakätsiyarqan. Tsaypita päsarmi Hazezon-tamar partichö täraq amorreo runakunatapis ushakätsiyarqan.
8Tsaymi Sodomapa, Gomorrapa, Admapa, Zeboimpa y Belapa mandaqnin reykuna alistakuyarqan Sidim pampachö guërrata rurayänanpä. (Bela markapa jukaq jutinmi karqan Zoar.) 9Tsaychömi pitsqa reykuna chusku reykunawan pelyayarqan. Tsay chuskun reykunam kayarqan Elampa mandaqnin rey Quedorlaomer, Goimpa mandaqnin rey Tidal, Sinarpa mandaqnin rey Amrafel y Elasarpa mandaqnin rey Arioc. 10Sidim pampachöqa brea#14.10 Breaqa yanam imayka siniganö. pözukunam atska karqan. Tsaymi Sodomapa y Gomorrapa reyninkuna soldädunkunawan guërrapita qeshpiykäyanqanchö tsay brea pözukunaman jeqarpuyarqan. Wakin kaq reykunam soldädunkunawan jallqakunapa qeshpiyarqan.
11Tsay pelyachö vinciq chusku reykunam soldädunkunawan Sodoma y Gomorra markakunaman yaykuykur llapan imaykantapis mas alli kaqtaqa apakuyarqan. Tsaynöllam llapan mikuyninkunatapis apakuyarqan. 12Abrampa sobrinun Lotmi taykarqan Sodomachö. Tsaymi Lotta prësu tsariskir llapan imaykankunatawan apakuyarqan. 13Tsaynö apaykäyaptinmi juk runa qeshpiskir Abramta willaq aywarqan.
(Abramqa hebreo runam karqan. Payqa taykarqan amorreo runa Mamripa encina munti chakranchömi. Mamre karqan Escolpa y Anerpa wawqinmi. Paykunaqa Abramwan yanapanakuyänanpämi willanakuyashqa kayarqan.)
14Sobrinun Lotta prësu apaykäyanqanta musyaskirmi Abramqa qorirqan makinchö yuriq sirviqninkunata. Tsay runakunam kimsa pachak chunka puwaq (318) kayarqan. Paykunata pushakurkurmi prësu apaq runakunata qatipar Dan markayaq Abram aywarqan. 15Taripaykurmi sirviqninkunawan illaqpita atacarnin paqaspa vinciyarqan. Tsaynö vincirmi Hoba markayaq qatipäyarqan. Tsay markaqa Damasco markapa norti kaq lädupam karqan. 16Tsaypitam llapan apayanqankunata qechur kutitsiyämurqan. Tsaynöpam sobrinun Lottapis imaykankunatawan kutitsiyämurqan. Tsaynöllam warmitapis ollqutapis prësu apayanqanta kutitsiyämurqan.
Abramta Melquisedec bendisanqan
17Quedorlaomerta y payta yanapaq reykunata vinciskir Abram kutiykämuptinmi Sodoma markapa mandaqnin rey tariparqan Save pampaman. Tsay pampapa jukaq jutinmi Mandaq Reypa Pampan. 18Tsaymi Salem markapa mandaqnin rey Melquisedecpis tsayman chaykur tantatawan vïnuta Abramta qararqan. Melquisedecqa poderösu Tayta Diosta sirviq sacerdötim karqan.#14.18 Hebreo idiömachömi nin: Melquisedecqa El-Eliónta sirviq sacerdötim karqan. El-Eliónqa Tayta Diospa jukaq jutinmi karqan. Tsaynöllam nin Gén. 14.19-20, 22 versïculukunachöpis. 19Abramta bendisarmi nirqan:
<<Ciëluta y kay patsata kamaq poderösu Tayta Dios bendicionninta qamman churaykallämutsun.
20Poderösu Tayta Dios alabashqa kaykullätsun.
Paymi yanapashurquyki contrayki kaq runakunata vincinaykipä>>.
Tsaynö niptinmi Abramqa qechur kutitsimunqanpita Melquisedecta diezmuta qararqan.#Heb. 5.6, 10; 6.20—7.17.
21Sodomapa mandaqnin reynam Abramta nirqan: <<Marka mayïkunataqa kutitsimay. Tsaypita kaqtaqa imaykatapis llapanta apakuy>>.
22Tsaynö niptinmi Abram nirqan: <<Ciëluta y kay patsata kamaq poderösu Tayta Diospa jutinchö jurarmi nirqü 23qampa kaqtaqa juk jïlullaykitapis ni llanqi watullaykitapis mana apanäpä. Tsaynöpam qamqa parlaykankinatsu <Abramqa noqapitam rïcuyashqa> nir. 24Sirvimaqnï runakuna mikuyanqallanna katsun. Compañamaq Aner, Escol y Mamrim sïqa derëchun kaqkunata apakuyätsun>>.
Jelenleg kiválasztva:
Génesis 14: qxo
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2002, 2008, Wycliffe Bible Translators, Inc. All rights reserved.
