Génesis 13
13
Abramwan Lot rakikäyanqan
1Warminta pushakurkur y llapan imaykankunatapis apakurkur Egiptupita Abram kutikurmi Neguevman charqan. Paywanmi sobrinun Lotpis aywarqan. 2Abramqa pasaypa rïcu runam karqan. Tsaymi qorinpis qellayninpis ashmankunapis atska karqan. 3Abram aywakurmi patsakur patsakur Neguevpita Bet-elman charqan. Tsaypitanam kutikurqan punta täranqan kaqman. Tsayqa karqan Bet-elpita Haiman aywaqchömi. 4Tsaychömi altarta ñöpata pirqanqan kaqchö Tayta Diosta mañakur adorarqan.
5Lotpis tiyun Abramnömi rïcu karqan. Paypapis üshankuna, cabrankuna, wäkankuna y toldunkunapis atskam karqan. 6Peru ashmankuna atska kaptinmi juk partillachö ishkankuna tärayta puëdiyarqantsu. 7Tsaymi Abrampa ashma mitsiqninkunawan Lotpa ashma mitsiqninkuna pelyayaq qewa janan. Tsay witsan tsaychö taykäyarqanrämi cananeo runakuna y ferezeo runakuna.
8Ashma mitsiqninkuna tsaynö pelyayaptinmi sobrinun Lotta Abram nirqan: <<Tsay castalla kaykarqa ama chikinakushuntsu ni mitsikuqnintsikkunapis rimanakuyätsuntsu. 9Rikanqaykinöpis kay parti jatunmi. Mayninchöpis shuyni täkunaykipä akrakuy. Janapa aywaptikiqa urapam aywashä. Urapa aywaptikiqa janapam aywashä>>.
10Tsaynö niptinmi Lotqa Jordán mayu ñöpan pampakunata entërupa rikachakurqan Zoar marka lädupa. Tsay pampakunachö qewapis y yakupis atska kaptinmi Edén huertanörä#Gén. 2.8-9. y Egiptunörä karqan. Tsaynöqa karqan Sodoma y Gomorra markakunata Tayta Dios manarä ushakätsiptinmi. 11Tsaymi Lotqa mas alli kaptin akrakurqan Jordán mayu ñöpan pampakunata. Tsaynöpam Abrampita rakikar rupay yarqamunan läduman aywakurqan. 12Abrammi sïqa jinan Canaánllachö quëdakurqan. Lotnam Jordán mayu aywaq pampakunachö kaykaq markakunaman aywar Sodoma marka cercanchö täkurqan. 13Sodomachöqa Tayta Diosta mana cäsuq jutsasapa runakunallam täyarqan.
14Lot aywaskiptinnam Abramta Tayta Dios nirqan: <<Kay taykanqaykipita norti kaqpa, sur kaqpa, rupay yarqamunan kaqpa y rupay ullunan kaqpa rikachakuy. 15Tsay rikanqayki partitaqa llapantam entregashayki. Imayyaqpis tsayqa kanqa qampä y qampita miraqkunapämi.#Hech. 7.5. 16Qampita miraqkunatam atskaman mirayänanpä alli rikashä. Tsaymi paykunaqa arënanö yupaytapis mana atipaypä kayanqa. 17Aywar entërupa rikapakamuy. Llapan rikanqayki kaqtaqa qamtam entregashayki>>.
18 Tayta Dios tsaynö niptinmi llapan imaykantapis apakurkur Hebrón marka cercanman Abram aywakurqan. Tsaychömi atska encina jachakuna karqan. Tsay jachakunaqa Mamre runapam karqan. Tsaychö taykarnam altarta Abram pirqarqan Tayta Diosta adorar mañakunanpä.
Jelenleg kiválasztva:
Génesis 13: qxo
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2002, 2008, Wycliffe Bible Translators, Inc. All rights reserved.
