Kulaje 6
6
N̂-mbərə dəwje siri karə uman njê-kaw-kulaje
1Dɔ ndɔɛ̂ tə̂ənn, kɔr njê-njaje go Jeju tə̂ aw kə kete kete. Jiipije kə̂ aw paje ndɔn-tar gɛrɛkə aw əmje rɔde kə ri dede kə̂ n̂-toje to Ebərəje. Mba kə ndɔ tɔyn bbo Ebərəje le aw kaynje nɛ̂n-kusa dɛnɛ̂n-ndubbaje a, dɔruje kəm dɛnɛ̂n-ndubbaje ləde. 2Njê-kaw-kulaje kə̂ dɔku gire joo le bbarje njê-njaje go Jeju tə̂ ngaâ paje nan: «To maji karə jeje nəənn, n-tusuje tar lə Lubba jinyaje, a jawje mba dda kula nɛ̂n-kayn ang. 3Be a, ngakɔnʼmje, maji karə ə-mbərəje dəwje siri horose tə̂ kə̂ dəwje aw paje tar ləde maji. Dəwje kə̂ Ndil-mə-nda kə kəm-karɛ ddusude arəje jinyaje kula nəənn jide tə̂. 4A Jeje, ja kunnje rɔje mba kula duju Lubba kə kula tɔju tar lə Lubba.» 5Dəwje kə̂ mbɔnje naan le tɔyn ndikije tar tə̂ kə̂ njê-kaw-kulaje paje arəde le. Yeenn bba, dəwje kə̂ n̂-mbərəde to Etiyɛnn kə̂ mə-kunn ddəm Ndil-mə-nda ddəm dduse, Pilipi, Porokɔr, Nikanɔr, Timɔn, Parmenas kə Nikola kə̂ to dəw kə̂ Antiyos kə̂ aw bbəəl Lubba lə Mɔyijə. 6N̂-ddeeje kə dəwje kə̂ siri le nɔn njê-kaw-kulaje tə̂ le darə n̂-duju Lubba dɔde tə̂ ddəm dila jide dɔde tə̂ ddəm.
7Tar lə Lubba nja kə kete kete ngaâ kɔr njê-njaje go Jeju tə̂ aw kə kete kete mə bbe tə̂ kə̂ Jerujalɛm. Njê-poloje Lubba tokə banya unnje məde arə Jeju.
Dəwje uwaje Etiyɛnn
8Mə-maji lə Lubba kə singa-mɔngu laa to dɔ Etiyɛnn tə̂ arə n̂-dda nɛ̂n-mɔrije kə nɛ̂nje kə̂ dum dɔ koo dang dang horo dəwje tə̂. 9Marə Jiipije kə̂ inje Sirɛnn kə Alɛkəjandiri kə̂ aw mbɔnje naan kəy mbɔn-naan tə̂ lə Jiipije kə̂ daw bbarde nan «Njê kə̂ teeje kɔ bbərə tə̂» kə njê kə̂ inje nangə tə̂ kə̂ Silisi kə njê kə̂ Aji aw maynje tar kə Etiyɛnn. 10A tar kəm-karɛ kə̂ Ndil-mə-nda arə naw pa le uta dɔde. 11Yeenn ngaâ darəje dəwje narɛ mba karə paje nan: «Joo Etiyɛnn lo taji ri Mɔyijə tə̂ kə lo taji ri Lubba tə̂.» 12Baann bba dɔsuje kutu dəwje le, tɔkəje kə njê-gərəje-Ndu darə duwa Etiyɛnn kə singa daw saa lo gangə sariya tə̂ lə Jiipije. 13N̂-ddeeje kə njê-tar-najije kə̂ toje to njê-ngəmje darə paje nan: «Kə ndɔ tɔyn njaa dingaw nəənn aw pa tar kə̂ maji ang dɔ Kəy-polo Lubba tə̂ kə̂ maji tɔyn ddəm dɔ Ndu tə̂ kə̂ Lubba arə Mɔyijə ddəm. 14N̂-pa nan Jeju kə̂ to dəw kə̂ Najarɛtə le a tuju Kəy-polo Lubba nəənn ngaâ nâ turu nɛ̂n-ji-bbeje kə̂ Mɔyijə inya arəje le. Joo tar laa le kə mbije njaa.»
15Kəm njê-gangəje sariya le tɔyn toje kə dɔ Etiyɛnn tə̂ ngaâ daaje kəmɛ̂ a, kəmɛ̂ le to tokə kəm anjəjeenn be.
Jelenleg kiválasztva:
Kulaje 6: KabbaDkS
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
