Naanearü ügüchiga 17
17
Tupana rü Abráü̃maxã inaxuneta
1Rü yexguma Abráü̃ 99 ga taunecü nüxü̃́ yexmagu rü Cori ya Tupana naxca̱x nango̱x rü ñanagürü nüxü̃: —Choma nixĩ ya Tupana ya Guxü̃étüwa Ngẽxmacü chixĩxü̃. Rü chanaxwa̱xe i aixcüma mea cumaxü̃ i chope̱xewa.
2Choma rü tá cumaxã ichaxüga rü tá chayamuxẽxẽ i cutaagü, rü tá namuxũchi —ñanagürü.
3-4Rü yexguma ga Abráü̃ rü waixü̃müanegu nanangücuchi. Rü yoxni ga Tupana rü nidexachigüama rü ñanagürü: —Ñaãcü tá nixĩ i cumaxã nax ichaxügaxü̃. Rü cuma tá nixĩ i norü o̱xi quixĩxü̃ i muxü̃tama i nachixü̃anecüã̱x i duü̃xü̃gü.
5Rü marü taxũtáma Abráü̃ nixĩ i cuéga. Rü ñu̱xmacürüwa rü tá Abraáü̃ nixĩ i cuéga erü muxü̃tama i nachixü̃anecüã̱x i duü̃xü̃güarü o̱xi tá cuxü̃ chixĩxẽxẽ.
6Rü tá chayamuxẽxẽ i cutaagü rü tá namuxũchi. Rü ngẽma cutaagü rü muxü̃tama i nachixü̃anegü tá nango̱xẽẽgü. Rü ngẽma cutaatanüwa tá nangẽxma i ãẽ̱xgacügü ixĩgüxü̃.
7Rü ngẽma ñu̱xma tá cumaxã rü cutaagümaxã chaxueguxü̃ rü ñaa nixĩ: Rü choma rü guxü̃gutáma curü Tupana chixĩ rü cutaagüarü Tupana chixĩ.
8Choma rü cuxna rü nüxna tá chanaxã i guxü̃ma i ñaa Canaáü̃ane i ñu̱xma nawa cumaxü̃xü̃. Rü tá guxü̃gutáma norü naane nixĩ i cutaagü. Rü choma rü tá norü Tupana chixĩ —ñanagürü.
9-10Rü Tupana rü Abraáü̃xü̃ ñanagürü ta: —¡Natürü i cumax rü cutaagü rü guxü̃gutáma peyanguxẽxẽ i ngẽma pemaxã nüxü̃ chixuxü̃! Rü dücax, chanaxwa̱xe i guxãma ya iyatüxe i petanüwa rü ípewíecha̱xmüü̃pe̱xechiraü̃.
11¡Rü pegü ípewiecha̱xmüü̃pe̱xechiraü̃gü! Rü ngẽmawa tá nango̱x nax aixcüma peyanguxẽxẽ i ngẽma yigümaxã nüxü̃ ixuxü̃.
12Rü ñu̱xmaü̃cüü rü guxãma ya iyatüxe ya ngexwaca ixíraxe i petanüwa rü 8 i ngunexü̃ tüxü̃́ ngẽxmagu rü name nixĩ i ítawiecha̱xmüü̃pe̱xechiraü̃. Rü ngẽxgumarüü̃tama penaxwa̱xe i ngẽmaãcü penaxü namaxã i guxü̃ma i perü puracütanüxü̃ i to i nachixü̃anecüã̱xü̃tawa naxca̱x petaxegüxü̃ rü woo nanegü.
13Rü ngẽmaãcü ya guxãma i pema rü perü duü̃xü̃gü, rü chanaxwa̱xe i pegü ípewíecha̱xmüü̃pe̱xechiraü̃gü. Rü ngẽmaãcü guxü̃gutáma pexenewa nango̱x nax aixcüma peyanguxẽẽxü̃ i ngẽma yigümaxã nüxü̃ ixuxü̃.
14Natürü ya yíxema tama tügü íwíecha̱xmüü̃pe̱xechiraü̃xẽ, rü name nixĩ i noxtacüma pegütanüwa tüxü̃ ípeta̱xüchi erü tama tayanguxẽxẽ i ngẽma yigümaxã ixunetaxü̃ —ñanagürü.
15Rü Tupana rü Abraáü̃xü̃ ñanagürü ta: —Rü ngẽma cuxma̱x i Charái, rü marü taxũtáma ngẽma nixĩ i ngĩéga. Rü ñu̱xmaguwena rü Chára tá nixĩ i ngĩéga.
