Kulaje 4

4
Daw kə Piyɛr de kə Jan lo gangə sariya tə̂
1Piyɛr de kə Jan daw paje tar darə dəwje bbay a, njê-poloje Lubba kə njê-kɔnje dɔ dəwje kə̂ aw ngəmje ta-kəy-polo Lubba kə Sadusinyɛje teeje ingajede. 2Wungu ɔnde dɔ Piyɛr de kə Jan tə̂ le, mba daw tɔjuje nɛ̂n dəwje ddəm daw paje darəde ddəm nan Jeju oy a ndol arə dəwje kə̂ oyje a ndolje tɔ. 3Duwade dilade kəy-kula tə̂ ndərəng lo arɛ, mba to dɔ lo-kul ngaa. 4A marə dəwje tokə banya horo dəwje tə̂ kə̂ tuka mbide ooje nɛ̂n tar lə Lubba le ooje məde tə̂ arə kɔr njê-mə-kunnje asə nɛ̂n kə̂ doro min.
5Lo arɛ a, njê-kɔnje dɔ Jiipije kə tɔkəjenjê-gərəje-Ndu kə̂ eeje Jerujalɛm mbɔnje naan. 6Ann kə̂ to tɔkə nje-polo Lubba, Kayipi, Jan, Alɛkəjandərə kə dəwje kə̂ mə nuju tə̂ lə tɔkə njê-poloje Lubba tɔyn eeje tə̂ənn tɔ. 7Darəje n̂-ddee kə Piyɛr de kə Jan nɔnde tə̂ ngaâ n̂-dujujede tar nan: «Ddəw singa-mɔngu tə̂ lə nân wase kə ri nân bba aw ddaje nɛ̂n nɛ̂n nəənn wa?» 8Ndil-mə-nda ddusu Piyɛr ngaâ pa arəde nan: «Njê-kɔn-bbeje kə tɔkəje, 9aw dujuje ta gərə gəl maji kə̂ n-dda kə nje-gɔl-goto ddəm ta gərə ddəw kə̂ jajɛ̂ nɛ̂n ddəm le bbokənɛn. 10Sese tɔyn kə dəwje kə̂ Ijarayɛl, maji karə ə-gərəje to kə ri Jeju-Kristə kə̂ Najarɛtə kə̂ ə-tɔlɛ̂je kakə-dəsə tə̂ bba Lubba ndole le â dəw nəənn ar nɛ̂n nɔnse tə̂ kə rɔ kə̂ maji nəənn. 11Ne â makəturuje lə Lubba pa tar laa nan: ‹N̂-to ər kə̂ see njê-kɔsuje kəy ə-mbətəje le. Ər le təl ddee to singa gɔl kəy kə̂ dungu nangə̂#4:11 Sɔm 118:22.›
12«Ne kâra baa nasə kajije, mba marə ri dang dɔ nangə tə̂ kə̂ Lubba unda dɔ marə dəw tə̂ karə ajije goto. 13Njê-gangəje sariya lə Jiipije ooje Piyɛr de kə Jan kə̂ n̂-toje to dəwje kə̂ baa ddəm dəwje kə̂ gərəje makəturu ang ddəm kə̂ aw paje tar kə bbəəl ang le a, dɔde ayn. A n̂-gɔnje n̂-gərəje tɔ to n̂-toje to njê-buwa-njaje lə Jeju14Daaje dəw kə̂ gɔlɛ̂ ddee maji kə̂ ar mbɔrde tə̂ le a, n̂-gərəje tar kə̂ dâ kilaje tə̂ ang. 15Dunnje ndu karə Piyɛr de kə Jan n̂-teeje lo gangə sariya tə̂ lə Jiipije le kə ddang. N̂-maynje naan tar horode tə̂ ngaâ n̂-paje nan: 16«Ddi â ja dda kə dəwje nəənn wa? Mba dede njaa n̂-ddaje nɛ̂n-mɔri nəənn arə dəwje kə̂ Jerujalɛm tɔyn gərəje kə majɛ̂. Ddəw kə̂ ja mayn nɛ̂n tarɛ̂ goto. 17Maji karə n-ddaje jarə tarɛ̂ nja kə kete horo dəwje tə̂ ang ngaa. Ja kin kə de karə n̂-bbarje ri Jeju n̂-paje nɛ̂n tar darə marə dəw ang ngaa.» 18Njê-gangəje sariya le bbarje Piyɛr de kə Jan le ngaâ n̂-paje darəde karə n̂-paje tar wase n̂-tɔjuje nɛ̂n kə ri Jeju ang. 19A Piyɛr de kə Jan dilaje tə̂ nan: «Ddi â to gatə gatə kəm Lubba tə̂ wa? Koo tase wase koo ta Lubba wa? To tar ləse karə ujaje kəmɛ̂! 20Ddəw kə̂ jeje nəənn ja kutu nɛ̂n taje dɔ nɛ̂n tə̂ kə̂ joo kə kəmje ddəm kə mbije ddəm goto.» 21N̂-təlje dinje kə de bbay, a dinyajede mba dingaje marə tar kə̂ a kasə karəde ddəw karə duwaje nɛ̂n de ang. Mba dəwje tɔyn aw ɔsuje gaji Lubba mba nɛ̂n kə̂ to le. 22Dəw kə̂ n̂-dda nɛ̂n-mɔri darə rɔɛ̂ ddee maji le bbalɛ̂ uta bbal dɔsɔ.
