Naanearü ügüchiga 13
13
Nügüna nixĩgachi ga Abráü̃ rü Lox
1Rü yexguma Equítuanewa ínaxũxũxgu ga Abráü̃ naxma̱xmaxã rü guxü̃ma ga norü yemaxü̃maxã, rü wenaxarü Négueaneca̱x nataegu. Rü namágü ga Lox rü nawe narüxũ.
2Rü Abráü̃ rü poraãcü namuarü yemaxü̃güã̱xü̃chi ga úiru rü diẽru rü muxü̃ma ga naxü̃nagü.
3Rü inaxũãchi ga Négueanewa rü meama nixũ ñu̱xmata ĩane ga Betéwa nangu. Rü wenaxarü ü̃paacü nagu naxãchiü̃xü̃ ga ĩane ga Beté rü ĩane ga Áiarü ngãxü̃wa yexmaxü̃wa nangu.
4Rü yema nixĩ ga yema nachica ga ü̃paacü ãmarearü guruxü̃ nagu naxüxü̃. Rü yéma nayumüxẽ rü Cori ya Tupanaarü ngü̃xẽẽca̱x ínaca.
5Rü yexgumarüxü̃ ta ga Lox rü nanepü ga Abráü̃rüxü̃ namuarü yemaxü̃ã̱xü̃chi. Rü nüxü̃́ nayexma ga muxü̃ma ga carnérugü, rü wocagü, rü norü duü̃xü̃gü ga naxü̃tagu ãchiü̃güxü̃.
6Natürü ga yema nachica ga nawa nayexmagüxü̃ rü tama ningu ga nabü naxca̱x ga yema muxü̃ma ga naxü̃nagü. Rü yemaca̱x ga Abráü̃ rü Lox rü taxucürüwama wüxiwa nayexmagü, yerü ga naxü̃na rü nayangechica.
7Rü yemaca̱x ga Abráü̃arü carnéruarü dauruü̃gü rü Loxarü carnéruarü dauruü̃gü rü tama nügümaxã nataãẽgü, rü nügü nadai. Rü yexgumaü̃cüü ta yema naanegu naxãchiü̃gü ga Canaáü̃tanüxü̃ rü Ferechéutanüxü̃.
8Rü yemaca̱x ga Abráü̃ rü wüxi ga ngunexü̃gu Loxmaxã nidexa rü ñanagürü: —Cuma rü choma rü yigütanüxü̃ tixĩgü rü ngẽmaca̱x tama name nax yigüchi ixaiexü̃. Rü tama name nax taxü̃naarü dauruü̃gü rü nügü nax nadaiechaxü̃.
9Rü dücax, rü ngẽma nixĩ i guxü̃ma i ñaa naane nax cuma cunayaxuxü̃ca̱x i ngẽma cuxü̃́ ngúchaü̃xü̃. Rü ngẽmaãcü tá yigüna tixĩgachi. Rü ngẽxguma cuma nórtewaama cuxũxchaü̃gu, rü choma rü tá súrwaama chaxũ. Natürü ngẽxguma cuma súrwaama cuxũxchaü̃gu, rü choma rü tá nórtewaama chaxũ —ñanagürü.
10Rü yexguma ga Lox rü natü ga Yudáü̃pechinügu nidau, rü nüxü̃ nadau ga nax nabaxcaxü̃ ga maxẽgü ñoma Tupana inatoxü̃rüxü̃, rü poraãcü nadexáã́xü̃ ga yema naane ñu̱xmata guma ĩanexacü ga Chóawa nangu. Rü Equítuanerüxü̃ nixĩ ga nax nameanexü̃chixü̃. Rü yemaacü nixĩ naxü̃pa nax Cori ya Tupana yaxoxẽẽãxü̃ ga guma ĩanegü ga Chodóma rü Gomóra.
11Rü yexguma ga Lox rü nanayaxu ga guxü̃ma ga yema naane ga Yudáü̃pechinüwa üxü̃. Rü yemaacü yema naane ga noxri nawa nayexmagüxü̃arü éstewaama naxũ. Rü yemaacü nixĩ ga Abráü̃ rü Lox ga nügüna yaxĩgachixü̃.
12Rü nüma ga Abráü̃ rü yexmatama Canaáü̃anegu naxãchiü̃, rü Lox rü guma ĩanegü ga Yudáü̃pechinüwa yexmagünegu nayaxãchiü̃ ga Chodómaarü ngaicamana.
13Rü guma ĩanewa nixĩ ga guxü̃ma ga duü̃xü̃gü ga yachixecümaxüchixü̃ rü poraãcü chixexü̃ naxügüxü̃ ga Tupanape̱xewa.
14Rü yexguma marü yaxũgachigu ga Lox, rü Cori ya Tupana rü Abráü̃maxã nidexa rü ñanagürü: —¡Ngẽma ícuchixü̃watama rü mea guxü̃gu nadawenü i nórtegu rü súrgu rü éstegu rü oéstegu!
15Rü choma rü tá cuxna chanaxã i guxü̃ma i ngẽma naane i nüxü̃ cudauxü̃. Rü guxü̃gutáma cuxrü rü cutaagüarü tá nixĩ.
16Rü choma rü tá chayamuxẽxẽ i cutaagü rü ñoma naxnücüte̱xerüxü̃ tá namuxũchi. Rü ngẽmaãcü taxúetama tayaxugü i ngẽma cutaagü.
17¡Rü inachi rü nagu rüxũ i guxü̃ma i norü ma̱x rü norü tatachinü i ñaa naane, erü choma rü tá cuxna chanaxã! —ñanagürü.
18Rü yexguma ga Abráü̃ rü inaxũãchi. Rü Mamréarü castañanecügu nayaxãchiü̃ ga ĩane ga Ebróü̃arü ngaicamana. Rü yexma nanaxü ga wüxi ga ãmarearü guruxü̃ nax yéma Cori ya Tupanaxü̃ yacua̱xüxü̃xü̃ca̱x.
Jelenleg kiválasztva:
Naanearü ügüchiga 13: tcaP
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2022, Wycliffe Bible Translators, Inc. All rights reserved.