16Rü choma rü tá mexü̃ ngĩmaxã chaxuegu rü tá cuxü̃́ ixãxacü. Rü aixcüma ngẽmaãcü tá ngĩxü̃ curüngü̃xẽxẽ. Rü muxü̃ma i nachixü̃anegüarü noxẽ tá iyixĩ. Rü ngẽma ngĩtaagü rü ĩanegüarü ãẽ̱xgacügü tá nixĩgü —ñanagürü.
17Rü yexguma ga Abraáü̃ rü waixü̃müanegu nanangücuchi. Natürü nüxü̃ nacugüãcüma nügüãẽwa ñanagürü: —¿Ẽ̱xna wüxi ya yatü ya 100 ya taunecü nüxü̃́ ngẽxmacü rü tá naxãxacüxü̃ nax papa yixĩxü̃ca̱x? ¿Rü Chára rü tá naxãxacüxü̃ nax marü 90 ya taunecü ngĩxü̃́ ngẽxmaxü̃? —ñaxü̃gu narüxĩnü ga naãẽwa.
18Rü yexguma ga Abraáü̃ rü Tupanaxü̃ ñanagürü: —Chierü mexü̃ Ismaémaxã cuxuegu̱xgu —ñanagürü.
19Rü Tupana nanangãxü̃ rü ñanagürü nüxü̃: —Pa Abraáü̃x, aixcüma nixĩ i ngẽma cumaxã nüxü̃ chixuxü̃, rü cuxma̱x i Chára rü tá cuxü̃́ ixãxacü. Rü cuma rü Ichaágu tá cunaxüéga. Rü yimáwa tá ningu ga yema cumaxã nüxü̃ chixuxü̃, rü ngẽmaãcü tá guxü̃gutáma nüxü̃ curüngü̃xẽxẽ i nataagü.
20Rü ngẽxgumarüxü̃ ta i Ismaéca̱x rü marü cuxü̃́ chaxĩnü rü yimá rü tá ta mexü̃ namaxã chaxuegu. Rü tá nüxü̃ curüngü̃xẽxẽ nax yamuxũchixü̃ca̱x i naxacügü rü nataagü. Rü yimá Ismaé tá nixĩ i nanatü i 12 i ãẽ̱xgacügü i poraexü̃. Rü nataagümaxã tá ichanachixẽxẽ i wüxi i taxü̃ i nachixü̃ane.
21Natürü yema chorü uneta ga cumaxã nüxü̃ chixuxü̃, rü tá ichayadaxẽxẽ nawa ya cune ya Ichaá i cuxma̱x i Chára ngĩne ya domarüücü ya tauemacügu tá bucü i nai ya taunecügu —ñanagürü ga Tupana.
22Rü yexguma marü nüxü̃ nachauxgu ga Abraáü̃maxã nax yadexaxü̃ ga Tupana, rü Abraáü̃na nixũgachi.
23Rü yematama ngunexü̃ ga Tupana namaxã idexaguwena nixĩ ga Abraáü̃ ga nane ga Ismaéxü̃ ínawíecha̱xmüü̃pe̱xechiraü̃xü̃. Rü yexgumarüxü̃ ta tüxü̃ ínanawíü̃cha̱xmüü̃pe̱xechiraü̃ ga guxãma ga guxema iyatüxe ga norü puracütanüxü̃ ga naxü̃tagu buexe rü guxema tümaca̱x nataxexe. Rü yemaacü nanaxü yema Tupana namaxã nüxü̃ ixuxü̃rüxü̃.
24-25Rü yexgumarüxü̃ ta ga nüma rü yematama ga ngunexü̃gu nügü ínawíecha̱xmüü̃pe̱xechiraü̃. Rü nüma ga Abraáü̃ rü 99 ga taunecü nüxü̃́ nayexma ga yexguma nügü ínawíü̃cha̱xmüü̃pe̱xechiraü̃gu. Rü yexguma ga nane ga Ismaé rü 13 ga taunecü nüxü̃́ nayexma.
26-27Rü nüma ga Abraáü̃ rü ñu̱xũchi nane ga Ismaé rü yematama ga ngunexü̃gu nügü ínawíü̃cha̱xmüü̃pe̱xechiraü̃gü wüxigu namaxã ga guxü̃ma ga napatagu buexü̃ ga iyatüxü̃gü, rü woo guxema norü puracütanüxü̃ ga tümaca̱x nataxexe ga to ga nachixü̃anecüã̱x. Rü yemaacü ga nüma ga Abraáü̃ rü nayanguxẽxẽ ga yema Tupana namaxã nüxü̃ ixuxü̃.
Jelenleg kiválasztva:
Naanearü ügüchiga 17: tcaP
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2022, Wycliffe Bible Translators, Inc. All rights reserved.