Njê-mə-kunnje dujuje Lubba
23Go kinya tə̂ kə̂ dinyade le a, Piyɛr de kə Jan le daw dingaje njê-buwa-njaje ləde ngaâ dɔruje gəl nɛ̂nje kə̂ mbayje lə njê-poloje Lubbatɔkəje paje arəjede le. 24Njê-marədeje le ooje tar ləde le ngaâ dede tɔyn njaa dooje ta naan, n̂-dujuje Lubba n̂-paje nan: «Əbbəjeje, əi njaa ə-dda dara kə nangə kə ba kə nɛ̂nje tɔyn kə̂ toje tə̂. 25Əi kə̂ arə Ndil-mə-nda unda tar nəənn ta kajeje Dabbiti tə̂ kə̂ to nje-kula ləi nan:
‹Mba ddi bba lo asə dɔ gəl-dəwje kə̂ dang ang
ngaâ daw dunguje tar mə naan tə̂ baa wa?
26Njê-kɔn-bbeje tɔyn kə̂ nangə̂ nəənn gɔlje rɔde ta dda ddɔ
ngaâ tɔkə mbayje mbɔnje naan ta mbətə Əbbə-dəwje ddəm Kristə laa ddəm.›#4:26 Sɔm 2:1-2
27«Tɔkɔrɔ njaa, Erodə de kə Pɔnsə Pilatə n̂-mbɔnje naan mə bbe tə̂ nəənn kə dəwje kə̂ gəlde to dang ddəm dəwje kə̂ Ijarayɛl ddəm mba mbətə nɛ̂n Jeju kə̂ to nje-kula ləi kə̂ undɛ̂ dang to Kristə le. 28Baann â, n̂-ddaje darə nɛ̂n tɔyn kə̂ ə-gɔl kete ddəw singa-mɔngu tə̂ ləi kə ddəw mə-ndiki tə̂ ləi le ddee to nɛ̂n kə̂ tɔkɔrɔ. 29Bbasinɛn nəənn, Əbbəjeje, maji karə oo singa kə̂ daw dda kə je bbo arəje singa, jee bbərə-kulaje ləi, arə n-pa tar ləi kə bbəəl ang. 30Maji karə ə-tɔju singa-mɔngu ləi arə rɔ-toje goto rɔ dəwje tə̂, arə nɛ̂n-mɔrije kə nɛ̂nje kə̂ dum dɔ koo toje. Arə nɛ̂njeenn toje tokə baann kə ri Jeju kə̂ to nje-kula ləi kə̂ maji tɔyn.» 31N̂-dujuje Lubba n̂-tungaje a, nangə yəkə lo tə̂ kə̂ n̂-mbɔnje naan tə̂ le. Ndil-mə-nda ddusude ngaâ dunnje kutu pa tar lə Lubba kə bbəəl ang.
Njê-mə-kunnje kaynje naan nɛ̂n-kingaje ləde
32Njê-mə-kunnje kə̂ banya le, məde kə kəjə ləde to kâra baa. Dəw kâra horode tə̂ pa nan marə nɛ̂n to lə ne kə karə ne baa ang, mba nɛ̂n-kingaje ləde tɔyn to ləde horo naan tə̂. 33Njê-kaw-kulaje aw paje tar ndol lə Əbbə-dəwje Jeju kə̂ oy a ndol le arə ngəng nya ngaâ tɔkə mə-maji lə Lubba to dɔde tə̂ kâra kâra tɔyn. 34Marə nɛ̂n du dəw kâra horode tə̂ ang, mba dəwje kə̂ ndɔɔ ləde to wase kəy ləde to, n̂-labbəje ngaâ n̂-ddeeje kə narɛ̂ 35dunguje nɔn njê-kaw-kulaje tə̂. Ngaâ n̂-kaynje naan narɛ̂ darə nân nân kara inga asə kəm nɛ̂n kə̂ dəw kâra kâra ndiki ta kinga.
36Marə dəw kə̂ ria nan Jojɛpə kə̂ njê-kaw-kulaje aw bbarɛ̂je nan Barnabas ee tə̂ənn. Ria le kandɛ̂ nan: «Nje-kula dingaw mə dəwje tə̂». N̂-to dəw kə̂ gəl Lebi tə̂, duje Sipərə. 37N̂-labbə marə ndɔɔ laa ngaâ n̂-ddee kə narɛ̂ nungu nɔn njê-kaw-kulaje tə̂.

Jelenleg kiválasztva:

Kulaje 4: KabbaDkS

Kiemelés

Megosztás

Másolás

None

Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be